ମାତିଉ 8
8
କୁକୁମ୍ବାଇ' ରେମବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାର୍କ 1:40–45; ଲୁକ 5:12–16)
1ଜିସୁଲା କୁନ୍ଡାକୁରୁଂ ଆଲୁଂ ଜର୍ଗା' । ସା' ଅବୁଦି ରେମଲେ ଆମାଇ ତେଂଗି'ତେଂଗି' ଉଇଆର୍ଗା' । 2ଆଇ'ତୁନ୍ବେଲା ମୁଇନ୍ଡା କୁକୁମ୍ବାଇ' ରେମ ସାକ୍ସେକ୍ ଜିସୁନା ସାର୍ମ'କନ୍ଡେକ୍ ଏନ୍ଡିକ୍ସେକ୍ ସୁନ୍ଡ୍ରଗା' । ସୁନ୍ଡ୍ରକ୍ସେକ୍ ମାଇ ସୁନ' “ଅ ପ୍ରବୁ, ଆନ ମୁନ୍ ଡୁକୁନା ଆନିଂ ବଲ୍ ଡିନ୍ଡେମ୍ ଗଂତୁନ” ଡ'ସେକ୍ ସୁନ' । 3ସା' ଜିସୁଲା ଆମାଇ ତୁରାମ'ସେକ୍ “ଆନ ବଲ୍ ଡିନ୍ଡେମ୍ପୁଲେଇ ଆନିଂ ମୁନ୍ ଡୁତା, ନ ବଲ୍ ଡେମା” ଡ'ସେକ୍ ସୁନ' । ସା' ଆମାଇ ରେ'କୁନୁଂ ଗୁଲାଇ ବୁ'ଗ୍ଉଇଗା'ସା' ଆଇ'କୁ ମାଇ ବଲ୍ ଡେଂଗା' । 4ସା' ଜିସୁଲା ଆମାଇ ସୁନ' “ଜୁ, ନ ଆଜାଏସା ଆସୁନ' । ମାତର୍ ନ ପୁଜାରିନ୍ବକ୍ ଉଇସେକ୍ ନିଂନା ଞେରି ବଲ୍ ଡେଂଗା' ଡ'ସେକ୍ ସାକିପୁଲେଇ ଆମାଇ ଅସୁ'ୟା । ମାରି ମସାନା ନିୟମ୍ବକ୍ ଲେକ୍ଲ'କୁନୁଂସୁଗ ମୁଇ ଗିଗେ ଗେ । ଡୁ'ତୁନ୍ ଡେମ'ନା ମାଇ ବଲ୍ ଡେଂଗା' ଡ'ସେକ୍ ଗୁଲାଇର ମାକ୍ତ” ଡ'ସେକ୍ ସୁନ' ।
ଜିସୁଲା ଆରମିୟନା ସଇନିକଲେନ୍ ମୁନା'ରେମ୍ନା ଗୁପାମ୍ରେମ୍ବକ୍ ବଲ୍ ଡିନ୍ଡେମ୍ଡେନ୍
(ଲୁକ 7:1–10)
5ଜିସୁଲା କପର୍ନାଉମ୍ ମୁନା'ଉଂଗମ୍ବକ୍ ଡେଲ'ସା' ଆତା ରମିୟ ସଇନିକଲେନ୍ ମୁଇନ୍ଡା ମୁନା'ରେମ୍ ମାଇନ୍ବକ୍ ସାକ୍ସେକ୍ ଆମାଇ ସୁନ', 6“ଅ ପ୍ରବୁ, ନିଂନା ଗୁପାମ୍ରେମ୍ ମୁଇନ୍ଡା ଗୁଇ'ସାର୍ତିଲ' ଗୁଇ'ସାର୍ସୁଂଅଁ'ସେକ୍ ଅବୁଦି ସିକ୍ସେକ୍ ଡିଂଅଁବକ୍ଉ ଡିରି'ଗୁତା” ଡ'ସେକ୍ ସୁନ' । 7ସା' ଜିସୁଲା, “ନିଂ ସାକ୍ସେକ୍ ଆମାଇ ବଲ୍ ଡେମ୍ତିଂ” ଡ'ସେକ୍ ସୁନ' । 8ମାତର୍ ସଇନିକ୍ଲେନ୍ ମୁନା'ରେମ୍ ସୁନ', “ଅ ପ୍ରବୁ, ନ ମୁଇନ୍ଡା ଅବୁଦି ମୁନା'ରେମ୍ସା' ନ ନିଂନା ଡିଂଅଁବକ୍ ସୁସାପ୍ପୁଲେଇ ନସୁଗ ନିଂ ମୁନା'ରେମ୍ ଆରାକ୍ । ମାତର୍ ନ ମୁଇ ତୁମ' ସୁନ'ବେ', ନିଂନା ଗତିରେମ୍ ବଲ୍ ଡେଂଉଇତା । 9ମାସା'ଡ'ନା ନିଂ ମୁଇନ୍ଡା ଅଦିକାର୍ ଡୁକୁନୁଂ ମୁନା'ରେମ୍ନା ଆଲୁଂ କାମ୍ ଡେମ'ତିଂ ମାରି ନିଂନା ଆଲୁଂସା କାମ୍ରେମ୍ ଡୁତା । ସା' ନିଂ ଆମୁଇନ୍ଡା ଉୟା ଡ'ନା ମାଇ ଉଇତା; ମାରି ଆପାଲ୍ ମୁଇନ୍ଡା ସା'ବା ଡ'ନା ମାଇ ସାପ୍ତା; ମାରି ଆନିଂନା ଗତିରେମ୍ ମା ଡେମ୍ ଡ'ନାସା ମାଇ ଗୁତୁନ୍ ଗୁଲାଇ ଡେମ୍ତ” ଡ'ସେକ୍ ସୁନ' । 10ଜିସୁଲା ମାଇ ସୁନ'କୁନୁଂ ଅଂଅଁ'ସେକ୍ କାବାକାବା ଡେଂସେକ୍ ଆମାଇ ତେଂଗି'ତେଂଗି' ସୁସାପ୍ଡେଂକୁନୁଂ ରେମଲେବକ୍ ସୁନ', “ଜୁ, ନିଂ ନେଇନା ଇସ୍ରାଏଲ୍ ରେମଲେନ୍ ବିତ୍ରେ ମାଇସୁଗ ବିସ୍ବାସ୍ ଡେମ'କୁନୁଂ ଆଜାଏସା ଇନ୍ଡଇ'ସା ଜୁଜୁ ଅରଇ' ଡ'ସେକ୍ ନିଂ ଆପେ ସତଇସା ସୁନ'ତିଂ । 11#ଲୁକ 13:29ନିଂ ଆପେ ମାରି ସୁନ'ତିଂ, ଜାଜା ଜିଉଦିରେମ ଆରାକ୍ ଡୁ'ତୁନ୍ବାଇ' ରେମଲେ ଅବୁଦିର ଗୁଲାଇ କୁନ୍ଡାକୁରୁଂ ସରଗ୍ରାଜିବକ୍ ସାକ୍ସେକ୍ ଅବ୍ରାଆମ୍ଲା, ଇସାକ୍ଲା ମାରି ଜାକୁବ୍ଲାବୁରଂ ସାର୍ଦା ଡେଂସେକ୍ ତିରେ ଲେଇ'ତା । 12#ମାତିଉ 22:13; 25:30; ଲୁକ 13:28ମାତର୍ ମାପ୍ରୁନା ରାଜି ଇସ୍ରାଏଲ୍ ରେମଲେପୁଲେଇ ଡୁକୁଗା' ଡ'ନାସା ମା'ଏ ଆମାପ୍ରୁ ବିସ୍ବାସ୍ ଆଡେମ୍ତସା' ଆମା'ଏ ବାଇରି ଞୁର୍ବକ୍ ରାନ୍ଡେଲ' ବେ'ତ । ସା' ମା'ଏ ଆତା ଉକ୍ସେ' ୱାଇସେକ୍ସେକ୍ ଗେନ୍ଡ୍ରେଇ'ସି ଗେନ୍ଡ୍ରେଇ'ବକ୍ସେକ୍ ଇସାଉ ଡୁତା” ଡ'ସେକ୍ ସୁନ' ।
13ମାରି ଜିସୁଲା ଆତୁନ୍ ସଇନିକଲେନ୍ ମୁନା'ରେମ୍ ସୁନ', “ନ ଉୟା, ନ ମି ବିସ୍ବାସ୍ ଡେମ'ତୁନ ଡୁ'ତୁନାଉ ଡେମେଇ' ” ଡ'ସେକ୍ ସୁନ' । ଜିସୁଲା ଡୁ'ତୁନ୍ ଆମାଇ ସୁନ'କୁନୁଂବେଲାଉ ମାଇନା ଗତିରେମ୍ ଆଇ'କୁ ବଲ୍ ଡେଂଗା' ।
ଜିସୁଲା ଅବୁଦି ସିରେମ୍ବକ୍ ବଲ୍ ଡିନ୍ଡେମ୍ଡେନ୍
(ମାର୍କ 1:29–34; ଲୁକ 4:38–41)
14ତିର୍ଗି' ଜିସୁଲା ପିତର୍ନା ଡିଂଅଁବକ୍ ସା'ଗା', ସା' ଆତା ପିତର୍ନା କିୟାଁର୍ ସିବାଂସେକ୍ ଡିରି'କୁନୁଂ ଜୁଲ' । 15ସା' ଜିସୁଲା ଆମାଇନା ତିତି ତୁରାମ'ସା' ମାଇନା ସି ବାନି ଡେଂଉଇଗା' । ମାରି ମାଇ ବଲ୍ ଡେଂସେକ୍ ଆମା'ଏ ରାଂଅଁ'ବିବେ' ମୁଲାୟ' ।
16ମାରି ମୁନ୍ଡି'ଗା'ସା' ବୁତ୍ ସବ'କୁନୁଂ ଅବୁଦି ରେମଲେବକ୍ ରେମଲେ ମାଇନ୍ବକ୍ ରିଂଅଁ' ସା'ଗା' । ସା' ମାଇ ତୁମ'ବୁରଂଉ ଆବୁତ୍ଲେ ଞନ' ମାରି ଆଗୁଲାଇ ସିରେମ୍ବକ୍ସା ବାନି ଡେମ' । 17ସା' ଇନ୍ତେକନ୍ଡେକ୍ ଜିସାୟ ଡ'କୁନୁଂ ବାବବାଦିଲା ସୁନ'କୁନୁଂ ଗୁଲାଇ ସତ୍ ଡିନ୍ଡେମ୍ପୁଲେଇଉ ଜିସୁଲା କେନ୍ କାମ୍ ଗୁଲାଇ ଡେମ'ତା । ମାଇ ମା ସୁନ'କୁ ଡ'ନା:
“ମାଇ ନେଇ'ନା ସି ଗୁଲାଇ ମାଇନା ବାଗ୍ବକ୍ ରିଂଗା' ।
ମାରି ନେଇ'ନା ଦୁକକସ୍ଟ ଗୁଲାଇ ମାଇନା ବାଗ୍ବକ୍ ବୁଂଅଁ'” ଡ'ସେକ୍ ସୁନ'ବୁଂଅଁ' ।
ଜିସୁନା ତେଂଗି' ଉଇପୁଲେଇ ମୁନ୍ଡେଂକୁନୁଂ ରେମଲେ
(ଲୁକ 9:57–62)
18ମାରି ମାଇନା ସାର୍ବେର୍ତି ଅବୁଦି ରେମଲେ ରୁନ୍କୁନୁଂ ଜୁଲ'ସେକ୍ ଆମାଇନା ସିସ୍ୟଲେ ସମ୍ଦର୍କିନ୍ଡାକ୍ ଇନ୍ସିପାଟ୍ ପ'ଡା ଡ'ସେକ୍ ସୁନ' । 19ସା' ଆଇ'ତୁନ୍ବେଲା ଜିଉଦିରେମଲେନା ନିୟମ୍ ଅମାକ୍ରେମ୍ ମୁଇନ୍ଡା ମାଇନ୍ବକ୍ ସାକ୍ସେକ୍ ସୁନ', “ଅ ଗୁରୁ, ନ ଆମ୍ବ' ଉଇନାସା ନିଂ ଆନ ତେଂଗି'ତେଂଗି' ସାପ୍ତିଂ” ଡ'ସେକ୍ ସୁନ' । 20ସା' ଜିସୁଲା ଆମାଇ ସୁନ', “କଲ୍ୟାଲେ ଡୁକୁପୁଲେଇ ଲାଗ୍ଲାଗ୍ ଡୁତା ମାରି ପୁରି'ସୁରଇ'ଏ ଡୁକୁପୁଲେଇ ଇଁନ୍ସାକ୍ପି' ଡୁତା । ମାତର୍ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ ଡୁକୁପୁଲେଇ ଇ'କିସା ଜାଗା ଆରାକ୍” ଡ'ସେକ୍ ସୁନ' ।
21ସା' ଆଇ'ତୁନ୍ବେଲା ସିସ୍ୟଲେନ୍ ବିତ୍ରେ ମାରି ମୁଇନ୍ଡା ଆଜିସୁଲା ସୁନ', “ଅ ପ୍ରବୁ, ନିଂ ଡିଂଅଁବକ୍ ଇକ୍ସେକ୍ ମାରି ନେମ୍ବା ଗୁଇ'ଗା' ଡ'ନା ଆମାଇ ରାଇ'ସାଂ ରିଂସେକ୍ ତିର୍ଗି' ଆନ ତେଂଗି' ସୁସାପ୍ପୁଲେଇ ଆନିଂ ସୁଁ” ଡ'ସେକ୍ ସୁନ' ।
22ମାତର୍ ଜିସୁଲା ଆମାଇ ସୁନ', “ନ ଆନିଂ ତେଂଗି' ସା'ବା; ଆନିଂ ମମୁନାକ୍ ଡୁକୁନୁଂ ରେମଲେ ଗୁଇ'କୁନୁଂ ରେମଲେବକ୍ ରାଇ'ସାଂ ରିଂଏଇ'ଲେଇ” ଡ'ସେକ୍ ସୁନ' ।
ସମ୍ଦର୍କିନ୍ଡାକ୍ବକ୍ ଅବୁଦି ଉଇଡାଗ' ଗୁର୍ଡାଗ'କୁନୁଂ ଜିସୁଲା ଅଜୁଜୁ' ଡେନ୍
(ମାର୍କ 4:35–41; ଲୁକ 8:22–25)
23ତିର୍ଗି' ଜିସୁଲା ମୁଇ ଡଂଗାବକ୍ ଡାଇ'ଗା', ସା' ମାଇନା ସିସ୍ୟଲେସା ମାଇବୁରଂ ଉଇଗା' । 24ଆଇ'ତୁନ୍ବେଲା ସମ୍ଦର୍କିନ୍ଡାକ୍ବକ୍ ଅବୁଦି ଉଇଡାକ୍ ଗୁର୍ଡାଗ୍ ସା'ଗା', ସା' ଡଂଗା ଲୁବ୍ଡାଗ୍ ଉଇଡେଂକୁନୁଂସୁଗ ଡେଂଗା' । ମାତର୍ ଜିସୁଲା ଲେମ'କୁ । 25ସା' ମା'ଏ ମାଇନ୍ବକ୍ ସାକ୍ସେକ୍ ଆମାଇ ରୁକ୍ତିଡ'ସେକ୍ ସୁନ', “ଅ ପ୍ରବୁ, ଆନେଇ ରକ୍ୟା ଡେମ୍! ନେଇ ଗୁଇ'ତୁନେଇବେ” ଡ'ସେକ୍ ସୁନ' ।
26ସା' ଜିସୁଲା ଆମା'ଏ ସୁନ', “ପେ ମାସା' ଆନିଂ ବଲ୍ ବିସ୍ବାସ୍ ମଡିନେମ୍ ଆଇ'କେନ୍ ବୁତୁଂଗୁତୁପେ?” ଡ'ସେକ୍ ସୁନ' । ମାରି ଜିସୁଲା ମୁରାକ୍ସେକ୍ ଆଉଇଡାକ୍ ମାରି ଆସମ୍ଦର୍କିନ୍ଡାକ୍ ଜୁ' ଡୁକୁଲା ଡ'ସେକ୍ ତର୍ଞେକ୍ସେକ୍ ସୁନ', ସା' ଗୁଲାଇ ଜୁଜୁକ୍ ଉଇଗା' । 27ସା' ଗୁତୁନ୍ ଜୁଲ'ସେକ୍ ସିସ୍ୟଲେ କାବା ଡିନ୍ଡେଂଆର୍ ଉଇଗା' । ମାରି ମା'ଏ ସୁନ', “କୁନା ମିବାଇ' ରେମସା'ୟାଂ? ଜୁ, ଉଇଡାକ୍ ଗୁର୍ଡାଗ୍ ମାରି ସମ୍ଦର୍କିନ୍ଡାକ୍ସା ମାଇନା ତୁମ' ଅଂଅଁ'ତା” ଡ'ସେକ୍ ସୁନ' ।
ଆଇମ୍ବାୟ ବୁତ୍ ସବ'କୁନୁଂ ରେମ୍ବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାର୍କ 5:1–20; ଲୁକ 8:26–39)
28ତିର୍ଗି' ଜିସୁଲା ସମ୍ଦର୍କିନ୍ଡାକ୍ ଇନ୍ସି ଡୁକୁନୁଂ ଗାଦରିୟ ଜିଲାନା ରେମଲେନ୍ବକ୍ ଡେଲ' । ଆଇ'ତୁନ୍ବେଲା ବୁତ୍ ସବ'କୁନୁଂ ଇମ୍ବାୟ ରାଇ'ସାଂବକ୍କୁରୁଂ ତୁର୍ସେକ୍ ଆଜିସୁଲା ଅଲି'ଗା' । ମାଇପା ଆରେମଲେ ଅବୁଦି କସ୍ଟ ବେଡ'କୁସା' ଆତୁନ୍ରି'ତା ଜାଏସା ଉଇ ଇ' ଆଗଂତା ଡେଂକୁ । 29ମାରି ମାଇପା କିରକ୍ସେକ୍ ସୁନ', “ଅ ମାପ୍ରୁନା ଉଁ'ଉଁ, ନବୁରଂ ନାଂନା ମା କାମ୍ ଡୁତାସା' ନ ସା'ଗୁତୁନ? କସ୍ଟ ବିବେ'ନା ବେଲା ଡିନ୍ଡେମ୍ ଅର'ଏଉ ନ ଆନାଂ କସ୍ଟ ବିବେ' ଆକେ ସାକ୍ନ ଇ?” ଡ'ସେକ୍ ସୁନ' ।
30ମାରି ମା'ଏନ୍କୁରୁଂ ଇ'କି ଡଗ୍ରି'ତା ଅବୁଦି ରାସିବି'ଡେ ଡୁକୁ । 31ସା' ଆଇ'ତୁନ୍ବେଲା ବୁତ୍ଲେ ଆଜିସୁଲା ସୁନ୍ଡ୍ରକ୍ସେକ୍ ସୁନ', “ନ ଆନେଇ ଅ'ତୁର୍ତୁନ ଡ'ନା ଗୁତୁନ୍ ରାସିବି'ଡେନ୍ବକ୍ ବେନ୍ଟାୟ'ବେ'” ଡ'ସେକ୍ ସୁନ' ।
32ସା' ଜିସୁଲା ଆମା'ଏ “ଆତା ଉୟା” ଡ'ସେକ୍ ସୁନ' । ସା' ମାଇପାନ୍କୁରୁଂ ତୁର୍ସେକ୍ ଗିବି'ଡେନ୍ବକ୍ ଗାଇଗା' । ସା' ଗିବି'ଡେ କୁନ୍ଡା ବାଗ୍ବକ୍କୁରୁଂ ଅ'ଉର୍ସେକ୍ କୁନ୍ଡାପାଲି ସମ୍ଦର୍କିନ୍ଡାକ୍ବକ୍ ଅଲକ୍ସେକ୍ ଲୁବ୍ଡାକ୍ଆର୍ସେକ୍ ଗୁଗୁଇ' ଆର୍ଗା' । 33ସା' ଗୁଗୁଇ'ରେମ୍ ଉଂଗମ୍ବକ୍ ଉର'ଉର' ଉଇସେକ୍ ଆତା ମାମା ଡେଂଗା' ମାରି ଆତୁନ୍ ବୁତ୍ ସବ'କୁନୁଂପା ମାମା ଡେଂଗା' ଗୁତୁନ୍ ଗୁଲାଇ ଆଉଂଗମ୍ରେମ୍ ଅ'ଅଂଅଁ' ବେଡ' । 34ସା' ଗୁତୁନ୍ ଅଂଅଁ'ସେକ୍ ଉଂଗମ୍ରେମ୍ ଗୁଲାଇର ଆଜିସୁଲା ଜୁଜୁପୁଲେଇ ଉଇଗା' । ମାରି ଆମାଇ ଜୁଲ'ସେକ୍ କେନ୍ ଜାଗାକୁରୁଂ ନ ଡୁଂଆଁ ଡ'ସେକ୍ ସୁନ୍ଡ୍ରବାଲୁକ୍ସେକ୍ ସୁନ' ।
Aktualisht i përzgjedhur:
ମାତିଉ 8: BFW
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
CC BY-NC-ND 4.0