Cwaan 5
5
Imaa waashipiiyaank ekiihpimaaci'aatc otaahkosiin a'a Ciisahs
1Ahpii e'ishkwaaishiwepahk kii'maacaa Ciisahs weti Ceroosalamink (Jerusalem) ekii'ishaatc, ekii'ocihcihsenik kaashiwiihkwantiwahkamikisiwaatc iki Coowak otanami'aawiniwaank. 2I'imaa tahsh Ceroosalamink ayaa peshik saaka'ikanihkaanenhs i'imaa waahkaaya'ii e'ayaakin e'naanwewaanakahkin kaashitapinawahkitekin. Mii 'imaa takwan i'i saaka'ikanihkaanenhs i'imaa pehsho KihciMaanahcaanihshiwi Ishkwaantemink.#5.2 KihciMaanahcaanihshiwi Ishkwaantem: mii 'iwe peshik kaaishi‑ishkwaantemiwank i'i ootena. Peht Saahta#5.2 O'owe Peht Saahta (Bethzatha) kaaishinihkaatek saaka'ikanihkaanenhs, aaninta kehteoshipii'ikanink Pehtesta (Bethesda) ishinihkaate. (Bethzatha) ishinihkaate 'i saaka'ikanihkaanenhs, Hiiparoo (Hebrew) ishikiishwewinink. 3Mii 'imaa kaa'ishipimihshinowaatc kaakiihpaahtiinowaatc otaahkosiik, ekaa kaakii'waapihsikwaa kaye kaamaahkishkaawaatc kaye kaanipowiayaawaatc.#5.3 Aaninta kehteoshipii'ikanink kii'ishipii'ikaate 4 oshipii'ikanenhs, o'o e'ihkitoomakahk: Okiihpiihtoonaawaa nipiini ciwahkawaakamishkaanik. Aaniihsh naaninkotink iko kii'ishihse kaaTipenciketc otencaliman ekiihpinaashahkiinitc ekii'wahkawaakamishkaanik i'iwe nipiini. Nihtam 'awe kaapahkopiitc e'wahkawaakamishkaak kii'minoayaa'aa aaniin iko kaakii'inaahpinetc. 5Kii'ayaa 'imaa peshik inini aasha nihsimitanahshinihshwaahso (38) tahsoahki e'aahkositc. 6Ciisahs itahsh okii'waapamaan ehpimihshininitc, shikwahsh ehkihkenimaatc aasha kinwesh mii 'iwe ekii'ishiayaanitc, okiihkanoonaan: “Kinantawentaan ina ciminoayaayan?” okii'inaan.
7Miitahsh kaa'ikotc ini kaa‑aahkosinitc: “Kaawiin awiya nintayaawaahsii cipahkopii'otc ahpii e'maataakamishkaak nipi. Mekwaa tahsh iko ehpiishaayaan, aasha kotak awiya nintaacinaa'ik ehpahkopiitc.”
8Ciisahs itahsh okii'inaan: “Wanishkaan, otaahpinan kitahpihshimon, pimohsen,” okii'inaan. 9Shemaak a'a inini kii'minoayaa. Okii'otaahpinaan otahpihshimon ekiihpimohsetc.
Mii 'iwe e'Anwepiiwi kiishikaninik ahpii kaakiihpimohse'intc. 10Miitahsh i'i kaa'oncikanoonikotc oniikaanisiiwi Coowa': “Anwepiiwi kiishikan ohsha,” okii'ikoo'. “Kaawiin inahtehsinoon kitOonahshowewininaan#5.10 kitOonahshowewininaan: Kehtemasina'ikanink Onahshowewin kii'inahte cimanaa anohkiinaaniwankipan e'Anwepiiwikiishikahk. Waapantan Ex. 20.10; John 5.16,17; 7.23; 9.14,16. cipimiwitooyampan kitahpihshimon,” okii'ikoo'.
11Miihsh kaa'ishinahkwehtawaatc: “A'awe kaakiihpimaaci'itc mii 'owe kaakii'ishitc: ‘Otaahpinan kitahpihshimon, pimohsen, ninkii'ik.’ ”
12Miihsh okihkakwecimikoo': “Awenen a'a kaakii'inihk?”
13A'a tahsh kaakiihpimaaci'intc kaawiin okiihkihkenimaahsiin awenenan ini. Aasha aaniihsh Ciisahs i'imaa kii'oncimaacaa, mii 'imaa eshipaahtiinonitc mekweya'ii ekii'ishiwaninaako'itisotc.
14Naake tahsh miinawaa Ciisahs okii'mihkawaan Kihcianami'ewikamikonk ini ininiwan. O'owehsh okii'inaan Ciisahs: “Inashke aasha kiminoayaa. Keko miinawaa animacitootanken, nawac awahshime kekoon kikamaashiotihsikon,” kii'ihkito.
15Miihsh kaa'ishi‑ishaatc a'a inini ekii'awiwiintamawaatc i'i oniikaanisiiwi Coowa', Ciisahsoon iniweniwan kaakiihpimaaci'ikotc. 16Miitahsh o'omaa onci oniikaanisiik kaa'oncimaaciimikoshkaaci'aawaatc ini Ciisahsoon, ekiihtootaminitc i'iwe ekiihpimaaci'iwenitc e'Anwepiiwi kiishikaninik. 17O'o tahsh Ciisahsoon okii'ishinahkwehtaakowaan: “NinTete ahpane piko pitootam 'owe anohkiiwin, miihsh keniin eshinaakwahk ci‑inanohkiiyaan.”
18Miihsh o'owe onci ekii'ihkitonitc, oniikaanisiiwi Coowak awahshime okii'nanaantone'aanaawaa ewii'nihsaawaatc Ciisahsoon, kaawiin wiin ehta 'iwe ekiihpiikonaminitc Anwepiiwi kiishikani Onahshowewin, i'iwe ohsha kaye “Kishemanitoo ninTete” ekii'ihkitonitc; mii 'iwe “Kishemanitoo kaashiahpiihtentaakositc, kaye niin peshikwan nintahpiihtentaakos” ekii'ishikiishwenitc.
Owiintaan aanti kaa'oncimiinintc okashki'ewisiwin Ciisahs
19Miihsh imaa 'owe okii'inaa': “Tepwemakan i'i kaawiintamawinakook. A'awe oKosihsimaa kaawiin tipinawe kekoon taatootansiin, piko eshiwaapamaatc oTeten e'ayintootaminitc. 'Iwe kaa‑ayishihciketc Weyoohsimintc, amii kewiin mayaa peshikwan 'iwe kaa‑ayintootank a'a oKosihsimaa. 20A'a tahsh Oyoohsimaa osaaki'aan ini oKosihsimaan, shikwa kahkina kekoon owaapanta'aan eshihciketc. Shikwa keyaapi awahshime kaakihci‑inentaakwaninikin okawaapanta'aan kihcianohkiiwinan citootaminitc ahpiihc ono kaahtoocikaatekin, cimaamahkaatentamek. 21Shikwa 'awe Weyoohsimintc kaaishi kiiwepimaatisi'aatc kaaniponitc awiya' e'miinaatc pimaatisiwin, kewiin peshikwan oKosihsimaa omiinaa' pimaatisiwin awenena' iko kaainenimaatc. 22Shikwa 'awe Oyoohsimaa kaawiin wiin awiyan otipaahkonaahsiin. Okii'miinaan tahsh kahkina tipaahkoniwewin ini oKosihsimaan wiin citipaahkoniwenitc. 23Mii peshikwan kahkina iki pemaatisiwaatc cikihci‑inenimaawaatc ini oKosihsimaan taapishkoo kaaishi kihci‑inenimaawaatc ini Oyoohsimaan. A'a tahsh kaakihci‑inenimaahsik oKosihsimaan kaawiin okihci‑inenimaahsiin kaye Oyoohsimaan kaakiihpi‑ishinisha'okonitc.
24“Tepwemakan o'o kaawiintamawinakook: awenen iko kenoontank nintihkitowinan kaye tiyepweyenimaatc ini kaakiihpi‑ishinisha'onitc, otayaan pimaatisiwin wiihkaa keishkwaahsehsinok. Kaawiin tatipaahkonikaniwihsii, aasha 'imaa nipowinink ekii'onciaashawishkaatc, weti e'ayaatc pimaatisiwinink. 25Tepwewin kiwiintamawininim: piciinak hsa tapiocihcihse, aasha hsa ko ocihcihse ahpii, ikiweniwak aasha kaanipowaatc cinoontamowaatc otinwewinini ini Kishemanitoo oKosihsan. Ikiweniwak itahsh kaanoontamowaatc tapimaatisiwak. 26Shikwa 'awe Weyoohsimintc kaashikashkihtamawaatc pimaatisiwin awiya', mii peshikwan okii'inahsaan ini oKosihsan kewiin cikashkihtamawaanitc pimaatisiwin. 27Kaye okii'miinaan ini oKosihsimaan citipaahkoniwenitc, aaniihsh Inini oKosihsan tinowiwan. 28Keko maamahkaatentankek o'o kaaininakook, aaniihsh aasha weyiip taishihse ahpii kahkina kaakii'ishkwaapimaatisiwaatc kenoontamowaatc nintinwewin. 29#Dan 12.2. Tapionciwanishkaawak i'imaa kaa'ishina'inintwaa. Iki kaakii'minoishihcikewaatc tawanishkaawak cikiiwepimaatisiwaatc tepwe pimaatisiwinink. Ikihsh kaye kaakii'macihcikewaatc taishikiiwepimaatisiwak wiinawaa wiin cionahshowaanintwaa.”
Aanti wencikihkenimintc Ciisahs e'onciitc Kishemanitoonaank
30Shikwa kii'ani‑ihkito: “Kaawiin niin kekoon e'mihcipeshikoyaan nintaakashkihtoohsiin. Eshinoontawak ehta 'a ninTete, nintishitipaahkonike. Kwayahkwan hsa kaaishitipaahkonikeyaan, aaniihsh kaawiin ninantonansiin niin nintinentamowin, otinentamowin hsa 'a kaakiihpi‑ishinisha'otc.
31“Kiishpin niinehta tipaacintisoyaan cikanootamaatisoyaan, kaawiin iinsan tepwe kitaainihtawihsiim. 32Ayaa tahsh kotak kaatipaacimitc. Ninkihkentamowaan otipaacimowin kaainaacimitc ehtepwemakaninik. 33#Jhn 1.19-27; 3.27-30. Kikii'ishinisha'waawaak awiyak cikakwecimaawaatc Cwaanan (John). Okiihtipaatotaan 'iwe tepwewin. 34Kaawiin wiin awiya inini nimpakohsenimaahsii citipaacimitc, mii 'iwe ehta wencitipaacimak Cwaan kaakii'ishitashimitc, kiinawaa cipimaaci'ikooyek. 35Waahsahkonencikan e'minwaahsahkonek kii'inwaanaa 'a Cwaan citinowitc. Kikii'inentaanaawaa noomake cionciminwentamek owaahsesiwin. 36Nawac itahsh nintayaan kihcitipaacimikoowin ahpiihc a'a Cwaan kaa'inaacimitc. Ini hsa anohkiiwinan kaakii'miishitc a'a ninTete cikiishihtooyaan, miiwan ono anohkiiwinan noonkom entootamaan kaatipaacimikoyaan tepwe ekiihpi‑ishinisha'otc a'a Weyoohsimintc. 37#Mat 3.17; Mrk 1.11; Luk 3.22. Wiin a'a Weyoohsimintc kaakiihpi‑ishinisha'otc kaye wiin nintipaacimik. Kaawiin wiihkaa kikii'oncinoontansiinaawaa otinwewin, kaye kaawiin kikii'onciwaapamaahsiwaawaa eshinaakositc. 38Kaye kaawiin kikiih kikishkaakohsiinaawaa otihkitowin, aaniihsh kaawiin kitepwehtawimaahsiwaawaan ini kaakiihpi‑ishinisha'waatc. 39Kinanaantone'ike i'imaa kihcioshipii'ikewinink aaniihsh mii 'imaa nintoonciayaamin pimaatisiwin keishkwaahsehsinok kitinentaam. Mii ohsha 'imaa kihcioshipii'ikewinink kaaishitipaacimikooyaan. 40Kaawiin itahsh kiwiihpinaasihkawihsiim ciayaayek pimaatisiwin.
41“Kaawiin wiin 'imaa ininiink nintoonciantone'ansiin kihci‑inentaakosiwin. 42Kikihkenimininim itahsh aaniin entinowiyek, ekaa ehkikishkansiwek Kishemanitoo cisaaki'ek. 43NinTete otishinihkaasowin ninkiihpikikis, kaawiin itahsh kiwii'otaahpinihsiim. Kiishpin tahsh kotak awiya tipinawe wiiniko otishinihkaasowin pikikisitc, amii wa'a kikaotaahpinaawaa. 44Kiinawaa kiminwentaanaawaa e'miinitiyek i'i minwakimikoowin, kaawiin itahsh kitoonciantone'ansiinaawaa minwakimikoowin 'awe kaashipeshikotc Kishemanitoo kemiininekipan. Aaniihsh i'i keshitepwehtawiyek i'iwe kaaishiayaayek?
45“Keko niin inenimihshihkek cimaci‑inaacimohtawak a'a ninTete kiinawaa enaatisiyek. Ayaa hsa peshik e'maashitipaaciminek, amii wa'a Moosihs (Moses) kaa‑ahpenimonotawek. 46Kiishpin tepwe kiitepwehtawaawekopanen a'a Moosihs, keniin kitaakiihtepwehtawim. Niin aaniihsh kaakiihtipaacimitc i'imaa otooshipii'ikewinink.#5.46 Moosihs otooshipii'ikewinink: mii hsa 'iweni kaakiihtashintank maawac iko nihtam naanan masina'ikanan Kehtemasina'ikanink kaa ayaanikin. 47Iniwe tahsh ekaa ehtepwehtansiwek otooshipii'ikewinan, aaniin itahsh niin kekii'ishitepwehtamek nintihkitowin?” okii'inaa' Ciisahs i'i niikaanisiiwi Coowa'.
Nu markerat:
Cwaan 5: OJBR
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Ojibwe Shorter Bible (Roman Script) © 2008 Canadian Bible Society
