Ijɔ̍ɔn 10
10
Wɔ̄chīije yī ɔ̄chɛ odeyīrɛ anyīyɛrɔ̄
1Iji̍sɔ̄ɔsi gba̍a ka hīka, “Lēchi̍-lēchi̍, n ā koko̍o de ala̍! Ɔ̄chɛ nīi i̍ ge̍ chɛ̄ ga ɔka yī yɛwu bū la oko̍prīinu yī nū ni̍, nīi o̍ ge̍ tīichō ga la ɛbɛha̍ chɛ̄ gāa, ɔlɔjā - obu̍ūwī ba̍la okrōkpō ɔlamu-ɔlamu nɛ. 2Ɔ̄chɛ nīi ga bū la oko̍prīinu yī ɔka yī yɛwu ɔla̍ā ma̍, anu̍ - ɔ̄chɛ odeyīrɛ anyīyɛrɔ̄ ɛla̍ā a̍nɛ. 3Bū la ɛbɛ ɔla̍ā, ɔ̄chɛ odeyīrɛ oko̍prīinu yī ɔka yī yɛwu ɔla̍ā ē lwāa ɔpu ke̍e̍ ē hī ɛbɛ ē de ɔ̍. O̍ ge̍ kɛlā tāa anyīyɛrɔ̄ yī nū hī wā riyī ɔpɔ̄ɔpɛ̄, e̍ ge̍ē po̍ ɔkɔlɛ̄lā yī nū. Bū la ɛbɛ ɔla̍ā, o̍ ē de wa̍ bī ngmɛ̍ɛchɛ. 4E̍ ge̍ bīyɛchɛ ɔpɔ̄ɔpɛ̄ ma̍, o̍ ē yɔbū de wa̍. Anyīyɛrɔ̄ ɛla̍ā chī de ku ɔ̄ la u̍tu. Wu̍chē oji̍ nɛ, e̍ je̍ ɔkɔlɛ̄lā yī nū hwɔhi hwɔhi. 5O̍ ge̍ - ɔ̄chɛ ɔha̍ ji nɛ, e̍ i̍ ge̍ē chɛ̄ku ɔ̍ la u̍tu ni̍. E̍ ge̍ē de ē gwɛ̍ɛnya! Wu̍chē oji̍ nɛ, e̍ i̍ ge̍ē je̍ ɔkɔlɛ̄lā yī nū ni̍.”
6Iji̍sɔ̄ɔsi kɛlā nūma̍ de wa̍ la wɔ̄chīije ma̍, e̍ i̍ je̍ ɔjā nīi o̍ yɛ ē ka ma̍ ni̍.
Iji̍sɔ̄ɔsi - Ɔ̄chɛ Ɔnɛ̄ɛhɛhi odeyīrɛ anyīyɛrɔ̄ nɛ
7Wu̍chē yī ɔla̍ā, Iji̍sɔ̄ɔsi gba̍a ka hīka, “Lēchi̍-lēchi̍, n ā koko̍o de ala̍! Ami re̍ka oko̍prīinu de anyīyɛrɔ̄ ɛla̍ā a̍nɛ. 8Āchɛ ɛha̍ ɛla̍ā wa̍a̍ nīi wā yɔbū de u ma̍ - ebu̍ūwī ba̍la okrōkpō ke̍e̍ nɛ. Anyīyɛrɔ̄ i̍ pɔ̍ɔkɔ yī wā ni̍ lachi̍lachi̍. 9Ami - oko̍prīinu a̍nɛ. Ɔ̄chɛmɔ̄chɛ nīi ge̍ ga la ami, ɔlɔjā ge̍ē lɛ ɔhɛ̍ta̍. Ɔchɛ̄ ga lipu̍ ba̍la ɔngmɛ̍ɛchɛ ga yɛchɛ ge̍ē lā ke̍e̍ de ɔlɔjā nīi o̍ ē ga ke̍e̍ gāa ojōre̍ oro̍ōre̍. 10Uwī ma̍ ē wā ge̍ē wūwī, kɛ̄ɛ ē ngmo̍ okū, kɛ̄ɛ ē de ɔjā chāajɛ. Ami ma̍, n wā hɛ̄ɛbɛ nīi e̍ ge̍ē lɛ ɔhɔ̄leyī; ɔhɔ̄leyī nīi gɔ̄grāa ma̍.
11“Ami - ɔ̄chɛ ɔnɛ̄ɛhɛhi odeyīrɛ anyīyɛrɔ̄ nɛ. Ɔ̄chɛ ɔnɛ̄ɛhɛhi odeyīrɛ anyīyɛrɔ̄ ē chikpo̍ ge̍ē pīyaku̍ lɛhu̍ yī anyīyɛrɔ̄ yī nū. 12Ɔ̄chɛ nīi e̍ nāa anu̍ ɔnɔ̄nāa nīi i̍ ɔ̄chɛ odeyīrɛ anyīyɛrɔ̄ kpakpa ni̍ ma̍ i̍ ē chɛ̄ ɔpīyaku̍ i̍ngɔ̍ɔ ni̍. I̍ anu̍ lɛ anyīyɛrɔ̄ a̍ni̍ ma̍, o̍ ge̍ ma̍ odomu̍u nīi yeēwā ge̍ē ku̍ yɛwū, o̍ ē de gwɛ̍ɛnya. Bū la ɛbɛ ɔla̍ā, odomu̍u ɔla̍ā kpo̍ anyīyɛrɔ̄ ɛla̍ā ku̍, ya̍ nīi ehēhī to̍ojiya. 13Anu̍ - ɔ̄chɛ nīi e̍ nāa anu̍ ɔnɔ̄nāa ji nɛ ma̍, o̍ ē de ē gwɛ̍ɛnya, o̍ i̍ ē gbɛri̍ya̍ ē tū anyīyɛrɔ̄ ɛla̍ā ni̍. 14Ami ma̍ - ɔ̄chɛ ɔnɛ̄ɛhɛhi odeyīrɛ anyīyɛrɔ̄ nɛ. Lɔkɔ nīi n je̍ anyīyɛrɔ̄ yī u ma̍, i̍ngi̍ngɔ̍ɔ nīi aa̍ titi je̍ u a̍nɛ. 15O̍ lɛ lɔkɔ nīi Ɔwɔ A̍dā yī u je̍ u, nīi ami titi je̍ ɔ̄ ma̍. Ami ma̍, n chɛ̄ ɔpīyaku̍ lɛhu̍ yī anyīyɛrɔ̄ yī u. 16Anyīyɛrɔ̄ ɛha̍ hɔ̄ abɔ̍ɔ nīi - iyī u i̍ngi̍ngɔ̍ɔ ma̍. E̍ i̍ tū ribi ūkpo̍he nūma̍ ni̍. N ge̍ē bī ɛla̍ā wā i̍ngi̍ngɔ̍ɔ. Bū la ɛbɛ ɔla̍ā, e̍ ge̍ē pɔ̍ɔkɔ yī u. E̍ ge̍ē de ē pīya ribi ūkpo̍he lɛ ɔ̄chɛ odeyīrɛ wa̍ ūkpo̍he kpo̍kpo̍.
17“Ɔwɔ A̍dā ywɔ̍ɔnyɛ yī u kpɛ̍ɛji. Wu̍chē oji̍ nɛ, n chikpo̍ ge̍ē tu̍labɔ̄ hī ɔhɔ̄leyī yī u, hɛ̄ɛbɛ ē chōo̍chē de ē nāa. 18I̍ ɔ̄chɔ̄chɛ ge̍ē de ɔhɔ̄leyī yī u ē nāa ē hī u a̍ni̍. Ami ɔlɔjā chikpo̍ ge̍ē de ɔhɔ̄leyī yī u ē de a̍nɛ. N lwɔhu̍ ge̍ē de ɔhɔ̄leyī yī u ē de; n chī lwɔhu̍ ge̍ē chōo̍chē de ē nāa ē mɛ̍. Ɔjā nīi A̍dā yī u koko̍o de u ka amɔ̍lɔ ge̍ ya̍ ma̍ hɔ̄ ma̍ a̍nɛ.”
19Ɔpɔ̄ɔpɛ̄ āchɛ Iju̍u ɛla̍ā wa̍a̍ gba̍a de iyī wā kɔ̄ ribi, wu̍chē yī lɛlā ɔla̍ā wa̍a̍ nīi o̍ ka ma̍. 20Āchɛ yɛ̄mɛ̄mɛ̄ gblāa abɔ̍ɔ ē ka hīka ɔ̍lɔ ē ku̍ yapri̍ija; ɔ̍lɔ ē gbyɛ̍lɛ̍. Ɛ̍lɛ u̍tu gba̍a ē darɔ̄ku lɛlā yī ɔ̍lɔ ge̍ē ya̍ oji̍?
21Āchɛ ɛha̍ ma̍ gblāa abɔ̍ɔ ē ka hīka, ɔlyapri̍ija ɔ̍lɔ gba̍a ē kɛlā i̍ngɔ̍ɔ? Ɔlyapri̍ija ɔ̍lɔ gba̍a ē ya̍ nīi epriyī ɛ̍lɛ de ē myɛ̍ma̍?
Āchɛ yī Iju̍u hi̍hi̍yo̍ yī Iji̍sɔ̄ɔsi
22Yɛ̄grāa ɔla̍ā nīi Iju̍u wa̍a̍ yɛ ē ya̍ ɔwɔ̄wīyā ɔha̍ nīi re̍ka Ɔjā Ode Kwɔbɔ̄ De Ɔwɔ ma̍ abɔ̍ɔ la Ijɛru̍sālɛm a̍nɛ. Yɛ̄grāa yī owu nɛ. 23Iji̍sɔ̄ɔsi hɔ̄ abɔ̍ɔ la u̍nu̍ yī Ɔwɔ, yɛ ē ta̍ gaa abɔ̍ɔ la ɛbɛ nīi re̍ka U̍twɔ̄ɔda yī Iso̍lōmɔn ma̍. 24Bɛ̍ɛ̄nɛ̄, Iju̍u yɛ̄mɛ̄mɛ̄ wā ge̍ grēeyī tū ɔ̄ abɔ̍ɔ che ɔ̍ ikpo̍ hīka, “A ge̍ē ku̍ alɔ ē hɔ̄ la ahu̍lɛ̄lā nūma̍ ge̍ē ba̍ aba̍ ma̍/? Koko̍o de alɔ lēchi̍ lēchi̍ gɛ e̍ē! Awɔ - Ɔhɔ̍ɔnyɛta̍ Nīi Ɔwɔ Hōhu Ma̍ a̍nɛ?”
25Iji̍sɔ̄ɔsi hīya aa̍ ɔkɔ hīka, “Je̍ka n koko̍o de ala̍ i̍ngɔ̍ɔ mɛ̍; ala̍ i̍ chī chɛ̄ku u ni̍ kpɔ̍ɔ̍. U̍ku̍rɔ̍ nīi n ē ya̍ bū la wɔhu̍ yī A̍dā yī u ma̍, anu̍ - itɛ̍ɛhi̍yɛ̍ yī u a̍nɛ. 26Ala̍ i̍ chɛ̄ku u ni̍, wu̍chē oji̍ nɛ, ala̍ i̍ anyīyɛrɔ̄ yī u ni̍. 27Āchɛ nīi - anyīyɛrɔ̄ yī u ma̍ ē pɔ̍ɔkɔ yī u. N je̍ wā hwɔhi hwɔhi. E̍ ē ku u la u̍tu myɛ̄grāa-myɛ̄grāa. 28N ē de ɔhɔ̄leyī i̍mɔ̄mɛni̍ ē de wa̍. E̍ i̍ ge̍ē ko̍ōku̍ ge̍ē gbo̍ ni̍. Ɔ̄chɔ̄chɛ i̍ chī ge̍ē de wa̍ nāa ē hī um abɔ̄ mɛ ni̍. 29Ɔjā nīi A̍dā yī u de de u ma̍ ga ɔjāha̍-ɔjāha̍ wa̍a̍ ɔgɔ̄ga. Ɔ̄chɔ̄chɛ i̍ chī ge̍ē de wa̍ nāa ē hī A̍dā yī u abɔ̄ mɛ ni̍. 30Ami ba̍la Ɔwɔ A̍dā - āchɛ ūkpo̍he nɛ!”
31Bū la ɛbɛ ɔla̍ā, aa̍ wa̍a̍ kpo̍ achɔ̄ yɛ ge̍ē ta̍ ɔ̄. 32Iji̍sɔ̄ɔsi da wa̍ hīka, “Je̍ka n ya̍ u̍ku̍rɔ̍ ɔnɛ̄ɛhɛhi mwɛbɛ nīi ala̍ ma̍ mɛ̍? U̍ku̍rɔ̍ ɛla̍ā wa̍a̍ chī bū la abɔ̄ yī A̍dā yī u! U̍ma̍ama ma̍, ɔna̍ labɔ̄-labɔ̄ nīi ala̍ yɛ ge̍ ta̍ u lɛchɔ̄ wu̍chē yī nū ma̍?”
33Iju̍u ɛla̍ā koko̍o de ɔ̍ hīka aɛ̍lɛ i̍ yɛ ge̍ē ta̍ ɔ̍lɔ lɛchɔ̄ wu̍chē yī u̍ku̍rɔ̍ ɔnɛ̄ɛhɛhi nīi ɔ̍lɔ ya̍ ma̍ ni̍. Wu̍chē yī liwēyī nīi ɔ̍lɔ de de Ɔwɔ ma̍ nīi aɛ̍lɛ chikpo̍ ge̍ē ya̍ i̍ngɔ̍ɔ a̍nɛ. Je̍ka ɔ̍lɔ - ɔ̄chɛ̄ɛchɛ ɔlamu nɛ? Ɔ̍lɔ chōo̍chē chikpo̍ ge̍ē de iyī ɔ̍lɔ ē pīya Ɔwɔ?
34Iji̍sɔ̄ɔsi hīya aa̍ ɔkɔ bɛ̍ɛ̄nɛ̄ hīka, “Je̍ka e̍ ta̍ tū la īpū yī Lihɔ yī ala̍ ɛlɛjā hīka Ɔwɔ ɔ̍lɔ ka hīka, ‘Ala̍ - ɔwɔ nɛ!’ 35Alɔ wa̍a̍ chī jo̍ōkū hīka lɛlā yī Īpū yī Ɔwɔ - ichɛ̄ɛhi kpɛɛ ku yɛ̄grāa ɔha̍lɔha̍ nɛ. Āchɛ nīi Ɔwɔ ka ɛrɔ̄ yī nū de wa̍ ma̍ nīi o̍ hī wā ka ɔwɔ a̍nɛ. 36Ami ma̍, Ɔwɔ A̍dā hu um ohōhu de u tɛ̄rɔ̄ wā la yɛchɛ nūma̍. Kana̍ bɛ̍ɛ̄nɛ̄ nīi ala̍ chōo̍chē ka hīka amɔ̍lɔ de liwēyī de Ɔwɔ ma̍? Wu̍chē lɔkɔ nīi n ka hīka ami - Ɔyi̍ yī Ɔwɔ nɛ ma̍? 37N i̍ ge̍ yɛ ē ya̍ u̍ku̍rɔ̍ yī A̍dā yī u ni̍, ala̍ e̍e chɛ̄ku u ni̍. 38N ge̍ chī yɛ ē ya̍ u̍ku̍rɔ̍ ɛla̍ā, ala̍ i̍ ge̍ chɔ̄chɛ̄ ku u ni̍, ala̍ chɛ̄ku lɛlā yī u̍ku̍rɔ̍ nīi n yɛ ē ya̍ ma̍; hɛ̄ɛbɛ nīi ala̍ ge̍ jo̍ōkū kpɛɛ bɛ̍ɛ̄nɛ̄ hīka Ɔwɔ A̍dā hɔ̄ la ami, ami hɔ̄ la Ɔwɔ A̍dā.”
39Bū la ɛbɛ ɔla̍ā, aa̍ wa̍a̍ kū yɛ ge̍ē de ɔ̍ ē ku̍; Iji̍sɔ̄ɔsi gba ke̍e̍ hī wā abɔ̄ ku̍ pīya.
40Iji̍sɔ̄ɔsi ku̍chē pīya ga oe̍ ɔla̍nū yī Ɔkpa̍ yī Ijɔ̍dan la ɛbɛ nīi Ijɔ̍ɔn yɛ ē hu āchɛ yenyi ma̍ gāa ge̍ hɔ̄ abɔ̍ɔ. 41Āchɛ pɛ̍ kpɛ̍ɛ gāa dikpo̍ba̍ Iji̍sɔ̄ɔsi abɔ̍ɔ. E̍ ka Ijɔ̍ɔn ɔ̍lɔ i̍ ya̍ u̍ku̍rɔ̍ ɔlɛbɛ̍bi̍ ɔha̍lɔha̍ ni̍. Lɛlā nīi ɔ̍lɔ chī ka ku̍ ɔngrɔ̄ɔ nūma̍ wa̍a̍ ma̍ ɔ̍lɔ - ichɛ̄ɛhi nɛ. 42Āchɛ yɛ̄mɛ̄mɛ̄ chɛ̄ku Iji̍sɔ̄ɔsi abɔ̍ɔ la ɛbɛ ɔla̍ā.
Nu markerat:
Ijɔ̍ɔn 10: YBASR
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2020 Bible Society of Nigeria (second edition)
