Luka 23
23
Yesu a humwaa yə Hiridus ka Bilatus
(Matta 27.1-2,11-14; Markus 15.1-5; Yohana 18.28-38)
1Də a hangɨn peta ji-shalale darən kat, təna maɗə a kɨttən a zəkan a haka Bilatus nggwamnatɨ Yawudiya. 2Tən ɓe shikan a haka Bilatus, təna shea maɗə ta ɗəkən ləməgye som-som, tən ta sa atɨ, “Hina pan sɨne dɨ kɨɗa njiya, nda dɨ sa ɓwaare atɨ ɓe tənaa yə mbwa Kaisar, həmə kpanə Roma taa shemtə. Nda mɨna sa atɨ ndi ka nənəngɨn həmə, sɨnə Ma Həmɨnpwa a Yaɓwarən.”
3Bilatus a ɗiyə Yesu atɨ, “Hyenə həme da Yawude ma?”
Yesu a luwa a san atɨ, “Hye boyo ka nənanga.”
4Bilatus a maddə kormɨngɨn, a boyə kɨsehəmi kpan-kpanye ka təkə-təkətɨ myee shi kat atɨ, “Taa pa manə ka alə hasə, a la kən ɓashiti mya ɓashiyən.”
5Tən kat, təna maddə kormingrən a pwa ta sa atɨ, “Sɨnə dɨ ngama hubo ɓwaare, dɨ tukuta haa gə nda maddə nyatə ka wule kəndəshe dan, 'ye mbəgə hee kat a vor Yawudiya ka Galili, ɓəgəng ɓə tɨla ganə.”
6Ite Bilatus a kɨl ləməgingɨn 'ye mya boyə, nda ɗiyərən, “Mangɨn dɨ vor njiya Galili gən ma?” 7Ite Bilatus a kɨlə atɨ Yesu nə dɨ vor njiya Galili, a vor njiya da həmɨn Hiridus, nda lyenshe ka Yesu a hakan, itɨngɨn mgban Hiridus nee a vor Urshelima.
8Ite Hiridus a naa Yesu, haa a nɨngən kɨr-kɨr gəkɨlə ɓə ɓongə sɨne dɨ ɨli gə nda naa Yesu, gə ɓə kɨl lə zərgi səkushipa Yesu a ɗa. Gə-angɨn mgban sɨne dɨ hɨma atɨ təna peyə gə Yesu a ɗa i zərgi səkushipə a diisən. 9Hiridus ta naa Yesu nda ɗiyən ləməgye som-som. Shezə Yesu aa luwa a bwe alə. 10Kɨsehəmi kpan-kpanye ka ji-lee kəndə ɓashita Musa nee kangə hangɨn dɨ kər-jeronye a nəngɨn. 11Ndi Hiridus ka ji-pakawatɨ dan a dɨttən ta wakan. Təna shea kan wule rukute da həmye, təna mɨndən a haka Bilatus. 12A fərəngɨn yə Hiridus ka Bilatus a gəə ndewoyi ka sə, gə ɓə ɓongə byele aawa pedərən, təna nzagəsə ji-nyaati.
13Bilatus a waga kɨsehəmi kpan-kpanye ka mi kpanye darən kat ka ɓwaaree a hangɨn təna paya. 14Nda sarən, “Hwuna shike ka manə, pasa wule ma dɨ ɗa sɨkpakye, pedə ɓwaare ngama hubosərən gə nyatə a maɗə vor njiya. Hɨn warən ɗiyən le ndəltən kat a diingəwnə, taa pan ka alə hasə ɓətɨ wule a hwuna boyə nəngɨn. 15Hiridus mgban aa pan ka alə hasə. Gə-angɨn nda mɨnadən a hake, gə ndaa ɗa asə a ɓa ɗɨkə mya ɓɨltən. 16Gə-angɨn, na byengrən a ɗakan nda muɗə.”#23.16 Kada 17 nə a nə gə ɓə tamdə a kondoo dorshi. Kadangɨn a sa, “Təna kanggən a nda pararən ama gə kwalə Lawuttə.”
18Də tən kat təna maddə kormingrən a kwa-hiɗə, tən ta sa atɨ, “A mya muɗə ka ma a ɓɨlə! A mya parenə awa Barabas nda muɗə.” 19Ndi Barabas tɨngɨn mya ɗɨkdən a gbərəwe gəkɨlə nda pedə ɓwaare təna maddə nyatə a Urshelima. Nda mɨna ɓɨl ama ɓə.
20Bilatus a mɨna ɓərə ɗɨm a bwe le kaarən gəkɨlə təna mwa nda ɗaka Yesu nda muɗə. 21Ɓwaare kat a kwo le. Tən ta gəəshe atɨ, “A mya ɓɨdɨmdən a gbaltən! A mya ɓɨdɨmdən a gbaltən!”
22Bilatus a boyərən le a nyisərən a laka mwaakɨn, nda ɗiyərən, “Gəkɨlə mɨnə hwuna dɨ mwo atɨ mya ɓɨltən? Ndawula səhasə nda ɗa? Hɨn taa pan ka alə a ɓa ɗɨkə mya ɓɨltən. Gə-angɨn hɨn ɓa byengrən a ɗakan nda muɗə.”
23Ɓwaare a maddə kormingrən a pwa, tən ta sa atɨ, “A mya ɓɨdɨmdən.” Kwo le darən a gbaagə maasə Bilatus. 24Gə-angɨn nda ɗarən sa təna dɨ mwo, nda ɓashiyə Yesu ɓashitɨ we. 25Bilatus a pararən awa Barabas a mya gbən a gbərəwe gə nda maddə nyatə, ka mɨni ɓɨl we. Nda vərən Yesu gə təna ɓɨdɨmdən.
Mya ɓɨdɨmdə Yesu
(Matta 27.32-44; Markus 15.21-32; Yohana 19.17-27)
26Ite təna kɨr Yesu a dɨ ləkədən ɓa dɨ ɓɨdɨmdən, təna peyə ka ama mya dɨ wa atɨ Siman a dɨ Sireni, sɨne dɨ mɨnagə itɨ vɨrati. Ji-gyelmbutə a bɨlən mbamtə a ɗɨkdən nda nggur kada ɓɨdɨmta Yesu ta koɗən kan a beesən. 27Ɓwaare hananang a koɗə beetɨ Yesu, ka mandye a vor ɓwaarengɨn tən ta təwi ka hɨritə ta lyeb nzɨmsərən. 28Yesu a virwa, a sa mandingɨn atɨ, “Hwun mandi Urshelima, ɓe hwunaa təwo ta kehee gə le de ɓəmbə, hwuna təwo gə nəngəwnə ka jingəwnə. 29Fəre nee dɨ shi, a fərəngɨn hwun ɓa sa atɨ, ‘Sə pepeyə ka mandyee jenyi, a 'ye aa ga ɗɨm wape ka 'ye aa ga shawadə je!’ 30A fərəngɨn,
“ ‘Ɓwaare ɓa sa mogye atɨ,
“Fwakam a nəngenə!”
Tən ɓa sa hee mgbənye, “Kopomenə.” ’#23.30 Naasə: Hosaya 10.8.
31Anda wule shingɨn a dɨ ɗa yang ɓəgəng, a ite kada nee ɓak-ɓak, ka jibe a sɨsən, ɓə ya ɓa gə ndi kana kpama?”
32Mya kər i ji-ɗa sɨkpaki kpe a dɨ ləkədərən ɓa dɨmə kaarən dɨ vor Urshelima gə mya ɓələ a haa mye ɓa ɓɨl Yesu də. 33Ite təna tɨla a haa mgbənga mya dɨ wa atɨ Kpəəkəne, a hangɨn mya ɓɨdɨmdə Yesu a gbaltən a waka ji-ɗa sɨkpakingɨn. Hiɗə a tɨfə zɨməngən, hiɗə a tɨfə lyekɗe. 34Yesu a sa, “Baa, nggurərəngə səhase darən, gəkɨlə tənaa lee sa təna dɨ ɗa.” Ji-gyelmbutə mgban a pa-bara a nə sɨɓwetɨ dan.
35Ɓwaare kat a kangə ta nidən. Mi kpanye darən a shartən, təna fɨlə ka kyeɗəke, tən ta sa atɨ, “Nda mbədə imi, ɓa nda mbədə nəngɨn anda sɨnə Ma Həmɨnpwa a Yaɓwarən a ma Həmɨnpwa a nggɨltən.” 36Ji-gyelmbutə mgban a shartən, təna vən vwo gbaange, 37təna san atɨ, “Anda hyenə həme da Yawude, zə mbədə nanga.”
38Mya dorshe a ɗɨkə pwa a nəngɨn atɨ, “manə sɨnə həme da yawude.”
39Hiɗə dɨ vor ji-ɗa sɨkpakingɨn 'ye mya galinga darən a pwa gbyel ka Yesu a ɗaa Yesu atɨ, “A hye sa atɨ hyenə Ma Həmɨnpwa a Yaɓwarən yee? Ɓa hye mbədə nanga ka hin mgban.”
40Kpeyəsən a dɨkan a san, “Teewa gəə kala Həmɨnpwa ma? A hyenə ka wule ɓashitɨngɨn a kwaamɨ we ɓətɨ ndi. 41Hye leyə atɨ gə ɗa sɨkpakye dam mya ɓɨdɨmdəm. Hɨnggə ma, ndaa ɗa a səhasə.”
42Mangɨn ɓe boyo shee, nda sa Yesu atɨ, “Yesu ɗyanga ke, hye kana pɨrə həmne dəw.”
43Yesu a luwa a san, “Diyalə na dɨ səw, supo hye ɓa gəə ɓwaa ke gaarə a haa kaanda da Həmɨnpwa.”
We da Yesu
(Matta 27.45-56; Markus 15.33-41; Yohana 19.28-30)
44Itɨngɨn fəre nggɨra dɨ ɓɨri, kulitə a nzaa kɨsə a gbəə hangɨn kat baa mbwayi fəre mwaakɨn, 45fəre aa yə ɓɨrə. Səpate a vor Shafe a sɨrə a təkə kpe. 46Yesu a maddə kormɨngɨn a waha bərəng, “Baa, a vor tɨfanga na dɨ ɗaka myenshi.” Ndi ɓe boyo shee mbəə, nda fuwa pitɨ kpawtə dan.
47Gyana nyate kangə hangɨn ɓe na sa dɨ ɗa ɗatɨngɨn, nda ndukodə Həmɨnpwa a sa atɨ, “Diyalə, manə ma femə taa səhasə kan.” 48Myee paya sɨ kanyi dɨ naa sa ɗa kat ka diingrən, təna ɗaka hangɨn a muɗə hwoɗye, ta lyeb nzəmingrən ka yedi-kɨttə. 49Myee kat mgban leerən ndi Yesu, kat ka mandye kwaɗan dɨ Galili, təna kangə haa ɓongətə ta nidə shee dɨ ɗa.
Ɗɨk wo Yesu
(Matta 27.57-61; Markus 15.42-47; Yohana 19.38-42)
50Ama nə də kwakɨngɨn nə Yusufu dɨ vɨraa Aramatiya a njiya Yawudiya, sɨnə hiɗə dɨ vor peta mi kpan-kpani ji-shalale, ma femə pepe. 51Ndi ndaa mwaka wule shee ndeyingɨn a dɨ ɗa Yesu, ɓə ɓongə sine dɨ kula shita həmne da Həmɨnpwa. 52Nda wudə haka Bilatus a nyisən gə nda nggur wo Yesu a ɗɨkə. 53Nda jangadə sɨtɨngɨn gə kada ɓɨdɨmtə, a vutə ka foowo pepeye, a ɗɨkə vor taana mya ɗa a gonggoro faratə a myaa ndaga ɗɨkdə wo ama də. 54Fərəngɨn tufə bəti#23.54 Fərə jumma'a., kaade ɗa ɓwaare nee dɨ pedə shee gə haa kana kɨɗa fərə piyati.
55Tən mandye shi ka yə Yesu dɨ Galili a koɗə Yusufu gə təna naa haa mya ɗɨk Yesu də ka bəsən. 56Beetɨ angɨn, təna mɨnə hwoɗye gə təna dɨ ɗa maare ka shi ɨhɨng-ɨhɨngye mya bəsə we. Gɨraha da Musa a sa atɨ myaa dɨ ɗa lyentə a fərə piyatɨ da Yawude. Sə mgban təna koɗə kormi gɨrahangɨn a piya.
Zvasarudzwa nguva ino
Luka 23: bcy
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.