Yowanane Diumvuija
Diumvuija
— Mukanda wa Lumu lua Disanka mufunda kudi Yowanane mmushilangane bikole ne mikanda mikuabu isatu ya Lumu lua Disanka. Amu malu a pa bisama bia Yezu (bit. 18-19) adi mafuanangane ne a mikanda mikuabu isatu. Malu makuabu kana onsu mmashilangane. Mudi kabidi malu adi Yowanane nkayende mufunde, bu dibaka dia mu Kana (2.1-12), dimonangana dia Yezu ne Nikodemu (3.1-21), ne mukaji muena Samariya (4.1-12), ne muena tuneke wa mu Betzata (5.1-18), ne muntu mulela mpofu (9.1-41). Yowanane udi ufunda amu malu makese a pa disomba dia Yezu mu bantu. Kadi malu makese adiye ufunda aa adi ne mushinga mukole, bualu munda muawu mudi dilongesha dinene didi Yezu umvuija bantu.
Miaku ya kumpala (1.1-18) idi bu musambu. Mukanda wa Lumu lua Disanka mufunda kudi Yowanane udi uleja Yezu bu Muaku wa kashidi wa Mvidi Mukulu udi udienza muntu, ufika bua kusomba ne bantu, bua muoyi, butoke ne bulelela bikale nabu.
Mu mukanda mudi bitupa binene bibidi, bilondeshile diba dia Yezu, mmomumue ne diba dia lufu luende, didi kabidi diba dia kumupingajilabu butumbi buende (2.4; 12.23).
— Kumpala kua diba dia Yezu (1.19—12.50): Yowanane-Batiste, mulongi wende Andre, Filipe ne Natanayele, badi baleja muntu wende mushindu muntu wende bivuabu bapeta kudi Yezu. Pashishe mukanda udi utulondela dimonangana dia Yezu ne bantu bashilangane, kabidi ne bishima muanda mutekete bidi Yezu wenza bikale bu “bimanyinu” bidi ne bua kulongesha bantu badi babiumvua bimpe malu manene. Yowanane udi ujikija tshitupa tshia kumpala etshi ne tshikepeshilu tshia dilongesha dia Yezu (12.37-50).
— Diba diende dimane kufika (13.1), Yezu udi ulongesha balongi bende malongesha a ndekelu adi bu diyi diende dia ndekelu didiye ubashila (bit. 13-16). Pashishe udi utendelela, udilongolola bua kudifila ku lufu, uteka bonsu badiye ushiya mu bianza bia Tatu (tshit. 17). Pashishe Yowanane udi utulondela, mushindu mufuanangane ne wa bafundi bakuabu basatu, mudibu bakuata Yezu, bamufundila tshibawu tshia lufu, bamupopela pa mutshi mutshiamakane, pashishe mudi balongi basangana lukita luende munda mutupu (bit. 18-20). Dituku dia Dipita dia Maweja-Nangila, Yezu mubike ku lufu udi umuenekela Mariya wa mu Magdala, pashishe balongi bende, nangananga Tomase. Tshitupa tshia 21 (balongi muanda mutekete, Petro ne bakuabu basambombu, badi bamonangana ne Yezu mubike ku lufu, ku muelelu wa dijiba dia Tiberiyade), bavua batshifunda kunyima kua bidimu, batshisakidila ku mukanda ukavua ne nkomenu.
Nkomenu awu (20.30-31) udi uleja kipatshila ka mukanda: kufikisha mubadi ku ditaba dia ne: Yezu udi Meshiya, Muana wa Mvidi Mukulu, uvuabu batulaye. Muntu udi witaba nanku, neapete muoyi, bualu Yezu, uvua Tatu mututumine, udi “njila, bulelela ne muoyi” (14.6).
Nu markerat:
Yowanane Diumvuija: TSH96
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Bible avec Livres Deutérocanoniques en Tshiluba © Société Biblique de la R. D. Congo, 1996