Ijɔ̍ɔn 11
11
Ɔpīyaku̍ yī Ila̍jārɔsi
1Ɔngrɔ̄ɔ ɔha̍ re̍ka Ila̍jārɔsi hɔ̄ la Ibɛ̍tāni. O̍ de kwi̍īyē gbo abɔ̍ɔ. Ipwo̍gra ɔla̍ā nīi Imeri̍ ba̍la Ima̍ta nīi - aɛ̍nɛ̍ ma̍ hɔ̄ a̍nɛ. 2Imeri̍ nūma̍ pi̍i̍, anu̍ de yanɔ̄ oni̍pī kwɛ̍kwɛ̍ chīyēkla̍ Iji̍sɔ̄ɔsi la ikpo̍, bī inyɛ̄lɛ̄hu̍ yī anu̍ ɔlɔjā ngū Iji̍sɔ̄ɔsi anu̍ a̍nɛ. Ɔɔ̍nɛ̍ yī nū ɔnɔ̄ngrɔ̄ɔ nīi re̍ka Ila̍jārɔsi ma̍ kwi̍īyē a̍nɛ. 3Aɛ̍nɛ̍ anānyā āchɛ ɛpɛpa nūma̍ wā ge̍ tɛ̄rɔ̄ hu Iji̍sɔ̄ɔsi ka ɔ̍lɔ ge̍, “Ādā! Ɔya wɔ lēchi̍ lēchi̍ de kwi̍īyē gbo amu.”
4Iji̍sɔ̄ɔsi po̍ ɛrɔ̄ nūma̍ ma̍, o̍ ka hīka, ɔchlɛhu̍ yī lɛlā nīi - ɔ̍lɔ ge̍ē bū la iyē oko̍ōku̍ yī Ila̍jārɔsi nūma̍ ma̍, ɔ̍lɔ i̍ ɔpīyaku̍ yī ɔ̍lɔ ka̍ta̍ ni̍; lɛlā yī ɔ̍lɔ nūma̍ ɔ̍lɔ ge̍ē bī rīgā ke̍ke̍ni̍ ge̍ē de Ɔwɔ. Bū la lɛlā nūma̍ nīi Ɔyi̍ yī Ɔwɔ ɔ̍lɔ ge̍ē nāa rīgā ɔnɔ̄kɔ̄kū a̍nɛ.
5Ima̍ta ba̍la Imeri̍ ɔɔ̍nɛ̍ yī nū tūla Ila̍jārɔsi hī Iji̍sɔ̄ɔsi ɔtū kpɛ̍ɛji. 6O̍ po̍ ohu yī iyē oko̍ōku̍ yī Ila̍jārɔsi ma̍, o̍ jī hɔ̄ abɔ̍ɔ kpɔ̍ɔ̍ la ɛbɛ nīi o̍ hɔ̄ ma̍ ɔ̄chī ɛpa ligbo̍-ligbo̍. 7O̍ wā ge̍ de a̍chi̍kpo̍ yī nū bɛ̍ɛ̄nɛ̄ ka aɛ̍lɛ ge̍ ku̍chē ga Ijudi̍ya gɛ.
8A̍chi̍kpo̍ yī nū ka ɔ̍lɔ ge̍, “U̍ū, Ɔngūlɛ̄lā! Ɔjā ma̍ i̍ki̍krɔ̍ɔ nīi Iju̍u yɛ ge̍ē ta̍ lɛchɔ̄ ngmo̍ wɔ abɔ̍ɔ ma̍, anu̍ nīi a gba̍a ku̍chē yɛ gāa a̍nɛ?”
9Iji̍sɔ̄ɔsi da wa̍ bɛ̍ɛ̄nɛ̄ hīka, “Je̍ka yɛnɔ ūkpo̍he lɛ ākārākā igwo̍lɛpa? Ɔ̄chɛ ge̍ yɛɛ la yɛnɔ gēdēgēdē, o̍ i̍ ē hu̍kōowu ē wu̍ mla̍ajɛ ni̍. Wu̍chē oji̍ nɛ, o̍ ē myɛ̍ma̍ la ɛbɛ ɔlɛgēdēgēdē yī yɛchɛ nūma̍. 10Ɔ̄chɛ ge̍ yɛɛ la otu̍, aa̍ nīi o̍ ē hu̍kōowu ē wu̍ ē mla̍ajɛ a̍nɛ. Wu̍chē oji̍ nɛ, ɛbɛ ɔlɛgēdēgēdē ɔha̍lɔha̍ i̍ hɔ̄ de ɔ̍ ni̍.” 11Iji̍sɔ̄ɔsi kwɛ̍ɛjī lɛlā nūma̍ ma̍, o̍ gba̍a ka de wa̍ hīka, “Ala̍ ma̍ gɛ ko̍ō! Ɔya alɔ Ila̍jārɔsi gbwɔlā gbo abɔ̍ɔ. N ge̍ē gāa ge̍ē de ɔ̍ ē hye̍ēyī.”
12A̍chi̍kpo̍ yī Iji̍sɔ̄ɔsi da abā yī wā hīka, “Ila̍jārɔsi ge̍ gbwɔlā, ɔ̍lɔma̍ o̍ ge̍ē de ē lɛ cha̍cha̍.”
13Aa̍ ma̍ je̍ka ɔ̍lɔ - wɔlā ɔlamu ji nɛ. Tublāa ni̍, ɔpīyaku̍ nīi Iji̍sɔ̄ɔsi yɛ ē ka a̍nɛ. 14Wu̍chē yī ɔla̍ā, o̍ de ka hwōō de wa̍ bɛ̍ɛ̄nɛ̄ hīka, “Ala̍ ma̍ gɛ ko̍ō! Ila̍jārɔsi pīyaku̍ mɛ̍! 15Wu̍chē yī ala̍ nūma̍, n chī lɛ ɔwɔ̄wīyā kpɛ̍ɛji nīi n i̍ hɔ̄ abɔ̍ɔ ba̍la anu̍ ni̍ ma̍. Ɔla̍ā ge̍ē ya̍ nīi ala̍ ē chɛ̄ku u brii. Alɔ ā pīya gāa dikpo̍ba̍ ɔ̄ gɛ!”
16Anu̍ Itɔ̍mɔ̄ɔsi nīi re̍ka “Ayɛ̍ɛpa” ma̍ da a̍chi̍kpo̍ yī Iji̍sɔ̄ɔsi ehēhī hīka aɛ̍lɛ ge̍ pīya tāa Ɔngūlɛ̄lā gāa, hɛ̄ɛbɛ nīi aɛ̍lɛ ge̍ gāa ge̍ ku̍ ba̍la ɔ̍lɔ!
Iji̍sɔ̄ɔsi re̍ka Ohye̍ēyī la Okū ba̍la Ɔhɔ̄leyī a̍nɛ
17Iji̍sɔ̄ɔsi gbajɛ gāa ma̍, o̍ po̍ hīka ɛ̍lɛ de Ila̍jārɔsi nyi gbajɛ la ɔ̄chī ɛnɛ mɛ̍. 18Ibɛ̍tāni lɛ kurɛkurɛ ga Ijɛru̍sālɛm. O̍ i̍ gbajɛ la ina̍aba ɛpa ni̍. 19Wu̍chē yī ɔla̍ā, Iju̍u yɛ̄mɛ̄mɛ̄ pɛ̍ wā abɔ̍ɔ ge̍ē ma̍ Imeri̍ ba̍la Ima̍ta, ē ta̍ wā ogo̍go̍ yī ɔpīyaku̍ yī ɔɔ̍nɛ̍ yī wā ɔnɔ̄ngrɔ̄ɔ.
20Ima̍ta po̍ ɔpɔ̄ɔpɛ̄ ka Iji̍sɔ̄ɔsi ɔ̍lɔ yɛ abɔ̍ɔ yewā ma̍, o̍ pīya yɛ grāa anu̍. Imeri̍ ma̍ hɔ̄ abɔ̍ɔ wɔlɛ̍. 21Ima̍ta ka de Iji̍sɔ̄ɔsi bɛ̍ɛ̄nɛ̄ hīka, “Ādā, o̍ ge̍ re̍ka a hɔ̄ amu nɛ, ɔɔ̍nɛ̍ yī u ɔnɔ̄ngrɔ̄ɔ i̍ ge̍ chī pīyaku̍ ni̍. 22N chī jo̍ōkū hīka ɔjāha̍-ɔjāha̍ nīi a ge̍ chikpo̍ la abɔ̄ yī Ɔwɔ, o̍ ge̍ē de ē de wɔ.”
23Iji̍sɔ̄ɔsi koko̍o de ɔ̍ hīka, “Ma̍ ko̍ō, ɔɔ̍nɛ̍ yī wɔ ge̍ē hye̍ēyī wā la ɔhɔ̄leyī.”
24Ima̍ta hīya anu̍ ɔkɔ hīka, “Ādā, n jo̍ōkū i̍ngɔ̍ɔ hīka o̍ ge̍ē hye̍ēyī wā la ɔhɔ̄leyī la ɔ̄chī ɔkwɛ̍ɛjī we̍.”
25Bū la ɛbɛ ɔla̍ā, Iji̍sɔ̄ɔsi ka de ɔ̍ hīka, “Ma̍ ko̍ō! Ami re̍ka ohye̍ēyī la okū a̍nɛ. Ami chī - ɔhɔ̄leyī a̍nɛ. Ɔ̄chɛmɔ̄chɛ nīi ge̍ chɛ̄ku u, ɔlɔjā ge̍ pɔ̄pīyaku̍, o̍ ge̍ē hɔ̄leyī. 26Ɔ̄chɛmɔ̄chɛ nīi ge̍ chī chɛ̄ku u nīi ɔlɔjā ge̍ hɔ̄leyī we̍, o̍ i̍ ge̍ē ko̍ōku̍ ge̍ē gbo̍ gɛ ni̍. A chɛ̄ i̍ngɔ̍ɔ?”
27Ima̍ta hīya anu̍ ɔkɔ hīka, “N chɛ̄ i̍ngɔ̍ɔ, Ādā! N chɛ̄ hīka awɔ - Ɔhɔ̍ɔnyɛta̍ Nīi Ɔwɔ Hōhu Ma̍ a̍nɛ. Awɔ - Ɔyi̍ yī Ɔwɔ nīi ge̍ē wā la yɛchɛ ma̍ a̍nɛ!”
Iji̍sɔ̄ɔsi drɛ̄ɛgba
28Ima̍ta kwɛ̍ɛjī lɛlā nūma̍ ma̍, o̍ ku̍chē ga wɔlɛ̍ ge̍ hī Imeri̍ ɔɔ̍nɛ̍ yī nū ɛra̍ du̍mɔ̍ ga ɛkū ge̍ koko̍o de ɔ̍ hīka Ɔngūlɛ̄lā ɔ̍lɔ wā amu mɛ̍. Ɔ̍lɔ yɛ abɔ̍ɔ ē chikpo̍ yī ɔ̍lɔ. 29Imeri̍ po̍ i̍ngɔ̍ɔ ma̍, o̍ nyɔ̄ gbru ɔpɔ̄ɔpɛ̄ pīya yɛ gāa dikpo̍ba̍ Iji̍sɔ̄ɔsi. 30Yɛ̄grāa ɔla̍ā, Iji̍sɔ̄ɔsi e̍e rɛ abɔ̍ɔ la ɛbɛ nīi Ima̍ta grāa anu̍ ma̍. O̍ i̍ gbajɛ wā la ipwo̍gra kpakpa we̍ ni̍. 31Iju̍u yɛ̄mɛ̄mɛ̄ nīi gblāa abɔ̍ɔ la u̍nu̍ tāa Imeri̍ yɛ ē ta̍ ɔ̄ ogo̍go̍ ma̍ ma̍ ɔ̄ nīi o̍ nyɔ̄ i̍ngɔ̍ɔ yɛ gāa ma̍, e̍ de ku ɔ̍ gānyɔ̄. E̍ je̍ka ɔ̍lɔ yɛ ga u̍nwɔ̍wu̍ ge̍ē drɛ̄ɛgba.
32Imeri̍ gbajɛ ga ɛbɛ nīi Iji̍sɔ̄ɔsi yarɛ, nīi o̍ ma̍ ɔ̄ ɔpɔ̄ɔpɛ̄ ma̍, o̍ ngma̍ ta̍gbo la ajɛ la apli̍kpo̍ yī Iji̍sɔ̄ɔsi. O̍ ka ɔ̍lɔ ge̍, “Ādā! A ge̍ hɔ̄ amu nɛ, ɔɔ̍nɛ̍ yī u ɔnɔ̄ngrɔ̄ɔ i̍ chī ge̍ pīyaku̍ ni̍.”
33Iji̍sɔ̄ɔsi ma̍ nīi Imeri̍ yɛ ē drɛ̄ɛgba tūla āchɛ ɛla̍ā nīi ku ɔ̍ la u̍tu ma̍, o̍ ku̍ ɔ̄ nya̍a̍ ga ūkpɔ̄tū. Iji̍sɔ̄ɔsi ta̍ a̍pi̍yɔ̍ ɔlamu-ɔlamu. 34O̍ che wa̍ ikpo̍ ka aba̍ nīi ɛ̍lɛ de ɔ̍lɔ nyi ma̍?
E̍ ka ɔ̍lɔ ge̍ yewā ge̍ ma̍ ɛbɛ ɔ̍lɔma̍ gɛ, Ādā.
35Iji̍sɔ̄ɔsi drɛ̄ɛgba. 36Bū la ɛbɛ ɔla̍ā, āchɛ yī Iju̍u ɛla̍ā ka hīka ɔ̍lɔ hi ɔ̍lɔ ɔtū kpa̍a!
37Āchɛ ɛha̍ gblāa abɔ̍ɔ ē ka hīka ɔ̍lɔ chī ya̍ nīi opriyī ɔ̍lɔ de myɛ̍ma̍ mɛ ko̍ō! Nɛ̄ni̍, i̍ngɔ̍ɔ nīi ɔ̍lɔ ge̍ ya̍ nīi Ila̍jārɔsi ɔ̍lɔ i̍ ge̍ pīyaku̍ gɛ ni̍ a̍ni̍?
Iji̍sɔ̄ɔsi de Ila̍jārɔsi hye̍ēyī la okū
38Iji̍sɔ̄ɔsi gba̍a ta̍ a̍pi̍yɔ̍, wu̍ ɛyɛ ta̍ pīya ga ɛbɛ yī u̍nwɔ̍wu̍ bɛ̍ɛ̄nɛ̄. U̍nwɔ̍wu̍ ɔla̍ā - wɔ̄gɔ̄ ɔha̍ nīi e̍ bu de lɛchɔ̄ gū ɔpu yī nū ma̍ nɛ. 39Iji̍sɔ̄ɔsi da wa̍ ka ɛ̍lɛ ge̍ miya lɛchɔ̄ ɔ̍lɔma̍ ba̍ ga ɛkū.
Ima̍ta nīi - ɔɔ̍nɛ̍ yī okū ma̍ ka hīka, li̍pī ɔ̍lɔ ge̍ē de ē yɔ̍ɔ̄kɔ̄kū, Ādā. Wu̍chē oji̍ nɛ, ɛ̍lɛ de ɔ̍lɔ nyi gbajɛ la ɔ̄chī ɛnɛ mɛ̍.
40Iji̍sɔ̄ɔsi ka de Ima̍ta hīka, “Je̍ka n koko̍o de wɔ mɛ̍ hīka, a ge̍ chɛ̄ku u, ɔ̍lɔma̍ a ge̍ē ma̍ wɔhu̍ ɔnɔ̄kɔ̄kū yī Ɔwɔ!” 41Bū la ɛbɛ ɔla̍ā, e̍ wā ge̍ de lɛchɔ̄ ɔla̍ā miya hī oko̍o yī u̍nwɔ̍wu̍ bɛ̍ɛ̄nɛ̄. Iji̍sɔ̄ɔsi hu eyī hwa̍a̍ ga ichō ka hīka, “Ādā, n da wɔ o̍be wu̍chē lɔkɔ nīi a ē darɔ̄ku lɛlā yī u ma̍. 42N jo̍ōkū lēchi̍ lēchi̍ hīka a ē darɔ̄ku lɛlā yī u myɛ̄grāa-myɛ̄grāa. Wu̍chē yī āchɛ nīi gblāa ma̍ ma̍, anu̍ - ohu̍ nīi n yɛ ē ka i̍ngɔ̍ɔ a̍nɛ. N ya̍ hɛ̄ɛbɛ nīi e̍ ge̍ē chɛ̄ hīka aɔ̍lɔ de amɔ̍lɔ tɛ̄rɔ̄ wā a̍nɛ.” 43Iji̍sɔ̄ɔsi kwɛ̍ɛjī la ɔhā nūma̍ ma̍, o̍ tɔ̍ɔna ka gbōō hīka, “Ila̍jārɔsi ngmɛ̍ɛchɛ!” 44Ɔ̄chɛ nīi pīyaku̍ ma̍ ngmɛ̍ɛchɛ bū la wɔ̄gɔ̄ ɔla̍ā bɛ̍ɛ̄nɛ̄ la ɔ̄pa̍ nīi e̍ de ha̍aba ku̍ ɔ̄ la ikpo̍ ba̍la abɔ̄ gala eyī wa̍a̍ ma̍. Iji̍sɔ̄ɔsi ka ɛ̍lɛ ge̍ kpo̍ ɛjā ɛla̍ā wī hī ɔ̍lɔ nīi ɛ̍lɛ ge̍ tu̍ hī ɔ̍lɔ.
Alɛhu̍ yī Iju̍u miya tū Iji̍sɔ̄ɔsi
(Ima̍tiyu 26:1-5; Ima̍aki 14:1-2; Ilu̍uku 22:1-2)
45Iju̍u yɛ̄mɛ̄mɛ̄ nīi wā la ɛbɛ yī Imeri̍ ma̍ ma̍ lɛlā ɔla̍ā nīi Iji̍sɔ̄ɔsi ya̍ ma̍, e̍ chɛ̄ku ɔ̍. 46Āchɛ ɛha̍ cha pīya dikpo̍ba̍ Āchɛ yī Ifa̍rasīi ge̍ koko̍o yī lɛlā ɔla̍ā nīi Iji̍sɔ̄ɔsi ya̍ ma̍ de wa̍. 47Bū la ɛbɛ ɔla̍ā, Āchɛ yī Ifa̍rasīi ba̍la alɛhu̍ aligbe wā ge̍ lɛ ɔmɔ̄miya ba̍la Ogrēeyī yī Alihiyo wa̍a̍. E̍ ka hīka, kana̍ nīi aɛ̍lɛ ge̍ē ya̍ ma̍/? U̍ku̍rɔ̍ ɔlɛbɛ̍bi̍ ɔnɔ̄kɔ̄kū-ɔnɔ̄kɔ̄kū nīi ɔngrɔ̄ɔ nūma̍ ɔ̍lɔ yɛ ma̍ ē yɔ̍ɔ̄ya̍ a̍nɛ. 48Aɛ̍lɛ ge̍ pi̍ye̍mā hī ɔ̍lɔ nīi ɔ̍lɔ ge̍ ya̍ i̍ngi̍ngi̍ngɔ̍ɔ ga iyɔ̄bū iyɔ̄bū, āchɛ wa̍a̍ ɔ̍lɔ ge̍ē chɛ̄ku ɔ̍lɔ. Bū la ɛbɛ ɔla̍ā, Aliro̍om ɛ̍lɛ ge̍ē de ē wɔ̍ɔ̄tū, wā ge̍ē de u̍nu̍ yī Ɔwɔ ba̍la ɔcha nūma̍ wa̍a̍ ē chāajɛ.
49Ɔ̄chɛ ɔha̍ yī wā re̍ka Ike̍yāfasi. Anu̍ - A̍dā aligbe lɛ̍yi̍ ɔla̍ā a̍nɛ. O̍ koko̍o de wa̍ hīka, “O̍ re̍ka ala̍ i̍ pa je̍ ɔjɔ̄jā ni̍? 50Ala̍ i̍ jo̍ōkū ni̍ ma̍, ɔ̄chɛ ūkpo̍he kpo̍kpo̍ ge̍ pīyaku̍ de āchɛ wa̍a̍, o̍ hwɔhi hi̍ ɔkɔkɔ nīi ɔcha ɔla̍ā wa̍a̍ ge̍ē de ē chāajɛ ligbo̍-ligbo̍.” 51Lēchi̍-lēchi̍, lɛlā nūma̍ o̍ i̍ ka wɔ̄bɔ̄bɔ̄ yī nū ni̍. Lɔkɔ nīi anu̍ re̍ka A̍dā Aligbe lɛ̍yi̍ ɔla̍ā a̍nɛ ma̍, anu̍ nīi o̍ yɛ ē mwɔ̍ɔmu hīka Iji̍sɔ̄ɔsi ɔ̍lɔ ge̍ē pīyaku̍ de āchɛ yī Iju̍u wa̍a̍ a̍nɛ. 52I̍ aa̍ ke̍e̍ nīi o̍ ku̍ de wa̍ a̍ni̍. O̍ ku̍ hɛ̄ɛbɛ ge̍ē bī ayi̍ yī Ɔwɔ nīi mīyanya wa̍a̍ ma̍ ē wā ge̍ē ngmo̍tu̍chɛ̄ bāa ribi ūkpo̍he ma̍.
53Bū la i̍chi̍chɛ ɔla̍ā nīi alɛhu̍ yī Iju̍u miya ge̍ē de Iji̍sɔ̄ɔsi ē ngmo̍ a̍nɛ. 54Wu̍chē yī ɔla̍ā, Iji̍sɔ̄ɔsi i̍ chɛ̄ ga la ɔgbādu abɔ̍ɔ la Ijudi̍ya gɛ ni̍. O̍ ku̍ pīya ga ajɛ ɔha̍ abɔ̍ɔ bla̍a ajɛ ɔngma̍akprū, abɔ̍ɔ la ipwo̍gra ɔha̍ nīi re̍ka E̍frāyim ma̍. Abɔ̍ɔ nīi anu̍ ba̍la a̍chi̍kpo̍ yī nū gblāa bɛ̍ɛ̄nɛ̄ a̍nɛ.
55Yɛ̄grāa nīi Iju̍u wa̍a̍ ē ya̍ Ɔwɔ̄wīyā yī Owu̍lā ma̍ wā ge̍ de hōhī kurɛkurɛ bɛ̍ɛ̄nɛ̄. Āchɛ yɛ̄mɛ̄mɛ̄ pīya bū la o̍gra yī wā ga ipwɔ̍ɔ̄lɛ̍ la Ijɛru̍sālɛm, gāa ge̍ē yɛ̍ɛ̄lā yī lɛbi̍ ɔgwɔ̄gwā o̍bū nīi yɛ̄grāa yī Ɔwɔ̄wīyā yī Owu̍lā ē gbajɛ. 56E̍ gblāa abɔ̍ɔ ē deyīrɛ yī Iji̍sɔ̄ɔsi. Āchɛ ɛha̍ nīi grēeyī gblāa abɔ̍ɔ la u̍nu̍ yī Ɔwɔ ma̍ yɛ ē che ɔ̍nyīnū ikpo̍ hīka ɛ̍lɛ gbɛri̍ya̍ kana̍ ma̍/? Iji̍sɔ̄ɔsi ma̍ ɔ̍lɔ i̍ ge̍ē wā la ɔwɔ̄wīyā nūma̍ ni̍ oo? 57Alɛhu̍ aligbe ba̍la Āchɛ yī Ifa̍rasīi koko̍o de āchɛ hīka ɔ̄chɛ nīi - ɔ̍lɔ ge̍ je̍ ɛbɛ nīi Iji̍sɔ̄ɔsi ɔ̍lɔ hɔ̄, ɛ̍lɛ ge̍ ka hɛ̄ɛbɛ nīi aɛ̍lɛ ge̍ de ɔ̍lɔ ku̍.
Nu markerat:
Ijɔ̍ɔn 11: YBASR
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2020 Bible Society of Nigeria (second edition)
