Yowanane 1
1
Muaku wa Mvidi Mukulu udi butoke ne muoyi
1Pavua Mvidi Mukulu mufuke ku tshibangidilu bintu bionsu, Muaku ukavuaku. Muaku uvua ne Mvidi Mukulu. Muaku uvua Mvidi Mukulu. 2Uvua ne Mvidi Mukulu ku tshibangidilu.#1.2 Fuanyikija tun. 1-2 ne Nsum 8.22-26. 3Mvidi Mukulu uvua mufuke bintu bionsu ne Muaku. Kakuvua tshintu nansha tshimue tshivua Mvidi Mukulu kayi mufuke ne Muaku.#1.3 Fuanyikija ne Tshib 1.3; Mis 33.6,9; 1 Kor 8.6; Kol 1.16-17. 4Munda mua Muaku muvua muoyi.#1.4 Kakuvua tshintu nansha tshimue tshivua Mvidi Mukulu kayi mufuke ne Muaku (kan. 3); munda mua Muaku muvua muoyi (kan. 4); mu mikanda mikuabu mbafunde ne: Mvidi Mukulu uvua mufuke bionsu ne Muaku. Bivuaye mufuke bivua ne muoyi munda muabi. Muoyi awu uvua mupeteshe bantu butoke. 5Butoke budi bukenka mu miidima. Kadi miidima kayivua mibuanyishe.#1.5 midima kayivua mmuanyishe: mu mikanda mikuabu mbafunde ne: midima kayivua mua kubupita bukole.
6Mvidi Mukulu uvua mutume muntu wende, dina diende nYowanane.#1.6 Ke Yowanane-Batiste: tangila 1.19-36. 7Yeye uvua mulue kujadika malu, bua kumanyisha bantu malu a butoke. Uvua mulue bua bantu bonsu bitabe tshidiye wamba. 8Yeye mene kavua butoke. Uvua mulue kujadikila bantu malu a butoke. 9Butoke ebu ke butoke bulelela budi bufika pa buloba bua kutokesha bantu bonsu.
10Muaku uvua pa buloba. Mvidi Mukulu uvua mufuke bintu bionsu ne Muaku.#1.10 Tangila kan. 3. Kadi bantu kabavua bitabe Muaku. 11Muaku kufika mu ditunga diawu.#1.11 Mu ditunga diawu, nansha: mu ditunga didi diawu. Kadi bana bawu nanshabu kuwakidila. 12Kadi bamue kuwakidila, kuwitaba. Kubapeshawu bukole bua kuikala bana ba Mvidi Mukulu.#1.12 Fuanyikija ne Ngal 3.26; 1 Yow 3.1-2. 13Kabena babalele ku bukole bua mashi, mudi tatu wa pa buloba ulela muana. Kadi Mvidi Mukulu nkayende ke udi mubapeshe muoyi mupiamupia.
14Muaku kudienza muntu. Kusombawu munkatshi muetu. Uvua muwule ne dinanga kabidi ne bulelela. Tuetu kumona butumbi buawu.#1.14 Fuanyikija ne Yesh 60.1-2. Butumbi ebu ke budi Muana mulela umue upeta kudi Tatuende. 15Yowanane ke uvua muambile bantu bualu buende. Uvua muele diyi dikole ne:
— Yeye ewu ke umvua muambe ne: “Muntu neafike panyima panyi udi muntambe meme, bualu kabayi banji kundela, yeye ukavuaku.#1.15 Tangila 1.30.”
16Muntu yonsu wa kutudi mmupete tshiende tshitupa tshia bubanji bua dinanga diende. Uvua mudiele lupemba misangu ne misangu. 17Mvidi Mukulu uvua mutuelele mikenji idi Moshe mutumanyishe.#1.17 Tangila Tshim 31.18; 34.28. Kadi dinanga ne bulelela mbifika kudi Yezu Kristu. 18Muntu nansha umue kena muanji kumona Mvidi Mukulu.#1.18 Fuanyikija ne Tshim 33.20. Amu Muana mulela umue, Mvidi Mukulu udi musombe pamue ne Tatu, ke udi mutumanyishe Tatu.
Yowanane-Batiste udi wambila bantu malu
(Mat 3.1-12; Mar 1.1-8; Luk 3.1-18)
19Telejayi muvua Yowanane muandamune bamfumu ba bena Yuda ba mu Yerushalayime pavuabu batume batuangaji ne bena Levi kudiye bua kumukonka ne:
— Wewe udi nganyi?
20Yowanane kavua mubenge kubandamuna. Kadi kubambilaye patoke ne:
— Meme tshiena Meshiya.
21Kumukonkabu ne:
— Kadi udi nganyi? Udi Eliya anyi?
Yowanane kuandamuna ne:
— Tshiena Eliya.
Kumukonkabu kabidi ne:
— Udi Muambi utudi bindile anyi?
Kuandamunaye#1.21 Tangila Mal 3.23; Diel 18.15, 18. ne:
— To.
22Nanku kumuambabu ne:
— Kadi udi nganyi? Utuandamune, bua tuye kuambila bavua batutume? Udi udiamba mene ne: ndi nganyi?
23Yowanane kuandamuna ne:
— Ndi
“Diyi dia muntu udi wela lubila mu tshipela ne:
Longololayi njila wa Maweja-Nangila bimpe!#1.23 Yesh 40.3, muvua bena Ngreke bafunde ku kale.”
(Ke bivua muambi Yeshaya muambe.)
24Ku bantu bavuabu batumine Yowanane, kuvua Baparushe.#1.24 Mu mikanda mikuabu mbafunde ne: Bantu bavuabu batumine Yowanane bavua Baparushe. 25Ke bavua bamukonka ne:
— Paudi kuyi Meshiya, kuyi Eliya, nansha muambi utudi bindile, kadi udi utua bantu mu mayi bua tshinyi?
26Yowanane kubandamuna ne:
— Meme ndi nnutua mu mayi. Kadi munkatshi muenu mudi muntu unudi kanuyi bamanye. 27Udi ulua panyima panyi. Kadi tshiena nansha muakanyine kusulula nshinga ya bisabata biende.
28Bionsu ebi bivua bienzekele mu musoku wa Betanya,#1.28 Betanya: mmusoku udibu kabayi bamanye bimpe, kadi uvua luseke ludi diba dipatukila lua Yardene. Udi mushilangane ne mukuabu wa dina adi udi ku mpenga kua Yerushalayime (tangila 11.1). dishiya dia musulu wa Yardene, uvua Yowanane utua bantu mu mayi.
Yezu udi Muana wa mukoku wa Mvidi Mukulu
29Butshia, Yowanane kumona Yezu ufika kudiye. Kuambilaye bantu ne:
— Tangilayi Muana wa mukoku wa Mvidi Mukulu udi umbusha bubi bua bantu.#1.29 Fuanyikija ne Yesh 53.6-7. 30Yeye ke umvua muambe ne: “Muntu udi ulua panyima panyi. Kadi udi mumpite meme. Bualu kabayi banji kundela, yeye ukavuaku.” 31Tshivua mumumanye. Kadi ndi mulue kutua bantu mu mayi bua kumumanyisha kudi bena Izrayele.
32Yowanane uvua ujadika kabidi ne:
— Mvua mumone Mueyelu wa Tshijila upueka mu diulu bu nyunyi wa nkudimba, umuikila.#1.32 Fuanyikija ne Yesh 11.2; 61.1. 33Tshivua nansha muanji kumumanya. Kadi Mvidi Mukulu uvua muntume bua kutua bantu mu mayi, uvua mungambile ne: “Muntu uwamona Mueyelu wa Tshijila upueka, umuikila, Yeye awu ke udi utua bantu mu Mueyelu wa Tshijila.” 34Ke Yowanane kuamba ne: “Mvua mumone nanku. Ke mundi njadika ne: Muntu awu ke Muana wa Mvidi Mukulu.”
Yezu udi ubikila balongi bende ba kumpala
35Butshia, Yowanane uvua kabidi muaba awu pamue ne balongi bende babidi. 36Umona Yezu upita, kuambaye ne:
— Tangilayi Muana wa mukoku wa Mvidi Mukulu!#1.36 Tangila 1.29.
37Balongi babidi ba Yowanane bumvua muvuaye muambe amu, kulondabu Yezu. 38Yezu ukudimuka, kubamonaye bamulonda. Kubakonkaye ne:
— Tshinudi nukeba ntshinyi?
Bobu kumuandamuna ne:
— Rabi#1.38 Rabi: mmuaku udi mu buena arame. (mmomumue ne “Mulongeshi”), utu usomba penyi?
39Yezu kubambila ne:
— Luayi, nenumone.
Kuyabu nende. Kumonabu muaba uvuaye usomba. Kumusombeshabu dituku dijima. (Diba dikavua bu pa inayi wa dilolu).
40Umue wa ku balongi babidi bavua bumvue muvua Yowanane muambe, balonde kabidi Yezu, uvua Andre, muanabu ne Simone Petro. 41Andre kusambakena diambedi ne muanabu Simone. Kumuambilaye ne:
— Tuvua bamone Meshiya. (Mmomumue ne: “Kristu”).
42Kuyaye ne Simone kudi Yezu. Yezu kutangila Simone, umuamba ne:
— Wewe udi Simone, muana wa Yowanane. Nebakuinyike ne: Kefase.#1.42 Kefase: mmuaku udi mu buena arame. (Mmomumue ne: “Dibue”).
Yezu udi ubikila Filipe ne Natanayele
43Butshia, Yezu uvua musue kuya mu buloba bua Ngalileya. Kusambakenaye ne Filipe. Kumuambilaye ne:
— Undonde!
44(Filipe uvua muena Betsayida;#1.44 Betsayida: mmusoku uvua mutumba ne Kefamawume. Andre ne Petro bavua basombe kabidi mu musoku awu.) 45Pashishe Filipe kusambakena ne Natanayele. Kumuambilaye ne:
— Tuvua bamone muntu uvua Moshe mutele mu mukanda wa Mikenji, kabidi uvua bambi bambe.#1.45 Fuanyikija ne Diel 18.18; Yesh 9.5-6; Yez 34.23. Ke Yezu, muana wa Yozefe, muena mu tshimenga tshia Nazarete.
46Natanayele kuambila Filipe ne:
— Mu Nazarete mudi mua kupatuka bualu bua nsongu anyi?
Filipe kumuandamuna ne:
— Luaku, neumone.
47Yezu umona Natanayele ufika kudiye, kuambaye ne:
— Ke muena Izrayele mulelela udi kayi ne dishima nansha dikese munda muende.
48Natanayele kumukonka ne:
— Udi mummanye munyi?
Yezu kumuandamuna ne:
— Mvua mukumone, Filipe kayi muanji kukubikila, pauvua muinshi mua mutshi wa mfiku.#1.48 Balongeshi ba bena Yuda bavua banyisha kusombela muinshi mua mutshi wa mfiku bua kubala mikanda, ne bua kuela meji ku bidibu bafunde mu Mikanda ya tshijila.
49Nanku Natanayele kumuambila ne:
— Mulongeshi, udi Muana wa Mvidi Mukulu, udi mukalenga wa bena Izrayele!#1.49 Fuanyikija ne Mis 2.7; Sef 3.15.
50Yezu kumuandamuna ne:
— Udi witaba nanku amu bualu mvua mukuambile ne: ndi mukumone muinshi mua mutshi wa mfiku. Neumone malu manene mapite ebu!
51Yezu kuamba kabidi ne:
— Ndi nnuambila bulelela ne: nenumone diulu diunzuluke, batumibue ba Mvidi Mukulu babanda bapueka kulu kua Muana wa muntu.#1.51 Fuanyikija ne Tshib 28.12.
Nu markerat:
Yowanane 1: TSH96
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Bible avec Livres Deutérocanoniques en Tshiluba © Société Biblique de la R. D. Congo, 1996
