Mahendo 5
5
Anania na muchewe Safira
1Mutʼu mumwenga aihiwaye Anania na muchewe Safira, águza munda wao nao. 2Ela acherekezana atanye kʼanda chasi fulani cha zo pʼesa zokala apata, na chidzako ahwale ziratʼu zondakala zisala, ende akaalembe ahumwa a Jeso ambe ni zosi. Ndo Anania ariphokwendalavya ziratʼu zokala zisala, 3Pʼetero wamuuza vivi, “Anania, vikaladze hata we ukaphenywa ni Shetani, na ukadziikira kʼanda chasi fulani cha zo pʼesa zozipata phoguza munda, hata vino unamulemba Roho wa Mulungu? 4Anania, uwe phokala kʼudzangwe kuuguza o munda, wakala ni maliyo. Na hata uriphouguza, pʼesa zozipata zakala ni zako vivyo, uzihumire vyako uhenzavyo! Ndo ni utʼu wani okuhenda wamule kuhenda neno rino? Bee uwe manya kukala, kʼumulembere mutʼu, ela udzimulemba Mulunguo!” 5Anania ariphosikira gago, wagwa na achifa phapho kare. Atʼu osi ogasikira gago, áogofyerwa muno. 6Atumia murika achidzalufinikʼira nguwo lufulwe, na achilulavya konze achendaluzika.
7Gariphochira masaa mahahu hivi, Safira mukaza Anania wakudzaphenya mumo ndani, ela achikala kʼadzangwe kugamanya gokala gadzimupata mulumewe. 8Ndo Pʼetero achimwamba, “Safira, zino pʼesa zodzirehewa ni mulumeo, zikale ni zosi zozipata muriphoguza o munda wenu?” Safira achiudzidza achiamba, “Ehʼe ni zosi.” 9Pʼetero achimuuza vivi, “Vikaladze hata mukaima njama na mulumeo kukala, mumuheze Roho wa Bwana? Bee uwe manya kukala, mulumeo udzefa hata ukwendazikwa kare. Na vivi odzikwendamuzika hinyo a muyangoni anauya, na hata uwe nawe andakudzakuhwala!” 10Phapho kare Safira naye achigwa mbere za Pʼetero, na achifa. Atumia murika ariphokudzamona udzefa, áluhwala lo lufulwe achilulavya konze, na achendaluzika pho mbirani pha yiye mulumewe. 11Ndo akuluphiri osi na anjine osi osikira maneno gago goapata Anania na muchewe Safira, áogofyerwa muno.
Vilinge na mautʼu-mautʼu manji ga kwangalaza
12Ahumwa a Jeso ákaza kuhenda vilinge na mautʼu-mautʼu manji ga kwangalaza kati ya atʼu. Akuluphiri osi ákala ukati kwa ukati, anaonana phamwenga mumo Hekaluni pho varanda ra Selemani. 13Kʼakuna mutʼu munjine yeyosi yesubutu kudzitiya riro duu ra akuluphiri, ela o anatsʼi áalika o akuluphiri. 14Ela hata vivyo, atʼu anji muno, ache kwa alume ámukuluphira Bwana, na achionjeza isabu ya akuluphiri. 15Gago gosi gohendwa ni o ahumwa a Jeso, gáahenda atʼu aaphirike akongo njira bomu na kwalaza tsʼatsʼani na makuchʼini, kwa hata Pʼetero achiamba unachira, anjine afikirwe hata kumba ni cho chivurivuriche tu. 16Atʼu anji kulaa midzi ya kʼanda-kʼanda ya Jerusalemu ákala achidza nao, kureha akongo ao, na atʼu okala anayugwa ni mapepo mai, na ao osini ákala achiphozwa.
Ahumwa a Jeso anaturiswa
17Ahumwa a Jeso phokala anaenderera kuhenda vivyo vilinge na mautʼu-mautʼu manji ga kwangalaza, kuhani mubomu, na anzie osi okala ni atʼu a chama cha Asadukayo, áaonera chidzitso. 18Ndo achiagwira ahumwa a Jeso, na achendaatiya ndani ya yo jela bomu. 19Ela kuriphofika usiku, malaika wa Bwana achendayivugula yo miyango ya jela, na achialavya konze o ahumwa a Jeso. 20Chisha, achiaamba vivi, “Endani mukaime boma ra Hekalu, mwambire atʼu chila chitʼu dzulu ya uu uzima uphya.” 21Ahumwa a Jeso ágatuwa gago, na achirauka chiti achendaphenya boma ra Hekalu achanza kufunza.
Ariphokala anaenderera kufunza, kuhani mubomu na anzie, áhenda monano wa ngambi bomu ya atumia a Chiyahudi, na chisha achiahuma atʼu ko jela ende akaahwale o ahumwa a Jeso. 22Ela ao ahendikazi ohumwa ariphofika ko jela, kʼendereaona o ahumwa a Jeso. Kwa vivyo, achiuya achendasema. 23Ao ákwendaamba vivi, “Siswi hudzikwendaona miyango ya jela yifungwatʼo, na arinzi anayirinda jeri. Ela huriphovugula yo miyango, kʼahumonere mutʼu yeyosi mumo ndani.” 24Mubomu wa arinzi a Hekalu na makuhani abomu ariphosikira gago, áangalala achikala kʼaamanya kulairirani. 25Ndo phokala acheri kwangalala phapho, mutʼu mumwenga achidza achiaamba, “Higa maneno mba atumia! Aratʼu atʼu oatiya ndani dzana, vivi aimire baraza ra Hekalu anaafunza atʼu.” 26Phapho mubomu wa arinzi a Hekalu, phamwenga na shikarie achenda ko barazani, kwendaahwala. Ela kʼaasukumire-sukumire kwakukala, ákala ni aoga áona dza kwamba andapigwa mawe ni atʼu.
27Ariphokwenda nao, ákwendaaimisa mbere za yo ngambi kwa auzwe ni kuhani mubomu. 28#Mat 27:25Ndo kuhani mubomu achiaamba vivi, “Siswi hwamukahaza tsetsetse kukala, mutsʼifunze kamare kwa dzina ra mutʼu yiye. Ela heka vino mwi mudzigotʼeza mafunzo genu phapha Jerusalemu phosi, na mudzidina kwamba ndiswi omuulaga mutʼu yiye?” 29Pʼetero na o ahumwa a Jeso anzie achiudzidza vivi, “Siswi ni seti humogophe Mulungu, ela tsʼi adamu. 30Mwimwi muriphomuulaga Jeso kwa kumukotʼa misumari musalabani, Mulungu wa akare ehu wamufufula. 31Na Mulungu ariphomufufula, wamukweza cheo, kwa kumwika mukonowe wa kulume achikala chilongozi na Mutivyi, kwa aahende Aiziraeli atye, na phapho apate kusamehewa madambi gao. 32Siswi hu mashaidi ohendagaona na matso maneno gago, na yiye Roho wa Mulungu ariye Mulungu uapʼa amogophao, unangʼaza vivyo dzulu ya maneno gago.”
33Atumia a yo ngambi ariphosikira gago, átsukirwa muno hata achikala anahenza aaulage. 34Ela Mufarisayo mumwenga aihiwaye Gamalieli, ariye wakala ni mwalimu wa shariya na unaishimiwa ni atʼu osi, wazuka, na achiamba o ahumwa a Jeso alaviwe konze vichache. 35Chisha, achiaamba vivi o atumia a ngambi, “Kʼamona Aiziraeli asena, galilikaneni chividzo gaga mutsumago kwahendera atʼu aa! 36Mwimwi munamanya kukala, yo myaka hulaayo, kwalairira mutʼu mumwenga aihiwaye Teuda. Yiye wadzamba ni mubomu, na atʼu apatao magana mane achimutuwa. Ela yiye waulagwa, na o atʼu osi okala achimutuwa achitsamukana, na gago ga yiye gachisira. 37Gariphochira gago, ukati wa kutarwa atʼu phokala ufika, kuchilairira Juda muchina Galilaya, na yiye naye achiavuha atʼu achimutuwa. Ela yiye naye waulagwa, na o atʼue okala achimutuwa achitsamukana nao. 38Ndo maoni gangu ni kwamba, aricheni ende vyao aa, mana, chikala gaga gao agahendago ni maneno gao gogadzila enye, kʼagandakwenderera. 39Ela gachikala ni ga Mulungu, munaheha na Mulungu bule, na kʼamundaidima kwaziza!”
40Ao atumia a ngambi achigakubali gago maneno ga Gamalieli, na ndipho achialagizira arehewe ndani o ahumwa a Jeso. Achialamula achapwe vibokʼo, na achiakanya atsʼifunze kahiri kwa dzina ra Jeso, chisha achiaricha achenda vyao. 41Ahumwa a Jeso o ariphorichwa, áuka pho ngambini na kuno hata anahamirwa, kwakukala, ákala anamanya Mulungu waatara anawirya aturike kwa dzulu ya dzina ra Jeso. 42Ndo achenderera kufunza na kusumurira Nguma Mbidzo chila tsʼiku mumo Hekaluni na midzini mwa atʼu kukala, Jeso ndiye yiye Kʼirisito.
Aktualisht i përzgjedhur:
Mahendo 5: CHIDUR
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr