Lk 9
9
Yesus alom bë awom ai bëbèè
Mt 10,5-15; Mk 6,7-13
1Ndò angaloe bë awom ai bëbèè, avëë bò ngul ai edzoe a nyòl bëbë minsisim bësë, ai na bësye akòn, 2ndò angalom bò na bëyedan edzoe Zamba, ai na bëlëdë akòn, 3nyè ai bò na: Të mianòṅ dzom ziṅ a miakë a zen, tò ntum, ngë mfëg, ngë mbaṅëla, ngë mòni, tò ki na mibi biwòman bibè. 4Ndò fë, e nda miayi nyian, eyë tòbògan ete, eyë fë mityege ete. 5E ba bandzëki soan ai mina, eyòṅ miakodo a tisòn te, sasan mbulug onë mina a mëkol#9,5Asamza mbulug ya mëkol, nala watyan na bayi ki fë kalan nguma dzom ai bod bëte. asu mbòòlan waban. 6Ndò bëngatye, bëngakë bakë a bëtisòn, bëtisòn, bëyedëgan mbëmbë foe, bëlëdëgë fë bod hom osë.
Herodes akòn Yesus wòṅ
Mt 14,1-12; Mk 6,14-29
7Ndò Herodes Tetrarka#9,7Tetrarka angabë ndzoe etun nnam., angawog e mam mësë mëlodo ma, fëg engadzaṅ nyè ai mbol bod bëziṅ bëdzoo na Yohannes ahëbë a bëkon, 8bëvòg ki bëdzoo na Elias ayene, bëvòg bò na mbòg ziṅ ya bëprofet ahëbë a sòṅ. 9Herodes nyè na: Mamen mëngatsig Yohannes nlo. Za ben hm mawog abui mam di mëtyan ai nyè? Angadzëṅ hm na ayen nyè.
Yesus avë bod bakuda bëtan bidi
Mt 14,13-21; Mk 6,30-44; Yoh 6,1-14
10Adugan apostel bëngadugan, ndò balèè nyè e mam mësë bëngabò. Ndò anòṅ bò, akëlëg ai bò, hë bò bò a e tisòn enë dzoe na Betsaida. 11Minkunda mingayi yëm nala, bëngatoṅ nyè. Ndò angasoan ai bò, angakad bò mam më edzoe Zamba, angalëdë fë e ba bëyaṅan ai evovoe. 12Amos ongakë hm wayimbi. Ndò bë awom ai bëbèè badzo ai nyè na: Soege nkunda bod asu yë na bëkë e mal mal ya ngòdò ha, bëdzëṅ mëdzogobo, bëdzëṅ fë e dzom badi, amu binë a nkod-nnam ha. 13Nyè ai bò na: Mina bëben vaan bò e dzom ya adi. Bò na: Biabëlë ki abui, hë bëmbaṅëla bëtan ai kòs ebè, së na bia bëben bikë kus bidi asu e bod bësë ba. 14Amu bëngabë dzam bò bakuda bëtan. Ndò hm adzo ai bëyègè boe na: Toan bò a si a mëngoe, anë angoe bod mëwom mëtan. 15Ndò bëngabò nala, bëmana toa bò bësë a si. 16Ndò anòṅ e bëmbaṅëla bëtan ai kòs ebè nyi, abede mis a yob, afubu biè, amana bëg, akalan bëyègè na bëvë bod. 17Ndò bësë bëngadi, bëdzie, ndò bëngakoan e bi bingaligi, biad bitun bëmbaṅëla awom ai bibè.
Petrus amëm: Yesus anë Messias. Yesus akad awu die ai akui-lë sòṅ
Mt 16,13-28; Mk 8,27—9,1
18Ndò hm labò na, mbol angabë akogëlan nyè etam, bëyègè bëtoa ai nyè, ndò asili bò na: Bod badzo na mënë za? 19Ndò bayalan na: Yohannes ndu-bodo; bëvòg badzo na onë Elias, bëvòg na onë profèt ziṅ ya okoba ya adugan hëbë a sòṅ. 20Nyè ai bò na: Mina hm ki, miadzo na mënë za? Ndò Petrus ayalan na: Onë Kristus Zamba. 21Ndò angatëbëlë bò na të bakad tò mod ziṅ adzo te, 22nyè na, mòn mod ayean dzugi abui, bënyia-bodo-mvia bësie nyè, ai bëfada ai bëtili bëkalara, bëwoe nyè, dzam da ahëbë a sòṅ a amos lala. 23Ndò adzo ai bò bësë na: Ngë mod ziṅ ayi na azu abie ma, asiege nyè emen, abëgë klos dzie amos osë, azu atoṅ ma. 24Amu e nyò ayi na abaala enyiṅ dzie, ayi dzò dzèè. E nyò ki adzèè enyiṅ dzie asu dama, e nyòlò te ayi dzò kode. 25Mfi dze onë na mod akyëbë ai si esë, ngë adzèè nyè emen? 26Amu e nyò awog osòn asu dama ai asu bibug biama, mòn mod nyè fë ayi nyè wog osòn eyòṅ ayi sò a duma die ai e di esya ai e di mimfufub benglès. 27Makad mina bëbëla, bod bëziṅ bëtëtëlan ha a bayi ki nyumulu awu së na bëtari yen edzoe Zamba.
Yesus atsende nyòl a nkol a yob
Mt 17,1-8; Mk 9,2-8
28Ndò hm labò na, dzam bò mëlu awom a mvus e bibug bi, ndò anòṅ Petrus ai Yohannes ai Yakobus, abëdë a nkol#9,28-36A nkol Tabor ngò Yesus angatsende nyòl ai asu. Lukas adzo na lëngabò nala eyòṅ Yesus akogëlan. Nkol Tabor onë a Galilea, tègè daṅ oyab ai maṅ më Tiberias. na akogëlan. 29Abog akogëlan ha, ndò asu die angatsende, eyie dzie engafum hë anë ten. 30Bod bëbè bëngalèè ai nyè, bëngabë na Moses ai Elias; 31E bod bëngayene ba bëngalèè adzo awu die ya angabë na layene a Yerusalem. 32Petrus ai e ba bëngabë ai nyè bëngaku oyò. Ahëbë angahëbë, ndò bayen duma die ai e bod bëbè bëngabë tëlë ai nyè. 33Eyòṅ bëngasolan, Petrus nyè ai Yesus na: A ṅyëgële, anë mbëṅ na bitòbò ha; ndò ṅloṅan bibëm bilè, dzia asu doe, dzia asu Moses, dzia asu Elias; emen të yëm e dzam adzo. 34Akòbògò nala, ndò nkut ongasus bò a nyòl. Bëngakòn wòṅ a bënyian a nkut ha. 35Ndò kiṅ yasò a nkut ete na: Mòn wama ya mëngatòb nyòlò, vogolan nyè. 36Amana kiṅ engamana kòbò, Yesus antoa etam. Bò fë hë bivol, ndò fë mëlu mëte, bandzëki kad tò mod e mam bëngayen.
Yesus asye mòngò ya abëlë mbë nsisim a nyòl
Mt 17,14-18; Mk 9,14-27
37A amos otsaag hala, ndò basus a nkol a si, mod nkunda atoban ai bò. 38Mod ziṅan gabam a nkunda ete ha na: A ṅyëgëlë, makogëlan ai wa, vòligi te mòn wama, anë ma mbaṅ mòn. 39Mbë nsisim akad nyè bi, etye etye angabam, awoa nyè a si, avul angakui nyè a anyu; anë të nyè dzoge së na abò nyè mbë dzam. 40Mëkogëlan ya ai bëyègè boe na bëtsidan nyè, bò tègè ai ngul te. 41Yesus nyè na: A mvòṅ bod minë tègè ai ṅyëbë, mitoa fë dzongo, mayi tòbò ai mina akui ve, mëdzibigi mina? Zaag ai nyò mòn ha. 42Ṅnyie anë angasubu, ndò fë mbë nsisim awundi nyè, awoa nyè a si. Yesus abama ai mbë nsisim, abò mòngò mvoè, ndò avë nyè esya. 43Bësë bëngakam duma Zamba.
Yesus akad eyòṅ bèè na ayi wu
Mt 17,22-23; Mk 9,30-32
Mbol bod bësë bëkama e mam abòòg, ndò adzo ai bëyègè boe na: 44Toan nyili e bibug bi a mëlò man, amu mòn mod ayi kuan a mò më bod. 45Dzam da, bandzëki wog ebug te, ndò fë engabë bò ndimba e kan yë na bò të wog, hë bò bëmbarëga nyè sili adzo ebug te.
Za anë e mod osu?
Mt 18,1-5; Mk 9,33-37
46Ndò minlaṅëdan miakui bò a zaṅ ha na za anë mfaṅ a lodo e ba bëvòg. 47Mbol Yesus ayëmë mintsogan ya minnëm miaban, ndò anòṅ man mòngò, atele nyè babi ai emen, 48nyè ai bò na: E mod osë asoan ai e man mòngò nyò a dzoe dama, ma asoan ai nyè. E mod ki asoan ai ma, asoan ai e nyò angalom ma. Amu e nyò anë mëligi-mvua a mina bësë, ṅnyè anë mfaṅ a bui.
E mod asë mina e ngam ya ayat, anë ai mina ngam dzia
Mk 9,38-40
49Ndò Yohannes adzo ai nyè na: A ṅyëgëlë, biyen mod atsidëgan bëbë minsisim a dzoe doe, ndò bidzo na biakaman ai nyè dò, amu asëki ai bia esamba. 50Yesus nyè ai nyè na: Mibë kaman ai nyè dò. E nyò asëki mina e ngam y'ayat anë ai mina ngam dzia.
YESUS ABED A YERUSALEM
Dzal samaritan laben soan ai Yesus
51Eyòṅ mëlu yë na anòṅëban a yob mëngakui, ndò angatye na akë a Yerusalem#9,51Yesus atari e dulu lakë ai nyè a Yerusalem, mfag akë bi mintye.. 52Ndò angalom bod osu; ndò bakë, bënyian a tisòn bësamaritan na bakomëzan nyè etoa ete. 53Hë da, bandzëki soan ai nyè, mbol angabë akëlë ai dulu osu a Yerusalem#9,53Samaritan bëluugu Zamba, bëvaa fë nyè mëtunëṅa a nkol Gerizim. Yuden bëkëlë a Yerusalem. Asu te Samaritan basoan ki ai Yesus, mbol bayëm na akë a Yerusalem.. 54Ayënë bëyègè boe Yakobus ai Yohannes bëngayen nala, bò na: A Nti, yë wayi na bibò na ndoan esus a yob, emana bò? 55Ndò avëṅan ai mvus, akaman ai bò dò. 56Ndò bëngakë dzal afë.
E bod bayi na batoṅ Yesus a zut
Mk 8,19-22
57A bëkëlë a zen ha, ndò mod ziṅ a kad nyè na#9,57-62Mod wayean voan mam ya si ngë wayi na watoṅ Yesus.: Mayi wa toṅ tò okë ve! 58Yesus nyè ai nyè na: Mvag ebëlë mimbil, anòn ya yob abëlë mumba, hë da mòn mod abëlë ki e hom aboo nlo. 59Nyè ai mod mfë na: Zaag wabie ma. Mod te nyè na: A Nti, dzoge të ma mëtari kë dzëb tara. 60Nyè ai nyè na: Dzoge mimbim midzëb mimbim miaban; mfa woe, zaag kë wayedan edzoe Zamba. 61Mod mfë nyè na: Mazu mabie wa, a ṅyëgëlë. Hë da, tarigi ma dzoge na mëkë yaan ai nda-bod dzama. 62Yesus nyè ai nyè na: Mod afufudi wò a ebag esye, angadugan bëbë a mvus. E nyòlò te ayean ki ai edzoe Zamba.
Aktualisht i përzgjedhur:
Lk 9: NTE12
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
MKPAMAṄ AMVOE Nouveau Testament en langue Ewondo © Bible Society of Cameroon, 2012.