ମାତିଉ 7
7
ଆଜାଏସା ବିସାର୍ନା ଆଡେମ'
(ଲୁକ 6:37–38; 6:41–42)
1ଆଜାଏସା ବିସାର୍ନା ଆଡେମ' ଡୁ'ତୁନ୍ ଡେମ'ନା ଆପେସା ବିସାର୍ନା ଆଡେମ୍ତ । 2#ମାର୍କ 4:24ମାସା'ଡ'ନା ଆପାଲ୍ ରେମଲେ ପେ ବିସାର୍ନା ଡେମ'କୁନୁଂସୁଗ ଆପେସା ବିସାର୍ନା ଡେମ୍ତ । ମାରି ପେ ଆପାଲ୍ ରେମଲେ ମିବାଇ' ନିୟମ୍ବୁରଂ ବିସାର୍ନା ଡେମ୍ତୁପେ ଗୁତୁନ୍ ନିୟମ୍ବୁରଂଉ ଆପେସା ସମାନ୍ ବିସାର୍ନା ଡେମ୍ତ ।
3ନିଜର୍ନା ମ'ବକ୍ କନ୍ଟ୍ଲାସଂ ଡୁକୁନୁଂ ମଏତ୍ବାର୍ ଆପେମ୍ବାଇଲକ୍ ଡାଉବାଇ' ରୁକ୍ମ'କୁନୁଂବକ୍ ଜୁତିଂ ଡ'ସେକ୍ ମାସା' ନ ଏତ୍ଗୁତୁନ? 4ଜୁ, ନନା ମ'ବକ୍ ବୁଡାଲା କନ୍ଟ୍ଲାସଂ ଡୁକୁନୁଂ ଜୁଜୁ ଆଗଂତୁନ ଡ'ନା ଆପେମ୍ବାଇଲକ୍ “ଅ ବାଇଲକ୍ ଆନ ରୁକ୍ମ'କୁନୁଂ ତକ୍ତିଂ” ଡ'ସେକ୍ ନ ମି ସୁଁସୁ ଗଂତୁନ? 5ଅ ନାଡାଇବାର୍ବାଇ'ରେମ୍! ଜୁ, ନ ସିଁସେଇଁ ନନା ମ'ବକ୍ ଡୁକୁନୁଂ ଗୁତୁନ୍ ବୁଡାଲା କନ୍ଟ୍ଲାସଂ ତକ୍ସୁଂ, ଡୁ'ତୁନ୍ ଡ'ନା ଆପେମ୍ବାଇଲକ୍ ରୁକ୍ମ'କୁନୁଂ ତଗ'ସୁଂସୁଂପୁଲେଇ ବଲ୍ ଜୁଜୁ ଗଂତୁନ ।
6ପେନ୍ବକ୍ ମାମା ବଲ୍ବଲ୍ଟାବାଇ' ଡୁତା ଗୁତୁନ୍ ଆଗୁସୁ'ଡେ ଆବେଡ', ମା'ଏ ତିର୍ଗି' ଆନ୍ଡେଇଁସେକ୍ ଆନେଇ' ଅପ୍ତ । ମାରି ମୁକ୍ତା ଡ'ସେକ୍ ଇମି ଡୁକୁନୁଂ ଅବୁଦି ଦାମ୍ବାଇ'ନା ବୁରେ ଆଗିବି'ଡେ ଆବେଡ', ମା'ଏ ଗୁତୁନ୍ ଗୁଲାଇ ସରଉ ଜଗ୍ଡାଗ'ତେଇଁଡାଗ'ସୁଂତ ।
ଆପେ ମା ଦର୍କାର୍ ଗୁତୁନା ଆମାପ୍ରୁ ଲୁ'
(ଲୁକ 11:9–13)
7“ଲୁଡ'ସେ'ଗାଉ ଡୁକୁଲା, ଆପେ ବେ'ତ । ତୁର'ସେ'ଗାଉ ଡୁକୁଲା, ପେ ବାମ୍ତୁପେ । ଡୁଡବ'ସେ'ଗାଉ ଡୁକୁଲା, ପେପୁଲେଇ ପାଟା ରୁକ୍ତ । 8ମାସା'ଡ'ନା ଜା ଲୁ'ତ, ମାଇ ବାମ୍ତା । ଜା ତୁର୍ତ, ମାଇ ଜୁତ । ଜା ଡୁଡବ୍ତ ମାଇପୁଲେଇ ପାଟା ରୁକ୍ତ ଡ'ସେକ୍ ନିଂ ଆପେ ସୁନ'ତିଂ ।
9ପେନ୍ ଉଁ'ଉଁନେ ରୁଟି ଲୁଡ'ନା ପେ ଆମା'ଏ ସୁମ୍ ଡ'ସେକ୍ ବୁରେ ବେ'ତୁପେ ଇ? 10ଆରା'ଗେ ଆନିଂ ଆ'ଡଂ ବେ' ଡ'ନା ଆମା'ଏ ବୁବୁ' ବେ'ତୁପେ ଇ? ଇନ୍ଡ'ଇଏସା ଡୁ'ତୁନ୍ ପେ ଆଡେମ୍ତୁପେ । 11ପେ ଅଲିରାକ୍ବାଇ' ରେମଲେ ଡ'ନାସା ଆପେନ୍ ଉଁ'ଉଁନେ ବଲ୍ବଲ୍ଟାବାଇ' ବିବେ' ଡୁତା ଡ'ସେକ୍ ପେ ମାଗ'ତୁପେ । ଡୁ'ତୁନ୍ ଡ'ନା ସରଗ୍ବକ୍ ଡୁକୁନୁଂ ଆପେମ୍ବା ଜାଜା ଲୁ'ତ ଆମା'ଏ ଗୁଲାଇ ବଲ୍ଟାବାଇ' ପେ ଲୁଡ'କୁନୁଂକୁରୁଂ ଅଦିକ୍ ମାଇ ବେ'ତ । 12#ଲୁକ 6:31ପାଲ୍ ରେମଲେ ଆନେଇ ବଲ୍ ଜୁଲେଇ' ଡ'ସେକ୍ ଆପେ ମୁନ୍ ଡୁତା ଡ'ନା ଡୁ'ତୁନାଉ ପେସା ଆମା'ଏ ବଲ୍ ଜୁଜୁ ଡୁତା । ମାସା'ଡ'ନା ମସାଲା ଲେକ୍ଲ'କୁନୁଂ ନିୟମ୍ବକ୍ ମାରି ବାବବାଦିଲେନା ଉଲାକ୍ବକ୍ସା ଡୁ'ତୁନାଉ ଲେକ୍ଲ'ବୁଂଅଁ'ତା ।”
କୁତବ୍ବାଇ' ଡାନ୍ଡର୍
(ଲୁକ 13:24)
13“କୁତବ୍ବାଇ' ଡାନ୍ଡର୍କୁରୁଂ ଗାୟା । ମାସା'ଡ'ନା ନାସାଇବାର୍ନା କୁରୁଂବକ୍ ରିଂଅଁ' ଉଇନା ଡାନ୍ଡର୍ ଅବୁଦି ସୁନ୍ତାବାଇ' ମାରି ଆତା ଉଇନା କୁରୁଂସା ଅବୁଦି ଅସାର୍ବାଇ', ମାରି ଅବୁଦି ରେମଲେ ଗୁତୁନ୍କୁରୁଂ ଗାଇ ଉଇଡେନ୍ତା । 14ମାତର୍ ଜିବନ୍ ବିବେ'ନାବକ୍ ଗୁଗାଇନା ଡାନ୍ଡର୍ ଅବୁଦି କୁତବ୍ବାଇ' ମାରି ଆତା ଉଇନା କୁରୁଂସା ଅବୁଦି ଡାଉବାଇ' । ସା' ଉନାରଉ ଗୁତୁନ୍କୁରୁଂ ତୁର'ସେକ୍ ବାମ୍ତା ।”
ମୁଇ ସୁଲପ୍ବକ୍ ସୁ'ଉକୁନୁଂ ଜୁଲ'ସେକ୍ ଗୁତୁନ୍ ବଲ୍ଟାକି ଆରାକ୍ ଡ'ସେକ୍ ସୁଁସୁ ଗଂତୁନେଇ'
(ଲୁକ 6:43–46)
15“ନେଇ ବାବବାଦିଲେ ଡ'ସେକ୍ ଆପେ ନାଡାଇବାର୍ପୁଲେଇ ରେମଲେ ପେନ୍ବକ୍ ସାପ୍ତା । ସା' ପେ ସଇଗା ଡେଂସେକ୍ ଡୁକୁଲା । ମା'ଏ ପେନ୍ବକ୍ ସାକ୍ସେକ୍ ନେଇ ବାବବାଦିଲେ ଡ'ସେକ୍ ମେନ୍ଡାଲେସୁଗ ଦରମ୍ବାଇ' ଅସୁଇ'ତା । ମାତର୍ ମା'ଏନ୍ ଜିବନ୍ ବିତ୍ରେ ଆନ୍ଡ୍ରଂକାଲେସୁଗ ଡୁତା, ସା' ଆରେମଲେ ନାସାଇବାର୍ପୁଲେଇଉ ସାପ୍ତା । 16ମା'ଏ ଡେମ'କୁନୁଂ କାମ୍ ଗୁଲାଇ ଜୁଲ'ନା ମା'ଏ ମିବାଇ' ରେମଲେ ଡ'ସେକ୍ ପେ ମାକ୍ତୁପେ । ମାସା'ଡ'ନା ମୁଇ ସୁଲପ୍ବକ୍ ସୁ'ଉକୁନୁଂ ଜୁଲ'ନା ଗୁତୁନ୍ ମିବାଇ' ସୁଲପ୍ ଡ'ସେକ୍ ନେଇ' ମାକ୍ତୁନେଇ' । ତାର୍ମାଂବକ୍ ଅଂଗୁର୍ ମୁମୁଇ' ଆଗଂତୁନେଇ' ମାରି ଗୁରାଇ'ବାଇ' ସୁଲପ୍ବକ୍ ଲିଅଇ ଆସୁ'ଉତା ସା' ମୁମୁଇ' ଆଉଇତୁନେଇ' । 17ବଲ୍ଟା ସୁଲପ୍ବକ୍ ବଲ୍ଟାବାଇ' ସୁ'ଉତା ମାତର୍ ଇମ୍ବ'ନା ଅଲିରାକ୍ବାଇ' ସୁଲପ୍ ଗୁତୁନ୍ବକ୍ ଅଲିରାକ୍ବାଇ'ଉ ସୁ'ଉତା । 18ସା' ବଲ୍ଟା ସୁଲପ୍ବକ୍ ଅଲିରାକ୍ବାଇ' ମାରି ଅଲିରାକ୍ବାଇ' ସୁଲପ୍ବକ୍ ବଲ୍ଟାବାଇ' ଆସୁ'ଉତା । 19#ମାତିଉ 3:10; ଲୁକ 3:9ସା' ଇମ୍ବ'ନ୍ ସୁଲପ୍ବକ୍ ବଲ୍ଟାବାଇ' ଆସୁ'ଉତା ଗୁତୁନ୍ ଗୁଲାଇ ଗୁୟ'ସେକ୍ ସୁଂଅଁବକ୍ ବାଲ'ସୁଂତ । 20#ମାତିଉ 12:33ସା' ମୁଇ ସୁଲପ୍ବକ୍ ସୁଉ'କୁନୁଂ ଜୁଲ'ସେକ୍ ଗୁତୁନ୍ ବଲ୍ଟାକି ଆରାକ୍ ଡ'ସେକ୍ ସୁଁସୁ ଗଂତୁନେଇ', ଡୁ'ତୁନ୍ଉ ରେମଲେ ଡେମ'କୁନୁଂ କାମ୍ ଗୁଲାଇ ଜୁଲ'ନା ମା'ଏ ବଲ୍ବାଇ' କି ଅଲିରାକ୍ବାଇ' ଡ'ସେକ୍ ନେଇ' ମାକ୍ତୁନେଇ' ।”
ନିଂ ଆପେ ଆମାକ୍ତିଂ ଡ'ସେକ୍ ସୁଁସୁନା
(ଲୁକ 13:25–27)
21“ଅ ପ୍ରବୁ, ଅ ପ୍ରବୁ, ଡ'ସେକ୍ ଆନିଂ ଇସାଉ ସରଉ ୱାୟ'ସେକ୍ ଡୁକୁନୁଂ ରେମଲେ ମୁଇନ୍ଡାସା ସରଗ୍ରାଜିବକ୍ ଉଇ ଆଗଂତା । ମାତର୍ ସରଗ୍ବକ୍ ଡୁକୁନୁଂ ନେମ୍ବାନା ମୁନ୍ସୁଗ ଜାଜା କାମ୍ ଡେମ୍ତ ମା'ଏଉ ଉଇ ଗଂତା । 22ଆଗୁଲାଇ ରେମଲେ ବିସାର୍ନା ଡିନ୍ଡେମ୍ନା ଦିନ୍ବକ୍ ଅବୁଦିର ନିଂବକ୍ ସାକ୍ସେକ୍, ‘ଅ ପ୍ରବୁ, ଅ ପ୍ରବୁ, ନନା ଇମିବକ୍ ନେଇ ମାପ୍ରୁ ସୁନ'କୁନୁଂ ଅଂଅଁ'ସେକ୍ ଆରେମଲେ ସୁନ'କୁନେଇ ମାରି ନନା ଇମିବକ୍ ନେଇ ଆବୁତ୍ଲେ ରେମଲେନ୍ ଞେରିକୁରୁଂ ଞନ' ଅ'ତୁର'କୁନେଇ ମାରି ନନା ଇମିବକ୍ ନେଇ ଅବୁଦି କାବାକାବା ଡିନ୍ଡେମ୍ବାଇ' କାମ୍ ଡେମ' ଅସୁୟ'କୁନେଇ କି ଆରାକ୍?’ ଡ'ସେକ୍ ସୁନ୍ତ । 23ମାତର୍ ‘ନିଂ ଆପେ ଇନ୍ଡଇ'ଏସା ଆମାକ୍ତିଂ; ପେ ଅଲିରାକ୍ବାଇ' କାମ୍ ଡେମ'କୁନୁଂ ରେମଲେ, ପେ ନିଂକୁରୁଂ ସୁଲୁଂ ଡୁଂଆଁ’ ଡ'ସେକ୍ ନିଂ ଆମା'ଏ ଉନ୍ତା ସିଦାସିଦା ସୁନ'ବେ'ତିଂ ।”
ଇମ୍ବାୟ ବ'ସିଂରେମ୍
(ଲୁକ 6:47–49)
24ସା' ଜାଏସା ମୁଇନ୍ଡା ନିଂନା ତୁମ' ଅଂଅଁ'ସେକ୍ ନିଂ ସୁନ'କୁନୁଂସୁଗ ଗୁଲାଇ କାମ୍ ଡେମ୍ତ ଡ'ନା ମାଇ ବୁରେ ବାଗ୍ବକ୍ ଡିଂଅଁ ଅ'ରଇଁୟ'କୁନୁଂ ମୁଇନ୍ଡା ବୁଦିରେମ୍ସୁଗ । 25ଅବୁଦି ଉଇଡାଗ' ଗୁର୍ଡାଗ'ସେକ୍ ପୁର୍ଡାଗ୍ ବାଗ୍ବକ୍ ଡାଇ'ଗା' ମାରି ଅବୁଦି ମୁନା'ବାଇ' ଉଇଡାଗ'ସା' ଗୁତୁନ୍ ଡିଂଅଁବକ୍ ବାଂଗା', ମାତର୍ ଆତୁନ୍ ଡିଂଅଁ ଅ'ଲାର୍ ଆଗଂତା । ମାସା'ଡ'ନା ଗୁତୁନ୍ ଡିଂଅଁ ବଲ୍ଟା ବୁରେ ବାଗ୍ବକ୍ ମୁଲ୍ନା କନ୍ତି ବଡ'ସେକ୍ ଅ'ରଇଁୟ' ବୁଂଅଁ'କୁ । 26ମାରି ଜା ନିଂନା ତୁମ' ଆଅଂତ ମାରି ନିଂ ସୁନ'କୁନୁଂସୁଗ ଗୁଲାଇ କାମ୍ ଆଡେମ୍ତ ଡ'ନା ମାଇ ମୁଇନ୍ଡା ମାକ୍ନାବାଇ' ରେମସୁଗ । ମାସା'ଡ'ନା ଡୁ'ତୁନ୍ବାଇ' ରେମ ବାଲି ବାଗ୍ବକ୍ ଡିଂଅଁ ଅ'ରଇଁୟ'ତା । 27ଅବୁଦି ଉଇଡାଗ' ଗୁର୍ଡାଗ'ସେକ୍ ପୁର୍ଡାଗ୍ ବାଗ୍ବକ୍ ଡାଇ'ଗା' ମାରି ଅବୁଦି ମୁନା'ବାଇ' ଉଇଡାଗ'ସା' ଗୁତୁନ୍ ଡିଂଅଁବକ୍ ବାଂଗା', ସା' ଗୁତୁନ୍ ଡିଂଅଁ ଲାର'ସେକ୍ ଟାଟେଉ ବିଲ୍ଉଇଗା' ।
28 #
ମାର୍କ 1:22; ଲୁକ 4:32 ଜିସୁଲା କେନ୍ ତୁମ' ଗୁଲାଇ ସୁଁସୁ ଅ'ଡମ'ସା' ମାଇ ସୁନ'କୁନୁଂ ଅଂଅଁ'ସେକ୍ ରେମଲେ ଗୁଲାଇର ଅବୁଦି କାବା ଡିନ୍ଡେଂଆର୍ ଉଇଗା' । 29ମାସା'ଡ'ନା ଜିସୁଲା ଅବୁଦି ବପୁ ଡୁକୁନୁଂ ମୁଇନ୍ଡା ମୁନା'ରେମ୍ସୁଗ ଆମା'ଏ ଅମାଗ'କୁ ମାତର୍ ମାପ୍ରୁନା ନିୟମ୍ ଅମାକ୍ରେମେ ଇନ୍ଡଇ'ସା ଆମା'ଏ ଡୁ'ତୁନା ଅମାଗ' ଆଡୁତା ।
Aktualisht i përzgjedhur:
ମାତିଉ 7: BFW
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
CC BY-NC-ND 4.0