John 5
5
Chapter 5.
1ADSHI dla Jews haade gia lagunung-ai swon ijan, waigien Jesus Jerusalem ā kulthaian.
2Waigien Jerusalem gu Lumado keu-e kwulth shu ijan, Hebrew haade kilthga Bethesda hin kyagan, wē keu-wādsie tlēlthaian.
3Althji ā ga stisgai kwon dlūu-wong-an, tl hang-kaga isgien, tl kēiwau ishin, tl hyilgala ishin; undlai hyildung-ai keu tl ēdang-an.
4Giagut nung angelga kaalths gien undlai il tla-hyildung-gang-an altha; waigien undlai hyildunsdlu, ai nung kaga-tlagans tliku sti et alth il stidōhun il ligulgang-an.
5Waigien nung ilthing-a tuda tlaale lthōnulth waugu stanshang-a stigan gu ijan.
6Tlistleuon il dlūūdas Jesus kang-andlu, hin il et-hunsgadan ishin un il ūnshidandlu Ligulai da gu dung gudung? hin la il shudaian.
7Nung itlagadas, tlistleuon untlai hyildunsdlu, gum shu-e ai di nung isdalthing-e kang-gāgung-ung-gung; hawun ā lth kāgundān nung kulat di kōnast ai kāgagung-gung, hin anung stis hang-gang il shudaian.
8Kālthūltha, tīdanai lth ung-a isdā ang-a kā, hin Jesus il shudaian.
9Waigien hawidan anung ilthing-as ligalan, waigien tīdanai ung-a il isdaian gien il kagan. Waudlu sabbath-gāgan.
10Sabbath-gāgung, gin ing-gu dung tīdas dung isdie gum lā-ung-gung, althji alth hin Jews haade nung ligalan shudaian.
11Di nung tl-ligulgun ū, Tīdanai lth ung-a isdā-ang-a ka, hin di shudagun; hin tlou hang-gang tla il shudaian.
12Tidanai lth ung-a isdā ang-a ka, gīshdū hin dung shudai-ang? hin la alth tl kianang-an.
13Waigien nung il tl-ligalan gum un il ūnshidang-an, Jesus sta kaidan altha, gu tl shkūlaian altha.
14Waudlu temple-gai ā Jesus il kēaian, Gwokeng, dung ligulgun; gum lth housen gin dāung-a isdang-ung; ging-an dung etsdlu, wau telg gin dāung-a dung gwī isisang, waigien hin la il shudaian.
15Nung ilthing-as kaidan gien, Jesus ū il tl-ligalang Jews haade ga il shouon.
16Adshi tā Jews haade Jesus ā gushou dāung-a shudagang-an, sabbath shantlanai ai a gin is il isdaian altha.
17Wētgai keu di Aung lthong-gwilgung-gung, waigien ltha ishin lthong-gwilgung-gung, hin tlou Jesus hang-gang tl shudaian.
18Adshi tā ishin Jews haade wau telg il tīie da gudang-an, sabbathga il tla-hūsdas gien, Shanung-itlagadas Aung-ung hin il kyadaian gien, Shanung-itlagadas ging-an ishin agung il etdaian altha.
19Waigien Jesus hin hanglthang tl shudaian, Yenkien, yenkien dalung lth shudang, Nung Git gum gūstgang-an gin isdalthing-ang-gung, tliku il Aung waus il kens ging-an il waugung-gung; tliku gin il isdas ging-an il Git ishin waugung-us altha.
20Nung Aung-as Git-ang kwōyādas altha, waigien gin il isdas wautliwon la il kendagung-gung; waigien ashgai telg lthong-gwila euonda la il kendāashang, un dalung kuldung-ai una.
21Nung Aung-as ga kotulthgiasgai kālthūdas gien, il tlā-hēnanstla-gung-us ging-an, il Git ishin nung isdāgudas ging-an tla-hēnans-tlagung-gung.
22Nung Aung-as gum tl ging-kilisalung-gung-uns altha; Git-ang ga tlou ging-kilisalang wautliwon il isdagun;
23Nung Aung-as ga tl gūtguts ging-an il Git ishin tl gūtgut-odsūe una. Il Git ga gum nung gūtgudansdlu, il Aung il kilkaidun ga ishin gum il gūtgīdung-ung-gung.
24Yenkien, yenkien dalung ga lth shugung, Di kil nung gnduns gien, di nung kilkaidun ishin il yetdasdlu, il hēnung-a-swonung-gung, waigien gum la tl ging-kilisalung-gung-ung-gung, kotal sta tlou hēnung-a ā il kāgung-gung.
25Yenkien, yenhien dalung ga lth shugung, ga kotulthgiasgai Shanung-itlagadas Git kil gudung-ases ashkoshgadai isang-kasas gien, wēt ishin ijung; waigien ga gudunsgai hēnung-āashang.
26Nung Aung-as kodan agung hēnung-ādas ging-an, Git-ang ishin agung il hēnung-ādadagun;
27Waigien tl ging-kilisalung-ai un dugwīa la ga il isdagun, nung haada Git il is altha.
28Gum lth adshi un kuldung-ang-ū; ga lthēo-wasgai wautliwon il kil gudung-ases ashkoshgadai isangkasas altha,
29Waigien tl kālthougadung-ashang; gin lā ga isdagun-gai hēnung-a un kālthougaduns gien, gin dāung-a ga isdagun-gai ishin ging-kilisalang un kālthougadung-ashang,
30Gum ltha kodan gin isdalthing-ang-gung; tliku gin lth guduns ging-an lth ging-kilisalung-gung; waigien giagun ging-kilisalung-ai lāgung; gum tliku lth guduns ging-an etgai da di gudung-uns altha, di nung kilkaidun guduns ging-an tlou etgai da di gudung-gung.
31Ltha gudan unstgang swonan shusdlu, gum yenki dīna et-lthing-ang-gung.
32Nung kulat ū di unsta shugung, waigien di unsta il shusdlu, yenki etsi un di unshidung.
33John ā dalung tukilistīidun, waigien la ū yenki gin ets unsta shouon.
34Waigien gum tl haada di unsta shougai da di gudung-ung-gung; hīkwon dalung kogunai un a gin is lth shudang.
35Kasodou ō-otga ū il ijun; waigien kwaiumdsiwon lagia otgagai alth gudung-ai ligai da dalung gudung-gun.
36Waigien John telg nung ets di unsta shugung; lthong-gwila lth elthgīdie un nung Aung-as di ga isdagun, lthong-gwila yikī lth isdas ū, nung Aung-as di kilkaidun unsta shugung.
37Waigien nung Aung-as di kilkaidun di unsta shugun. Gum tlījan tl il kil dalung gudung-ung-gun, gum tliku il ets ishin dalung keng-ung-gun.
38Waigien gum il kil āgang dalung isdagung-ung-gung; nung il kilkaidun kil gum dalung yetdagung-uns altha.
39Gin lā kālung-as dalung lididagung-gung, althsgai alth dalung hēnung-a-swonung-ashang dalung gudung-gung-us altha; waigien di unst ū althsgai shugung;
40Waigien dalung hēnung-gai un gum di a istalai da dalung gudung-gung-ung-gung.
41Gum tl haada di un yāgudung-ai da di gudung-ung-gung.
42Waigien dalung un di ūnshidung, gum Shanung-itlagadas gia kwōyādie āgang dalung isdāans-a.
43Aung-ung kyē ā lth katlang, waigien gum di dalung gwūlāang-gung; nung kulat kodan katlasdlu tlou, la dalung gwūlāashang.
44Gushinu dalung yetdalthing-āgung, gūdan dalung yāguduns gien, Shanung-itlagadas swonshuns sta un yāgudung is gum ga dalung stalthansdlu-a?
45Nung Aung-as ga dalung alth lth gialthanda-gudang-ashang ltli gum gudung-ung-ū; nung swonshung ū dalung alth gialthandagudang-gung, Moses, nung dalung yetdagun-a.
46Moses dalung yetdaiasdlu, di ishin dalung yetdalthing-āgung, di edē gin il kālang-an altha.
47Waigien gin il kālang-an gum dalung yetdansdlu, gushinu di kil dalung yetda-tljūashang? hin Jesus tl shudaian.
Nu markerat:
John 5: HAIDA
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
First published by the British and Foreign Bible Society 1891-1899.
