Lukas 10
10
Yesus nahaleway pit kabul ata kaɗokun
1Kolehei Mori Yesus ɓana pedena pit kabul ata kaɗokuni, ɓegge nahalewayi kako ɗuɗuɗa ata ullu wal tabara-Na ta tangngad kota mono ta hadau kako-Na nimla. 2Malinage tabaraɗa, “Buta ata ka au hatena tabara-Gu, tanyiɗuwe wale butaꞌma ata katalaraɗage Lii Dahha. Yiɗɗa tuʄawe wiha pare kararaɓe ta oma kalla, tabolo walena tutuꞌmayi ata kamangaat. Oro ɓatauɗage habayangna tabarai Mori kaɗauge nne oma, tannam kana halewawal ata kareih buta tut talarage Lii Dahha tabaraɗa ata aika kal rangehowe. 3Kakomge! Tanyiɗuwe apewela! Nauwag halewami ta hadau ta jonga ata japata, katauna bebbe ta til ranga baani. 4Ilam ngidkam kalek baku, mono kalek magowo lohho ilam ngidka kopaleꞌ hajelwai. Ilam ngahɗalkam ta til lara ɓam haneweɗangana ata. 5Nna ɓam tamam ta bat umma, tak ulwe: moul mono makoranai Mori kaɗaakage tabarami. 6Nyi ɓaɗaaka ata ka engana ta umma neɗo kahibaguge moul mono makoranai Mori pahaɗikkim, naɗaꞌwe tabarana. Tabolo nyi aina hibakawe nne haggawe tabaramu. 7Ɓaɗaaka ata kahibawu, enga hakitanala, neꞌ ta ummana. Hibaɗaɗuyi yaa-enu paha inyaɗagu tabaramu. Oroge ata ka ullana narakage ɓana hibawe upage. Ilam dikki-dikkam walta bat umma ta ɗiha bat umma. 8Nim ɓam maikam ta wu kota mono ɗahiba waigim ege ate, yaa ɗaɗudi agayi hayiiɗa tabaramu. 9Hataggahaila raɗa ata kalawara neɗo ta kota, mono takɗage tabaraɗa, ‘Ɗikɓenage rahgei Alla ɓana hareha ɗaꞌ Raja tabarami.’ 10Tanyiɗuwe mi ɓam maikami ta ɗiha wu kota mono ta haɗau neɗo aiɗa hibam, huuna ta lara monom takwela: 11‘Nne kabka kota kaɗakta ta leꞌma, makabahayi kawukawe tadka aina hibagimi Alla mono enga nahoukgimi. Tabolo kam tadawela ɗikɓenage rahgei Alla ɓana hareha ɗaꞌ Raja tabarami.’ 12Kam apewela, ta laɗo rah kaweɗage pan-tana, houk hayii tabaraɗa ata Sodom kahadda japata#10.12 Raɗa ata ta kota Sodom mono kota Gomora hada japatayi nyiwe Mori mana hamauhadi waina latti. Bahhawe ta Jurata Ɗaꞌ 19:1-23 mono Juratai Yudas 7. nareih lewaraɗahowe walta houk ha yii tabaraɗa ata neꞌ ta kota.”
Alla nahoukud raɗa ata ta kota aika hibai Yesus
(Mat. 11:20-24)
13“Lilokomige mi, Korazim! Lilokomige mi, Betsaida! Nauwag rayiɓedi kahekagaina ta jonga dalarami, tanyiɗuwe walem ʄarraꞌmam walta doku-jalami. Ɓag rayi ʄalahege kahekagaina ta kota Tirus mono ta kota Sidon, enga nyipoɗuyi raɗa ata bal ɓaɗa ʄarra walta doku-jalaɗa. Ma lohho namaropoi ateɗa mono ɗataudi karaꞌka ta pan katakɗa, tadanage ɓaɗa ʄarra walta doku-jalaɗa. 14Ta laɗo rah kaweɗage pan-tana, houk ata ta kota Tirus mono kota Sidon reih lewaraɗahoge walta houk pahibami. 15Mono mi ata Kapernaum, nna ta pahangaɗamu enga ha akagama ta sorga limɗage? Waleꞌma! Mi enga haburrgim ta lat aika baɗa!”
16Yesus nahanewe tabaraɗa ata kaɗoku-Ni, “Ata karangemi, ɗarange ʄalawa Nauwa. Ata aika hibami, wale ɗahiba ʄalaꞌma-Wa. Mono ata aika hiba-Wa wale hiba ʄalaꞌmai Alla kahalewa-Wa.”
Haggaɗa kapit kabulna kaɗokun
17Kapit kabulna kaɗokuni ɗahagga waina lagahara ate, mono liɗage tabara-Na, “Mori, lohho ɗummo raɗa wad japata ɗamanud tabarama ɓama hareha waige ngara-Mu!”
18Yesus balehanage, “Nauwag etai kabalka ɓana moun walta langta natuʄai kamillaka. 19Kamtadawela, tangkahami Nauwa yiiɓemige ɓiꞌta-hareha tannam kamhamauhad nippe, halatka mono tangkahadi kulhaɗa muhum, wale laꞌhingmana kahalilokom. 20Loko ɓatauɗaꞌge ilam madakka ateɗangage, oronage raɗa wad japata ɓaɗa kangaꞌka tabarami. Reih dahhaɗahoge mi ɓam lagahara, oroge ngaramu ɓana matulhaɓewe ta sorga.”
Yesus nalagahara
(Mat. 11:25-27, 13:16-17)
21Neɗa memaʄala, Yesus nalagahara oroge ɓana banun Wad Ɓiha-madnai Alla. Yesus nahanewe, “Ama, Mori kawahage langta mono pan-tana! Nauwa wailugug tabara-Mu oroge ngaradukage Yau ɓam kaɓunyge walta ata tada mono ata maniwola pahangaɗa, tanyiɗuwe Yau hatingoge tabaraɗa tangkahaɗa ata kaliɓawa ate kabaige ɓa hanuwad. Ama, nyiɗahowe kayanana ta ate-Mu.”
22Maɓeggei Yesus nagilaka tabara ana hakodo halole-Na mono linage, “Ama-Gu nayii kahhaɓegadi kawaha mono maniwola pahangaɗa tabara-Gu. Wale laꞌhingmana wu ak ata katadayi Ana helenai Ama, tauɗa ʄalage walaꞌma katadayi Ama helenai Ana, mono ata hapedenai Ana mana hatingonani Ama tabarana.”
23Maɓeggei Yesus napoterana ɓana arodi ana hakoɗo halole-Na, mana haneweɗahe tabaraɗa, “Maringkana mi oroge ɓam etawe tangngage harayi-Gu. 24Kam apewe, butai lede liinai Alla mono raja, kamaꞌge etawe agawe ha etam, tabolo wale ɗa etaꞌmawe. Mono ɗakamaꞌge rangewe agawe harangem, tabolo walena ɗaꞌmawe rangewe.”
Lii-hatuʄa wu ata Samaria kadahha ate
25Murge ɗaan wu gurr agama ata Yahudi kamayegan jiwatanai Yesus. Nyi manakanukkayi, “Ama Guru, agaɗahoi harayig tannam kag kolege na mourha aika man dukkana?”
26Nabalehawei Yesus, “Agawe kamatulha nna lar ta Juratanai Musa?#10.26 Lar ta Juratanai Musa nyiwe uk-pareha hayiinai Alla tabaraɗa ata Israel ledeni lede-liinai Alla kangaranai Musa, lar ta lima jurata kawungana Lii-Kira Kamema (Kejadian, Keluaran, Imamat, Bilangan mono Ulangan). Agalinaɗawe hayappam tutge nna kamatulha?”
27Naɗa ata nabalehawe, “ ‘Manawarakin Mori Allam wal kalaak atem, waige ngaradukage ura-dewam, waige tangngage kulham, waige tangngage pahangaɗam,’ mono ‘Manawaran ole atam katauna ɓam manawarage tut taum.’ ”
28Malinagei Yesus, “Nabalehamu natenawe, ɓam rayi tauɗaꞌge enga kolemuge mourha aikaman dukana.”
29Tabolo naɗa gurr agama ata Yahudi enga ɗau ɗahingge mane wikna ɓana tena. Mana hil matutra piwal, “Iyaɗahoi naɗa ole atag?”
30Mana balehawei Yesus wain naɗe lii-hatuʄa, “Ɗaan naɗa wu kaɓaan kawalta kota Yerusalem kakako ta kota Yeriko. Maɗik ta til lara amid kareɓoyi. Maɗa kareɓonad ngaradukad ɗauna, ɗapaluyi nakamhamate, maɓegge tannaɗan ta til lara ɓana kaɓogela. 31Ma amin wu imam#10.31 Imam nyiꞌna ata kaledege Alla mono kaɗaꞌ ata. Kapirrana ha ullaɗahona imam katauna yii maaraka waina ranga hatuun mono hatomage habayangna tut ata waɗeka. kaliʄalani naɗa lara. Kole ɓana etai naɗa ata nawigrana mono kako hakitanage. 32Tauɗa ʄalanage amlin wu ata Lewi#10.32 Lewi: nne nyiwe ngara wu kaɓihu Israel. Raɗa ata walta kaɓihu nne ɗatagna baleha tullud imam tut rayige kangotena ta Ummanai Mori ta Yerusalem. kaliɗan naɗa lara. Na etai naɗa ata naɗikkini mono hamatarani, tanyiɗuwe kako hakita ʄalanage. 33Maɓegge amlin wu ata Samaria#10.33 Ata Yahudi mono ata Samaria ɗahamuh wikna. katangra kako lin naɗa lara. Kole ɓana etai naɗa ata, namaraɓehawe atena mono namanawarani. 34Naɗikkin naɗa ata mana hamurrahanad tangngad kapotana waige anggur mono nataunadi welengha, maɓegge nakaboronad kapotana. Lohho nahapannen ta keledai ɗauna, mono nangidiyi ta umma hadau tudu mono nataun morro. 35Ɗammahegetana, manayiinad ɗuɗa amaha dinar#10.35 Mata amaha dinar hanaliwe, wu amaha ɓahi harayi walta ɓah kaka. Nuthona kahewana wu ata karayi ulla ta oma ɗiha laɗo wu amaha dinar. tabara naɗa mor umma mono linan, ‘Kam ourhakigani, lohho aina tut kahoyi raɗe amaha nimlage tabawalkayi ɓag haggawa.’ ”
36Malinagei Yesus, “Naɓatauge wal raɗa katauɗana ata, ɗoukge hangaɗam giɗahoni ka ole atan naɗa ata hareɓo?”
37Naɗa gurr agama ata Yahudi nabalehawe, “Naɗa ata kamaraɓeha atena mono katullun.”
Malinagei Yesus, “Kakow mono kamrayi tauɗage!”
Yesus naloɗikkidi Marta monoi Maria
38Yesus namarangadi ana hakodo halole-Na maɗa kako hakitana, maɗaɗikki ta ɗiha bat harona. Neɗo ɗaan wu lawai kangaranai Marta, nahibayi yiɗɗa ta ummana. 39Marta ɗaan angwinnena kangaranai Maria. Maria ngoɗonage tabara leꞌnai Yesus rangenage hanuwa-Na. 40Tanyiɗuwei Marta karingaka ha inyakadi ha yaa-en ɗa. Mana kako tabaranai Yesus malinage, “Mori, walem millahingmaga ate? Maria ɓana tanna mehaga ɓag ullana. Halewai kana tulga.”
41Balehanagei Yesus, “Marta, Marta! Yau gelagagamuge mono hamayilla wikmuge tut tangngage! 42Wu ɗahewe kareih ɓanning, nyiꞌwe hapedenai Maria aiha pik ngala hagga wal tabarana.”
Zvasarudzwa nguva ino
Lukas 10: lmy
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024 (Active), Wycliffe Bible Translators, Inc. All rights reserved.