Luke 3
3
1ရောမဧကရာဇ်တိဗေရိ နန်းအဆာတ် ရှစ်နူဘန်းဟာပလီးငှါမှါခ့်ခါ ပုန္တိပိလတ်ကား ယုဒပြေဘင်းရှာန်းပလာန်ထှာဘန်း၊ ဟေရုဒ်အန္တိပကား ဂါလိလဲဘင်း ရှာန်းပလာန်ထှာကြီးမှာ။ ဟေရုဒ်အန္တိပဘင်းနရှီ ဖိလိပ္ပုကား ဣတုရဲယောက် တရာခေါနိတ် ပြေတေဘင်းအရှာန်ထှာဘန်း လုသာနိကား အဘိလင်ပြေဘင်း ရှာန်းပလာန်ထှာမှာ။ 2အန်၌မှါခ့်ခါ အန္နယောက် ကာယဖတာတ်ကား ပုရောဟိတ်တုံန်းတေထှာနင်းကြီးမှါခ့်ခါ ဘုရားရှာန်ဘင်း နှုတ်ကပါတ်တော်ကား သမီဆာထုတ်လားစစ်ပင်း အရပ်ပေငှါဘင်း ဇာခရိဘင်းဆာ ယောဟန်ပါ ထုတ်အီမှာ။ 3ယောဟန်ကား ဂျော်ဒန်မြစ်ကမ်းတစ်လျှောက်တေဘေ လာန်ဘန်း သမီဆာတာတ်တေ အန်တာတ်ပင်း အမဲဘင်းအပြစ်တေဒေ နောင်တတေလူကြီးဘန်းနာ ဝဲငွတ်ပင်းမာန်းဂလာတေ အွန်ကြီးကွန်းအတွာတ် လိုက်လံသဘန်းငှေါနင်းမှာ။ 4ပရောဖက်ဟေရှာယ ကျမ်းကျိန်းဘေ ရေးဒီဘင်းအတိုင်း "သမီဆာထုတ်လားစစ်ပင်းအရပ်ပေ သမီဆာဟော်ဝါ ဟာတ်ပန်းနင်းဘင်းကား အရှာန်ဘင်းလမ်းတေ ရာန်းစိန်း။ 5လမ်းဟွတ်ပန်းနင်းဘင်းနာတေဒေ ကာစါမ်းဘန်း ကယာတုံန်း ကယာရှာတေဒေ ညှိသကြီး။ လမ်းကြိပ်ပင်းနာတေဒေ ရာန်းစိမ်းယုတ်ပန်း၊ အမဲဘင်းလမ်းတေဒေ မဲကွန်းအွန်ဘန်းပဲကြီး။ 6အန်၌မှါခ့်ခါ ဘုရားရှာန်ဟက် ကယ်တာန်သဘင်းတေ သမီဆာတာတ် ကတုံန်ကြီးကူ" ညယ်ထှာမှာ။ 7စီးမှါခ့်ခါ ယောဟန်ကား ဟိန်ဘေ ဝဲငွတ်ပင်းမာန်းဂလာအွန်ဒင် ထုတ်ကြီးရီဘင်း သမီဆာကလောင်းတုံန်းတာတ်တေ "ကဖူးကန်းတာတ်၊ ထုတ်အီကူဘင်း ဘုရားရှာန်အပြစ်အီလားဟက် လွောပ်သကွန်းအတွာတ် ဟနိမ်တေဟာဟမဲဆတီးအီရီတေ။ 8အမှာတွာတ် ဟနိမ်ဘင်း အမဲဘင်းအကျာန်းတေဒေ တက်ပါမ်ငှေါဘင်းနာဒေ သက်သေကာကြီး။ ဟနိမ်ကောက် ဟနိမ်ကာ အာဗြဟံဘင်းမျိုးဆက်တေထှာမှာညယ် အငှေါနင်းကြီးဆာ။ ဘုရားရှာန်ကား အဘင်းလုံးကရှီတေဒေ အာဗြဟံဘင်း မျိုးဆက်ထှာကွန်း အွန်ရန်နာ။ 9အရာတ် ကလွုန်တေဒေ တကနုပ်ဟဲ့ ဟစ်ပေါ်ကူညယ် ရထူးဟော်ဝါကား အဆာန်တာန့်ထှာနင်းပန်း။ အမှာတွာတ် ရှရှီမလဲအရှီဟာဘင်း ကလွုန်တေဒေ ဟစ်ပေါ်ဘန်း ဝါမ်စူလားခံသထှာကူ" ညယ်ငှေါမှာ။ 10စီးမှါခ့်ခါ သမီဆာတာတ်ကား ယောဟန်တေ "အန်နိမ်ငှေါဘန်းကား အလေကား ဟာနိမ်အွန်ကြီးထှာကူတေ" ညယ်စိန်ယူကြီးမှာ။ 11ယောဟန်ကား "ဟနိမ်နောင်းဟက် ဆာန်ဆုံကလိန်းတူးငှါဘင်းဆိတ်ကား အဘိုဘင်းဆိတ်တေ တူဝါကားအီသင့်သမှာ။ ဟနိမ်ဘေ ယုတ်တင်အူဒင်ငှါဘန်းကား အဘိုဘင်းဆိတ်တာတ်နင်း မံအီထှာကူ" ညယ်ပြန်သဘန်းငှေါမှာ။ 12အခွန်ကွန်းဆိတ် စယ်ယာတာတ်ရီဒါး ယောဟန်ပါ ဝဲငွတ်ပင်းမာန်းဂလာအွန်ကူညယ်ဒီကြီးဘန်း အန်တာတ်ကား "အိုးဆကြီး၊ အလေရီးဒါး ဟာနိမ်အွန်သင့်သောတေ" ညယ်စိန်ယူကြီးမှာ။ 13ယောဟန်ကား "ဟနိမ်အခွန်ကွန်ထှာကူဘင်း သမီဆာတာတ်ဟက် ကွန်ထှာကူဘင်းထာတ်ပိုသော အကွန်ဆာ" ညယ်ငှေါမှာ။ 14စစ်ဆားစယ်ယာတာတ်ရီးဒါး ယောဟန်တေ "အလေရီဒါး ဟာနိမ်အွန်ထှာကူတေ" စိန်ယူမှါခ့်ခါ ယောဟန်ကား "ဟနိမ်ကား သမီဆာတာတ်ဟက်ဖူးတေ အတာန်းအစိန်ကြီးဆာ။ ဟာဟမဲတေစဲ အချီညယ်အငှေါကြီးဆာ။ ဟနိမ်လူဘင်းနာဖူးဆယောက် လာဘန်းနင်းကြီး" ညယ်ပြန်သဘန်း ငှေါကာမှာ။ 15သမီဆာတာတ်ကား အမှါတ်ကျီ ကယ်တာန်ရှာန်မေရှိယ ကြွဒီကူဘင်းနာတေ မျှော်သဘန်းစောင့်သနင်းကြီးဘင်းအတွာတ် သမီဆတာတ်ကား ကယ်တာန်ရှာန် မေရှိယကားm ယောဟန်ထှာကူးသမှာ" ညယ်တွေးသနင်းကြီးမှာ။ 16အမှာတွာတ် ယောဟန်ကား အန်တာတ်တေ "ငါကား သမီဆတာတ်တေဝဲယောက်၌ဆာ ဝဲငွတ်ပင်းမန်းဂလာဒေ အွန်အီလား။ အန်နိမ်စါန်းငှေါဒီ ငါထာတ်မြင့်မြတ်သဘင်း ဆိတ်ဟော်ဝါဒီနင်းဘန်း။ အန်နိမ်စါန်းငှေါဒီ ငါကား ဟိန်ဟက်တဉ်းဆိုင်းတေ ဟပ်အီဒင်စဲ အထိုက်တန်သဝါး။ ဟိန်ကား သမီဆတာတ်တေ ဉာဏ်အလင်းတော်ယောက်၊ ဝါမ်ယောက် နှစ်ခြင်းမာန်းဂလာတေအီကူ။ 17ဟိန်သဟူးနောင်းဘေငှါဘင်း အန်နန်ဘင်းကောက်ဆွယောက် အန်တူယောက် လာတ်ခေါက်တေမယ်ကူ။ သတူဒေ ဗုတ်ခူးနောင်းဘေစါန်းဘန်း လာတ်ခေါက်တေဒေကား ဟာ၌မှါခ့်ခါဆဲ အရှီးဘင်းဝါမ်ဘေ ဆွတ်နာန်ကူ" ညယ်ငှေါမှာ။ 18ယောဟန်ကား အန်နိမ်နည်းလမ်းတေယောက် သမီဆာတာတ်တေ နောင်တတေလူဘန်း ဘုရားပါလှည့်သစိန်းဒင် ဟောသကာအီမှာ။ 19ယောဟန်ကား ရှာန်းပလာန်ဟေရုဒ်တေ ဟိန်နရှီဘင်းအိတ် ဟေရောဒိတေ လာရီဘင်းယောက် တခြားအမဲဘင်းတေအတွာတ် အပြစ်တာန်သမှာ။ 20အမှာတွာတ် ဟေရုဒ်ရှာန်းပလာန်ကား ဟိန်ဘင်း စစ်ဆားတာတ်တေ ယောဟန်တေ ရင်ဘန်း ထောင်အကျဉ်းချတာန်ဘင်းအတွာတ် အကြီးကျယ်အမဲဘင်း အပြစ်တေ ထပ်သဘန်း ကျူးလွန်သမှာ။ 21ယောဟန် ထောင်အအက်ကျီမှါခ့်ခါ သမီဆာကလောင်းတုံန်းနင်း ဝဲငွတ်ပင်းမာန်းဂလာတေအွန်အီရီဘန်း ကိုယ်တော်ယေရှုတေရီးဒါး ဝဲငွတ်ပင်းမာန်းဂလာအွန်ဘန်း ဆုစိန်နင်းမှါခ့်ခါ ဟမုခ်တုံန်းကားပွါမ်းသဘန်း 22ဉာဏ်အလင်းတော်ကား အဟူးတူအသွာန် ကိုယ်တော်စေါက်ပေ ပီးဆာတ်နီမှာ။ ဟမုခ်စောက်ခက် ဆကလားရီးဒါး "နာန်ကား ငါအကြီးကျယ်မစ်ထှာဘင်း ငါဆာထှာမှာ၊ ငါကား နာန်တေအကြီးကျယ်အားရသမှာ" ညယ် ဆကလားပူရီမှာ။ 23ကိုယ်တော်ယေရှုကား အမှုတော်တေ စသဘန်းအွန်မှါခ့်ခါ အဆာတ် ဆန်းနူထုတ်ပန်း။ ဟိန်ကား ယောသပ်ဆာထှာဘန်း ယောသပ်ကား ဧလိဆာထှာမှာ။ 24မာဿတ်ကား လေဝိဘင်းဆာ၊ လေဝိကား မေလခိဘင်းဆာ၊ မေလခိကား ယန္နဘင်းဆာ၊ ယန္နကား ယောသပ်ဘင်းဆာ 25ယောသပ်ကား မတ္တသိဘင်းဆာ၊ မတ္တိသိကား အာမုတ်ဘင်းဆာ၊ အာမုတ်ကား နာဟုံဘင်းဆာ၊ နာဟုံကား ဧသလိဘင်းဆာ၊ ဧသလိကား နဂ္ဂဲဘင်းဆာ 26နာဂ္ဂဲကား မာအတ်ဘင်းဆာ၊ မာအတ်ကား မတ္တသိဘင်းဆာ၊ မတ္တသိကား ရှေမိဘင်းဆာ၊ ရှေမိကား ယောသပ်ဘင်းဆာ၊ ယောသပ်ကား ယုဒဘင်းဆာ 27ယုဒကား ယောဟန္နဘင်းဆာ၊ ယောဟန္နကား ရေသဘင်းဆာ၊ ရေသကား ဇေရုဗဗေလဘင်းဆာ၊ ဇေရုဗဗေလကား ရှာလသေလဘင်းဆာ၊ ရှာလသေလကား နေရိဘင်းဆာ၊ 28နေရိကား မေလခိဘင်းဆာ၊ မေလခိကား အဒ္ဒိဘင်းဆာ၊ အဒ္ဒိကား ကောသံဘင်းဆာ၊ ကောသံကား ဧလမောဒံဘင်းဆာ၊ ဧလမောဒံကား ဧရဘင်းဆာ၊ 29ဧရကား ယောရှုဘင်းဆာ၊ ယောရှုကား ဧလျေဇာဘင်းဆာ၊ ဧလျေဇာကား ယောရိမ်ဘင်းဆာ၊ ယောရိမ်ကား မဿတ်ဘင်းဆာ၊ မဿတ်ကား လေဝိဘင်းဆာ၊ 30လေဝိကား ရှိမောင်ဘင်းဆာ၊ ရှိမောင်ကား ယုဒဘင်းဆာ၊ ယုဒကား ယောသပ်ဘင်းဆာ၊ ယောသပ်ကား ယောနန်ဘင်းဆာ၊ ယောနန်ကား ဧလျာကိမ်ဘင်းဆာ၊ 31ဧလျာကိမ်ကား မေလေဘင်းဆာ၊ မေလေကား မဲနန်ဘင်းဆာ၊ မဲနန်ကား မတ္တသဘင်းဆာ၊ မတ္တသကား နာသန်ဘင်းဆာ၊ နာသန်ကား ဒါဝိဒ်ဘင်းဆာ၊ 32ဒါဝိဒ်ကား ယေရှဲဘင်းဆာ၊ ယေရှဲကား ဩဗက်ဘင်းဆာ၊ ဩဗက်ကား ဗောဇဘင်းဆာ၊ ဗောဇကား စာလမုန်ဘင်းဆာ၊ စာလမုန်ကား နာရှုန်ဘင်းဆာ 33နာရှုန်ကား အမိနဒပ်ဘင်းဆာ၊ အမိနဒပ်ကား အဒ်မိန်ဘင်းဆာ၊ အဒ်မိန်ကား အာရံနိဘင်းဆာ၊ အာရံနိကား ဟေဇရုံဘင်းဆာ၊ ဟေဇရုံကား ဖာရက်ဘင်းဆာ၊ ဖာရက်ကား ယုဒဘင်းဆာ၊ 34ယုဒကား ယာကုပ်ဘင်းဆာ၊ ယာကုပ်ကား ဣဇက်ဘင်းဆာ၊ ဣဇက်ကား အာဗြဟံဘင်းဆာ၊ အာဗြဟံကား တေရဘင်းဆာ၊ တေရကား နာခေါ်ဘင်းဆာ၊ 35နာခေါ်ကား စေရောက်ဘင်းဆာ၊ စေရောက်ကား ရာဂေါဘင်းဆာ၊ ရာဂေါကား ဖာလက်ဘင်းဆာ၊ ဖာလက်ကား ဟေဗာဘင်းဆာ၊ ဟေဗာကား ရှာလဘင်းဆာ၊ 36ရှာလကား ကာဣနန်ဘင်းဆာ၊ ကာဣနန်ကား အာဖာဇစ်ဘင်းဆာ၊ အာဖာဇစ်ကား ရှေမဘင်းဆာ၊ ရှေမကား နောဧဘင်းဆာ၊ နောဧကား လာမက်ဘင်းဆာ၊ 37လာမက်ကား မသုရှလဘင်းဆာ၊ မသုရှလကား ဧနောက်ဘင်းဆာ၊ ဧနောက်ကား ယာရက်ဘင်းဆာ၊ ယာရက်ကား မဟာလေလဘင်းဆာ၊ မဟာလေလကား ကာဣနန်ဘင်းဆာ၊ 38ကာဣနန်ကား ဧနုတ်ဘင်းဆာ၊ ဧနုတ်ကား ရှေသဘင်းဆာ၊ ရှေသကား အာဒံဘင်းဆာ၊ အာဒံကား ဘုရားရှာန်ဘင်းဆာထှာမှာ။
Zvasarudzwa nguva ino
Luke 3: ktpv-rv
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.