Susumo 7
7
Tɛmɛ-nshi
1Dagwi Darwey kwong a yâng Nowa, “Yel e ji gwokundung, hwo na belɔ mō mwa, yaga ma di e ji bemât jeng yemo hwo wɛ njumo zɔng hwà sé cik e bayis hom. 2Jut yi e ji mwa ngyāma de ya sé ryat kuru na yɛ nyaas, beras o betaama na beha mo betaama; ko yi e ji yinde ya sé kyiri jut ɛ̀ bibya, rwas o na hwā mo. 3Ano de hwà rɔda ra na benon kuru na vɛ benaas, beras o betaama na beha mo betaama, yaga na be vɛ mɛ̀ yere e jey. 4A tɛt ɛ̀ pɔlɔ taama, ko ma rɔda tɛ̀ rwak wo rop e ra jey nagwi na naturuk nepɔlɔ kuru banaas, na me bin wey na kayɛ pyɛ de ya vɔk neken, yemo de ma kana yong.”
5Nowa kwong a ra pyɛ̂ mwa de Dagwi Darwey a nɔng ɛ nu e ra yɛ. 6A vɔk neshey naga betyiimin (600) jeng de tɛmɛ-nshi wa hwo e ra jey.
7Nowa, na nèy mɛ, na hwā mɛ, tanga behâ nèy mɛ yɛn a yel e ji gwokundung o, na be sey neken mɛn yi e tɛmɛ-nshi. 8Yi e ji ngyāma na yas de ya sé ryat, na yinde ya sé kyiri, na yi e ji yére benon tanga mwa pyɛ́ gabaga, 9yɛ̄ bibya, rwas o na hwā mo, ba yel e ji gwokundung o tanga Nowa, sede remo de Dagwi a ga nɔng ɛ nu. 10E bamâ pɔlɔ taama tɛmɛ-nshi wa hwo e ra jey.
11Jeng de Nowa a vɔk neshey naga betyiimin, e pɔlɔ hê kuru na hɛ taama e pwɛl gwo neba, mwa jɔ̂t nshî gwogbɔng gworep gwociwil de gwa sé e nɛn vwel ya gbuksal, ko bapɔk larwak ba wuma hɛn. 12Rwak wa jɛ̀rɛk e ra jey wosho kuru banaas na turuk kuru banaas. 13Ko e tuk hining hane mo, Nowa tanga nèy mɛ Shɛm, na Ham, na Yafɛt, na hwâ Nowa, tanga behâ nèy mɛ, mwa yɛn ba yel e ji gwokundung o. 14Ko kayɛ yerê ngyāma na kayɛ yerê yas, na kayɛ yerê pyɛ̂ gabaga, na kayɛ yerê benon hey na ve lɔ ya yel tanga yɛn. 15-16Rwas na hwā mo yi e kayɛ pyɛ cen ba yel e ji gwokundung o bibya, sede remo de Dagwi a ga kana nɔ̂ng Nowa nu. Bama de yɛn a ga yel mwa, ko Dagwi Darwey a bang rwi gwokundung o e bamâ Nowa.
17Tɛmɛ-nshi wa re nuyel e ra jey nepɔlɔ kuru banaas. Nshi mo na tula hɛn, ko gwokundung o gwa hala vwel, gwa sogo tǎlu e ra nshi. 18Nshi na gwɛ̌ re nuyel na gwɛsɛ hɛn ding-ding, ko gwokundung o gwa kyě rini e ra nshi. 19Ko nshi na re gâp jey, na turus, ko na kyiri begbɔng beraku mwa. 20Ko nshi na tút, na kwey beraku, na dal sede mita betaama vɔk e rak o. 21Ko kayiyɛ pyɛ de ya sé cen, de ye kyě kyè, ya ku: benon, na yas, na ngyāma na mwa pyɛ̂ gabaga tanga mwa bemasi arɔng. 22Kayɛ pyɛ de ye pɔng e jey, ya ku. 23Dagwi Darwey a wey na pyɛ́ cen mwa de ya sé e jey, bemasi, na ngyāma mwa, na pyɛ̂ gabaga, na benon. E Nowa zɔng de ba tik ɛ tanga vemo de ba sé e gwokundung tanga yɛ.
24Nshi na nàra e ra jey nepɔlɔ naga na kuru batungun (150), vit nà tɛt ɛn.
Nu markerat:
Susumo 7: bomBI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust