Ageini 50
50
1Di do Yosepu oko gwako papa mere, eko donyo koko di eko note. 2Yosepu bin oko ciko imuroko jotic mege pi tuno kom papa mere di kiwire kede mo angwe kur. Gin di kiko timo kamanono bala kame oudo Yosepu owaco negi kede. 3Kitero ceng ot ongwon (40) di kitie tic noni i kome, pien manono en kare kame mitere me tuno kom dano oto. Jo me Misiri bin oko koke pi ceng ot kanyaare (70).
4Kakame kare me koke oko tiek kede, Yosepu bin oko waco ne jo me ot ka Parao be, “Ka wun imaranu, ango akwao wu iotunu di ikounu waco ne Parao kaman: 5#Ageini 47.29-31papa nango oudo omia akwongere; en ewaco na be, ‘Ango ayapuno to. In ibino yika i abo kame ango akunyo pira i lobo me Kanan.’ Pi mano, ango akwae eyei na ot, tetekeny akaruno yiko papa na; di do ango ako bino dwogo.” 6Parao oko gamo be, “Oti, di iko yiko papa ni, bala kame oudo in ikwongere pi timo.”
7Yosepu bin oko ot yiko papa mere. Jotic ka Parao dedede, joadongo me ot ka Parao, kede joadongo dedede me lobo me Misiri bin oko upere kede Yosepu, 8karacel kede jo me ode, imiegu mege, kede jo me ot ka papa mere, gin dedede kiupere kede en. Bin gin kiweko idwe, romini, diegi kede doke gi kenekene en kodong Gosen. 9Jo aoto kede cabalan kede jo kame ringo kede asigiran da bin oupere kede; oudo ebedo twon ekodet me jo. 10Kakame gin bin kiko tuno kede i laru me canyo me Atad, kabedo kame tie loka tuca me Yorodan, gin kiko koko kitek ki kuno di kitie kede iturur adwong; di Yosepu oko timo pwola me koko papa mere pi ceng kanyaare. 11Kakame jo me Kanan, wegi lobo nono oneno kede koko kame oudo tie i laru me canyo me Atad, gin kiko waco be, “Man koko atek twatwal kame jo me Misiri tie timo.” Pi mano, oko do cako nying kabedo nono be Abel Misiraim; en etie loka tuca me Yorodan. 12Iepone noni, awobe ka Yakobo bin oko timo bala kame papa gi oudo ocoro gi kede.
13 #
Tice 7.16
Gin bin kiko tero kome i lobo me Kanan di kiko yike i abo me Makepela, tetu kide me Mamure, i poto kame bin Aburaam owilo kibut Epuron Ngakiti, pi bedo kakame eyiko iye jo. 14Ingei Yosepu yiko papa mere, en eko dok Misiri kede imiegu mege kede jo dedede kame oudo oupere kede ot yiko papa mere.
Yosepu Osasiro Imiegu mege
15Kakame imiegu ka Yosepu oneno kede be papa gi otieko to, gin kiko waco be, “Amoto nat di Yosepu pwodi tie kede lilo but wa di eko mito culo kwor i kom wa pi rac kame wan bin otimo ne.” 16Di gin kiko cwano ne Yosepu kop di kiwaco be, “Di oudo pwodi likame papa ni oto, en oudo emio wan acora be, 17‘Wacenu Yosepu kaman: ango angangao in, sasiro imiegu ni ki gikarac gin kede ki dub kame gin bin kitimo nin.’ Pi mano, nan do wan okwai isasiro wa ki gikarac kame wan jotic ka Rubanga ka papa ni bin otimo ni.” Yosepu oko kok kakame bin en ewinyo kede kop kame gin kiwaco ne. 18Di imiegu mege da oko kok di kiko riebere piny i nyime di kiwaco ne be, “Wan ige ipasoi ni.” 19Do Yosepu oko waco negi be, “Kur ibedunu kede lworo! Iparunu be ango abedo Rubanga? 20Akadi bed bala wun bin ipelakinunu timo nango raco, do Rubanga oko loke pi kelo bero, tetekeny egwok kuo me jo atot, bala kame nataman etie timo. 21Pi mano, kur ibedunu kede lworo moro; ango kikoma abino gwoko wu karacel kede idwe wu.” Iepone noni en bin eko kweno cuny gi, di eyamo kede mwolo but gi.
Yosepu Oto
22Yosepu bin oko dong bedo Misiri, en karacel kede jo me ot ka papa mere. En bin eko bedo kuo i wi lobo pi mwakini tol acel kede tomon (110). 23Yosepu bin oko bedo kuo tuno neno idwe ka Epuraimu, tuno i ikwae me adek. Makir wot ka Manase da bin onywalo idwe di Yosepu oko tingo gi di egamo gi pi bedo mege. 24En bin eko waco ne imiegu mege be, “Ango ayapuno to, do Rubanga ateteni bino bino butu di eko kwanyo wu tenge ki lobo noni, eko tero wu i lobo kame en bin ekwongere pi mino Aburaam, Isaka kede Yakobo.” 25#Yai 13.19; Yosua 24.32; Iburanian 11.22Di do Yosepu oko mino awobe ka Yakobo okwongere di ewaco negi be, “Kame Rubanga obino butu, wun ibinunu yeno cogere na iterunu.” 26Yosepu bin oko to i Misiri di oudo etie kede mwakini tol acel kede tomon (110); oko mino kome otuo di oko wire kede mo angwe kur di oko kete i sanduku.
Nu markerat:
Ageini 50: BILK13
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Baibuli I Leb Kumam © Bible Society of Uganda, 2013.