Lk 11
11
Ayëgëlë asu mam më ngogëlan
Mt 6,9-15. 7,7-11
1Ndò hm lazu bò na, mbol angabë hom ziṅ, akogëlan, eyòṅ angamana kogëlan, ndò mbòg ya bëyègè boe adzo ai nyè na: A Nti, yëgëlë bia mbol bakogëlan, akyaè ya Yohannes angayëgëlë bëyègè boe. 2Nyè ai bò na: Eyòṅ miakogëlan, midzoo na:
A tara, dzoe doe afubugan. Edzoe dzoe ezaag.
3Vaa bia e bidi biayaṅan ai biè amos osë.
4Dzu bia minsëm mian, amu bia fë biadzu e mod osë abèan bia.
Të walëdë bia a mëbobëla.
5Nyè ai bò na: Za ya abë mina abëlë mvoe, akëlë abë nyè ai zaṅa lu, nyè ai nyè na: a moe, kolëge ma bëmbaṅëla bëlè, 6amu mvoe dzama endëmë ma sòṅ a dulu#11,6Bod bëdiṅi wulu ai alu, asu yë na të vian wabi bò., ndò mabëlë ki e dzom mabëlan ai nyè ete. 7E nyò mbòg ayalan a nda ete, nyè na: Dzoge ma, të waandëgëlë ma. Mbè ofèdban ya, ndò fë bòn bama ai mamen, bimana ya bombo a si. Masëki dzam kodo a si na mazu wa vë dzom ziṅ. 8Makad mina na: tò abò të kodo a si na avë nyè mbol anë mvoe dzie, ayi fò kodo a si, avëë nyè e dzom ayaṅan ai dzò asu mban nsilan woe. 9Ndò makad mina: Siligan, bayi mina vë. Dzëṅan, miayi sòm; kudan, bayi mina yaè. 10Amu e mod osë asili, abi. E nyò adzëṅ, asòm. Bayaè e nyò akud. 11Esya mbe ya abë mina mòn ayi nyè sili kòs, angavë nyè nyò a mëyian më kòs? 12Ngë ki na asili nyè aki kub, angavë nyè kara olërë? 13Ndò hm, ngë e mina ya minë bëbe, miayëm vë bòn ban mimbëmbë bifaè, biyòṅ biam e tara ya yob ayi vë e ba basili nyè Mfufub Nsisim?
Yesus ban Belzebul
Mt 12,22-30; Mk 3,20-27
14Yesus angabë atsidëgan mbë nsisim otoa mvug. Eyòṅ mbë nsisim nyò angakui, mvumvug ongakòbò, minkunda mingakam. 15Bëvòg bëziṅ ya ete bò na: Atsidan bëbe minsisim a dzoe Belzebul, nkukuma minsisim. 16Bëvòg bëngadzè nyè, bësiligi nyè na abò ndëm esòò a yob. 17Mbol angabë ayëmë mintsogan miaban, nyè ai bò na: Edzoe esë yayidan ai eben yayi mana; e nda esë yaluman ai eben yayi ku. 18Ngë Satan aluman ai emen, eyë edzoe dzie yayi tòbò ya? Së mina miadzo na matsidan bëbe minsisim a dzoe Belzebul a! 19Ndò hm, ngë matsidan bëbe minsisim a dzoe Belzebul, a dzoe za bòn ban batsidan bò? Asu te, mbò bayi mina tsig ntol. 20Ngë matsidan minsisim ai onyu Zamba, yëman hm na edzoe Zamba esò ya abë mina. 21Eyòṅ ngungul mod waanòni nda dzie ai bikpè bisë, akuma die anë a mvoè. 22Ṅnyie fë anë e mod alod nyè a ngul azu, atëgë nyè, avaè nyè bikpè bie ya ahë fidi, amana haman byem bie. 23E nyò asëki ai ma, anë ma e ngam ya ayat; ndò fë e nyò akoan ki ai ma atsam. 24Eyòṅ mbë nsisim akui mod a nyòl, akë a nkod-nnam; akëë adzëṅ e hom awaè, të yen. Nyè na: Mayi dugan a e nda dzama masò ete. 25Abog te azu dzò kòb, bëmana ya voe, etoa ntaan ntaan. 26Abog te hm ayi kë nòṅ minsisim mifë milè, mitoa dzam abe milodo nyè, anyian, atòbò ete. Mëmana më mod te mayi bò mësis alodo e ma më osu.
Mfaṅ mvòm; Bod basili ndëm
Mt 12,38-42; Mk 8,12
27Ndò labò na, abog akòbògò e mam ma, ndò mininga ziṅan gavë kiṅa bod ete ha, nyè ai nyè na: Mvòm ai abum angabëgë wa, ai e mëbè onganyaṅ. 28Nyè na: Mvòm abui ai e ba bawog ebug Zamba, bëbaala dzò#11,28Maria adaṅ mvòm abui mbol abaala ebug Zamba.. 29Mbol bod bëngabë hë azu abui, ndò akèè na akòbò na: E mvòṅ bod nyi enë mbë mvòṅ. Yadzëṅ ndëm, ndò bayi ki bò vë ndëm hë e nyi Yonas. 30Amu e kan Yonas angabë ndëm asu bod ya Ninive, nala ngò fë mòn mod ayi bò asu e mvòṅ nyi. 31Nkukuma mininga ya minkyè#11,31 Yënë Mt 12,42 afëb 38 wayi tëbë a nkat ai bod ya e mvòṅ nyi, akpèè bò a nkat, amu angasò a abug si-ndon na azu wog fëg Salomon; Yënë sik, e mod alod Salomon anë ha! 32Bod ya Ninive bayi tëbë a si a nkat ai e mvòṅ nyi, bëkpèè dzò a nkat; Amu bëngavëṅan ai ebug Yonas; Yënë, e mod alod Yonas anë ha.
Mfyè asu nyòl
Mt 5,15. 6,22-23
33Mod akokoe alamba, atele dò a asoe, ngë ki na a emvaṅ a si. Batele dò a etelëge-alamba a yob, asu yë na e bod banyian, bëyen mfyè. 34Alamba nyòl anë dis doe. Ngë dis layen wa mbëṅ, nyòl dzoe esë enë a mfyè. Ngë anë hm fë abe, nyòl dzoe enë a dibi. 35Bò hm okala na të mfyè ya onë abë wa ovëṅan dibi. 36Ngë nyòl dzoe esë enë a mfyè, tègè ai man dibi, yayi bò a mfyè hë anë mfyè alamba wafyè wa.
Yesus akòṅan ai bëfarisea ai bëloya
Mt 23,1-36; Mk 12,38-40; Lk 20,45-47
37Abog akòbògò ha, ndò man farisea abanda nyè na akë di abë nyè. Ndò anyian, ayëmë etoa. 38Ayënë man farisea angayen nala, angakam na andzëki soban osusua etsam-akag. 39Nti nyè ai nyè na: Mina bëfarisea, miasob kòb ai elè a nsëṅ mbëṅ, mimana dzie ai ndòg ai abe a nnëm ete. 40A mëkud më bod, nga e mod angakom nyòl, ṅnyè fë angakom a nnëm ete? 41Vaan hm almosen e kan enë mina a nnëm ete, abog te dzom esë yayi bò mfuban. 42Dzam da, amala ai mina, bëfarisea amu miayaan efas awomo ya mvoṅëlo, ai atëgëlë ai bitutuga bisë, mina të yaan ngòl ai ediṅ Zamba. Mingabë yëan bò e ma, të voan e ma mëvòg. 43Amala ai mina, a bëfarisea, amu miadiṅ etoa osu a mënda bikoan, ai mësugan a minsëṅ mi angara. 44Amala ai mina, amu minë anë zëzë mëbom më sòṅ, a bod bawulu a yob të yëm.
45Ndò ṅyëgëlë mvende mbòg adzo ai nyè na: A ṅyëgëlë, kë watè bia eyòṅ wakòbò nala a! 46Nyè na: Mfa waan fë, mina bëyëgëlë bë mvende, amala ai mina, amu miakag bod adid mimbëgë, mina bëben të namba mimbëgë ai tò onyu mbòg. 47Amala ai mina, amu miamana kom mësòṅ bëprofèt; besoa mbò bëngawoe bò. 48Miatoan lëdë ete na miayëbë mimboan besoa, amu mbò bëngawoe bò, mina ki mikomo mësòṅ. 49Asu te fëg Zamba engadzo na: Mayi bò lom bëprofèt ai bë apostel, bayi woe, bëtibili fë bëvòg ya ete, 50asu yë na bësili e mvòṅ bod nyi adzo mëki bëprofèt bësë ya mëngasoeban a si, atarigi a mëtari më si, 51atarigi ai mëki më Abel akui a mëki më Zakarias ya angawu a zaṅa latar ai nda-Zamba. Owe, makad mina na, bayi sili e mvòṅ bod nyi ndòṅ te. 52Amala ai mina, mina bëyëgëlë bë mvende, amu miavaè bidiiga bi oyëmë#11,52Bëfarisea bavëg na bayëm Mfufub Ntilan, ndë bayëm ki. Mbol bayëm ki, ndò bakaman ai e bod bëvòg na bëzu abë Kristus, amu ngë mod watoan wog Mfufub Ntilan, wayi kë kui abë Kristus.. Mina bëben të nyian, e bod ki bëyii na banyian, mikaman ai bò. 53Ndò angakodo hala, bësaṅa bëkalara ai bëfarisea bëtari hm na basiṅ nyè eyëgan, bëngandëgëlë nyè ai abui minsili, 54bëlama na bënòṅ nyè ebug ziṅ a anyu.
Aktualisht i përzgjedhur:
Lk 11: NTE12
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
MKPAMAṄ AMVOE Nouveau Testament en langue Ewondo © Bible Society of Cameroon, 2012.