Tim pa Jomoor 6
6
Jokony abirio
1I hongo me munyo welo pa jofonjirok medere dito, Joyuda ma joluwo Dhogrik joero kiŋunyaŋunya kwoŋ Joebulaniya. Joyuda ma joluwo Dhogrik jowaco ni mon tho pajo kipar kwoŋ jo odoco i pok ma kisi ndelo. 2Am'omiyo Jomoor apar g'ario jolwoŋo kweth pa jofonjirok gipi kanyacel to jowaco ni, “Kiripi ka waweyo tic ma fonjo Wac pa Were to wayindin gi tic ma poko cemo ayin. 3Am'omiyo, wutmin wan, yeri win cwo abirio i dier win ma wiŋeyo ni jopoŋ gi Cuny Maleŋ kodi rieko, aka wabino ketho jo i tic me. 4Aka wawegi wabino liŋ i tic ma kwayo kodi fonji.” 5Lwak ji gibe josangala gi wac pa jomoor, to joyero Stefano, jal m'opoŋ gi yeyo kodi Cuny Maleŋ; kodi Filipo, kodi Purokoro, kodi Nikanor, kodi Timon, kodi Parmena kodi Nikolao, Japath m'odonjo i dini pa Joyuda wok Antiok. 6Jokelo jono ruwaŋ jomoor, to jokwayo rijo, to joketho cingi gin kwoŋ jo.
7Gikenyo Wac pa Were omedere nyay. Welo pa jofonjirok ma Yerusalem omedo idho malo ma piyo, aka jocway ri Were i wi migam mathoth jojolo to yeyo.
Mako Stefano
8Stefano, dhano ma Were oŋaŋo gi nema aka oasere gi meni, otimo gigipiny madongo ma kelo dhier kanyacel gi gir'aura i dier ji. 9To ji megi, m'oyido jobedo jokweth ma kalamo pa jom'ogony (paka onwaŋo ilwoŋo jo), kodi jokalamo ma Sireno kodi ma Alekizandiria, jopiemo gine. Jono gi Joyuda man ma jowok Silisia kodi Asia jocako piem gi Stefano. 10To Cuny Maleŋ omiyo Stefano rieko ma munyo luwo jok'onyalo ciro go. 11Am'omiyo jonyewo ji moro ma jowaco ni, “Wawinjo go luwo gima k'otire kwoŋ Musa kodi Were!” 12Ameno jonyalo kisigila ji kodi jotel pa ji kodi Jondiko. Jobino bongi Stefano, jomako go, to jotero go i kapido. 13Gikenyo jokelo ji moro ma jotwodo kwoŋ Stefano, ka jowaco ni, “Jame ndir je luwo aluwa marac kwoŋ Ot maleŋ mapa Were mawan kodi kwoŋ Cik pa Musa. 14Aka wawinjo munyo go waco nike Yesu ma Nazareth me bino ŋinyo woko Ot pa Were to wiro woko kula je ma wanwaŋo bongi Musa!” 15Ji je ma jobedo i kapido jocomo waŋ gin kwoŋ Stefano aka joneno ni waŋe ocale kodi waŋ malaika.
Nu markerat:
Tim pa Jomoor 6: DHOPE
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Dhopadhola DC Bible © Bible Society of Uganda, 2018.