Mahendo 4
4
Pʼetero na Johana anagwirwa
1Pʼetero na Johana ariphokala acheri kwasumurira atʼu neno ra Mulungu mumo Hekaluni, makuhani, mubomu wa arinzi a riro Hekalu na Asadukayo, ákwenda pho phao phokala. 2Atʼu ao átsukirwa muno kwakukala, o ano Pʼetero ákala anaasumurira atʼu kukala, afadzi andafufulwa kulaa kuzimu dza Jeso arivyofufulwa. 3Ndo achiagwira o ano Pʼetero na Johana, ela kwakala kudzetswa kare. Kwa vivyo, achiatiya ndani hata kuchicha. 4Ela hata vivyo, anji a o atʼu okala asikira udzumbe wao, ákuluphira, na ao achionjeza isabu ya akuluphiri, hata alume hichiyao achikala anatapira helufu tsʼano.
Pʼetero na Johana anaphirikwa mbere za ngambi
5Kuriphocha, vilongozi a Ayahudi, atumia a ngambi na alimu a shariya áonana phamwenga pho Jerusalemu. 6Anasi yekala ulongola kukala kuhani mubomu, wakala u phapho. Kayafa yekala ndiye kuhani mubomu ukati uo, Johana, Alekizanda na atʼu anjine a mudzungu wa kuhani mubomu nao, ákala a phapho. 7Ndo ngambi yichilagiza Pʼetero na Johana arehewe mbere zao, na achidzaauza vivi, “Yuno mutʼu yekala upholoza mwamuphoza kwa widimi wa ani, na kwa dzina rani?” 8Pʼetero phapho wakala udziudzalwa ni Roho wa Mulungu, na kwa vivyo achiaudzidza vivi, “Vilongozi na atumia a ngambi! 9Maneno gohenderwa mutʼu yuyu yekala upholoza, bee gámokola. Ela kwahivira mudziuza vyophozwa, 10hunamuhenza mwimwi na Aiziraeli osi mumanye kukala, mutʼu yuyu aimireye mbere zenu, ni muzima kamare, kwakukala, waphozwa kwa widimi wa dzina ra Jeso Kʼirisito muchina Nazareti. Yiye mwimwi mwamuulaga kwa kumukotʼa misumari musalabani, ela Mulungu wamufufula kulaa kuzimu. 11#Zab 118:22Jeso ndiye ariye Maandiko ga Mulungu ganagomba dzuluye kukala,
‘Riri dziwe ririro mwarirema mwimwi ajengi,
vivi ndiro rodzikala dziwe ra tende muno!’
12“Yiye Jeso hicheye, ndiye ariye unaidima kutivya. Maana, phapha duniani phosi, adamu kʼaahewerwe dzina ra mutʼu munjine yeyosi, ririro siswi hunaidima kutivywa kuchirira riro.”
13Ao atumia a ngambi ariphoona vivyo ano Pʼetero na Johana arivyogomba photsʼi woga, na ákala anaamanya kʼaana chisomo cha tende na ni atʼu a kawaida, áangalala na phapho achiamanya kukala, ao ákala achikala phamwenga na Jeso. 14Mutʼu yekala uphozwa, wakala wimire phamwenga nao phapho. Kwa vivyo, o atumia a ngambi kʼaaidimire kugomba chitʼu kwakukala, ákala anamona ni muzima kamare. 15Ndo o atumia a ngambi achiaamba o ano Pʼetero na Johana alae konze, na o achisala ko ndani achigatsagula. 16Ao áuzana achiamba, “Hʼaya asena, hwahendedze atʼu ano? Kwani vivyo, chila mutʼu asagalaye phapha Jerusalemu unamanya kukala, ao áhenda dalili ya kwangalaza jeri, na hata siswi naswi kʼahwidima kugarema. 17Ela hata vivyo, atʼu aa nahwakanyeni vyenye kukala, atsʼimwambire mutʼu yeyosi kahiri dzulu ya dzina ra Jeso, kwa hata neno riri huriulageni, na phapho kʼarindagotʼa kwa atʼu.”
18Ndo ariphoerekezana vivyo, achialagizira akaihiwe adze ndani kahiri, na achidzaakahaza kukala, atsʼigombe, hebu kufunza kamare kwa dzina ra Jeso. 19Ela Pʼetero na Johana achiaudzidza vivi, “Lamulani enye kumba ni haki mbere za Mulungu kumwishima mwimwi kuriko kumwishima yiye. 20Ela kala ni siswi, kʼahwidima kuricha kugomba dzulu ya gago maneno hurigogaona na kugasikira.” 21Atumia a ngambi ariphosikira vivyo, akaaza kwakanya chisiru, na chidzako achiaricha tsare. Ao kʼaaidimire kwatiya akili kwakukala, atʼu osi ákala anamulika Mulungu kwa gokala gahendeka. 22Dalili yiyo yakala ni ya kwangalaza, mana, mutʼu yephozwa wakala una myaka yodzichira mirongo mine.
Akuluphiri anamuvoya Mulungu aatiye moyo
23Pʼetero na Johana ariphorichwa tsare tu, áuya kare kwa akuluphiri anziao, achendaambira gosi garatʼu gokala adzambwa ni makuhani abomu, na atumia a ngambi. 24#Kul 20:11; Neh 9:6; Zab 146:6O akuluphiri anziao ariphosikira gago, ágwirikana chivimwenga achimuvoya Mulungu vivi, “Bwana Mwenyezi, uwe ndiwe yeumba mbingu na itsʼi, bahari na vyosi virivyo mumo. 25#Zab 2:1, 2Uwe ndiwe uriyemuhenda mukare wehu Daudi, ariye ni muhumikio agombe kwa widimi wa Rohoo kwamba,
‘Heka atʼu a mataifa ni asiru muno?
Heka atʼu anadzila ngewa zirizo kʼazindakala?
26Afalume a duniani ádzidziika kwete,
na atawala adzila ngewa phamwenga kwa amupinge Mwenyezi Mulungu
na yiye Kʼirisitowe.’
27 #
Luk 23:7-11;
Mat 27:1, 2; Mar 15:1; Luk 23:1; Joh 18:28, 29 “Vivyo vyakala jeri, mana, Herode, Pʼonitiyo Pilato, Aiziraeli na atʼu a makabila manjine áonana phapha mudzi uu, na achimupinga Jeso muhumikio mutakatifu, ariye wamuhenda akale yiye Kʼirisito. 28Ao áhenda vivyo kuchimiza garatʼu gokala udzigaaza, na kudzila hangu mwanzo kuchirira widimio na henzoro. 29Ndo Bwana, ao vivi anahwogofya, ela hunakuvoya siswi ahendikazio, uhwidimise kusumurira nenoro photsʼi woga kamare. 30Golosa mukonoo wa kuphoza uphoze atʼu, na henda dalili na mautʼu-mautʼu ga kwangalaza kwa dzina ra Jeso, muhumikio mutakatifu.”
31O akuluphiri ariphomarigiza kuvoya tu, pharatʼu phatʼu phokala arundikana, phásumba na osi achiudzalwa ni Roho wa Mulungu, na achenderera kusumurira neno ra Mulungu photsʼi woga.
Akuluphiri arivyosagala na umwenga
32 #
Mahe 2:44, 45 Akuluphiri osi ákala ana nyaa mwenga, na mwimo wao nao, wakala ni umwenga vivyo. Kʼakuna hata mumwenga yehumira mwiyo hicheye kwa ni wakwe, itsʼiphokala ágavyana vyosi arivyokala navyo. 33O ahumwa a Jeso áenderera kwaambira atʼu na mukotse unji kukala, Bwana Jeso wafufuka jeri, na Mulungu achiahatsʼa muno ao osini. 34Kʼakuna hata mumwenga kati yao yekala na haja na utʼu, na achikosa. Maana, ákala achiimaima vivi, atʼu okala ana minda hebu nyumba anaguza, 35na pʼesa zondapatikana zirehewe kwa ahumwa a Jeso. Ao ákala achireherwa anazigavya chila mutʼu kutuwirizana na hajaze.
36-37Mumwenga wa o akuluphiri oguza minda yao na pʼesa achizireha kwa ahumwa a Jeso, ni Jesefu. Jesefu wakala ni Mulawi, na kwao kwakala ni Kupuro. Ahumwa a Jeso, yiye ákala amwiha Barinaba na maanaye ni, “Mutʼu aatiyaye moyo anzie.”
Aktualisht i përzgjedhur:
Mahendo 4: CHIDUR
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr