PIENCILNA 31
31
A Innkuon le a Ganhonte tawh Jacob Tai
1Laban’ tapate in, “Jacob in i pa-a’ zosie la zo ta hi; ama in i pa tawh kisai tami hauna zosie nga zo hi,” a ci uh Jacob in a za hi. 2Laban in masanglai bangin maipha tawh ama a don nawn lona lam Jacob in mu hi. 3Tua ciengin Topa in Jacob kungah, “Na pu na pa le na tanaute’ gamah kilekia in, nang kang ompi ding hi,” a ci hi. 4Tuaci’n Jacob in mi sawlin a ganhon opna gamlahah Rachel le Leah hlansah a, 5a kung vuah, “Na pa un masanglai bangin maipha tawh kei ei don lo lam ka mu hi. Ahi vangin ka pa’ Pasien in kei ei ompi hi. 6Ka tha nei zosie tawh na pa uh’ na ka sep lam na thei uhi; 7ahi vangin na pa un kei ei solin ka thaman sawmvei khel a, hizongle kei ei bawlsiet ding Pasien in phal lo hi. 8Ama in, ‘A pawl teng na thaman ding hi heh,’ a ci leh ganhon zosie in ta a pawl ngentang a nei uhi. Tuale ama in, ‘A dung pawl teng na thaman hi heh,’ a ci leh ganhon zosie in ta a dungpawl a nei uhi. 9Tam bangin Pasien in na pa’ ganhonte la-in kei ei pie hi.
10“Ganhonte zangmat hunin ka khuodah leh keelpi tunga kikhap keeltang zosie a dungpawl, a bempawl, a puonga a opna khu ka mangin ka mu hi. 11Tua ciengin Pasien’ vantungmi in ka mangin ka kungah, ’ Jacob,’ ei ci-a, tuale keima in, “Tanah om ing!’ ka ci hi. 12Ama in, ‘Dahto inlen en in, keelpi tunga kikhap keeltang zosie dungpawl, bem pawlin puong uhi; bangzieh ahei cile na tunga Laban gamtat zosie ka mu zo ta hi. 13Kei pen nang in khuom khat sathau nu-in kei tungah kiciemna nang bawlna mun Bethel#31:13 Cn: Heb ah a khietna kicien lo hi. Pasien ka hi hi. Tu-in tam gam nuasie pailien inlen na pienna gamah kilekia in,’ ei ci hi,” a ci hi.#Pien 28:18-22 14Tua ciengin Rachel le Leah in ama dawngin, “I pa’ inn sungah ei dinga a kinuasie tanh le luo khat beh a om ei mah? 15Ama in ei gel pen gamdangmi banga ei ngaituo hi lo amah? Azieh pen ama in eite ei zua zo a, ei dinga ei kipie sum zang mang zo hi. 16Pasien in i pa tung pana a lahpieh neisa zosie eite le i tate-a’ ahi hi; tua ahi ciengin tu-in Pasien in na kunga ang gen popo bawl in,” a ci hi.
17Tuaci’n Jacob tho a, kalaoh tungah a tate le a zite a tuongsah hi; 18tuale ama in a ganhon zosie, a nei a lam zosie, Paddanaram gam sunga a nei a ganhon zosie hawi-in a pa Isaac’ tenna Canaan gam zuonin a pei hi.
19Tuumul heu dingin Laban a kuon laitahin Rachel in a pa’ innsung pasien-te na gu hi. 20Tuale Jacob in a tai sawm lam ama kungah gen loin Aram mi Laban sol hi. 21Tuaci’n a neisa vannuoi tawh ama tai hi. Ama in a kipatna-ah Euphrates#31:21 Heb “gun” gun kanin Gilead gam muoltung lam a manaw hi.
Laban in Jacob Nuaphah
22A ni thum ni-in Jacob a tai lam Laban kungah kigen hi. 23Tuaci’n ama in a sanggamte zawpi-in ama a phah masangsie Gilead muoltung gamah ni sagi sung a del hi. 24Ahi vangin Aram mi Laban kungah zanlai a mangin Pasien pei-in ama kungah, “Jacob kungah thupha ahi a, thusie ahi zongin kamteng khat zong na gen lo nadingin kidawm in,” a ci hi.
25Laban in Jacob a nuaphah hi. Tu-in Jacob in Gilead muoltung gamah a puonbuh na lam a, Laban in Gilead muoltung gamah a sanggamte tawh giephuol a sat uhi. 26Laban in Jacob kungah, “Na bawl bang ahei? Kei nei sol a, ka tanute zong namsau lahsanin galmat bangin na peipi zo ta hi. 27Bang dingin kei ei solin bangma ei gen loin na daptai mawh na hei? Tawm le lyre tumin guolnopna late tawh hing hla buong sam ding hi veng maw. 28Tuale bang dingin ka tanute le ka tapate tawh mangpha pai-in ei kitawpsah beh lo na hei? Na mot gamtat mama hi. 29Nang bawlsietna khop ding thu ka nei hi; ahi vangin zani zanin na pa’ Pasien in ei hopi a, ‘Jacob kungah thupha ahi a, thusie ahi zongin kamteng khat zong na gen lo nadingin kidawm in,’ ei ci hi. 30Na pa’ inn na ngai seng zieha a pei ding hi nan lacin bang dinga ka pasien-te na guh mawh ahei?” a ci hi. 31Jacob in Laban dawng a, “Ka kung panin pauhat thu tawh na tanute nang kaidawh khah ding ka zau zieh ahi hi. 32Hinanle na pasien-te na muna penpen koikoi hitaleh kihinkhawi lo ding hi. I sanggamte muna-ah ka kunga om nang-a’ teng kawh inlen kilah in,” a ci hi. Rachel in tua pasien-te#31:32 Heb “tuate” a guh lam Jacob in a thei sih hi.
33Tuaci’n Jacob’ puonbuh sungah Laban lutin, tuale Leah’ puonbuh, le a nasem numei gel’ puonbuhte sungah zong lut a, ahi vangin ama in tuate a mu sih hi. Leah’ puonbuh panin ama pei-in Rachel’ puonbuh sungah a lut hi. 34Tua laitahin Rachel in innsung pasien-te la-in kalaoh phaw kawmah koi-in a tungah a to hi. Laban in puonbuh sung teng zosie long a, ahi vangin tuate a mu sih hi. 35Tuale ama in a pa kungah, “Na mai-ah kang din thei lo ziehin ka pu lungthah sin. Numei’ ngaina nin ka nei zieh ahi bo hi,” a ci hi. Tuaci’n ama in a sui vangin innsung pasien-te a mu sih hi.
36Tua ciengin Jacob lungthah a, Laban phawhsie gawpin, “Ka tatkhielna bang ahiei? Tamza taha nei del nadingin ka mawna bang ahiei? 37Ka van zosie na lonsieng vangin na innsung van bang teng ahiei na mu? Ei gel kikalah amate in thu a khen thei nadingun kei sanggamte le nang sanggamte mai-ah tuate hing koi in. 38Tami tam kum sawmni sung nang tawh kang om zo ta hi; na tuupite le na keelpite a tatol om loin na ganhonte lahah tuutang sa ka ne sih hi. 39Gamsate’ thasate zong na kungah kang puoh ngai vateh sih hi; kei mama in tua bang supnate ka thuoh hi; sunlai-a kigute hile zanlai-a kigute hile kei nei losah hi. 40Kei pen tu-a bang ka hi hi. Sunlai-in nisa in ei katum a, zanlai-in khuovot in ei tawpkangin ka kimu thei sih hi. 41Tami kum sawmni sung na inn ah ka om hi. Na tanu nite ziehin kum sawm le li sung nangma’ na semin kum guh sung na ganhonte ka cing a, ka thamante sawmvei na khel hi. 42Ka pa’ Pasien, Abraham’ Pasien, le Isaac’ Giinpa#31:42 Heb ah a khietna kicien lo hi. kei lamah ang om lo khat hi leh, khut guoha nei sawlmang tahpi ding ahi hi. Pasien in ka gentheina le ka khut tawh ka sepnate mu a, zani zanin nang ang phawhsie hi,” a ci hi.
Laban le Jacob in Thuciemna Khat Bawl
43Tua ciengin Laban in dawngin Jacob kungah, “Tanu teng keima’ tanu, naupang teng keima’ naupang, ganhon teng keima’ ganhon ahi a, khum na mu teng zosie khu keima-a’ ahi hi. Ahi vangin tam ka tanute tung ahi a, amate sunga pieng naupangte tungah ahi zongin tuni-in ken bang law thei ding ka hei? 44Tu-in hing pei inlen nang le kei in thuciemna khat bawl vai; nang le kei kikalah teci hisah vai,” a ci hi. 45Tuaci’n Jacob in suong khat la-in khuomin phut hi. 46Tuale Jacob in a sanggamte kungah, “Suongte khawm un,” ci a, amate in suong la-in a lomin a cieng uhi; amate in tua suongcien gei-ah an a ne uhi. 47Tua khu Laban in Jegar-sahadutha#31:47 Aramaic ah “Teci panna suongcien” kici hi. ci-a, ahi vangin Jacob in Galeed#31:47 Heb ah “Tecipanna suongcien” kici hi. ci hi. 48Laban in, “Tam suongcien pen tuni-in nang le kei kikala teci ahi hi,” a ci hi. Tua ahi ziehin ama in tua khu Galeed, ci-in minvaw a, 49a khuom#31:49 Sam tawh kitekah ahi hi: MT ah “khuom” ci om lo hi. pen Mizpah#31:49 “Vilna khuom” a cina ahi hi. ci hi. Azieh pen Laban in, “Ei tegel khatlekhat i opton lo ciengin Topa in nang le kei kikalah ei cing tuoh taheh. 50Ka tanute na bawlsiet a, ahi sihle ka tanute banah zi na lah be leh ei tawh koima a opton sih vangin nang le kei kikalah i teci Pasien ahi lam khu phawh in,” a ci hi.
51Tua ciengin Laban in Jacob kungah, “Keima in nang le kei kikala ka phusa tami suongcien le khuom en in. 52Nangma ang susie dingin tami suongcien kalsanin na kungah kang pei lo nading, nang zong kei ei susie dingin tam suongcien kalsanin kei kunga nang pei lo nadingin tami suongcien teci ahi a, tami khuom zong teci ahi hi. 53Abraham’ Pasien le Nahor’ Pasien - amate pate’ Pasien- in eite kikalah thu khen taheh,” a ci hi. Tuaci’n a pa Isaac’ Giinpa#31:53 Heb ah a khietna kicien lo hi. tawh Jacob a kiciem hi. 54Tuale Jacob in a sangna munah biehpiehna lui a, an ne dingin a sanggamte hlan hi; tuale amate in an a ne vua, zan tungtawnin muoltung gamah a taam uhi.
55 # 31:55 Heb ah 32:1 Zingmawng tungin Laban tho a, a tute le a tanute tawpin thupha a pie hi; tua ciengin ama pei-in inn lamah a kilekia hi.
Iliyochaguliwa sasa
PIENCILNA 31: ZBOTF01
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zo Bible © Bible Society of Myanmar, 2018.