Yohana 17
17
Yesu a ɗa nənəngɨn hiwtə
1Ite Yesu a bwe ləməginə a mbəə, nda maddə nəngɨn a nidə pwa, a ɗa hiwtə:
“Baa, fəre kənə. Fukadə Nzanga, gə Nzanga a fukada. 2Hyenə və Nzanga gətə a nə ɓwaare kat, gə myee hye vən nda vərən myente kaaru-kaaru. 3Myentɨ kaaru-kaarutɨngɨn nə atɨ təna leera hyenə Həmɨnpwatɨ diyale hiɗə kal-kal, təna leyə atɨ hɨnə Yesu Ma Həmɨnpwa a Yaɓwarən, a hye lyanarən. 4Hɨn bɨldə fukatɨ dəw a vor vɨratə dɨ ha lyente hye vi na ɗatɨrə a mbəə kat. 5Baa, zə fukadi ɓəgəng a humwasa ka wule fukate na gə kaarə a hakəw ite myaa nda kwak vɨratə.”
Yesu a hiwo lagbe dan
6“Hɨn bɨlda bwang a hakarən tən myee hye vitɨrən dɨ vor vɨratə. Giɓə tənə hɨnggu, hyenə vitɨrən, tən koddə ləməgye dəw. 7Tən leyə ɓəgəng atɨ shee hye vi kat dɨ hakəw təna dɨma, 8gə ləməgye dəw 'ye hye vi kat hɨn boyərən, tən luutɨrən mgban. Tən leyə twa ka diyale atɨ dɨ hakəw na shi, tən mwadiyale atɨ hyenə lyanari. 9Hɨnə dɨ ɗa hiwtə gə le darən. Taa ɗa hiwtə gəkɨlə mbiɗitɨ mi vɨratə kat, na ɗa hiwtə gə myee hye vi, gə tənə hɨnggu. 10Myee na gə kaarən kat hɨnggu nə, hɨnggu mgban hɨngginə. Gə hɨn ɗɨm fukate shike dɨ hakarən. 11Taa diyə nza vor vɨratə ɓə, tən tənə a vor vɨratə, hɨn hɨnə dɨ mɨnə hakəw. Baatɨ ɗəmɗəme, kəpdərən ka gəte a vor kwakɨnga, a kwaka hye vi gə təna peyə a gə hiɗə ɓətɨ na gə hiɗə kəw. 12Ite hɨne a hakarən ganə a vɨratə, na jintɨrən a mbədərən a gətɨ kwaka hye vi, taa ama kipə vorsərən, pɨrgə ma mwasa ka kɨttɨ dan yeri ɓaa, gəkɨlə la mya doro vor Malɨmtɨ Ɗəmɗəmtə a naa.”#17.12 Naasə: Dyemshe 41.10.
13“Ɓəgəng hɨnə dɨ mɨnə hakəw, shezə na bwe ləməginə ite hɨnə a nda vɨratə gə təna gə ka gbaktɨ hanɨngtɨ de a vor hubosərən. 14Hɨn vərən ləməgye dəw, mi vɨratə kwotɨrən gəkɨlə aa tənə hɨnggərən, ɓətɨya aa hɨnə hɨnggərən. 15Taa ɗa hiwtə atɨ hye porgərən gə vor vɨratə, na nyisu gə hye mbədərən gə tɨfə ma hase. 16Tənaa hɨnggə vɨratə nə, ɓətɨya hɨn mgban aa hɨnggə vɨratə nə. 17Zə gəədərən ɗəmɗəm dɨ ha diyale gə ləməgye dəw nə diyale. 18Naya hye lyanari a vɨratə, sə mgban na pɨra lyentɨrən a vor vɨratə. 19Gə le darən na vədə na a hakəw gə təna gə ɗəmɗəm ka diyale.”
Yesu a hiwo gə le da myee mwakan
20“Baatə, taa ɗa hiwtə gə le darən ɓəmbə, hɨnə dɨ hiwi gə le da myee ɓaga mwake a gɨɗi dɨ ha ləməgye darən, 21gə tən kat təna peyə a gə hiɗə, gə ɓətɨya hye gə sɨshi, hɨn mgban na gə sɨsa. Hɨnə dɨ ɗa hiwtə mgban atɨ təna nza sɨsəm gə mi vɨratə a mwadiyale atɨ hyenə lyanari. 22Hɨn vərən fukate hye vi gə təna peyə a gə hiɗə ɓətɨya hɨm a gə hiɗə, 23hɨnə a sɨsərən, hyene a sɨshi. A təna peyə a gə hiɗə, gə mi vɨratə a leyə atɨ hyenə lyanari, hyene mwotɨrən ɓətɨ hye mwori.”
24“Baatə, hɨnə dɨ mwi atɨ myee hye vi a gə ke a haa na gə də, gə təna naa fukatɨ de, a wule fukate hye vi gə hye dɨ mwori, a ite myaa nda kwak vɨratə.”
25“Baatɨ feme, ka sate atɨ mi vɨratə aa leera, hɨnggi hɨn leera, lagbenə mgban kat leyə atɨ hyenə lyanari. 26Hɨn bɨlda a hakarən, hɨn ɓa pɨrə humwa a bɨlda, gə mwohaa hye bɨli a gə ɓwaa kaarən, hɨn mgban na gə sɨsərən.”
Zvasarudzwa nguva ino
Yohana 17: bcy
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.