DUKU 14
14
Chisɔsi‑a kamin dɔndɔ baun, suin tee ma
1Chu n 'na suin tee dɔndɔ ma, Chisɔsi ta‑a wan daun chɛ tena mɔ dɔndɔ 'a chenɛ a, min ni Fayisii n kun ti a. A tima chɛ a, an ni wan Chisɔsi a tɛ tena chɛndɛ chɛ. 2Mbɛ a yen ko, kamin dɔndɔ min chenɛ n fa faen ni, a basan a boo gbɛɛ a, a ni wan nɔ Chisɔsi ya kɔɔ. 3Mbɛ Chisɔsi‑a a fɔ Chu n 'na sawa kan mɔɛ chɛ n ye, a basan Fayisii chɛ n na, a ɔ, “Mmɔ 'a sawa dɔnden fan mu mmɔ ni mɔɛ a baun suin tee ma, kɔ a ma a fɔ ni ka?”
4Chɛɛ an‑na a ɔ maun fan don. An ma bai ɔ bai fɔ ni. Mbɛ Chisɔsi‑a kamin chɛ bia, mbɛ a‑a a baun. Mbɛ a‑a a boo ka, a ta‑a a waa a. 5Mbɛ Chisɔsi‑a a fɔ an ye, a ɔ, “Ni wo dɔndɔ 'a denɛ bea‑a yii sonɛ ɔ suin tee ma, ni wo 'a ninchi wɛɛ mu, wo e a bɔ wan nɔ bui chɛ a, ae?”
6Chɛɛ bai ɔ bai ma che ni bɔ‑a an da a, a fɔ koe a a ye.
Chisɔsi‑a kanɛ chɛ, a si dɔpandaya ma
7Chisɔsi na‑a a ɔ yen fan, mbɛ mɔɛ miin chee‑a ka daun chɛ bɛn chɛ ɔ, an ni wan si tena chɛndɛ chɛndɛ n ya‑a an fandi ko a. Mbɛ a‑a tai chɛ tɛ an gbɛɛ tena, a ɔ, 8“Ni mɔɛ min mbe ma‑a musu si‑a, a‑a i chee an musu si daun chɛ bɛn chɛ ɔ, i ma ta i ni si tena chɛndɛ ya i wandi ko a. Koe min na mu, kɔkɔɛ mɔ chenama dɔ mende cheeen fan mu, min benden mu i ma. 9Mbɛ mɔɛ min sin‑na wo fea gbɛɛ chee ka, ɛ na‑a wan, mbɛ a‑a a fɔ i ye, a ɔ, i ni i kafai, a ɔ, kaina chɛ ɛ kai chɛ an ko a. Mbɛ a tima chɛ a, e mau‑a wan ta koe a si‑a kaina, baa ɛnden bɛɛ ee min ma. 10Chɛɛ ni an‑na i chee tima ɔ tima bɛnɛ ɔ, ta, mbɛ i si‑a kaina, baa ɛnden bɛɛ ee min ma. Ni i yaa yii na‑a, a ni i tan nɔ si ɔ, ɛ a fɔ‑a wan i ma, a ɔ, i ni ta, a ɔ, i ni si gbakoo kaina. Chɛ ɛ ma‑a wan basɔmaya a i tena, mɔɛ tɔɛ chɛ n gbɛɛ ya kɔɔ, an‑na miin chee ka. 11Koe min na mu, ni mɔ ɔ mɔ‑a a wandi a sɛ, Yataa ɛ a mɔɛ chɛ a yii‑a wan. Chɛɛ ni mɔ ɔ mɔ‑a a wandi a yii, Yataa ɛ a mɔɛ chɛ a sɛ‑a wan.”
12Mbɛ Chisɔsi‑a a fɔ a yaa yii chɛ wɛɛ ye, a ɔ, “Ni i‑a daun chɛ bɛnɛ ɔ bɛn, i ma to nɔ i ni i dia nyɔɛ n fan chee dechee. I ma i suun ma nyɔɛ n dechee chee, a basan nyan tɔɛ n na. A mu koe min na, an bɛɛ i chee‑a wan to tima dɔ mende a an ta daun chɛ bɛnɛ n dɔ. Ni chɛ ma‑a, mbɛ i ban‑da i 'a pawa ma sɔn‑da koe chɛ ko a, i na‑a min chɛ an ye. 13Chɛɛ ni i‑a daun chɛ bɛnɛ ɔ bɛn, chɛ n chee miin yɔnden mu. Namaa n chee, i ni tamban tɔɛ n chee, a basan ya te tɔɛ n na. 14Mɔɛ n fan nɛ, miin mbe ee che i ta wai nyima a yɛ‑a. Chɛɛ ni i‑a chɛ ma, e dua ma sɔn‑da wan. Tima min na, mɔɛ miin tanden ni Yataa tena, an mbe ma‑a an kɔɔ sɔ‑a a ka saya ɔ, Yataa ɛ a tɔnɔnɛ be‑a wan i ma.”
Chisɔsi‑a tai tɛ, a si daun chɛ bɛn ba ma
(Matiu 22:1-10)
15Kamin dɔndɔ min ni nɔ si ɔ daun chɛ tena chɛ, an bɛ Chisɔsi a, a‑a bai chɛ a min kɛn, a‑a a fɔ wan Chisɔsi ye, a ɔ, “Dua ɛ ma‑a wan mɔɛ chɛ n ma, Yataa ɛ miin chee‑a a 'a daun chɛ bɛnɛ ɔ, tima min na mu, ɛ a 'a mansaya ɔ yian‑da.”
16Mbɛ Chisɔsi ɔ, “Tima dɔndɔ a, kamin dɔndɔ na‑a daun chɛ bɛnɛ ɔ bɛn fan, mbɛ a‑a mɔ sɛsɛ chee an daun chɛ bɛn chɛ ɔ. 17Tima che‑a kɛn an bɛn chɛ ko a, a‑a bɔi den dɔndɔ a ta wan mɔɛ chɛ n tena, a‑a miin chee, a ɔ, an ni na, a ɔ, a ban‑da ko ɔ ko ɔ bɛn‑da. 18Chɛɛ a tima chɛ a, an gbɛɛ‑a a kuu sɔ wan kafai be‑a dɔndɔ dɔndɔɛ a. Mɔɛ saa saa‑a a fɔ wan bɔi den chɛ ye, a ɔ, ‘N 'na denɛ n‑na a kuu sɔ n 'na sɛnɛ wai a, chɛ an‑na a fɔ, n toen mu n ni ta, n ni a fo nɔ. A fɔ a ye, i ɔ, a ni n kafai.’ 19Mbɛ dɔndɔ wɛɛ‑a a fɔ, a ɔ, ‘N‑na ninchi tan fan san ka sanche. N toen mu n ni ta an na wɛɛ ɔ. A fɔ a ye, a ni n kafai.’ 20Mbɛ a sawan bɔɛ chɛ wɛɛ‑a a fɔ, a ɔ, ‘N‑na musu si ka sanche, chɛ ko a, n mbe ee che‑a ta‑a.’
21“Mbɛ bɔi den chɛ yɛ‑a, mbɛ a‑a koe chɛ n gbɛɛ ɔ yian a kun ti chɛ a. Kun ti chɛ faa tɛ‑a wan gbeden, mbɛ a‑a a fɔ bɔi den chɛ ye, a ɔ, ‘A a gbandia, i ni ta chia kuu chɛ n na, a basan duu tɔnkɔnɛ n gbɛɛ ɔ, i ni na yɔn tɔɛ n na, ya te tɔɛ nu, a basan namaa n na.’ 22Mɔɛ chɛ n cheeenɛ gbakɔ, a na‑a wan to, mbɛ a‑a a ɔ yian a kun ti chɛ a, mbɛ a‑a a sɔ wai min na, a‑a a chɛ, chɛɛ kaina a ma fa nin bɛ. 23Mbɛ kun ti chɛ‑a a fɔ to a 'a bɔi den chɛ ye, a ɔ, ‘Ta duu sundu kunɛ n na, a basan fia ɔ chia chɛ n na, mbɛ i‑a a din an ma fɔsɛɛ a, min mbe a ma, an ni na, mbɛ n 'na chenɛ a fa‑a. 24N ni a ma din i tena, mbɛ n‑na mɔɛ miin chee ka a saa a, mbɛ an dɔndɔ wɛɛ ee n 'na daun fen chɛ sima wɛɛ puin an da ɔ.’ ”
Chisɔsi‑a bai sa, a si ma koe ma a fɛ mɔɛ a
(Matiu 10:37-38; 5:13; Maki 9:50)
25A tima chɛ a, mɔ sɛsɛ bea‑a wan Chisɔsi fɛ, an bɛ ni ta tena miin na. Mbɛ a‑a a ya a mun an ma, a ɔ, 26“Mɔ kan kɔ kan min mbe na‑a n tena, a ee che ma‑a n fɛ denɛ a, mɔɔ ni n bakoe a dia‑a a ye, a ni ben a fa ma, a ni ben a de ma, a ni ben a 'a denɛ ma, a ni ben a suun ma nyɔɛ ma, a ben a 'a musu wɛɛ ma, a basan an mɔɛ chɛ wandi gbu wɛɛ a. 27Ni mɔ ɔ mɔ ma nyina ni a faa ma koe ma, a ni a ma bɛn mɔnɛ ɔ bia koe a, a basan fa koe a n ko a, a ee che bea‑a n fɛ.
28“Ni wo dɔndɔ wɛɛ toen mu a ni banda a chenɛ sɔ, a ee a kuu sɔ ka dechee. Ɛ si pɛn, a ni a ɔ yen, ni fen nyɔn mbe a boo ɔ. Ɛ a ɔ yen pɛn, ni an kɔpɔɛ chɛ ɛ chen chɛ a ban fan. 29Ni a ma chɛ ma ni, ni a‑a chenɛ gbu kuu si, a ee na‑a kun‑da a ni wai chɛ a ban. Mbɛ mɔɛ miin gbɛɛ‑a a ɔ yen‑da fen ma‑a, an mbe a ma yɛn‑da wan. 30An mbe a fɔ‑a wan, an dɔ, ‘Kamin chɛ‑a a kuu sɔ chen chɛ sɔ‑a, chɛɛ a ma kun ni a ni a a ban.’
31“Mansa dɔndɔ yen ko, soya wu tanɛ ɛ a boo ɔ. A bɔ mansa dɔ mende, soya wu bi fea ɛ min boo ɔ, a toen ni a ni chɛɛ bun a ma. Mansa chɛ, soya wu tanɛ ɛ ka min boo ɔ, a ee ta ka dechee chɛɛ chɛ tena. Ɛ si pɛn, a ni a yii na chii, ni ɛ che wan chɛɛ chɛ chɛ‑a, a e na to ta‑a. 32Ni a ee kun, ɛ to pɔɔ wan, mbɛ a‑a sakana a ta a bɔɛ mansa chɛ tena, min mbe a ma, an ni ma kuiɛ dɔndɔɛ ɔ. 33Chɛ an‑na a fɔ, wo dɔndɔ wɛɛ ee che ma‑a n fɛ denɛ a, mɔɔ ni a mɔɛ chɛ‑a a kan kɔ sɔ fen kɔ fen na, min mbe a boo ɔ.
34“Kuiɛ nyin fan, chɛɛ ni a ɔ sɛ‑a, mɔ ee che to i ni a ma a dia ni yɛ a ɔ. 35A ma nyin to fen kɔ fen ko a, n mbe ee baa a ma koe a duu gboo wɛɛ ni nyan. A nyin dechee mɔ ni a a dɛ fia ɔ. Wo wɛn too ɛ koe a min, wo chɛ a min.”
Iliyochaguliwa sasa
DUKU 14: KONONT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kono © The Bible Society of Sierra Leone, 2006.