यूहन्ना 4
4
यीशु औरौ सामरी बैटमाणिश
1जोबै यीशु कै पौता चाला कै फरीसी लोगै शुणु कै यीशु यूहन्ना दै जादा चैलै बौणांव औरौ तिनुखै बपतिस्मा दैंव। 2(पौरौ यीशु आपी नै बल्कि तैसकै चैलै बपतिस्मा दैंव थिए) 3तोबै सै यहूदिया प्रदेश खै छोडे़बा गलील जिले खै आपणै चैलै कै साथै पाछु हौटै गौआ। 4औरौ तैसीखै सामरिया प्रदेश शै हौयौ जाणौ जौरुरी थियु जिथुकै पौरमेशवर बै ऐजौ ही चांव थिया। 5इथकारिए सै सामरिया प्रदेश दा सूखार शहर दा ओऊवा, जू तियौं जोमीनो कै धोरे औसौ, जिथै याकूबे आपणै बैटै यूसुफ खै दैय राए थै। 6औरौ याकूबे जू कुआँ खोणे राए थिया, सै ऐबै बै तिथी थिया। यीशु बाटो पुंडा हांडदै-हांडदै खौड़ै गौआ, औरौ तैसी कुंए पांदी ऐई बौठै गौआ। औरौ ऐजै बात दोफारी कै सौमय हौए।
7तेथियो ऐक सामरिया प्रदेश कै बैटमाणिश पाणी भोरदै आए, औरौ यीशुए तियौंखै बौल़ौ, “मुखै पिणौ कारिए पाणी दै।” 8तैसी सौमय तैसकै चैलै तौ शहरो दै खाणौ खै मोलै लान्दै हौटै रौवै थिए। 9तियैं सामरी बैटमाणिशै यीशु खै बौल़ौ, “तू ऐक यहूदी औसौ, औरौ हांव ऐक सामरी बैटमाणिश औसौ। तू मुं कैईंदु पाणी किथुखै मांगै?” जिथुकै यहूदी लोग सामरियों कै साथै कैशणाई बै बर्ताव नै राखौ थिए।
10यीशुए जोवाब दिया, “तू ना जाणै कै पौरमेशवर ताखै का दैणौ चांव, औरौ तू ऐजौ बै ना जाणै कै कुणै तांव कैईंदु पाणी मांगै लो। जै तू जाणदी तौ तू मुं कैईंदु मांगदै औरौ हांव ताखै पाणी दैंदा जू पाणी जीवन दैंव।” 11बैटमाणिशै यीशु खै बौल़ौ, “ओए रै गुरु, तांव कैंई तौ पाणी भोरणो कारिए किछै बै ना आथी, औरौ कुआँ बैजाए डुंगा औसौ? तोबै सैजौ जीवन कौ पाणी तांव कैंईदौ कुकै दौ भैटदौ? 12का तू अमारै पुराणिया याकूब दा बौड़ा औसौ, जैणै आमु कै ऐजा कुआँ दैय राए, औरौ आपणै संतान, औरौ आपणै गोरु समैंत तिथमुंजी दो पियु।” 13यीशुए तियौंखै जोवाब दिया, “जू कुणिए ऐजौ पाणी पिला सै हौजौ तीशी रौंदा। 14पौरौ जू कुणिए तिथु पाणी मुंजी दो पिला जू हांव तैसीखै दियुंबा, सै सौदा तौड़ी तीशी ना रौंदा, औरौ जू पाणी हांव तैसीखै दियुंबा, सै तिथु मुंजी ऐक फटवाणी बौणै जांदो, जू तैसी पाणी कै दैंदा रौंव जू तैसी सौदा कै जिन्दगी तौड़ी दैला।” 15बैटमाणिशै तैसीखै बौल़ौ, “ओए रै प्रभु, मुखै सैजौ पाणी दै ताकि हांव तीशी ना होऊं, औरौ ना पाणी भोरणो ऐतरै दूर ओऊं।”
16यीशुए तियौंखै बौल़ौ, “जा, आपणै घोरवाल़ै खै इथै बौईद।” 17बैटमाणिशै जोवाब दिया, “हांव बिना घोरवाल़ै कै औसौ।” यीशुए तियौंखै बौल़ौ, “तू ठीक बौल़ै, ‘हांव बिना घोरवाल़ै कै औसौ।’ 18जिथुकै तुऐं पाँच घोरवाल़ै छोड़े दियै, औरौ जैसी आरी तू ऐबै रौए सै बै तैरा घोरवाल़ै ना आथी, ऐजौ तुऐं साचौ बौल़ौ।”
19बैटमाणिशै तैसीखै बौल़ौ, “ओए रै प्रभु, मैरै ऐशैखै जाणियौ कै तू पौरमेशवर कै बातौ बौताणौवाल़ै औसौ। 20अमारै सामरी पुराणिया, ऐसी धारो पांदी आराधना कौरौ थिए, औरौ तुऐं यहूदी लोग बौल़ौए कै यरूशलेम शहर ही सैजी जौगैह औसौ जिथै पौरमेशवर कै आराधना कौरणै चैंई।” 21यीशुए तियौंखै बौल़ौ, “ओए रै बैटमाणिश, मैरी बातौ पांदी बिशवाश कौर, कै सैजा सौमय आन्दा लागै रौआ कै तुऐं ना तौ इथु धारो पांदी पिता पौरमेशवर कै आराधना कौरदै, ना यरूशलेम शहर दै। 22तुऐं सामरी लोग जैसीकै ना जाणौ तैसकै आराधना कौरौ, औरौ आमै यहूदी लोग जैसीखै जाणुए तैसकै आराधना कौरु; जिथुकै उध्दार यहूदी लोगौ मुंजी औसौ। 23पौरौ सैजा सौमय आन्दा लागै रौआ, यानी आए ही गौआ, जिथमुंजी साची आराधना कौरणौवाल़ै पिता पौरमेशवर कै आराधना आत्मा औरौ सौचाई शै कौरदै, जिथुकै पिता पौरमेशवर आपणै कारिए ऐशणै आराधना कौरणौवाल़ै जूओं। 24पौरमेशवर आत्मा औसौ, इथकारिए जौरुरी औसौ की तैसकै आराधना कौरणौवाल़ै आत्मा औरौ सौचाई शै आराधना कौरौ।” 25बैटमाणिशै तैसीखै बौल़ौ, “हांव जाणुए कै मसीह जू पौरमेशवर का अभिषिक्त औसौ, आणौवाल़ा औसौ; जोबै सै आला तौ आमु सौबै बातौ बौताए दैंदा।” 26यीशुए तियौंखै बौल़ौ, “मोऐं जू ताखै बौल़ै लौ, हांव ही मसीहा औसौ।”
चैलो कौ पाछु आणौ
27तेथियो तैसकै चैलै आए गौवै, औरौ सै हैरान हौए गौवै कै सै बैटमाणिश आरी बातौ कौरदा लागै रौआ, तोबै बै तैसीखै कुणिए नै पूछी, “कै तू का चांए?” या “किथुकै इयौं आरी बातौ कौरी लैई?” 28तोबै बैटमाणिश आपणा घड़ा छोडे़बा, शहरो खै हौटै गौए, औरौ लोगौ कैंई बौलदै लागै, 29“उंढे आव, ऐसी आदमी खै दैखौ, जैणै मैरै जिन्दगी कै बारै मुंजी सौब ठुँ बौताए दियु जू किछै मोऐं कौरे राए थियु। कोदी ऐजाई तौ नी मसीह औसौ?” 30तोबै सैजै शहर शै निकल़ैयो यीशु कै दैखणौ कारिए तैसकै धोरे आन्दै लागै।
31ऐतरै दै चैलै यीशु आरी ऐजै बिन्ती कौरदै लागै, “ओए रै गुरुजी किछै खाए कौर।” 32पौरौ यीशुए तिनुखै बौल़ौ, “मुंकैई खाणौ खै ऐशणौ खाणौ औसौ, जिथु तुऐं ना जाणौ।” 33तोबै चैलै आपी मुंजी बौल़ौ, “का कुणिए ऐसी कारिए किछै खाणौ खै लाए राए?” 34यीशुए तिनुखै बौल़ौ, “मैरौ खाणौ तैसी पौरमेशवर कै इछा कै मानणा औसौ जैणै मुखै भैजै राए, औरौ तैसी कामौ कै पूरा कौरणा जू तैणै मुखै दैय राए।”
35तुऐं बौल़ौ, “फसल काटणौ कै इबी चार मीनै रौए रौवै।” दैख, हांव तुऔं बुलू, आपणी आखी खोलो, औरौ आणौवाल़ै लोगौ कै दैखौ। सै ऐक बागड़ी कै जैशणै औसौ जू काटणौ कारिए तैयार औसौ। 36औरौ फसल काटणौ वाल़ै आगै ही काम कौरे लौआ, औरौ आपणै धियाड़ी पाए लोए, औरौ सै ऐजौ औसौ, कै तिनुऐ तिनु लोगौ कै कौठै कौरे लौवै जू सौदा कै जिन्दगी पालै, कै बौणौवाल़ा औरौ काटणौवाल़ा दुईनै खोशे मौनालै। 37जिथुकै इथपांदी ऐजै कहावत ठीक बौठौ: “ऐक आदमी बौंवए औरौ ओका आदमी काटौए।” 38मोऐं तुऔं खै तियौं बागड़ी काटणौ कारिए छाड़ै, जिथमुंजी तुऐं मैहनत ना कौरे रैई, ओकीए मैहनत कौरे, औरौ तुऐं तिनकै मैहनत कै फसल कै कौठै कौरलै।
सामरियों का बिशवाश कौरणा
39औरौ तैसी शहर कै बैजाए सामरी लोगै तियौं बैटमाणिशौ कै बौलणौ शै यीशु पांदी बिशवाश कौरा, जैणै ऐजौ बौल़ौ थियु कै तैणै सौब ठुँ जू मोऐं कौरे राए, मुखै बौताए दियु। 40जोबै ऐजै सामरी लोग तैसकै धोरे आए, औरौ यीशु शै बिन्ती कौरदै लागै, की अमारै कागे रौ, औरौ सै तिथै दौ दूसौ तौड़ी रौआ। 41औरौ तैसकै उपदैश कै बौजैह शै, हौजौ बै बौहितै लोगै बिशवाश कौरा। 42औरौ तियौं बैटमाणिशौ खै बौल़ौ, “ऐबै आमै तैरै बौलणौ शै बिशवाश ना कौरु, जिथुकै आमै आपी शौणै पाए, औरौ जाणै पाए की सौथी कै ऐजाई दुनिया का उध्दार कौरणौवाल़ा औसौ।”
43तोबै तिनु दो दूसौ कै बाद यीशु तिथैदा निकल़ैयो गलील जिले कै हौटा। 44यीशुए आपी गवाही दी कै पौरमेशवर कै बातौ बौताणौवाल़ा आपणै देश दा आदर ना पांव। 45जोबै यीशु गलील जिले दा ओऊवा, तौ गलील जिले कै लोग खुशी कै साथै तैसीआरी भेटिए; जिथुकै जैतरै काम तैणै यरूशलेम शहर दै तैयारो कै सौमय दै कौरे राए थिए, तिनुऐ तिनु सौबी कै दैख राए थिए, जिथुकै सै बै तैयार दै हौटै रौवै थिए।
कर्मचारी कै बैटै खै ठीक कौरणा
46तोबै सै हौजौ गलील जिले कै काना नगर दा ओऊवा, जिथै तैणै पाणी खै अंगूर का रस बाणै राए थिया। तिथै राजा का ऐक कर्मचारी थिया, जैसका बैटा कफरनहूम नगर दा बीमार थिया। 47सै ऐजौ शौणैबा कै यीशु यहूदिया प्रदेश पौरौशा गलील जिले खै आए रौआ, तैसकै धोरे हौटा, औरौ तैसी कैईंदै बिन्ती कौरदा लागा कै, “चाल मैरा बैटा ठीक कौरे दै: जिथुकै सै मौरणौवाल़ा औसौ।” 48यीशुए तैसीखै बौल़ौ, “जांव तौड़ी तुऐं निशान औरौ अनौखै काम नै दैखी, तांव तौड़ी कौलोंई मुं पांदी मसीह कै भैष दा बिशवाश ना कौरदै।” 49राजा कै कर्मचारी तैसीखै बौल़ौ, “ओए रै प्रभु मैरै बैटै कै मौरणौ दा औगौड़ियौ चाल।” 50यीशुए तैसीखै बौल़ौ, “जा, तैरा बैटा जियुंदा औसौ।” औरौ तैसी आदमीए यीशु कै बौलेयौंदी बातौ पांदी बिशवाश कौरा औरौ हौटै गौआ। 51सै बाटो पुंडा चालै रौआ थिया, औरौ तैसकै नोकर तैसीआरी भेटिए, औरौ बौलदै लागै, “कै तैरा बैटा जियुंदा औसौ।” 52तैणै नोकर कैईंदु पूछु, “कै कियों सौमय दा सै ठीक हौंदा लागा?” तिनुऐ तैसीखै बौल़ौ, “बियाल़ियो दोफारो कै ऐकी बोजे तैसका बुखार उतरे गौआ।” 53तोबै तैसकै बापू जाणै पोऊँ, कै ऐजौ तैसी सौमय हौ, जैसी सौमय यीशुए बौल़ै राए थियु कै, “तैरा बैटा जियुंदा औसौ,” औरौ तैसकै परिवार कै सौबी लोगै बिशवाश कौरा।
54ऐजा दूजा चौमत्कार का काम थिया, जू यीशुए यहूदिया प्रदेश शै गलील जिले दा पाछु आयौ दिखोऊवा।
Aktualisht i përzgjedhur:
यूहन्ना 4: SRXNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.