ମାତିଉ 9
9
ଗୁଇ'ସାର୍ତିଲ' ଗୁଇ'ସାର୍ସୁଂଅଁ'କୁନୁଂବାଇ' ରେମବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାର୍କ 2:1–12; ଲୁକ 5:17–26)
1ସା' ଜିସୁଲା ଡଂଗାବକ୍ ଲେଇ'ସେକ୍ ସମ୍ଦର୍କିନ୍ଡାକ୍ ଇନ୍ସି ପକ୍ସେକ୍ ମାଇନା ନିଜର୍ନା ଉଂଗମ୍ବକ୍ ଉଇଗା' । 2ସା' ଆତା ଗୁଇ'ସାର୍ତିଲ' ଗୁଇ'ସାର୍ସୁଂଅଁ'କୁନୁଂବାଇ' ଆମୁଇନ୍ଡା ରେମ ଜିସୁନ୍ବକ୍ ଆ'ଇରସୁଗ ଡୁନ'ରିଂଅଁ' ସା'ଗା' । ସା' ଜିସୁଲା ମା'ଏନ୍ ବିସ୍ବାସ୍ ଜୁଲ'ସେକ୍ ଆତୁନ୍ ସିଲା ସୁନ', “ଅ ମେ', ନ ଆବୁତୁଂଗା', ନନା ପାପ୍ ଗୁଲାଇ ନିଂ କେମା ଡେମ'ନିଂ” ଡ'ସେକ୍ ସୁନ' ।
3ମାତର୍ ଜିଉଦିରେମଲେନା ନିୟମ୍ ଅମାକ୍ରେମେ ଏନ୍ତୁକ୍ର ଗୁତୁନ୍ ଅଂଅଁ'ସେକ୍, “ଜୁ, କୁନା ମାପ୍ରୁସା' ଇ?” ମାପ୍ରୁସୁଗ ସୁନ'ତା ଡ'ସେକ୍ ମା'ଏନ୍ ଜିବନ୍ବକ୍ ଏତ୍ଗା' ।
4ମା'ଏ ଏତ୍କୁନୁଂ ଜିସୁଲା ମାଗ'ସେକ୍ “ପେ ମାସା' ପେନ୍ ଜିବନ୍ବକ୍ ଡି'କେନ୍ ଅଲିରାକ୍ବାଇ' ଏତ୍ଗୁତୁପେ? 5ନନା ପାପ୍ ଗୁଲାଇ କେମା ଡେଂଗା' ଡ'ସେକ୍ ଆମାଇ ସୁଁସୁନା ଅଲୁ କି ନ ତଗ୍ଡାକ୍ସେକ୍ ଉରିଂ ଡ'ସେକ୍ ସୁଁସୁନା ଅଲୁ, ଇମ୍ବ'ନା ଅଲୁ?” ଡ'ସେକ୍ ସୁନ' । 6କେନ୍ ଦର୍ତନିବକ୍ ରେମଲେନା ପାପ୍ ଗୁଲାଇ କେମା ଡିନ୍ଡେମ୍ପୁଲେଇ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁନ୍ବକ୍ ବପୁ ଡୁତା, ଗୁତୁନ୍ ପେ ମାଗ'ନାଉ ଡେନ୍ତା । ଡୁ'ତୁନ୍ ସୁନ'ସେକ୍ ମାଇ ଆତୁନ୍ ଗୁଇ'ସାର୍ତିଲ' ଗୁଇ'ସାର୍ସୁଂଅଁକୁନୁଂଆଁ ସୁନ', “ଅ ମେ', ମୁରାଗା', ମାରି ନନା ବିନେସାକ୍ ଜୁଗ'ସେକ୍ ଇ'ଡା” ଡ'ସେକ୍ ସୁନ' । 7ସା' ମାଇ ଉନ୍ତ୍କୁରୁଂ ମୁରାକ୍ସେକ୍ ଡିଂଅଁବକ୍ ଇ'ଗା' । 8ସା' ଗୁତୁନ୍ ଜୁଲ'ସେକ୍ ରେମଲେ ଗୁଲାଇର ଅବୁଦି ବୁତୁଂଆର୍ଉଇଗା' । ମାରି ଡି'କେନ୍ ଡିନ୍ଡେମ୍ପୁଲେଇ ମାପ୍ରୁ ଆରେମଲେ ବପୁ ବେଡ'ସା' ମା'ଏ ଆମାପ୍ରୁ ସୁନ୍ଡ୍ରଗା' ।
ଆମାତିଉଲା ୱାୟ'ତା
(ମାର୍କ 2:13–17; ଲୁକ 5:27–32)
9ଉନ୍ତ୍କୁରୁଂ ଜିସୁଲା ଉଇରେମ୍ ସିସ୍ତୁ ଲୁଲୁ'ନା ଡିଂଅଁବକ୍ ମାତିଉ ଡ'ସେକ୍ ମୁଇନ୍ଡା ଲେଇ'କୁନୁଂ ଜୁଲ'ସେକ୍ ନ ଆନିଂ ତେଂଗି' ସା'ବା ଡ'ସେକ୍ ଆମାଇ ସୁନ' । ସା' ମାଇ ତଗ୍ଡାକ୍ସେକ୍ ଆଜିସୁଲା ତେଂଗି' ଉଇଗା' ।
10 #
ଲୁକ 15:1,2 ସା' ତିର୍ଗି' ଜିସୁଲା ମାତିଉନା ଡିଂଅଁବକ୍ ସୁସୁମ୍ପୁଲେଇ ଲେଇ'କୁ । ଆଇ'ତୁନ୍ବେଲା ସିସ୍ତୁ ଲୁଲୁ'ରେମ୍ ମାରି ପାପ୍ବାଇ' ରେମଲେ ଅବୁଦିର ସାକ୍ସେକ୍ ଜିସୁଲା ମାରି ମାଇନା ସିସ୍ୟଲେବୁରଂ ସୁସୁମ୍ପୁଲେଇ ତିରେ ଲେଇ'ଗା' । 11ସା' ପାରୁସି ରେମଲେ ଗୁତୁନ୍ ଜୁଲ'ସେକ୍, “ପେନ୍ ଗୁରୁ ମାସା' ସିସ୍ତୁ ଲୁଲୁ'ରେମ୍ ମାରି ପାପ୍ବାଇ' ରେମଲେବୁରଂ ତିରେ ଲେଇ'ସେକ୍ ସୁସୁମ୍ ଡେନ୍ତା?” ଡ'ସେକ୍ ଆଜିସୁନା ସିସ୍ୟଲେ ସୁନ' ।
12ସା' ଜିସୁଲା ଗୁତୁନ୍ ଅଂଅଁ'ସେକ୍, “ବଲ୍ବାଇ' ରେମଲେପୁଲେଇ ଡାକ୍ଟର୍ ଦର୍କାର୍ ଆରାକ୍ ମାତର୍ ସିବାଇ' ରେମପୁଲେଇଉ ଡାକ୍ଟର୍ ଦର୍କାର୍ । 13#ମାତିଉ 12:7ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ତୁମ' ମା ଡ'ସେକ୍ ପେ ମାଗ'ନାଉ ଡେନ୍ତା । ଆତା ମା ଲେକ୍ଲ'ତା ଡ'ନା, ‘ପେ ଗିଗେ ଗେଲ'କୁନୁଂ ଆନିଂ ଦର୍କାର୍ ଆରାକ୍ ମାତର୍ ପେ ଆପାଲ୍ ରେମଲେ ଲିବିସୁପ୍ବା, ଗୁତୁନାଉ ଆନିଂ ଦର୍କାର୍ ।’ ମାସା'ଡ'ନା ଦରମ୍ବାଇ' ରେମଲେବକ୍ ନିଂ ୱାଇ ସାକ୍ ଆଡୁତିଂ ମାତର୍ ଜାଜା ପାପ୍ବାଇ' ରେମଲେ ଡୁତା ଆମା'ଏଉ ୱାଇପୁଲେଇ ନିଂ ସା'ଗୁତିଂ” ଡ'ସେକ୍ ସୁନ' ।
ଆଂଡାକ୍ସ ପାର୍ତନା ଡିନ୍ଡେମ୍ନା
(ମାର୍କ 2:18–22; ଲୁକ 5:33–39)
14ଆଇ'ତୁନ୍ବେଲା ଜଅନ୍ନା ସିସ୍ୟଲେ ଜିସୁନ୍ବକ୍ ସାକ୍ସେକ୍ ସୁନ', “ନେଇ ମାରି ପାରୁସିଦଲ୍ନା ରେମଲେ ଆଂଡାକ୍ସ ପାର୍ତନା#9:14 ଉପାସ୍ ଡେମ'ତୁନେଇ ଡେମ'ତୁନେଇ । ମାତର୍ ନନା ସିସ୍ୟଲେ ମାସା' ନେଇସୁଗ ଆଂଡାକ୍ସ ପାର୍ତନା ଆଡେମ୍ତ?” ଡ'ସେକ୍ ସୁନ' । 15ସା' ଜିସୁଲା ଆମା'ଏ ସୁନ' “ଆର୍ଜୁନ୍ରେମ୍ ଆଇ ଦିନ୍ ପନ୍ତେକ୍ ମାଇନା ସଂରେମ୍ବୁରଂ ଡୁତା, ଆଇ'ତୁନ୍ ଦିନ୍ ପନ୍ତେକ୍ ମାଇନା ସଂରେମ୍ ଆସିନ୍ତାତ । ମାତର୍ ଆ'ଇବେଲା ଆଆର୍ଜୁନ୍ରେମ୍ ସଂରେମେନ୍କୁରୁଂ ରିଂଅଁ' ଡୁଂତା, ଆଇ'ତୁନ୍ବେଲା ମାଇନା ସଂରେମେ ଆଂଡାକ୍ସ ପାର୍ତନା ଡେମ୍ତ ।”
16“ଇନ୍ଡଇ'ଏସା ଜାସା ତିମେ ଇମ୍ପ' ଇ'କି ଗାର'ସେକ୍ ବାୟୁର୍ ଇମ୍ପ' ଗାର୍କୁନୁଂବକ୍ ମିସାୟ'ସେକ୍ ଆସ'କୁତ । ମାସା'ଡ'ନା ସ'କୁଲ'ନା ତମ୍ଡାକ୍ବେଲା ତିମେ ଇମ୍ପ' ମାକିମ୍ସାକ୍ ଉଇତା ମାରି ବାୟୁର୍ ଇମ୍ପ' ଅଦିକ୍ ଅଦିକ୍ ଗାର୍ ଉଇତା । 17ମାରି ରେମଲେ ତିମେ ଅଂଗୁର୍ଡାଗ୍ ଇସାବୁରଂ ଅ'ରଇଁୟ'କୁନୁଂ ବାୟୁର୍ ତୁମ୍ବାବକ୍ ସୁର' ଆବୁଂତ । ସୁର'ନା ଗୁତୁନ୍ ତୁମ୍ବା ଲୁବୁଂସେକ୍ କାନାକ୍ଉଇତା । ମାରି ଅଂଗୁର୍ଡାଗ୍ସା ଡୁଂଅଁ'ଉଇତା । ଡୁ'ତୁନ୍ସା' ମା'ଏ ଇସାବୁରଂ ଅ'ରଇଁୟ'କୁନୁଂ ତିମେ ତୁମ୍ବାବକ୍ଉ ତିମେ ଅଂଗୁର୍ଡାଗ୍ ବୁଂତ । ଡୁ'ତୁନ୍ ଡ'ନା ଅଂଗୁର୍ଡାଗ୍ ମାରି ତୁମ୍ବାସା ବଲ୍ ଡୁତା” ଡ'ସେକ୍ ସୁନ' ।
ଗୁଇ'କୁନୁଂ ସେଲାନ୍ବକ୍ ମାରି ବାର ବରସ୍ ସତକ୍ ଡେଂସେକ୍ ମତେପ୍ବାର୍ ଡୁକୁନୁଂ ସେଲାନ୍ବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାର୍କ 5:21–43; ଲୁକ 8:40–56)
18ମାରି ଜିସୁଲା କେନ୍ ଗୁଲାଇ ତୁମ' ସୁଁସୁବେଲା ଜିଉଦିରେମଲେନ୍ ପାର୍ତନା ଡିଂଅଁନା ମୁଇନ୍ଡା ମୁନା'ରେମ୍ ସା'ଗା' । ସାକ୍ସେକ୍ ମାଇ ଜିସୁନା ସୁମଂକୁରୁଂ ଏନ୍ଡିକ୍ସେ'ଗା ସୁନ୍ଡ୍ରକ୍ସେକ୍ ସୁନ', “ନିଂନା ସେଲାମ୍ବୁଇ'ଗୁ ମୁଇନ୍ଡା ଆ'ନା ଗୁଇ'ଉଇଗା' । ମାତର୍ ନ ସାକ୍ସେକ୍ ଆମାଇ ତିତିବୁରଂ ତୁରାମ'ନା ମାଇ ବୁରତା” ଡ'ସେକ୍ ସୁନ' । 19ସା' ଜିସୁଲା ଉନ୍ତ୍କୁରୁଂ ତଗ୍ଡାକ୍ସେକ୍ ମାଇବୁରଂ ତିରେ ଉଇଗା' । ମାଇନା ସିସ୍ୟଲେସା ଆମାଇ ତେଂଗି' ଉଇଗା' । 20ମା'ଏ ଉଇଡେଂକୁନୁଂବେଲା ବାର ବରସ୍ ପନ୍ତେକ୍ ସତକ୍ ଡେଂସେକ୍#9:20 ବାର ବରସ୍ ପନ୍ତେକ୍ ବନି ତୁର୍ସେକ୍ ମତେପ୍ବାର୍ବାଇ' ମୁଇ ସେଲାନ୍ଲା ମାଇନ୍ବକ୍ ସା'ଗା' । ମତେପ୍ବାର୍ବାଇ' ଡୁକୁନୁଂ ମୁଇନ୍ଡା ସେଲାନ୍ଲା ମାଇନ୍ବକ୍ ସା'ଗା' । ମାରି ଗୁତୁନ୍ ସେଲାନ୍ଲା ଜିସୁନା ଗି'ଡାଂକୁରୁଂ ସାକ୍ସେକ୍ ମାଇ ଅଲୁ'କୁନୁଂ ସାକ୍ଡିଂସକାବକ୍ ଆଲାମ' ବେଡ' । 21ମାସା'ଡ'ନା “ମାଇନା ସକାବକ୍ ଆଲାମ' ବେଡ'ନା ନିଂ ବାନି ଡେନ୍ତିଂ” ଡ'ସେକ୍ ଗୁତୁନ୍ ସେଲାନ୍ଲା ନିଜର୍ନା ଜିବନ୍ବକ୍ ଏତ୍କୁ । 22ସା' ଜିସୁଲା ଆନ୍ଡେଇଁକିକ୍ସେକ୍ ଆମାଇ ଜୁଲ'ସେକ୍, “ଅ କୁଇ', ଆବୁତୁଂଗା'! ନ ଆନିଂ ବିସ୍ବାସ୍ ଡେମ'ତୁନସା' ନ ବାନି ଡେଂନ” ଡ'ସେକ୍ ସୁନ' । ସା' ଗୁତୁନ୍ ସେଲାନ୍ଲା ଉନ୍ତ୍ବାଂସା' ବଲ୍ ଡେଂଗା' ।
23ତିର୍ଗି' ଜିସୁଲା ଗୁତୁନ୍ ମୁନା'ରେମ୍ନା ଡିଂଅଁବକ୍ ଡେଲ' । ସା' ଆତା କିନ୍ଡିଂସାଂଅଁର୍ ବୁକ୍ବୁକ୍ରେମ୍ବକ୍ ମାରି ଉକ୍ସେ' ୱାଇସେ'କୁନୁଂ ରେମଲେବକ୍ ଜୁଲ' । 24ସା' ଆମା'ଏ “ପେ ବାଇରି ତୁରା । କେନ୍ ସେଲାମ୍ବୁଇ'ଗୁଲା ଗୁଇ' ଆଡୁତା ମାତର୍ ମାଇ ଲେମ'ଗୁତା” ଡ'ସେକ୍ ଜିସୁଲା ସୁନ' । ସା' ଗୁତୁନ୍ ଅଂଅଁ'ସେକ୍ ରେମଲେ ଆମାଇ ଡୁଡଲ'ସେକ୍ ଅ'ଗେୱାଲ' ବେଡ' । 25ମାତର୍ ଆରେମଲେ ବାଇରି ଅ'ତୁର'ସେ'ଗା' ଜିସୁଲା ଗୁତୁନ୍ ଗୁଇ'କୁନୁଂଆଁ ଡୁକୁନୁଂ ଡିଂଅଁ ବିତ୍ରେ ଗାଇଗା' । ଗାଇସେକ୍ ମାଇ ଆସେଲାନ୍ନା ତିତି ସବ'ସା' ମାଇ ବୁରକ୍ସେକ୍ ତଂଗା' । 26ସା' କେନ୍ ଡେଂକୁନୁଂ ଗୁଲାଇ ଗୁତୁନ୍ ଦେସ୍ବକ୍ ଗୁଲାଇ କୁନ୍ଡା ଉନୁଂଉଇଗା' ।
ଜିସୁଲା ଇମ୍ବାୟ କାନାମ'ବାଇ' ରେମବକ୍ ବଲ୍ ଡିନ୍ଡେମ୍ଡେନ୍
27ଜିସୁଲା ଗୁତୁନ୍ ଜାଗାକୁରୁଂ ଉଇଡେଂକୁନୁଂବେଲା ଇମ୍ବାୟ କାନାମ'ପା ଆଜିସୁଲା ତେଂଗି'ତେଂଗି' ଉଇସେକ୍ ଡକ୍ତି'ତା କିରକ୍ସେକ୍ ସୁନ' “ଅ ଦାଉଦ୍ନା ଉଁ'ଉଁ, ନ ଆନାଂ ଦୟା ଡେମ୍!” ଡ'ସେକ୍ ସୁନ' । 28ମାରି ଜିସୁଲା ଡିଂଅଁ ବିତ୍ରେ ଗାଇଗା'ସା' ଗୁତୁନ୍ କାନାମ'ପାସା ଗୁତୁନ୍ ଡିଂଅଁବକ୍ ମାଇନା ଉନ୍ତୁ' ସା'ଗା' । ସା' ଜିସୁଲା ଆମାଇପା ସୁନ', “ନିଂ ଆପା ବଲ୍ ଡେମ୍ତିଂ ଡ'ସେକ୍ ପା ବିସ୍ବାସ୍ ଡେମ'ତୁପା ଇ?” ଡ'ସେକ୍ ସୁନ' । ସା' ମାଇପା ସୁନ', “ଅଁ'ଅଁ ପ୍ରବୁ, ନାଂ ବିସ୍ବାସ୍ ଡେମ'ତୁନାଂ” ଡ'ସେକ୍ ସୁନ' । 29ଆଇ'ତୁନ୍ବେଲା ଜିସୁଲା ଆମାଇପାନା ମ' ଆଲାମ'ସେକ୍ “ପା ଆନିଂ ମି ବିସ୍ବାସ୍ ଡେମ'ତୁପା ଡୁ'ତୁନାଉ ବଲ୍ ଡେମେଇ'” ଡ'ସେକ୍ ସୁନ' । 30ସା' ମାଇପା ଆଇ'କୁ ଜୁଜୁ ଗଂଗା' । ମାରି ଜିସୁଲା ଆମାଇପା ସୁନ' “କେନ୍ ବିସୟ ଆଜାଏସା ବାସ୍ ଆସୁନ'” ଡ'ସେକ୍ ସୁନ' । 31ମାତର୍ ମାଇପା ଉନ୍ତ୍କୁରୁଂ ତୁର୍ସେକ୍ ଗୁଲାଇ କୁନ୍ଡା ସୁନ'ସୁନ'ସେକ୍ ବୁଲ୍ଲ' ବେଡ' ।
କନ୍ଦାରେମ୍ବକ୍ ଜିସୁଲା ବଲ୍ ଡିନ୍ଡେମ୍ଡେନ୍
32“ଗୁତୁନ୍ କାନାମ'ପା ବଲ୍ ଡେଂସେକ୍ ଉଇବେଲା ଆମୁଇନ୍ଡା ରେମ ବୁତ୍ ସବ'ସେକ୍ ଅ'କନ୍ଦାଲ'କୁନୁଂ ରେମବକ୍ ଆ'ଇରସୁଗ ଜିସୁନ୍ବକ୍ ରିଂଅଁ' ସା'ଗା' । 33ସା' ଜିସୁଲା ଆତୁନ୍ ବୁତ୍ ଞନ' ଅ'ତୁର'ସା' ଗୁତୁନ୍ କନ୍ଦାଲା ଅଇଁ ଗଂଗା' । ସା' ଆତା ଡୁକୁନୁଂ ରେମଲେ ଗୁତୁନ୍ ଜୁଲ'ସେକ୍ ଅବୁଦି କାବାକାବା ଡେଂସେକ୍, ଇସ୍ରାଏଲ୍ ଦେସ୍ବକ୍ ଡି'କେନ୍ ଡେଂକୁନୁଂ ନେଇ ଇନ୍ଡଇ'ଏସା ଜୁଜୁ ଅରଇ' ଡେଂକୁନେଇ” ଡ'ସେକ୍ ସୁନ' । 34#ମାତିଉ 10:25; 12:24; ମାର୍କ 3:22; ଲୁକ 11:15ମାତର୍ ପାରୁସିଦଲ୍ନା ରେମଲେ ଗୁତୁନ୍ ଜୁଲ'ସେକ୍, “କୁନା ବୁତ୍ଲେନ୍ ମୁନା'ରେମ୍ନା ବପୁବୁରଂ ଆବୁତ୍ଲେ ଞନ'ତା” ଡ'ସେକ୍ ସୁନ' ।
ଜିସୁଲା ଆରେମଲେ ଜୁଲ'ସେକ୍ ଲିବିସୁପ୍ ଡେନ୍
35 #
ମାତିଉ 4:23; ମାର୍କ 1:39; ଲୁକ 4:44 ଉନ୍ତ୍କୁରୁଂ ଜିସୁଲା ଜିଉଦିରେମଲେନା ପାର୍ତନା ଡିଂଅଁବକ୍ ଉଇସେକ୍ ଆରେମଲେ ମାପ୍ରୁନ୍ ରାଜିନା ବଲ୍କବର୍ ଅମାଗ' ମାରି ପାଲ୍ପାଲ୍ ସିବାଇ' ରେମଲେବକ୍ ମାରି କସ୍ଟ ବାଂକୁନୁଂ ରେମଲେବକ୍ସା ବଲ୍ ଡେମ'ସେକ୍ ଗୁଲାଇ ମୁନା'ଉଂଗମ୍ ଡାଉ ଉଂଗମ୍ବକ୍ ବୁଲ୍ଲ'କୁ । 36#ମାର୍କ 6:34ମାରି ଜିସୁଲା ଆରେମଲେ ଜୁଲ'ସେକ୍ ମାଇନା ଜିବନ୍ବକ୍ ଲିବିସୁପ୍ଗା' । ମାସା'ଡ'ନା ଆମେନ୍ଡାଲେ ଗୁଗୁଇ'ରେମ୍ ଆରାକ୍ନା ମି ମେନ୍ଡାଲେ ତଂରିତଂକେ ଡେଂସେକ୍ କସ୍ଟ ଡେନ୍ତା ଡୁ'ତୁନ୍ସୁଗ ମାପ୍ରୁନା ବାନିକବର୍ ସୁଁସୁରେମ୍ ଆଡୁତାସା' ରେମଲେ ଇମ୍ବ'ନ୍ କୁରୁଂବକ୍ ଉଇନା ବଲ୍ ଡ'ସେକ୍ ମମୁନାକ୍ ତଂରିତଂକେ ଉଇସେକ୍ କସ୍ଟ ଡେଂଗୁତା । 37#ଲୁକ 10:2ଆଇ'ତୁନ୍ବେଲା ଜିସୁଲା ଆମାଇନା ସିସ୍ୟଲେ ସୁନ' “ଅଇ'ସିସି'ନା ଅବୁଦି ଡୁତା ମାତର୍ କାମ୍ରେମ୍ ଉନାରଉ ଡୁତା । 38ଡୁ'ତୁନ୍ସା' ଅଇ'ସିସି'ପୁଲେଇ ଅବୁଦି ରେମଲେବକ୍ ବେନ୍ଟାଇ ଡ'ସେକ୍ #9:38 ଆସାକାର୍ ସୁଁ ଡ'ନା: ଆମାପ୍ରୁ ପାର୍ତନା ଡେମ୍ଆସାକାର୍ ସୁଁ” ଡ'ସେକ୍ ସୁନ' ।
Aktualisht i përzgjedhur:
ମାତିଉ 9: BFW
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
CC BY-NC-ND 4.0