Tim pa Jomoor 7
7
Luwo pa Stefano
1Jadwoŋ pa jocway ri Were i wi migam openjo Stefano ni, “Wac no obedo adieri?” 2#Cak 12:1Aka Stefano odwoko ni, wutmera gi bacere nan! Winjan win! Were man gi dwoŋ omenyere ri kwari wan Abraham munyo go fodi nitie yu Mesopotamia, mafodi go k'okidho bedo Haran, 3aka Were owaco rigo ni, “Weyi jothuwin kodi piny mewin ikidhi i piny ma anonyuthin.” 4#Cak 11:31; Cak 12:4Gikenyo go oeye i piny ma Kaldeya to kidho bedo Haran. Aka rumacen munyo ba Abraham otho, Were okwanyo go woko kenyo to kelo go i piny me, ma pama wibed'iye. 5#Cak 12:7; 13:15; 15:18; 17:8I hongo no Were k'omiyo Abraham kad'adec moro paka apere won, kada nyaka lowo ma romo par tiendi dhano; to Were ociko ni bino miyo go piny no, aka rumacen d'obedo apere kodi apa nyikwaye, kada go onwaŋo fodi ongoye gi nyathi. 6#Cak 15:13-14Me a gima Were owaco rigo: “Nyikwayin jobin bedo i piny ma wiloka, kama jobino bed'iye ŋecin aka ibino kuro jo marac hongo ma romo oro miya aŋwen.” 7#Wok 3:12Were owaco ni, “Abino thumo banja loyo nono ma jobino tic rijo no, aka rumacen nyikwayin jobino wok i piny no to jodwoko laman ka.” 8#Cak 17:10-14; Cak 21:2-4; Cak 25:26; Cak 29:31—35:18Gikenyo Were omiyo Abraham cikirok ma thumirok paka ranyuth mere. Am'omiyo Abraham othumo Isaka munyo ndelo aboro otundo, aka Isaka obedo ba Yakobo, aka Yakobo obedo ba nono apar g'ario.
9 #
Cak 37:11; Cak 37:28; Cak 39:2,21 Kwarere ma nonin no jotimo nyeko gi omin gin Yozefu, to jotana go gi Jomisir paka ŋeca. To Were obedo gi Yozefu, 10#Cak 41:39-41to wodho go maber i teko pere je. Munyo Yozefu otundo ruwaŋ Farawo, kere pa Jomisir, Were omiyo go kite maber swa kodi rieko m'omiyo go oywayo cuny Farawo. Farawo oloko Yozefu jadhum (gavana) ma piny kodi ma ot pere. 11#Cak 42:1-2Gikenyo kec opodho i Misir gipi kodi i Kanan, m'okelo candirok madwoŋ. Kwarere mawan jok'onyalo limo cemo moro je. 12Am'omiyo munyo Yakobo owinjo ni gir'acama nitie Misir, odhiro kwarere mawan koro kutho kidho liewo marapena. 13#Cak 45:1; Cak 45:16I wendo pajo mar'ario, Yozefu onyuthere ri wutmin aka Farawo oniaŋ ni jono jobedo wutmin Yozefu. 14#Cak 45:9,10,17,18; Cak 46:27Am'omiyo Yozefu odhiro mikwenda ri Yakobo bamere, munyo waco rigo kodi peco gipi ni jowokidhi Misir. Welo pajo oyido romo ji piero abirio g'abic. 15#Cak 46:1-7; Cak 49:33Gikenyo Yakobo okidho Misir, kama go kodi kwarere mawan jotho iye. 16#Cak 23:3-16; 33:19; 50:7-13; Yos 24:32Delkwoŋ jo oter Sekem, kam'oyik'iye jo i kaliel ma Abraham cango onyewo kwoŋ nono pa Hamor gi pesa moro.
17 #
Wok 1:7-8
Munyo ndir ocore cegin ri Were ma ketho cikirok pere kodi Abraham i tim, welo pa ji mawan i Misir oyido oidho malo swa. 18Rumacen kere man, ma k'oŋeyo wac pa Yozefu ocako dhum i Misir. 19#Wok 1:10,11; Wok 1:22Go obuto ri ji mawan to lokere mager ri kwarere mawan, munyo romo jo jwango nyithindho pajo maŋic nike jowotho. 20#Wok 2:2I ndir no ama onywol'iye Musa, nyathi maŋon swa ruwaŋ Were. Okur go peco pa bamere hongo ma dwe adek. 21#Wok 2:3-10Aka munyo owodhi go peco pajo, nyar Farawo odimo go to pidho paka nyathi pere won. 22Ofonji go rieko je mapa Jomisir to lokere ŋatatek swa i wac kodi i tim.
23 #
Wok 2:11-15
Munyo Musa oromo oro piero aŋwen, oridho paro ma limo Joisiraili wadi. 24Oneno acel kwoŋ jo munyo Jamisir moro timo rigo marac; gikenyo oredo konyo Joisiraili no to culo kwor kwoŋ Jamisir gi neko woko go. 25(Go oparo nike ji pere wegi jobino ŋeyo ni Were oyido oro go ma konyo jo, to kere jok'oniaŋ). 26Yawere mere Musa onwaŋo Joisiraili ario jogore, to temo theko jo ka waco ni, “Jume, kole wibedo wutmere. Raŋo ma widhaw matek ama?” 27To ŋat'oyido timo nyawote marac odhiro Musa gicen, to penjo ni, “Ŋat'okethin rwoth ma thumo riwan banja? 28Imito nekan bende, paka nyoro ineko Jamisir?” 29#Wok 18:3-4Munyo Musa owinjo gime oringo to eye Misir to cako bedo i piny Midian kam'olim'iye wote ario.
30 #
Wok 3:1-10
Munyo oro piero aŋwen okadho, malaika omenyere ri Musa i mac m'ogaŋere m'onwaŋo liel i kasugu dudi moro cegin gi got Sinai. 31Musa ouro swa gima go oneno, to dhire cegin gi kasugu dudi no wonen maber. Gikenyo go owinjo dwondi Rwoth munyo waco ni, 32“An Were pa kwarere nin, Were pa Abraham kodi Isaka kodi Yakobo.” Musa okirin gi lworo aka k'otimo miseni ma ŋiyo. 33To Rwoth waco rigo ni, “Luny woko war ma tiendin, rupiri kam'icung'iye me Kabedo Maleŋ. 34Adieri atieko neno candirok pa ji paran i piny Misir, kendo atieko winjo paka joywak malith, aka onyo aloro bino botho jo. Onyo biye, alaorin i Misir.”
35 #
Wok 2:14
Me a Musa ma jono jokwero ka jopenjo go ni, “Ŋat'okethin rwoth ma thumo riwan banja?” Kole go won a ŋata Were ooro paka rwoth kodi jaboth pajo gi meni pa malaika m'omenyere rigo i kasugu dudi ma onwaŋo liel mac. 36#Wok 7:3; Wok 14:21; Kwan 14:33Go am'otelo ji i royo wok Misir, munyo timo gigipiny ma miyo ji dhier kanyacel kodi gir'aura i Misir kodi i Wakawaka M'obokere, kodi i thim i hongo ma oro piero aŋwen. 37#Cik 18:15,18Me a Musa m'owaco ri Joisiraili ni, “Were bino kelo riwin jatuci wac Were bende paka an, ma bino wok kwoŋ ji mewin won.” 38#Wok 19:1—20:17; Cik 5:1-33Me a ŋata cango obedo i dier Joisiraili ma jocokere i thim kanyacel kodi kwarere wan kodi malaika m'oluwo gine wi got Sinai; aka go olimo mikwenda ma kwo mapa Were m'okelo riwan.
39To kwarere wan jokwero winjo go; jodhiro go gicen aka joparo kiri kwoŋ gik yu Misir. 40#Wok 32:1Am'omiyo jowaco ri Aron ni, “Tim riwan werin ma jobino telo wan. Wakuya gim'otimo Musa no m'omiyo owodho wan i piny Misir.” 41#Wok 32:2-6Gikenyo jocweyo gimoro ma cale nyathi dhiaŋ to jocako lamo gino, to jotimo kalima ma miyo gino dwoŋ. 42#Amos 5:25-27Gikenyo Were owiro ŋeye rijo to miyo jocako lamo micalin ma polo, paka ondiki i kitawo pa jotuci wac Were ni,
Ji ma Isiraili! Manago i ndir ca
wineko ran le paka cowirok i
hongo ma oro piero aŋwen i thim?
43Kole wema pa were Molek ama witiŋo
kodi cal pa were micala Refam,
cal ma wicweyo ni wilam.
Am'omiyo abino riemo win woko kalo kiri Babilon.
44 #
Wok 25:9,40 Kwarere mawan oyido jonitie gi wema pa Were i dier thim. Oger paka Were ooro Musa timo, i cal ma Were onyutho Musa. 45#Yos 3:14-17Rumacen, kwarere mawan ma jojolo wema wok bongi bacere pajo jotiŋo munyo jowotho kodi Yosuwa to jotero i piny pa nonin ma Were oriemo woko rijo. Aka wema no obedo kenyo kiri i ndir pa Daudi 46#2 Sam 7:1-16; 1 Kigana 17:1-14m'onwaŋo silwany pa Were, aka okwayo Were ni woyeyi go wogeri ot ri Were pa Yakobo. 47#1 Kerin 6:1-38; 2 Kigana 3:1-17To Solomon ama ogero ot no rigo.
48To Were Madwoŋ Maloyo kibedi rigin i ot ma ji ama jogero; paka jatuci wac oketho i Ndiko ni,
49 #
Isa 66:1-2
Polo meno kom paran ma dhum, apaka Rwoth waco,
aka piny meno kom paran ma ajeng'iye tiendan.
Kiti ot aŋo ma d'igero ran?
Kosa kaywomirok paran obedi aŋo?
50Kosa cingan ama k'ocweyo gigipiny ni je?
51 #
Isa 63:10
“Wiy win tek swa! Dwoŋ thumirok ongoye i cuny win kodi i ithi win. Wicale kwarere mewin; wibende noknok wipiemo gi Cuny Maleŋ! 52Nitie jatuci wac Were kad'acel ma kwarere pajo k'olwenyo gine? Joneko kiri jomikwenda pa Were, ma cango con jotuco bino pa Ŋat'otire, ma witieko kiri camo rigo sereko to wineko go. 53Win ma wijolo Cik pa Were ma jomalaika jokelo riwin, ama wikwero winjo Cik no!”
Goyo Stefano gi tele
54Munyo jokweth ma pido jowinjo wac no, keme omako jo to cako mwodo laki gin. 55To Stefano, paka opoŋ gi Cuny Maleŋ, oŋiyo polo to neno dwoŋ pa Were kodi Yesu munyo ocungo yuracuc pa Were. 56Aka owaco ni: “Neni! Eno aneno polo oyawere aka Wod Dhano ocungo yuracuc pa Were!”
57Cungo kwoŋ wac me jom'ocokere kenyo jowoy aka joculo ithi gin; gikenyo joje jomwomere kwoŋe, 58jowodho go woko ma tindi aka jogoyo go gi telin. Jom'obedo i wac no joketho ruk pajo dho tiendi jayac m'ilwoŋo ni Saulo. 59Munyo jogoyo go, Stefano owaco ikwayo ni, “Rwoth Yesu, joli cunyan.” 60Gikenyo oguro conge piny to koko malo ni, “Rwoth, ikir'ikethi kwoŋ jo gimarac me, aka gi wac me opodho to kwe.”
Nu markerat:
Tim pa Jomoor 7: DHOPE
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Dhopadhola DC Bible © Bible Society of Uganda, 2018.