Mateo 13
13
1H’adie’fuku Yesu batukile ku nshibo, bashalele kubukunkula kwishiba. 2Bibumbu bikata bia bantu bibekoñene kwadi, biabia batwelele mbwato, bashalele; na kibumbu kishima kibemene ku bukunkula kwa mema. 3E bebalungwile myanda yi bungi mu miele’shi: Talangai, muminyi bayile mu kumina mbio. 4Habaminyine, yingi (mbio) yibahonene ku bukunkula kwishinda, tonyi namu tubafikile kwiyimina. 5Yimo yibahonene habadi mabwe, habadi nsenga yshi bungi; henyihaha yibamene, mwanda ta yibadi na nsenga yi bula; 6na ha kukanka nguba, yibatatshile, yibafumbile, mwanda ta yibadi na mishi. 7Yingi namu yibahonene munkatshi mwa milobo, milobo yibatamine yibeinyengyela. 8Anka yingi yibahonene ha nsenga yibuwa; yibahele bikuba, yingi ha lukama, yingi ha makumi asamombo, yingi namu ha makumi asatu. 9E na matwi a kuhusha, ahushe. 10Bana ba-bukishi abafikile, abamuhwishe’shi; Wakula kwabadi mu miele kinyi? 11E bebālulwile’shi: Mwanda kwanudi ubahebwa kushingula yifībwe ya bufumu bw’Efile-Mukulu, anka kwibo kushī bahebwe. 12Mwanda kwi ese e n’akio, akikamuhebwa, e namu akekala n’abio bikambe; anka kwi ese te n’akio, akikatshibwa sunga’kia kiadi n’akio. 13Binyibiabia uno nyi mwanda unebalungwile mu miele; mwanda’bo ha kumona tabamono ooo; na ha kuhusha tabahusha, sunga kushingula. 14Mwabadi ’mubakumbashwa kitemukilo kia Esaiye; kibākwile’shi: Hakuhusha anukahusha, tanukashingula; na kumona anukamono, anka tanukahatula. 15Mwanda mashimba a bano bantu abālulukile bwalotakane, matwi abo ngashikile, meso abo namu abamomwa, tala kioso kihindji abakamono na meso abo, na kuhusha na matwi abo, sunga kushingula ’mashimba, n’abo kwikala balulukye ’mashimba, n’ami biandjia kwibahasha. 16Anka meso enu nga mwabi, mwanda amono; na matwi enu hamune, mwanda ahushā. 17Mwanda nyi binyibinyi nenulungula’shi, batemuki bebungi na bantu balulame babakyebele kumona abia bianumono, tambebimone; na kuhusha bianuhusha, tambebihushe.
18Binyibiabia hushai mwele wa muminyi. 19Ahahusha muntu mwanda wa bufumu, e tamwiuuke wibuwa, binyibiabia winyi mubi afiki, aunyengye’kio kibakunyinwe mwishimba die; Uno nyi winyi batambwile mbio ku bukunkula kwishinda. 20Anka yawa batambwile mbio mu kihindji kia mabwe, nyi e bahushishe Mwanda, kahindji n’āka namu eutambula na kusangala; 21Anka e te na mishi munda mwe e na mwinyi, anyingi kihindji kihi, anka ahakabuku kusabulwa su kubingwabingwa ha mwanda wa Mwanda, kahindji n’āka ebakokoshwa. 22E namu batambwile mbio munkatshi mwa milobo, nyi e bahushishe Mwanda, anka binyengo bia hanohansenga, na kōngolwa kwa mono, akwinyengyela Mwanda, n’e akutshikwa kuha bikuba. 23Anka e batambwile mbio mu nsenga yibuwa, nyi e ahusha Mwanda, na kwiushingula, a aha bikuba namu, atusha yingi bu lukama, yingi bu makumi asamombo, yingi bu makumi asatu.
24Ungi mwele belele kwabadi’shi: Bufumu bwa mwiilu bubahwandjikile kwi muntu baminyine mbio yibuwa mwifuba die. 25Anka bantu ha kulala-tulo, badi n’e mushikwa bafikile, baminyine nkonongo munkatshi mwa nano, bakatukile. 26Anka habatulukile mitombo na ha kuha bikuba, nkonongo yibamwekyele namu. 27Biabia bahika ba sha nshibo bafikile, bamulungwile’shi: A Mwanana, tobominyine mbio yibuwa mwifuba diobe’nyi? Ahenyihaha nkonongo yibafikile kwi kunyi? 28E bebalungwile’shi: Muntu e n’ami luhuna nyi bakitshi biabia. Bahika abamwihwishe’ shi: Okumina’twe kukeitukula’nyi? 29Anka E bambile’shi: Ayoyo, tala, su hanulamuna nkonongo anukatukwila nano n’ayo. 30Eyilekyei bubidi bwa’yo, yikudile hamune mpa n’ahakafiki hakūmbula, henyihaha nankalungula banoi’ shi; nusangulai hamune nkonongo kwibedi, nwianye mabombo mu kwiishika kālo, anka nukongole nano mu mputshika yande.
31Ungi mwele belele kwabadi’shi: Bufumu bwa mwiilu mbuhwandjikile na lubio lwa mūtade lubātshile muntu, bakunyine mwifuba die. 32Nyi mbinyibinyi ndukile buhela bwa mbio yoso; anka h’alukulu, ndukile munkatshi mwa mabula oso, lubālulukile tamutshi ukata, nyi anka biabia tonyi twa mwiilu atufiki mu kubombela mu ntabi yao. 33Ungi mwele bebambile’shi: Bufumu bwa mwiilu bubahwandjikile na kitatusho kibātshile mwana-mukashi, bekifīle mu bihimo bisatu bia bukula mpaa n’ahakibatatukile kioso kishima. 34Yino myanda yoso Yesu bakwile kwi bibumbu bia bantu mu miele, na kushī mwele tamwakule kwabadi. 35Biaudia kukumbashwa ubakwile mutemuki eshi; Nankabula mukanwa mwande na miele; nankatusha myanda yibadi yifībwe mpaa na ku mbangilo ya hanohansenga. 36Binyibiabia Yesu bebwesheshe kibumbu, batwelele mu nshibo; bana-be-ba-bukishi abafikile kwadi’shi: Etuhatulwile mwele wa Nkonongo ya mwifuba. 37N’e bebālulwile’shi: Winyi baminyine mbio yibuwa nyi Mwan’a muntu. 38Dinyi efuba nyi bahanohansenga; mbio yibuwa yi bana ba Bufumu, anka nkonongo nyi bana ba wawa mubi; 39Winyi a mushikwa beiminyine nyi Satana; kūmbula nyi kunfudilo kwa hanohansenga; abakūmbula nyi bamwikeilu. 40Anka bibakongwelwe nkonongo na kushika kālo, anka biabia aukekala ku kunfudilo kwa hanohansenga. 41Mwan’a Muntu akatumu bamwikeilu be, n’abo abakalamuna bintu bioso mu Bufumu bwe abikokosha, n’abo abakitshi bubi; 42Abakelwa mwilungu dia kālo, amukekala kudila na kwisuma kwa meno. 43Henyihaha balulame abakahenyahenya bu nguba mu Bufumu bwa Nshyabo. E na matwi a kuhusha, ahushe.
44Dimonyi, Bufumu bwa mwiilu nyi bubahwandjikile ku bia bineme bifwame mwifuba; binyi, habibasokwelwe na muntu, abebifīle, na ha mwanda wa kwibisehela, ēnde, ahane bioso biadi n’abio, akaule efuba diadia.
45Dimonyi, Bufumu bwa mwiilu nyi buhwandjikile na musungia bintu akimbi mabwe aneme; 46E, habamwene’nyi kabwe kamune ka mūlo wi bukoho, bayile na kuhana bintu bie bioso mu kuula’ko.
47Dimonyi, Bufumu bwa mwiilu nyi buhwandjikile na bukondja bubēlwe mu kalunga-ka-mema, bubakongwelwe ya bihaso bioso. 48Bwinyi, habubaule abebukakile ku bukunkula kwa mema, abashalele, abakongwele yibuwa kwilela mankuhi, anka yibubi abayisumbwile. 49Anka biabia abikekala kunfudilo kwa hanohansenga; bamwikeilu abakatuku, abakalamuna bebubi be munkatshi mwa balulame; 50Abakebēle mwilungu dia kālo; amukekala kudila na kwisuma meno. 51Yesu bebambile’shi; nubashingula yino myanda yoso’nyi? abamwalulwile’shi: uolo Mwanana. 52Henyihaha E bebalungwile’ shi: Binyibiabia oso mufundji-a-mikanda amulambukishwe bu mulondji ku Bufumu bwa mwiilu ’muhwandjikile muntu sha nshibo, atusha bia buneme bwe abia bihya na bikulu.
53Binyibiabia kibakitshinwe’shi, a habahudisha Yesu yino miele, e bakatukile kwanka. 54Habafikile mu nsenga ye, bebalambukishe mu kitumbwilo kiabo, biabia abakanyine’shi: Au bātshile kano kalolo na bino bikitshino bia bilengeleshi kwi kunyi? 55Uno tafundji a mabaya’nyi? Tabatemuna nyin’e bu Madiya’nyi? na bakwabo ta ba Yakoba, na Yosese, na Shimona, na Yudasa’nyi? 56Na bankashan’e boso, tabe n’etu kuno su? Binyibiabia a uno’u e na bino bintu bioso kwi kunyi? 57N’abo abakokweshwe ha mwanda w’e. Anka Yesu bebalungwile’shi: Mutemuki takutwa kinemo, ooo, anka mu nsenga yabo, na mu nshibo yabo. 58E takakitshina kwanka bilengeleshi bibungi, mwanda wa lushīlukumino lwabo.
Nu markerat:
Mateo 13: NTLK52
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 1952 Alliance Biblique de la République Démocratique du Congo