Югьан 11
11
Лазарин аьжал
1Сар адми иццру шулу. Дугъаз Лазар кӀуйи. Думу Марʼямна чан чи Марфа яшамиш шулайи Вифания гъулʼан вуйи. 2Марʼям, Агъайин ликарикан ягъ ктатури, дурар чан кушарихьди кжикури гъаши дишагьли вуйи. Ари Марʼямдин чве Лазар иццру гъахьнийи.
3Чйири Исайихьна гьамци кӀури хабар дебккуз гьаънийи: «Агъа, гьадмунур, Увуз ккунирнур, кетӀерццна». 4Гьаддикан аьгъю дубхьну, Исайи кӀуру:
– Му иццрушин аьжалихьна дар, думу Аллагьдин ад бадали ва гьаддилантина Аллагьдин Бали Чан адлувал улупбан бадали, вуйиб ву.
5Исайиз Марфа, дугъан чи Марʼям ва Лазар ккунидар вуйи. 6Гьаци, Лазар иццурайибдикан гъеебхьнушра, Иса кьюд йигъансана Учв айишваъ гъузру. 7Хъасин Дугъу Чан ученикариз кӀуру:
– Гъачай, Ягьудия уьлкейиз кьяляхъ гъягъюрхьа.
8– Я Мялим! – кӀуру Дугъаз ученикари, – жугьдариз Увʼин гъван уьлюбхну, улихьнаси йикӀуз ккунди айи, хъа Уву хъана дина гъягъюрана?
9Исайи дурариз гъапи:
– Йигъаъ йицӀикьюб сяаьт адаринхъа? Фуж йигъну гъяруш, дицир хъарсну алдакидар, фицики гьадгъаз му дюнʼяйин акв рябкъюра. 10Хъа эгер дицир йишвну гъяруш, хъарсну алдакиди, гьаз гъапиш акв ади шулдар.
11Гьамци дупну, Исайи давам апӀуру:
– Ихь дуст Лазар гъаахну. Узу думу хъиргуз гъяраза.
12– Агъа, сарун думу нивкӀуз душнаш, сагъ хьиди, – кӀуру Дугъаз ученикари.
13Исайиз гьамдиинди Лазар дукӀнайиваликан пуз ккунди айи, хъа дурари, думу аьдати нивкӀуз душна кӀури, фикир дапӀнайи. 14Гьадмуган Исайи дурариз ачухъди кӀуру:
– Лазар гъакӀну. 15Хъа учву бадали Узу гьадушваъ адарди хьубʼин шад вуза. Гьаци дубхьнайиган, учву хъугъдичва. Сарун гъачай гьадгъахьна гъягъюрхьа!
16«КӀвятӀях» кӀуру лакӀам хъайи Фомайи чан юлдшариз кӀуру:
– Гъачай, Мялимдихъди сатӀиди ухьура йихурухьа!
17Дина гъафи Исайиз, Лазар дукӀну накьвдиъ ади юкьуд йигъ вуйиб аьгъю шулу. 18Вифания Ерусалимдихьан шубуб километртӀан манзилнаъ адайи, 19ва дина гьадрарихъди Марфайихьнана Марʼямдихьна чвуччвун дердер зигуз гизаф жугьдар дуфнайи. 20Иса гъюрайибдикан гъеебхьубси, Марфа дишлади Дугъан улихьна гъягъюру, хъа Марʼям хулаъ имийи.
21– Агъа, эгер Уву мушваъ айиш, йиз чве йикӀидайи! – гъапи Марфайи Исайиз. – 22Саки узуз аьгъязуз, хъа гьамус вушра, Уву Аллагьдикан фу ккун гъапӀишра, Дугъу Увуз тувди.
23– Яв чве хъана гъудужвиди, – гъапи дугъаз Исайи.
24– Гъиямат йигъан вари чӀиви шлуган, думура гъудужвруб аьгъязуз, – жаваб туву Марфайи.
25Исайи гъапи:
– Узу вуза чӀиви хьувал ва уьмур. Фуж Узухъ хъугъраш, гьеле гъачӀишра, яшамиш хьиди. 26Хъа гьарсар, яшамиш шулади Узухъ хъугънайир аьсрариъра йикӀидар. Уву гьамдихъ хъугъурна?
27– Ав, Агъа, – жаваб туврайи дугъу, – узу хъугъурза: гьаму дюнʼяйиз гъюз ккади айи ва, магьа дуфнайи Месигь, Аллагьдин Бай, Уву вува.
Исайилан нивгъар алдахьуб
28Гьамци дупну, Марфайи, Марʼямдиз жиниди дих дапӀну, кӀуру:
– Мялим гьамшваъ а, Дугъу увуз дих апӀура.
29Му гафар гъеерхьубси, Марʼям гъудужвну, Дугъахьна гъягъюру.
30Иса мегьел гъулаъ учӀвнадайи ва Учв Марфайи къаршуламиш гъапӀушвʼин илмийи.
31Марʼямдихъди хулаъ ади ва думу ккарцури гъаши жугьдар, Марʼям тяди кади гъудужвну чӀатна удучӀвуб дябкъну, думу накьвдихъна ишуз гъягъюра, кӀури, хиял дапӀну, дурарра дугъан кьяляхъди гъягъюру. 32Хъа Марʼям, Иса хьайишвахьна дуфну, Думу гъяркъюбси Дугъан ликарикк ккархьру ва кӀуру:
– Я Агъа, эгер Уву мушваъ айиш, йиз чве йикӀидайи.
33Марʼям ва дугъахъди гъафи жугьдар дердлуди ишури дябкъну, кӀван деринаризкьан Чазра язухъ дубхьнайи Исайи гьерху:
34– Думу наан кивначва?
– Гъач учу улупидича, – гъапи дурари.
35Иса ишуру.
36– Лигайчва, фици Мугъаз думу ккундуш! – гъапи жугьдари чпин арайиъ.
37– Мугъу кур вуйириз рябкъювал тувну, – гъапи шли-вуш дураригъян сари, – Белки Дугъхьан Лазарра чӀиви шлуси апӀуз шул?
38Иса хъана артухъ пашманвалиинди накьвдихьна гъюру. Накьв дюрхъсиб вуйи. Душвазди учӀврушвахь гъван гьипнайи.
39– Гъван гьадабгъай! – кӀуру Исайи.
– Агъа, душваъ майтин ниъ абхънашул, фицики думу кивхъан юкьуд йигъ улдубчӀвна, – кӀуру Дугъаз дукӀнайирин чи Марфайи.
40Исайи дугъаз кӀуру:
– Узу увуз гъапундайин: «Эгер уву хъугъри гъузиш, Аллагьдин гьунар рябкъидивуз», – кӀури?
41Гъван гьадабгъуру. Исайи улар зина заъру ва кӀуру:
– Адаш, Увуз баркаллагь кӀураза, Увуз Узу ерхьбаз. 42Увуз Узу гьарган ерхьурайиб аьгъязуз. Гьамушвʼин али халкь Узу Уву гьаънайибдихъ хъугъри пну, ачухъди кӀурайиб вуйиз!
43Ва гьамци дупну, Исайи зарбди дих гъапӀу:
– Лазар, удучӀв!
44Хилар-ликар кафнаригъян гъидиржнайи, машниинра ирин чарч илипнайи Лазар накьвдиан удучӀвуру.
– Думу гъюдурчай, гъит гъарахри! – гъапи дурариз Исайи.
Жугьдар Иса йикӀуз чалишмиш хьуб
45Марʼямдихьна гъафи ва Исайи гъапӀуб гъябкъю жугьдарикан гизафдар Дугъахъ хъугънийи. 46Хъа дурарикан, фарисйирихьна душну, Исайи гъапӀубдикан ктибтрударра гъидихънийи.
47Жугьдарин аьхюну маллйирна фарисйир чпин собрандиз уч гъаши:
– Ухьу гьапӀну ккунду? – кӀуйи дурари. – Му касди гизаф аьламатар улупура. 48Эгер Думу мици гъитиш, вари Гьадгъахъ хъугъди ва римлуйир гъафиган, дурари ихь гьюкуматра ва ихь халкьра терг апӀиди.
49Каяфа кӀуру ва гьадму йисан жугьдарин маллйирин аьхюр вуди кадагънайи дурарикан сари кӀуру:
50– Учву сабдинра гъавриъ ахърадарчва! Я кас, учвуз гьаз аьгъдарчвуз: учвуз ужу хьибди, эгер вари халкьдихъанди сар адми гъачӀиш, вари жугьдар йихайиз?
51Мурар Каяфайин хусуси гафар дайи: гьадму йисан думу жугьдарин маллйирин аьхюрра вуди, дугъу пайгъамбриси гъапнийи, Иса халкьдихъанди йикӀиди кӀури, 52ва неинки гьаму халкьдихъанди, хъа гьацира вари дюнʼя вуйибси дарагънайи Аллагьдин веледар сабвалихъна хпан бадалира.
53Гьадму йигъхъан дурари Иса фици пуч апӀуруш, фикир апӀуз хъюгъру.
54Гьаддиз Иса жугьдарин арайиъ ашкарди лицури гъахьундар, ва гьадлин Думу, ичӀи чюлин гъирагъдихъ хъайи Ефраим кӀуру шагьриз душну, гьадушваъ Чан ученикарихъди гъузру.
55Жугьдарин Пасхайин машквар багахь шулайи. Уьлкейин варишвариан, чпи машквар хьайиз улихьна гунгьарихьан марцц апӀбан бадали, гьациб аьдат тамам апӀуз гизафдар Ерусалимдиз дуфнайи. 56Дурари, Иса агури, Аллагьдин хулаз уч духьну, чиб-чпигъ кӀуйи: «Фици хиял апӀурачва? Думу Пасхайин машквраз гъюрдайкӀана?»
57Аьхюну маллйирина фарисйири Иса дисбан бадали, гьар шлиз Думу айишв аьгъю гъабхьири гьаддикан чпиз хабар дебккуб буйругъ тувру.
Aktualisht i përzgjedhur:
Югьан 11: ТабГК
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Институт перевода Библии, 2010, 2013, 2016, 2018, 2023