MAKI 10
10
Chisɔsi‑a mɔɛ n kan, a si fuu ma
(Matiu 19:1-12; Duku 16:18)
1Chisɔsi ka‑a kɛn Kapanaun duu ɔ, a ta‑a wan Chudia chɛnyɛ ɔ, a ta Chɔdan yii gbaa chia a. Mbɛ fanka a kan‑da to a ma. A sin, yɔ a ni a ma buɛ min dɔ, a na‑a an kan fan.
2A sin, Chu mɔɛ dɔ nu, miin ni Fayisii n na, an na‑a wan a tena. An toen ni an ni a bia a chen kɔ. Mbɛ an dɔ, “Nn toen mu nn ni a ɔ sɔn, ni mmɔ 'a sawa dɔnden fan mu musu si kai ni a boo ka a 'a musu a.”
3Mbɛ Chisɔsi ɔ, “Sawa minan mbe Yataa 'a gboo ɔ, Mosisi na‑a min fɔ wo ye, a ma koe a?”
4Mbɛ an‑na a fɔ, an dɔ, “Mosisi‑a sawa min sa, a dɔnden fan mu nn ni nn 'na musu n boo ka. Koe min na mu, sawa chɛ ɔ te, e i 'a musu boo ka wan, ni i‑a siiya gboo be a ma, min mbe a ɔ yian, mbɛ i wan‑na i boo ka a a.”
5Mbɛ Chisɔsi ɔ, “Wo 'a tooɔgbɛa, an‑na a ma, Mosisi‑a sawa chɛ n nyɛn wo ko a. 6Chɛɛ Yataa 'a gboo ɔ te, mbɛ dunya a dan tima a, Yataa na‑a mɔ gbu fea an nyan, kai an fea musu a. 7Yataa 'a gboo ɔ te to, a ɔ, ‘Chɛ an fɛ mu, ni mɔ kaima‑a musu fuu, ɛ a de to wan, a basan a fa a, mbɛ an chɛ‑a an nyɔn dɔ, an fea a 'a musu a.’ 8A ɔ, ‘A sin, an fea chɛ, an mbe ma‑a wan mɔ dɔndɔɛ a.’ Chɛ‑a a ɔ yian fan, mbɛ mɔ fea ma to an na, chɛɛ mɔ dɔndɔ gbe mu gbɛ an na. 9Chɛ an fɛ mu, fuu ɔ, ni Yataa‑a mɔ fea an chɛ an nyɔn dɔ, mɔ ɔ mɔ kan kɔ kan ma an tɛ du.”
10An yɛ‑a kɛn chenɛ a, a fɛ denɛ n‑na a ɔ tisa wan to, a si musu ɔ ban koe dɔndɔ gbe chɛ ma. 11Mbɛ a ɔ an ma, “Mɔ kaima kan kɔ kan, min mbe ban‑da a 'a musu ɔ, a ni dɔ gbɛɛ si, a‑a waa an ma basan ka musu a, a ee fuu ɔ min na, Yataa ya a. 12Musu wɛɛ, ni a ban‑da a chɛɛ ɔ, a ni kai dɔ gbɛɛ sɔn, a wɛɛ‑a waa an ma basan ka kai a, a ee fuu ɔ min na, Yataa ya a.”
Chisɔsi‑a den mɛsɛ n dua
(Matiu 19:13-15; Duku 18:15-17)
13Chɛ gbakɔ, mɔɛ dɔ n na‑a wan an 'na den mɛsɛ n na Chisɔsi tena. An toen ni a ni a boo bun an kun ma, a ni samunɛ chɛ an ko a. Chɛɛ a fɛ denɛ n‑na chɛ ɔ yen kɛn, an‑na mɔɛ chɛ n na gban fan. 14Chɛɛ Chisɔsi bu ɔ nii ma dia ni, chɛ ɔ yen koe a. Mbɛ a ɔ an ma, “Wo a ma den mɛsɛ n ni na n tena. Wo ma an ma bai. Koe min na mu, mɔɛ miin maen mu yɔ den mɛsɛ chɛ nu, Yataa an mbe ma‑a an 'na mansa a. 15N ni a ma din wo tena, mbɛ ni mɔ ɔ mɔ ma dɔn ni, a ni don Yataa 'a mansaya kɔɔ yɔ den mɛsɛ chɛ nu, an mɔɛ chɛ ee che ma‑a Yataa ta a.” 16Mbɛ Chisɔsi‑a den mɛsɛ chɛ n ya dɔndɔ dɔndɔɛ a. Ɛ an si a kaa ma, ɛ a boo bun an ma, ɛ ta‑a an dua‑a.
Nyan tɔ dɔndɔ‑a Chisɔsi tan
(Matiu 19:16-30; Duku 18:18-30)
17Chisɔsi‑a a kuu sɔ kɛn ta‑a, a bɔ an kaina chɛ, kamin dɔndɔ na‑a bui chɛ‑a, mbɛ a bea‑a a chen kɔɔ. Mbɛ a ɔ, “Ticha, i wɛn mu mɔ chɛndɛ a, n mbe fen ma, n ni kuɔ fɔ fɔɛ ma sɔn?”
18Mbɛ Chisɔsi ɔ a ma, “E ma ka ma i ni n chee mɔ chɛndɛ a? Mɔ ɔ mɔ ma mɔ chɛndɛ a, mɔɔ dechee Yataa dɔndɔ gbe. 19I‑a sawa n sɔn fan, Yataa‑a miin be Mosisi ma. A ɔ, wo ma mɔ fa, ni sawa ma min fɔ ni. A ɔ, wo ma waa ma basan mɔɛ a, wo ee fuu ɔ min na, a ɔ, wo ma kanka chɛ, a ɔ, wo ma fania fɔ mɔ ɔ mɔ ma. A yɛ to, a ɔ, wo ma mɔ kafa, a sin, wo ni kooya be wo fa ma, a basan wo de a.”
20Mbɛ kamin chɛ ɔ, “Ticha, n mbe wan sawa chɛ n gbɛɛ bia tena, aan a ka n den mɛsɛ tɔɛ ma a sɔ sanche ma.”
21Mbɛ Chisɔsi‑a kamin chɛ ma fɛn, a wakoe a dia‑a a ye. Mbɛ a ɔ kamin chɛ ma, a ɔ, “Ko dɔndɔ an to‑a, e min ma gbɛ. Ta, i ni i boo fenɛ gbɛɛ ma tachɛ. Mbɛ i‑a an kɔpɔɛ chɛ ya, i‑a a be yɔn tɔɛ n ma. Chɛ‑a a ma‑a wan, i ni nyanɛ ma sɔn banda bu ɔ. Ni i‑a chɛ ma, mbɛ i na‑a, i ma‑a n fɛ denɛ a.” 22Kamin chɛ‑a bai chɛ a min kɛn, a ya kɔɔɛ ma‑a wan yama yama, mbɛ a yɛ‑a a waa a, faayɔn ba ɔ. Koe min na mu, nyan tɔ wa ni a a.
23Mbɛ Chisɔsi‑a a fɛ denɛ n gbɛɛ ma fɛn a 'a tindanɛ, mbɛ a ɔ an ma, “A ɔ gbɛ kaka nyan tɔɛ n ko a, an ni don Yataa 'a mansaya kɔɔ.”
24Chisɔsi fɛ denɛ n da ɔ gbaa‑a wan, a si a da a bai chɛ ma. Chɛɛ Chisɔsi ɔ an ma, “N 'na denɛ nu, don koe a Yataa 'a mansaya kɔɔ, a ɔ gbɛ ka. 25A ɔ gbɛ kaka nyan tɔɛ ko a, a ni don Yataa 'a mansaya kɔɔ, a ni ben ninchi#10:25 ninchi: Bai min nyɛnden mu Kiisi gboo ɔ, a fasai an nɛ: “nyɔkɔmɛ.” don koe ma miichi woe a.”
26Mbɛ bai gbu, a‑a an da a fa gban. Mbɛ an dɔ, “Mbɛ nyɔn mbe bauncha chɛ ma sɔn‑da gbɛ?”
27Mbɛ Chisɔsi‑a an gbɛɛ ma fɛn, mbɛ a‑a a fɔ an ye, a ɔ, “Mɔ gbu ee che chɛ chɛ‑a, chɛɛ Yataa tana, ɛ an chɛ. Koe min na mu, Yataa ɛ che wan ko ɔ ko ma‑a.”
28Mbɛ Pita bun‑da a fɔ‑a, a ɔ, “A yen ko, nn‑na nn kan kɔ sɔ fen kɔ fen na, mbɛ nn bea‑a i fɛ.”
29Mbɛ Chisɔsi ɔ, “Ka n mbe chɛ ma din wo tena. Chenɛ ni ma, ni suun ma nyɔɛ nu, de nu an bɛ fa n na, denɛ nu, a basan sɛnɛ n na, an nyin fan. Chɛɛ mɔɛ min mbe chɛ dɔndɔ wɛɛ to‑a n ko a, a ni a to sakana bai chɛndɛ chɛ ko a, 30Yataa ɛ a kɔ‑a wan. Fen chɛ n gbɛɛ sanche, chenɛ n ni ma, suun ma nyɔɛ nu, de nu an bɛ denɛ n na, a basan sɛnɛ n na, Yataa ɛ a kɔ‑a wan an na dunya chɛ ɔ, si tena chɛmɛ dɔndɔ ko a. Chɛɛ a tima dɔndɔ gbe chɛ kɔɔ, ko ma gbaaenɛ ɛ si‑a wan an na. A sin, Yataa ɛ kuɔ fɔ fɔɛ be‑a wan an ma dunya nama ɔ, min mbe na tena. 31Chɛɛ mɔɛ sɛsɛ nu, miin mbe sɔ ɔ ya ɔ sanche, Yataa ɛ an na yɛ‑a wan gbaa a. Mɔɛ miin sin mbe gbaa sanche, Yataa ɛ an sɔ‑a wan ya ɔ.”
Chisɔsi‑a a 'a saya kɔɔ fɔ, a gba sawan bɔɛ ɔ
(Matiu 20:17-19; Duku 18:31-34)
32Mbɛ an‑na chia bia, a sɛ Chuusaɛn duu ɔ. Chisɔsi an ni sɔ ɔ an ya ɔ. A sin, an da ɔ gbaaen fan ni. Mɔɛ chɛ n bɛɛ, miin ni a fɛ, chiandia ni wan an dɔ. Mbɛ a‑a a fɛ den tan kun ma fea chɛ n ya, a ta‑a an na kaina, an dechee, mbɛ a bun‑da a ɔ yian‑da an na, a si koe n ma, miin ni na tena a tan‑da Chuusaɛn duu ɔ. 33Mbɛ a ɔ, “Mmɔ yen ko ta‑a gbɛ Chuusaɛn duu ɔ. An mbe n fan, Mɔ Gbu 'a Denɛ, an mbe n bia tena wan nɔ, mbɛ an‑na n ma tachɛ Chu n tɛ mɔɛ nu Yataa a, an 'na mansa n ma, a basan Chu n 'na sawa kan mɔɛ n na. An mbe kaa a tɛ‑a wan n bakoe ma, n fa koe a, mbɛ an‑na n be mɔɛ chɛ n ma, miin ma Chu mɔ n na. 34A sin, an mbe n ma yɛn‑da wan, an ni an da yii chɛ n ma, an ni n bosa pien, mbɛ an‑na n fa. Chɛɛ ni an‑na chɛ ma, tee fea, a sawan bɔɛ ma, n mbe n kɔɔ sɔ‑a wan a ka saya ɔ.”
Chisɔsi fɛ den fea nu, an‑na a ɔ tisa
(Matiu 20:20-28)
35Mbɛ Chimisi n fea Chɔn na, kai Sɛbɛdi 'a denɛ nu, an na‑a Chisɔsi tena. Mbɛ an dɔ, “Kan mɔ, nn toen mu, nn ni i ɔ tisa, i ni koe an chɛ nn ye.”
36Mbɛ Chisɔsi ɔ, “Fen koe sima mu, wo toen mu n ni min chɛ wo ye?”
37Mbɛ an dɔ, “Tima min na e si‑a i 'a mansa sea ɔ, i 'a mansa wai chɛ koe a, nn toen mu nn dɔndɔ ni si i boo nyima ɔ, mbɛ dɔndɔ si‑a i manɛ ɔ.”
38Chɛɛ Chisɔsi ɔ, “Wo ma a ɔ sɔn wo e fen dɔ tisa tena. Wo e kun fan wo ni ko yawaen chɛ ɔ bia, n mbe na tena min dɔ bia‑a?”
39Mbɛ an dɔ, “Mm, nn mbe kun fan.”
Mbɛ Chisɔsi ɔ an ma, “Ko yawaen chɛ, min mbe na tena n tan‑da, ɛ wo wɛɛ tan‑da wan. 40Chɛɛ n mbe ee che n faa ma ya‑a, si koe a n baima n 'na mansaya ɔ. Fa Yataa an‑na an si tena chɛ ɔ bɛn, mɔɛ chɛ n ko a, a‑a a boo sɔ miin ma.”
41A fɛ den tanɛ tɔɛ chɛ n‑na bai chɛ a min kɛn, Chimisi an fea Chɔn‑na min fɔ, an faa tɛ‑a wan an ma. 42Chɛɛ Chisɔsi‑a an gbɛɛ chee kaina dɔndɔ, mbɛ a ɔ, “Wo faa ma tɛ. Wo‑a a ɔ sɔn fan, mbɛ mansa nu, mɔɛ chɛ n ko a, miin ma Chu mɔ n na, an mbe an 'na gbasaya yian fan an na. An 'na ya ɔ sɔɛ n bɛɛ, gbasaya ɛ ka wan an boo ɔ an kun ma. 43Chɛɛ a ee ka wo tɛ ɔ. Ni wo dɔndɔ wɛɛ toen mu, a ni ma mɔ chenama a wo tɛ, an mɔɛ chɛ ni a wandi ma bɔi denɛ a, wo gbɛɛ ko a. 44Ni wo dɔndɔ wɛɛ sin toen mu to, a ni ma ya ɔ sɔɛ a, a tɔɛ chɛ n gbɛɛ ko a, an mɔɛ chɛ wɛɛ ni ma an 'na yɔnɛ a. 45Koe min na mu, n fan, Mɔ Gbu 'a Denɛ wɛɛ, n ma na ni, mɔɛ n ni wai chɛ n ko a. Chɛɛ n na‑a, min mbe a ma, n ni mɔɛ n ma wai n chɛ. A yɛ to, n ni yɛ, n ni n fɔɛ be mɔ gbu n kun ka koe a.”
Chisɔsi‑a ya te tɔ dɔndɔ ya a ka
(Matiu 20:29-34; Duku 18:35-43)
46Mbɛ an che‑a Chɛiko duu ɔ. Chisɔsi n mbe kɛn bɔ‑a nɔ, an bɛ a fɛ denɛ n na, ni mɔ fanka miin ni an fɛ, an‑na kamin dɔndɔ tan fan si ɔ, chia kunɛ a. A tɔ ni Batimayɔsi, kai Timayɔsi 'a denɛ. Fion tɔɛ ni, a sin ni fenɛ an fuin. 47A‑a a a min kɛn, mbɛ Chisɔsi, min ka‑a Nasaɛti duu ɔ, an mbe ka ben tena, a‑a yee tɛ gbankon, a ɔ, “Chisɔsi, i wɛn bɔ‑a Mansa Defidi 'a dambi ɔ,#10:47 i wɛn bɔ‑a Mansa Defidi 'a dambi ɔ: A ni ka a fɔ an na, mbɛ Chisɔsi an mu kunka mansa a. A ni wan Chu mɔɛ n gbɛɛ yii ma, mbɛ mansa chɛ an mbe Mansa Defidi gba ya tena, a yɛ to, an mbe gbandi mɔɛ n baun‑da. chinchin n ma!”
48Mbɛ mɔ sɛsɛ nu nɔ, an sɔnkɔ‑a wan a ma, an dɔ, a ni a da a tɔn. Chɛɛ a tima gbu a ni gbɛ, a‑a yee tɛ a ben a saa ma, a ɔ, “I wɛn bɔ‑a Mansa Defidi 'a dambi ɔ, chinchin n ma!”
49Mbɛ Chisɔsi sɔ‑a, mbɛ a‑a a fɔ, a ɔ, “Wo a chee n ye.”
Mbɛ an‑na ya te tɔɛ chɛ chee, an dɔ, “I faa ma yɔn, i kɔɔ sɔ, a yen ko i chee‑a.”
50Mbɛ a‑a a 'a doma kun ma doma bɔ, a‑a a a dɛ. Mbɛ a tin‑da buɔdia a, a ta‑a Chisɔsi tena.
51Mbɛ Chisɔsi ɔ, “I toen mu n ni fen ko chɛ i ye?”
Mbɛ ya te tɔɛ chɛ ɔ, “Kan mɔ, a ma n ya a ni ka.”
52Mbɛ Chisɔsi‑a a fɔ a ye, a ɔ, “Ta, e ta tena kaina min, i 'a danaya‑a i baun.” A ya kɔɔɛ a, kamin chɛ‑a kaina yen gbadan, mbɛ a‑a a sɔ Chisɔsi fɛ, a 'a tachɛ chia ma.
Iliyochaguliwa sasa
MAKI 10: KONONT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kono © The Bible Society of Sierra Leone, 2006.