পত্থম 22
22
ইস্হাকরে উৎসর্ব গরানা
1এ ঘটনাগান পরেদি গোজেনে অব্রাহামরে এক্কো পোরোক্ষেত্ ফেলেল। গোজেনে তারে ডাগিলো, “অব্রাহাম।”
অব্রাহামে জোব্ দিলো, “এইয়্যে দঅ মুই।”
2গোজেনে কলঅ, তঅ পুয়োবোরে, এক্কোগুরি পুয়ো ইস্হাকরে, যিবেরে তুই এদক্ কোচ্পাজ্ তারে লোইনে তুই মোরিয়া চাগালাত্ যাহ্। সিয়েনত্ যে মুড়োবো কধা মুই তরে কোম্ সিবে উগুরে তুই তারে পুজ্যে-উৎসর্ব ইজেবে উৎসর্ব গর্।
3সেনত্তে অব্রাহামে বেন্যেপোত্যে উদিনে এক্কো গাধা পিদিত্ উদিলো। সে পরেদি তার পুয়ো ইস্হাক আর দ্বিজন চাগররে লগে নেযেল, পুজ্যে-উৎসর্বত্তে দার্বো কাবি নেযেনে যে জাগায়ান কধা গোজেনে তারে কোইয়্যে সিন্দি যাহ্ ধুরিলো। 4তিন দিনোত্ অব্রাহামে চোখ তুলি রিনি চেলে দূরোত্তুন্ সে জাগাগান্ দেগিলো। 5সেক্কে তে তা চাগরুনোরে কলঅ, “তুমি গাধাবোলোই ইয়োত্ থাগঅ; মঅ পুয়োবোলোই আমি সিদু যেবং। সিদু আমার উবোসনা থুম্ গুরিনে আরঅ আমি তমা ইদু ফিরি এবং।”
6ইয়েন কোইনে অব্রাহামে পুজ্যে-উৎসর্বত্তে দার্বো বোনাবো তা পুয়ো ইস্হাক কানাত্ তুলি দিইনে নিজে আগুনো পিলেবো আর ছুড়িগান্ নেযেল। সে পরেদি তারা দ্বিজনে একসমারে যাহ্ ধুরিলাক। 7সেক্কে ইস্হাকে তা বাব্ অব্রাহামরে ডাগিলো, “বাবা।”
অব্রাহামে কলঅ, “কিত্তে বাবা, কি কত্তে?”
ইস্হাকে কলঅ, “পুজ্যে-উৎসর্বত্তে দার্বো আর আগুন আঘে দেগঙর্, মাত্তর্ ভেড়া ছাগল ছঅবো কুদু?”
8অব্রাহামে কলঅ, “বাবা, পুজ্যে-উৎসর্বত্তে গোজেনে নিজে ভেড়া ছঅ যুক্কুলেই দিবো।” এ কধানি কদে কদে তারা উজেই যাদন্।
9যে জাগায়ান কধা গোজেন অব্রাহামরে কোইয়্যে তারা সিয়েনত্ যেইনে লুমিলাক্। সিয়েনত্ লুমিনে অব্রাহামে এক্কো ডালিপূজো বানেইনে সিবে উগুরে দার্বো সাজেল। পরেদি ইস্হাকরে বানিনে তারে সে ডালিপূজোবো দার্বোগানি উগুরে রাগেল। 10সে পরেদি অব্রাহামে পুয়োবোরে মারে ফেলেবাত্তে ছুড়িগান আদত্ নিলো। 11এ অক্তত্ লগেপ্রভুর দূত্তো স্বর্গত্তুন্ তারে ডাগিলো, “অব্রাহাম, অব্রাহাম!”
অব্রাহামে জোব্ দিলো, “এইয়্যে দঅ মুই।”
12দূত্তো কলঅ, “পুয়োবোরে মারে ফেলেবাত্তে আত্ ন-তুলিচ্ বা তা উগুরে আর কিচ্ছু ন-গুরিচ্। তুই যে গোজেন ভক্ত সিয়েন্ ইক্কিনে বুঝো গেলঅ, কিত্তে মঅ নাঙে তুই তঅ পুয়োবোরে, বানা এক্কো পুয়োরে উৎসর্ব গর্তে পিজেন্দি ন-আলাচ্।”
13অব্রাহামে সেক্কে চেরোকিত্তে রিনি চেলঅ আর দেগিলোদে তা পিজেন্দি এক্কো ভেড়া আঘে আর তা শিঙুন্ ঝুবোত্ বেড়েয়্যে এলঅ। সেক্কে অব্রাহামে যেইনে ভেড়াবো নেযেল আর পুয়োবো বদলে সে ভেড়াবো তে পুজ্যে-উৎসর্ব অনুষ্ঠানত্ ডালি দিলো। 14তে সে জাগায়ান নাঙান্ দিলো যিহোবা-যিরি (যিয়েনর ভেদ্তান্ “লগেপ্রভু যুগেই দে”)। সেনত্তে ইক্কিনিয়ো মান্জে কন্, “লগেপ্রভুর্ মুড়োবোত্ লগেপ্রভুই যুগেই দে।”
15-16লগেপ্রভু দুত্তো স্বর্গত্তুন্ অব্রাহামরে আরঅ ডাগিনে কলঅ, “তুই তঅ পুয়োবোরে, এক্কোগুরি পুয়োরে উৎসর্ব গুরিবাত্তে পিচ্ছো ন-ফিরোচ্ সেনত্তে মুই লগেপ্রভু নিজোর্ নাঙে শমত্ খেইনে কঙর্, 17মুই ঘেচ্চেকগুরি তরে বোউত্ বর্ দিম্, আর আগাজ তারা ধোক্ক্যেন আর সাগর পার ধূল্যে চর ধোক্ক্যেন তমা বংশ মানুচ্চুনোরে গুণি ন-পুরেয়্যে গুরিম। তমা বংশ মানুচ্চুনে তারা শত্রুগুনোর শঅরানি জিদি নেযেবাক্, 18তঅ বংশগুনো ভিদিরেন্দি পিত্থিমীর বেক্ জাদতুনে বর্ পেবাক্। তুই মঅ উগুমান্ পালেয়োচ্ বিলিনে সিয়েন্ অবঅ।”
19ইয়েন পরেদি অব্রাহামে তা চাগরুনো ইদু ফিরি এলঅ। সেক্কে বেক্কুনে একলগে সিয়েনত্তুন্ বের্-শেবাত্ ফিরি গেলাক্; ইয়োদোই অব্রাহামে বজত্তি গুরিদো।
নাহোর বংশগুনো কধা
20এ ঘটনাগানির্ পরেদি অব্রাহামে শুনিলোদে, এ ভিদিরে তা ভেই নাহোর মোক্ মিল্কার কয়েক্কো পুয়ো ওইয়োন। 21নাহোর দাঙর্ পুয়োবো নাঙান্ এলদে ঊষ। পরেদি বূষ আর কমূয়েলর জর্ম ওইয়্যে। কমূয়েল পুয়োবো নাঙান এলদে অরাম। 22নাহোর অন্য পুয়োগুনোর্ নাঙানি কেষদ, হসো, পিল্দশ, যিদ্লফ আর বথূয়েল। 23বথূয়েল ঝিবো নাঙান্ এলদে রিবিকা। অব্রাহাম ভেই নাহোর মোক্ মিল্কার পেদত্ এ আস্টোবো পুয়োর জর্ম ওইয়্যে। 24নাহোরর্ এক্কো লাঙ্ এলঅ; তা নাঙান্ এলদে রূমা। তা পেদত্ টেবহ, গহম, তহশ আর মাখার জর্ম ওইয়্যে।
Trenutno izabrano:
পত্থম 22: CBT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Copyright © 2021 Bangladesh Bible Society