U̍ku̍rɔ̍ yī Alɛrɔ̄ 3
3
Ɔngrɔ̄ɔ okwi̍kpo̍ oko̍ōku̍ nīi ē gbo la o̍grīgba yī U̍nu̍ yī Ɔwɔ ma̍
1I̍chi̍chɛ ɔha̍, Ipi̍ta ba̍la Ijɔ̍ɔn yɛ gāa u̍nu̍ yī Ɔwɔ bāa yɛ̄grāa yī oje ɛta̍ yī yɛnɔ nīi - yɛ̄grāa yī ɔhā ojōji ma̍. 2Ɔngrɔ̄ɔ ɔha̍ hɔ̄ abɔ̍ɔ la o̍grīgba yī u̍nu̍ yī Ɔwɔ la ɛbɛ nīi re̍ka “Oko̍nɔ̄ɔpu Oli̍hi̍hi̍” ma̍. Ɔngrɔ̄ɔ ɔla̍ā kwi̍kpo̍ oko̍ōku̍ bū la yɛ̄grāa nīi e̍ ma ɔ̍ ma̍. Mɔ̄chīmɔ̄chī, e̍ ē nāa anu̍ ge̍ē gbo abɔ̍ɔ nīi o̍ ē ba ɔ̄chɛ nīi ge̍ē chɛ̄ ga u̍nu̍ yī Ɔwɔ ma̍ okpo. 3O̍ ma̍ Ipi̍ta ba̍la Ijɔ̍ɔn nīi e̍ yɛ ga u̍nu̍ yī Ɔwɔ ma̍, o̍ ba wā ɔjā. 4Ipi̍ta ba̍la Ijɔ̍ɔn ma̍ ɔ̄ chi̍i̍. Ipi̍ta da ɔ̍ ka ɔ̍lɔ ge̍ hu eyī hwa̍a̍ ma̍ aa̍! 5Ɔngrɔ̄ɔ ɔla̍ā deyīrɛ wa̍ bɛ̍ɛ̄nɛ̄. O̍ gbɛri̍ya̍ ka ɛ̍lɛ ge̍ē kɔ̄ ɔjā ɔha̍ de anu̍. 6Ipi̍ta ka de ɔ̍ bɛ̍ɛ̄nɛ̄ hīka, “Okpo ma̍, n i̍ lɛ ni̍ ko̍ō! Ɔjā nīi n lɛ ma̍, n chī ge̍ē de ē de wɔ. Bū la riyī yī Iji̍sɔ̄ɔsi Ikra̍yisi yī Ina̍jārɛ̄ɛti, nīichō nīi a ā yɛɛ!” 7Ipi̍ta de abɔ̄ ku̍ ɔ̄ la abɔ̄ līre̍, nāa anu̍ nīichō. Ɔpɔ̄ɔpɛ̄, ikpo̍ yī ɔngrɔ̄ɔ ɔla̍ā ba̍la iko yī nū wa̍a̍ de lwɔhɔ̍hu̍. 8O̍ wi̍bi ku ajɛ, wu̍ ɛyɛ ta̍ ɔpɔ̄ɔpɛ̄. O̍ pīya tīkpo̍ tāa Ipi̍ta ba̍la Ijɔ̍ɔn ga u̍nu̍ yī Ɔwɔ. O̍ kū abɔ̍ɔ ē yɛɛ, ē wi̍bi i̍ngi̍ngi̍ngɔ̍ɔ ē kā Ɔwɔ ɔkɔ̄kā. 9Āchɛ wa̍a̍ ma̍ ɔ̄ nīi o̍ yɛ ē yɛɛ gba̍a yɛ ē kā Ɔwɔ ɔkɔ̄kā ma̍. 10E̍ je̍ ɔ̄ hwɔhi hwɔhi hīka ɔ̍lɔ ē hɔ̄ la “Oko̍nɔ̄ɔpu Oli̍hi̍hi̍” yī u̍nu̍ yī Ɔwɔ ba āchɛ ɔjā a̍nɛ ma̍, o̍ de ya̍ wā lɛbɛ̍bi̍ ɔlamu-ɔlamu. E̍ de kpo̍ hɛ̍ɛgbɛgba gblāa abɔ̍ɔ, wu̍chē yī lɛlā nīi ya̍ la lɛhu̍ yī ɔngrɔ̄ɔ ɔla̍ā ma̍.
Ɛrɔ̄ yī Ɔwɔ nīi Ipi̍ta ka la U̍nu̍ yī Ɔwɔ ma̍
11Ɔngrɔ̄ɔ ɔla̍ā e̍e hɛ̍ pla Ipi̍ta ba̍la Ijɔ̍ɔn abɔ̍ɔ we̍ ma̍, āchɛ chē gbūdūū gāa dikpo̍ba̍ wā abɔ̍ɔ la wāā ɔha̍ yī u̍nu̍ yī Ɔwɔ nīi re̍ka “U̍twɔ̄ɔda yī Iso̍lōmɔn” ma̍. O̍ e̍e lɛ wa̍ i̍mamachi̍-i̍mamachi̍ we̍. 12Ipi̍ta ma̍ āchɛ nūma̍ wa̍a̍ ma̍, o̍ da wa̍ bɛ̍ɛ̄nɛ̄ hīka, “Aya̍ali̍sɛ̄rɛli! Ɔna̍ - ɔlɛ ala̍ lɛbɛ̍bi̍ yī lɛlā nūma̍ ma̍/? Ɔna̍ - ɔma̍ alɔ chwaa i̍ngɔ̍ɔ ma̍? Ala̍ gbɛri̍ya̍ ka ɔ̍lɔ - wɔhu̍ yī aɛ̍lɛ kɛ̄ɛ bū la lɛlā ɔha̍ nīi aɛ̍lɛ ya̍ yɛ̍yɛ̍ ma̍ - ohu̍ nīi ɔngrɔ̄ɔ nūma̍ ɔ̍lɔ de yɛɛ mɛ a̍nɛ? 13Ɔwɔ nīi - Ɔwɔ yī A̍brahāam, ba̍la A̍yi̍sāaki ba̍la Ije̍kɔ̄ɔpu, ba̍la aa̍ ɔ̍kɔ̄kū yī alɔ wa̍a̍ ma̍, anu̍ de rīgā ɔnɔ̄kɔ̄kū nīi - iyī Ɔwɔ ma̍ de Iji̍sɔ̄ɔsi nīi - Ɔ̍chɛ̍ yī nū ma̍ a̍nɛ. Anu̍ nīi ala̍ chī ku̍ ɔ̄, wa̍ābɔ̄ la anu̍ de āchɛ nīi bī ɔcha yī ala̍ ma̍ a̍nɛ. Ipa̍yi̍lēeti kɔ̄ka ka anɔ̍lɔ ge̍ē tu̍ hī ɔ̍lɔ ma̍ ala̍ hi̍hi̍yo̍ de ɔ̍ abɔ̍ɔ la eyī yī nū. 14Anu̍ nīi lɛ cha̍ri̍cha̍ri̍ hwɔhi hwɔhi ma̍, ala̍ chī ta̍ ɔ̄. Ala̍ chōo̍chē ka de Ipa̍yi̍lēeti ka ɔ̍lɔ ge̍ tu̍ la abɔ̄ hī ɔ̄chɛ ɔngma̍āchɛ de ala̍. 15Bū la ɛbɛ ɔla̍ā, ala̍ de Ādādā nīi ē de ɔhɔ̄leyī de āchɛ ma̍ ngmo̍. Ɔwɔ chī de ɔ̍ hye̍ēyī la okū ke̍e̍ mɛ̍. Alɔ nūma̍ - itɛ̍ɛhi̍yɛ̍ yī ɔla̍ā a̍nɛ. 16Bū la wɔhu̍ yī riyī yī Iji̍sɔ̄ɔsi nūma̍ pi̍i̍ ba̍la ɔtū ode che ɔ̍ ochōche, anu̍ - ohu̍ nīi ɔngrɔ̄ɔ nūma̍ de lɛ kpra̍kpra̍ rɛ ma̍ a̍nɛ. Ɔjā nīi ala̍ ma̍ la eyī gba̍a jo̍ōkū hɔ̄ ma̍ u̍ma̍ama ma̍ bū la ɔtū ode che Iji̍sɔ̄ɔsi. Ɔtū nīi ɔngrɔ̄ɔ nūma̍ de che riyī yī Iji̍sɔ̄ɔsi ma̍, anu̍ ya̍ nīi o̍ de lɛ cha̍cha̍ rɛ ma̍ la iyɔ̄bū yī ala̍ wa̍a̍ a̍nɛ.
17“Aɛ̍nɛ̍ yī u, n jo̍ōkū hīka lɛlā ɔla̍ā nīi ala̍ ba̍la ɛgabɔ̄ yī ala̍ ya̍ tāa Iji̍sɔ̄ɔsi ma̍, i̍je̍ ni̍ - ohu̍ a̍nɛ. 18Ɔwɔ ka gbi̍chɛ-gbi̍chɛ gala oko̍o yī āchɛ ɔkɛrɔ̄ yī nū hīka Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ ɔ̍lɔ ge̍ē mi̍chi̍. Anu̍ nīi o̍ de pīya ichɛ̄ɛhi gala ɔgɔgu ɔla̍ā a̍nɛ. 19O̍ lɛ i̍ngɔ̍ɔ ma̍, ala̍ ā pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ gɛ! Ala̍ ā pīya ūkpɔ̄tū yī ala̍ kɔ̍ Ɔwɔ gɛ, hɛ̄ɛbɛ nīi o̍ ge̍ de lɛlā ɔdwɔ̄bi̍ yī ala̍ ngmo̍nyi̍; 20hɛ̄ɛbɛ nīi ɔlɛkpra̍kpra̍ nīi ē bū la abɔ̄ yī Ɔwɔ ma̍ ge̍ bū la ɛbɛ yī Ādā wā dikpo̍ba̍ ala̍; hɛ̄ɛbɛ nīi Ādā ge̍ de Iji̍sɔ̄ɔsi nīi - Ɔhɔ̍ɔnyɛta̍ Nīi Ɔwɔ Hōhu lɔ̄lā de ala̍ ma̍ tɛ̄rɔ̄ hu ala̍. 21O̍ chī ge̍ē hɔ̄ abɔ̍ɔ la ichō kpɛɛ gbo̍ yɛ̄grāa nīi Ɔwɔ ge̍ē gbla̍a ɔjāha̍-ɔjāha̍ wa̍a̍ ya̍ īpīpɛ̄ ma̍ o̍bū. I̍ngɔ̍ɔ nīi Ɔwɔ ka gala oko̍o yī āchɛ ɔnɛ̄ɛhɛhi ɛkɛrɔ̄ yī nū eli̍gbi̍chɛ a̍nɛ. 22Onīi Imo̍sīisi ka ma̍ re̍ka,
“ ‘Ādā Nīi - Ɔwɔ yī ala̍ ma̍ ge̍ē de ɔ̄chɛ ɔkɛrɔ̄ yī nū
ɔha̍ ē tɛ̄rɔ̄ hu ala̍; bɔ̄ɔkɔ nīi o̍ de ami tɛ̄rɔ̄ wā ma̍.
Ɔlɔjā ge̍ē bū la wɔma yī ala̍ ɛlɛjā.
Ɔ̄chɛmɔ̄chɛ ge̍ darɔ̄ku lɛlā nīi o̍ ge̍ē ka ma̍.
23Ɔ̄chɛ nīi i̍ ge̍ po̍ ɔkɔlɛ̄lā yī nū ni̍,
e̍ ge̍ē de ɔlɔjā wu̍ligbo̍ hī āchɛ yī Ɔwɔ ē de ɔ̍ ē chāajɛ.’
24“Āchɛ ɛkɛrɔ̄ yī Ɔwɔ tōtū la Isa̍mūɛli ɔlɔjā ba̍la āchɛ ɛha̍ nīi hɔ̄ la okwi̍ihi yī nū nīi bī ɛrɔ̄ yī Ɔwɔ ma̍, aa̍ wa̍a̍ mwɔ̍ɔmu ku̍ ɔ̄chī nūma̍ pi̍i̍. 25Oko̍o ochōche nīi āchɛ ɔkɛrɔ̄ yī Ɔwɔ bī wā ge̍ ka ma̍, je̍ka aa̍ ala̍ nāa a̍nɛ! Ala̍ chī nāa yɛka yī Ɔwɔ nīi o̍ gwa̍ ba̍la A̍brahāam ma̍ a̍nɛ. Ɔwɔ ka de A̍brahāam hīka, ‘Bū la wɔma yī wɔ nīi n ge̍ē de ɔpiyɛ ē de āchɛ̄ɛchɛ wa̍a̍ la yɛchɛ a̍nɛ.’ 26Anu̍ - ohu̍ nīi Ɔwɔ hu Ɔ̍chɛ̍ yī nū, de ɔ̍ tɛ̄rɔ̄ yɔbɔ̄ɔbū hu ala̍ hɛ̄ɛbɛ nīi o̍ ge̍ē de ɔpiyɛ ē de ala̍ la ɔya̍ nīi ala̍ pīyabɔ̄ta̍ hī ɔpɔ̄pū ɔdwɔ̄bi̍ yī ala̍.”
Nu markerat:
U̍ku̍rɔ̍ yī Alɛrɔ̄ 3: YBASR
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2020 Bible Society of Nigeria (second edition)