U̍ku̍rɔ̍ yī Alɛrɔ̄ 4
4
Ipi̍ta ba̍la Ijɔ̍ɔn rɛ la iyɔ̄bū yī ogrēeyī yī alihiyo
1Ipi̍ta ba̍la Ijɔ̍ɔn gblāa abɔ̍ɔ ē kɛlā de āchɛ ɛla̍ā ma̍, aligbe ba̍la ɔlɛhu̍ yī āchɛ ogbō u̍nu̍ yī Ɔwɔ ba̍la Āchɛ yī Isa̍dusīi ɛha̍ wā dikpo̍ba̍ wā. 2E̍ wɔ̍ɔ̄tū kpɛ̍ɛji wu̍chē lɔkɔ nīi Ipi̍ta ba̍la Ijɔ̍ɔn yɛ ē ngū āchɛ lɛlā ma̍. Wu̍chē oji̍ nɛ, e̍ yɛ ē ngū āchɛ lɛlā hīka Iji̍sɔ̄ɔsi ɔ̍lɔ hye̍ēyī la okū mɛ̍. Ɔla̍ā chabɔ̄ hīka okū wa̍a̍ ɔ̍lɔ ge̍ē hye̍ēyī we̍. 3E̍ de Ipi̍ta ba̍la Ijɔ̍ɔn kpo̍ ku̍ ge̍ tū la igbakɔbɔ. E̍ ku̍ wā tū abɔ̍ɔ ku ɔ̄chī ɔmɛpa, wu̍chē lɔkɔ nīi otu̍ yɛ ē de ē bī mɛ̍ ma̍. 4Āchɛ yɛ̄mɛ̄mɛ̄ nīi chī plɛ̍ɛ̄lā yī wā ɔla̍ā ma̍ chɛ̄ lēchi̍ lēchi̍. Āchɛ nīi chɛ̄ku Ɔwɔ ma̍ lɛ āchɛ u̍nɔ igwo̍lɛpa che ohu igwo̍.
5La ɔ̄chī ɔmɛpa yī nū, alɛhu̍ ba̍la ɛgabɔ̄ ba̍la āchɛ ongū Lihɔ yī Iju̍u wa̍a̍ tu̍ grēeyī abɔ̍ɔ la Ijɛru̍sālɛm. 6A̍nāasi nīi - A̍dā Aligbe ma̍ ba̍la Ike̍yāfasi, ba̍la Ijɔ̍ɔn ba̍la Alɛsa̍nda ba̍la āchɛ ehēhī nīi - alwɔlɛ̍ yī A̍dā Aligbe ma̍ gblāa abɔ̍ɔ. 7E̍ bī Ipi̍ta ba̍la Ijɔ̍ɔn ge̍ rɛ la iyɔ̄bū yī wā wa̍a̍. E̍ che wā ikpo̍ hīka, kana̍ nīi ɛ̍lɛ yɛ ē yɛ̍ɛ̄lā nūma̍ ma̍/? Wɔhu̍ ɔna̍ kɛ̄ɛ riyī yī ɔ̄nyɛ nīi ɛ̍lɛ bī nyiya ɔngrɔ̄ɔ ɔla̍ā ma̍?
8Uhu Ɔnɛ̄ɛhɛhi yī Ɔwɔ mu Ipi̍ta ibi̍īyē omōmu ma̍. O̍ hīya aa̍ ɔkɔ, da wa̍ hīka, “Alɛhu̍ ba̍la ɛgabɔ̄ yī ajɛ yī I̍sɛ̄rɛli wa̍a̍, n kaka ni̍ ko̍ō! 9O̍ re̍ka ala̍ hī alɔ lɛpɔ̄ i̍chɛ nūma̍ wu̍chē yī lɛlā ɔnɛ̄ɛhɛhi nīi alɔ ya̍ tāa ɔngrɔ̄ɔ okwi̍kpo̍ oko̍ōku̍ ma̍? Ala̍ chikpo̍ ge̍ē je̍ ɔjā nīi hu̍ nīi o̍ de lɛ cha̍cha̍ ma̍? 10Ɔ̍lɔma̍, n ge̍ē de ē yi̍ya ē de ala̍! N ge̍ē de ē yi̍ya ē de ayi̍ Ali̍sɛ̄rɛli wa̍a̍! Bū la riyī ba̍la wɔhu̍ yī Iji̍sɔ̄ɔsi Ikra̍yisi yī Ina̍jārɛ̄ɛti, aa̍ nīi ɔngrɔ̄ɔ nīi rɛ ma̍ la iyɔ̄bū yī ala̍ ma̍ de lɛ cha̍cha̍ a̍nɛ. Iji̍sɔ̄ɔsi nūma̍ nīi ala̍ de ɔ̍ gwōba̍ la ɔchi̍ ɔhrɛ̍ɛpa a̍nɛ. Ɔwɔ chī de ɔ̍ hye̍ēyī la okū ke̍e̍. 11Iji̍sɔ̄ɔsi nūma̍, anu̍ re̍ka ‘Lɛchɔ̄ nīi ala̍ āchɛ ɔmwɔlɛ̍ hi̍hi̍yo̍ ka ɔ̍lɔ i̍ hwɔhi ni̍ nīi chōo̍chē de pīya lɛchɔ̄ ɔlamu ɔlamu gɔ̄ga ma’ a̍nɛ. 12Ɔhɛ̍ta̍ hɔ̄ gala abɔ̄ yī anu̍ lōri̍īnū. Riyī ɔha̍lɔha̍ i̍ hɔ̄ la yɛchɛ nūma̍ nīi Ɔwɔ de de āchɛ̄ɛchɛ, nīi alɔ ge̍ē lɛ ɔhɛ̍ta̍ la anu̍ ni̍, ɔ̍chi̍kpa̍kpa̍ Iji̍sɔ̄ɔsi.”
13Alihiyo ɛla̍ā ma̍ hīka Ipi̍ta ba̍la Ijɔ̍ɔn ɔ̍lɔ kɛlā grigrigri lēchi̍ lēchi̍. E̍ chī jo̍ōkū ka ɛ̍lɛ - āchɛ ɔlamu ji nɛ, ɛ̍lɛ i̍ je̍ īpū ni̍. Wu̍chē yī ɔla̍ā, o̍ lɛ wa̍ lɛbɛ̍bi̍ kpɛ̍ɛji. E̍ chōo̍chē wā ge̍ de jo̍ōkū bɛ̍ɛ̄nɛ̄ hīka ɛ̍lɛ hɔ̄ tāa Iji̍sɔ̄ɔsi je̍. 14E̍ ma̍ ɔngrɔ̄ɔ ɔla̍ā nīi e̍ de ɔ̍ nyiya ma̍ nīi o̍ rɛ abɔ̍ɔ tāa Ipi̍ta ba̍la Ijɔ̍ɔn ma̍, e̍ je̍ lɛlɛ̄lā ge̍ē ka ku̍ aa̍ Ipi̍ta ē gɛ ni̍. 15E̍ de Ipi̍ta ba̍la Ijɔ̍ɔn wu̍ ngmɛ̍ɛchɛ hī ɛbɛ yī lɛpɔ̄. Alihiyo ɛla̍ā gblāa abɔ̍ɔ ē miya lɔkɔ nīi e̍ ge̍ē ya̍ ma̍: 16Oji̍ kpɛ̍ɛ nīi aɛ̍lɛ ge̍ē u̍tu ē ya̍ āchɛ nūma̍ ma̍/? Alijɛru̍sālɛm wa̍a̍ ɛ̍lɛ chī plɛ̍ɛ̄lā yī u̍ku̍rɔ̍ ɔlɛbɛ̍bi̍ nūma̍ nīi ɛ̍lɛ ya̍ ma̍ mɛ̍. Aɛ̍lɛ i̍ chī ge̍ē ta̍ahu̍ yī ɔla̍ā mɛ ni̍. 17Ɔjā ūkpo̍he, aɛ̍lɛ i̍ chikpo̍ nīi ohu yī lɛlā nūma̍ ɔ̍lɔ ge̍ mīyanya gɛ ni̍. Wu̍chē yī ɔla̍ā, aɛ̍lɛ ge̍ ta̍ ɛ̍lɛ ɔna gba̍a̍ hīka ɛ̍lɛ ge̍ e̍e kɛlā de ɔ̄chɔ̄chɛ la riyī yī Iji̍sɔ̄ɔsi ge̍ gbo̍ gɛ ni̍.
18Bɛ̍ɛ̄nɛ̄, e̍ chōo̍chē hī aa̍ Ipi̍ta ɛra̍ gāa ge̍ ta̍ wā ɔna hīka ɛ̍lɛ ge̍ e̍e kɛlā, kɛ̄ɛ ngū āchɛ lɛlā la riyī yī Iji̍sɔ̄ɔsi ge̍ gbo̍ gɛ ni̍.
19Ipi̍ta ba̍la Ijɔ̍ɔn hīya aa̍ ɔkɔ hīka, “Ala̍ ɛlɛjā, ala̍ ā ma̍ lɛlā nūma̍ we̍ e̍ē! Ɔna̍ lɛ kpakpa la eyī yī Ɔwɔ ma̍? Otū ala̍ la ichō kɛ̄ɛ otū Ɔwɔ la ichō? 20Alɔ ma̍, alɔ ge̍ē koko̍o yī lɛlā nīi alɔ ma̍ ma̍, ba̍la onīi alɔ po̍ ma̍ ē de āchɛ!” 21Alihiyo ɛla̍ā ka tāa aa̍ lēchi̍ lēchi̍ ga iyɔ̄bū iyɔ̄bū. E̍ i̍ ma̍ ochi̍chi̍ yī lɛlɛ̄lā nīi e̍ ge̍ē ya̍ wā ichi̍ ni̍ ma̍, e̍ tu̍ hī wā. Wu̍chē oji̍ nɛ, āchɛ wa̍a̍ yɛ ē kā Ɔwɔ ɔkɔ̄kā wu̍chē yī lɛlā ɔla̍ā nīi ya̍ ma̍. 22Ɔngrɔ̄ɔ ɔla̍ā nīi e̍ de ɔ̍ nyiya ma̍ gla lɛ̍yi̍ ohu ɛpa ta̍ mɛ̍.
Ɔhā nīi āchɛ yī Iji̍sɔ̄ɔsi ji ma̍
23E̍ tu̍ hī wā ɔpɔ̄ɔpɛ̄ ma̍, Ipi̍ta ba̍la Ijɔ̍ɔn pīya dikpo̍ba̍ āchɛ yī wā ge̍ koko̍o yī lɛlā nīi alɛhu̍ yī aligbe ba̍la ɛgabɔ̄ ka wa̍a̍ ma̍ de wa̍. 24E̍ po̍ ma̍, aa̍ wa̍a̍ ngmo̍tu̍chɛ̄ la ɔhā ojōji de Ɔwɔ hīka, “Ādā, awɔ - Ɔwɔ yī ɔjā wa̍a̍ a̍nɛ. Awɔ ya̍ ichō ba̍la ajɛ ba̍la li̍hu ba̍la ɛjā nīi gblāa la aa̍ wa̍a̍ ma̍ a̍nɛ. 25A̍dā yī alɔ Ide̍bīidi - ɔ̄chɛ yī wɔ nɛ. Bū la abɔ̄ yī Uhu Ɔnɛ̄ɛhɛhi yī Ɔwɔ, a kɛlā ɛha̍ gala oko̍o yī Ide̍bīidi hīka,
“ ‘Oji̍ - ohu̍ nīi Ɛcha nūma̍ ɛ̍lɛ ē ya̍ ɔtū ngurangura i̍ngɔ̍ɔ ma̍?
Oji̍ - ohu̍ nīi āchɛ ɛla̍ā ɛ̍lɛ ē gbɛri̍ya̍ yī lɛlā nīi - ɔ̍lɔ i̍ ɔjɔ̄jā ni̍ ma̍/?
26Ɛchwɔ̄lɛ̍ yī yɛchɛ nūma̍ wa̍a̍ ɛ̍lɛ tībi̍īyē yī lɛwu̍ mɛ̍.
Ɛgabɔ̄ wa̍a̍ ɛ̍lɛ tu̍ ge̍ grēeyī pīyeyīta̍ Ādā
ba̍la Ɔhɔ̍ɔnyɛta̍ Nīi - Ɔwɔ Ɔ̍lɔ Hōhu Ma̍ mɛ̍.’
27“Lēchi̍ nɛ. Ihɛ̍rɔ̄ɔdi ba̍la Ipɔ̍ntīyɔsi Ipa̍yi̍lēeti lɛ ogrēeyī i̍ngɔ̍ɔ. Aa̍ ba̍la Iju̍u ba̍la Ɛchɛkɔcha ɛha̍ grēeyī la ipwo̍gra nūma̍ i̍ngɔ̍ɔ pīyeyīta̍ ɔ̍chɛ̍ yī wɔ nīi lɛ cha̍ri̍cha̍ri̍ ma̍, Iji̍sɔ̄ɔsi nīi a de re̍ka Ɔhɔ̍ɔnyɛta̍ Nīi A Hōhu Ma̍. 28E̍ grēeyī ge̍ē yɛ̍ɛ̄lā nīi awɔ ɔlɔjā de miya o̍bū lɔkɔ nīi awɔ ɔlɔjā chikpo̍ ka ɔ̍lɔ ge̍ ya̍ ma̍. 29Ādā, ma̍ ɔna oluhuhwi nīi e̍ yɛ ma̍ ē ta̍ alɔ ma̍ gɛ! Tū alɔ āchɛ yī wɔ wɔbɔ̄ nīi alɔ ā tūuhwi, pi̍ye̍mā la ɛrɔ̄ yī wɔ ɔkɔ̄ka ni̍! 30De wɔhu̍ yī wɔ tɛ̄rɔ̄ ge̍ nyiya āchɛ okwi̍īyē. Ya̍ lɛbɛ nīi u̍ku̍rɔ̍ ɔnɔ̄kɔ̄kū ba̍la lɛlā ɔlɛbɛ̍bi̍ ge̍ ya̍ bū la riyī yī Iji̍sɔ̄ɔsi nīi - Ɔ̄chɛ Ɔnɛ̄ɛhɛhi yī wɔ ma̍.”
31E̍ kwɛ̍ɛjī la ɔhā ojōji ma̍, ipu̍nu̍ nīi e̍ tū ma̍ he̍ejē mɔri̍mɔri̍. Uhu Ɔnɛ̄ɛhɛhi yī Ɔwɔ mu wa̍ ibi̍īyē omōmu ɔpɔ̄ɔpɛ̄. E̍ kū la lɛlā yī Ɔwɔ la ɔkɔ̄ka grigrigri bɛ̍ɛ̄nɛ̄.
Āchɛ yī Iji̍sɔ̄ɔsi lɛ ɔjāha̍ ɔjāha̍ wa̍a̍ ngmo̍tu̍chɛ̄
32Āchɛ ɛla̍ā wa̍a̍ nīi chɛ̄ku Ɔwɔ ma̍ gblāa la ɛri̍ya̍ ūkpo̍he ba̍la ūkpɔ̄tū ūkpo̍he. Ɔ̄chɔ̄chɛ i̍ ka hīka, “Ɔjā nūma̍ - iyī u nɛ” lɛ̍kɛ̍kɔ̍ ni̍. Ɔjā nīi ɔ̄chaha̍ ɔ̄chaha̍ yī wā lɛ ma̍ - iyī wā wa̍a̍ nɛ. 33Alɛrɔ̄ yī Iji̍sɔ̄ɔsi kā wɔ̄kā yī ohye̍ēyī la okū yī nū de āchɛ brii wɔhu̍ wɔhu̍. Ɔwɔ de ɔpiyɛ ɔnɔ̄kɔ̄kū kla̍ aa̍ wa̍a̍. 34-35Ɔ̄chɔ̄chɛ i̍ gbyeklo̍ yī ɔjɔ̄jā ni̍. Āchɛ nīi lɛ ajɛ yī yɛrɔ̄ kɛ̄ɛ wɔlɛ̍ ma̍ ē de ē kpo̍ ra̍, nāa okpo yī ɛjā nīi e̍ de ra̍ ma̍ ē bī ge̍ē de alɛrɔ̄ yī Iji̍sɔ̄ɔsi. Aa̍ ē de ē kɔ̄ de āchɛ nīi o̍ ku̍ wā ɔkɔ ma̍ bɛ̍ɛ̄nɛ̄.
36Ɔngrɔ̄ɔ ɔha̍ hɔ̄ abɔ̍ɔ re̍ka Ijo̍sɛ̄ɛfu, bū la wɔma yī Ili̍fāyi. O̍ bū la Isa̍yi̍prɔ̄ɔsi. Alɛrɔ̄ yī Iji̍sɔ̄ɔsi ē hī ɔ̄ ka Iba̍nābasi. Ochi̍chi̍ yī Ɔla̍ā re̍ka “Ɔmlɔnyɛ Ɔtū.” 37Anu̍ de yɛrɔ̄ yī nū nāa ra̍ ma̍, o̍ bī okpo ɔla̍ā ke̍e̍ ge̍ de alɛrɔ̄ yī Iji̍sɔ̄ɔsi.
Nu markerat:
U̍ku̍rɔ̍ yī Alɛrɔ̄ 4: YBASR
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2020 Bible Society of Nigeria (second edition)