Lk 10
10
Yesus alom bëyègè mëwom zamgbal ai bëbè
1A mvus hala, ndò Nti atele bod bëfë mëwom zamgbal ai bëbè, alomo bò bëbè bëbè osu, a e tisòn esë ai e hom osë emen angabë na akë. 2Angabë adzoo ai bò na: Mëkoe bidi mënë abui, bëbò bisye mbò bëtoa abòd. Kogëlan hm ai Nti mëkoe bidi na alom bëbò bisye a mëkoe moe. 3Kaṅan! Yënan, malom mina anë mintomba a zaṅ mvu afan. 4Të mianòṅ tò mfëg, tò ekpa, tò ngob; të miasug tò mod ziṅ a zen. 5E nda ya miayi nyian ete, mitarigi dzo na: Mvoè ai e nda nyi. 6Ngë mòn mvoè anë ete, mvoè dzan yayi sus abë nyè. Ngë tegè ai nala, yayi dugan abë mina. 7Tòbògan a nda te, midzaag, minyaag fë e dzom bavë mina. Amu mbò-esye akyëbë ai maan moe#10,7Biayean tòṅ e bod ya bayedan bia mbëmbë foe.. Të miakë miawulu a mënda mënda. 8E tisòn esë minyian ete, bësoan ai mina, dzaan e dzi bavë mina, 9boan e minkokòn minë ete mvoè, mikada bò na: Edzoe Zamba esubu ya babi abë mina. 10E tisòn esë minyian ete, bò të soan ai mina, kuan, mitëbë a zaṅ nsëṅ ete, mina na: 11Tò mbulug ya tisòn a walad bia a mëkol hi, biasas mina wò. Miyëmë hë na edzoe Zamba esubu ya babi. 12Makad mina na, amos te, Sodoma ayi bi ovëves alodo tisòn te.
Amala ai e bëtisòn bayëbë ki
Mt 11,20-24
13Amala ai wa, a Korazin, amala ai wa a Betsaida. Amu, ngë e biyëṅ bi mam bingayënan abë mina biyënan a Tir ai Sidon, ngë bëngavëṅan ya kòm, bëbòdò minkut, bëwòbògò asub. 14Dzam da, Tir ai Sidon bayi bi nkat ovëves alodo mina. 15Mfa woe, a Kafarnao, yë wayi bedëban akui a yob? Yë wayi sigi akui a tolendoṅ? 16E mod awog mina, awog fë ma; E nyò ki abyandi mina, ma abyandi. E nyò hm abyandi ma, abyandi e mod angalom ma.
Bëyègè mëwom zamgbal ai bëbè badugan a nloman
17Ndo mëwom zamgbal ai bëbèè bëngadugan ai mintag a nnëm, bò na: A Nti, tò bëbë minsisim bëngabë bò bia mëwog hë a dzoe doe. 18Nyè ai bò na: Mëngayen anë Satan asòdan a yob anë zayaṅ. 19Yënë, mëngavë mina ngul ya awulu nyò ai bëkara-olërë a yob, ai ngul ya atëgë Nziziṅi, ndò fë dzom ziṅ yayi ki mina bò. 20Dzam da, të miadaṅ tag na minsisim miabò mina mëwog, taan na moe mënë mina ntilan a yob.
Yesus awog mintag
Mt 11,25-27. 13,16-17
21Awola te, ndò angafon ai ngul Zamba, nyè na: Makaṅ wa, a tara, a Nti yob ai si, amu ongasòli mimfëfëg ai bëyëmë e mam ma, okulan mò ban bòngò. Owe, a tara, amu nala ngò wamen ongafuu nnëm. 22Tara angavë ma dzom esë, ndò fë mod ziṅ ayëm ki mòn, ngë së ki esya; mod ziṅ ayëm ki tara, ngë së ki mòn ai e mod mòn ayi na akulan dò. 23Ndò avëṅan mfa bëyègè bëngabë, nyè ai bò mbombòg na: Mvòm ai e mis mayen e mam miayen ma. 24Amu makad mina na abui bëprofèt ai minkukuma bëngayi du na bayen e mam miayen ma, dzam da bandzëki yen; bëyii fë du na bawog e mam miawog ma, të mò wog.
Nkana abëṅ nnëmë man Samaritan
25Ndò mod mvende ziṅan gakodo a si na abobolo nyè, nyè na: A ṅyëgëlë, mëbò dze asu yë na mëbi enyiṅ kòm? 26Nyè ai nyè na: Dze enë ntilan a mvende? Walaṅ ya we? 27Ndò ayalan na: Odiṅi Nti Zamba woe ai nnëm woe osë, ai nsisim osë, ai ngul dzoe esë#10,27Em 6,5, ai fëg dzoe esë, odiṅi fë manyòṅ anë wamen#10,27Bl 19,18. 28Nyè ai nyè na: oyalan mbëṅ. Bò nala, wayi bi enyiṅ. 29Mbol e mod nyò ayii na alëdë emen, nyè ai Yesus na: Za hm anë madzaṅ? 30Yesus nyè na: Mod ziṅan gakodo a Yerusalem, angasigi a Yeriko, ndò angaku a mò bizilngan, ndò bëngasòdi nyè biyie, bëmana nyè yit, ndò balig nyè hala, awu ai enyiṅ ntye mbòg. Bò bëkëlëg. 31Ndò latoban ha na fada ziṅan gabë asigi zen te, ndò ayen e mod nyò, ayëmë zen fë. 32Dzam dëda fë, man levit asò hom te, ayënë nyè, asaala nyè. 33Ndò man Samaritan#10,33E Samaritan Yuden bëdzoo na bënë bësëm minsëm, mbò Yesus adzo na babò bod mbëṅ. Okoba, bëkarëga sob mëvëṅ ai wayn, bëngasye mò ai mbòn. ziṅ ya angabë a dulu azu kui abë e mod nyò; ayen angayen nyè, ayënë fò nyè ngòl, 34ndò asubu babi, amana nyè faṅ mëvëṅ, asoege mbòn ai wayn, ndò atoa nyè a ekabëli dzie, akëlë ai nyè a nda-bëyëṅ, angatuṅulu nyè. 35E kidi lende ya hala, ndò akuli mòni, minsaṅ mibè, avëë e mod angabë ai nda-bëyëṅ, nyè ai nyè na: Tuṅulu nyè; e dzi esë wayi dzèè a nyòl dzie, mayi wa vë eyòṅ mayi dugan. 36Za ya e bod bëbè ba, a ṅyënan woe, za angabò anë anë manyaṅ e mod angaku a mò bizilngan? 37Nyè na: E nyò angayen nyè ngòl. Yesus nyè ai nyè na: Këlëg hm, wa fë obò nala#10,37Mod osë, tò anë za, tò anë za, anë bia manyaṅ..
Yesus akë a bimò abë Marta ban Maria
38Eyòṅ bëkëlë ha, ndò anganyian a dzal ziṅ. Mininga ziṅ, dzoe na Marta angasoan ai nyè. 39Angabë abëlë manyaṅ dzoe na Maria, Maria te atoa Nti a mëkol a si, avogolo ebug dzie. 40Marta nyè angabë andëṅë ai bisye bi nda na abëlan ai bod. Ndò asò, nyè na: A Nti, dze yë landëgëlë ki wa na madzaṅ alig ma etam mëndëṅë ai bisye? Kada nyè na avòli ma. 41Nti nyè ai nyè na: A Marta, a Marta, wawu ndzug, ondëgëlë wamen asu abui mam, 42dzidzia endzò enë ai mfi. Amu Maria atòb mbëmbë ngab ya bëngâdali ki nyè.
Aktualisht i përzgjedhur:
Lk 10: NTE12
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
MKPAMAṄ AMVOE Nouveau Testament en langue Ewondo © Bible Society of Cameroon, 2012.