MAKI 11
11
Chisɔsi don‑da Chuusaɛn duu bu ɔ
(Matiu 21:1-11; Duku 19:28-40; Chɔn 12:12-19)
1Mbɛ Chisɔsi n‑na a fo Bɛfachi konko baima, a basan Bɛtani a. Konko chɛ n ni Wodifi kɔnkɔɛ ma wan, an sin dɔ nii ma yansan Chuusaɛn duu ɔ a. Nɔ ni, a‑a a fɛ den fea an sɔ. 2A ɔ, “Wo ta konko chɛ ɔ wo ya teen ma. Ni wo che‑a nɔ dechee, wo e sofɛ tɔngbɔɛ tan‑da wan, a chiienɛ ɛ, mɔ ɔ mɔ ma si nin bɛ min kɔ. Wo a fuin, wo ni na a a. 3Ni mɔ ɔ mɔ‑a wo ɔ tisa, fen ko a mu wo e chɛ ma tena, wo a fɔ a ye, wo ɔ, mansa an mbe a ma gbɔsɔɛ bɔ tena a a. Wo ɔ, ni a ban‑da dechee, wo e yɛ‑a wan a a dɔndɔ gbe.”
4Mbɛ an ta‑a, an‑na sofɛ tɔngbɔɛ tan baa ma, a chiienɛ ɛ chen dɔndɔ kankanɛ ma. An bun‑da kɛn a fuin‑da, 5mbɛ mɔɛ miin ni nɔ sɔ ɔ, an‑na an dɔ tisa. An dɔ, “Wo e kɛn sofɛ tɔngbɔɛ chɛ fuin‑da, wo e fen ma tena a a?”
6Mbɛ an‑na Chisɔsi da a bai ɔ yian mɔɛ chɛ n na. Mbɛ an‑na a fɛ den chɛ n to nɔ, an ta‑a a a. 7Mbɛ an na‑a sofɛ tɔngbɔɛ chɛ a Chisɔsi tena. Mbɛ an‑na an 'na doma kai n bɔ wan, mbɛ an‑na an dɔ sa sa sofɛ tɔngbɔɛ chɛ kɔ, mbɛ Chisɔsi si‑a a kɔ. 8A sin to, mɔ sɛsɛ na‑a an 'na doma kai n dɔ fuin fan a ya ɔ chia a. Mbɛ dɔ n sin‑na yamba kuunɛ n tɛ ben‑da, an‑na an bɛɛ a bɔn a ya ɔ, basɔmaya ko a. 9Mbɛ a ya ɔ mɔɛ nu, a basan a gbaa mɔɛ n na, an‑na yee wa tɛ, an dɔ, “Tando ni ma Yataa tɔɛ ma! Mansa Yataa ni mɔɛ chɛ dua, min na‑a a tɔɛ ɔ! 10Yataa ni mansaya chɛ dua, min mbe na tena, min mbe ma‑a yɔ mmɔ bemba n ta bemba Defidi 'a mansaya ni buɛ min dɔ. Tando ni ma Yataa tɔɛ ma!”
11Mbɛ Chisɔsi don‑da kɛn Chuusaɛn duu ɔ, a ta‑a dɔndɔ gbe Yataa 'a kata#11:11 Yataa 'a kata ni dɔndɔ gbe Chu chɛnyɛ gbɛɛ ɔ. Mɔɛ n ni Yataa fai nɔ wan, an sin ni yasi wɛɛ bɔ nɔ wan dechee. ɔ. A‑a fen kɔ fen ma mɛn fan nɔ. A tima chɛ a gbɛ, tee ni bea koe an dɔ. Mbɛ an bɛ a fɛ den tan kun ma fea n na, an bɔ‑a, an ta‑a Bɛtani duu ɔ.
Chisɔsi‑a kɔnɛ danka, an ni min chee an dɔ, fiki
12Mbɛ banda ɔ ka‑a kɛn, an yɛ‑a Chuusaɛn, a ka Bɛtani. A yɛ tena chɛ, kɔnkɔɛ‑a Chisɔsi bia wan. 13A‑a a ya a ta wan, mbɛ a‑a kɔnɛ yen pɔɔ, an ni min chee, an dɔ, fiki kɔnɛ, a pɔmbɔenɛ ɛ. Mbɛ a ta‑a, a ma fɛn koe a, ni a gbɔen fan ni. Chɛɛ a che‑a kɛn a ma, a nii ma a gbɔ kan kɔ kan tan ni a a, mɔɔ a yamba dechee. Koe min na mu, a gbɔ tima nii ma chɛ a. 14Mbɛ Chisɔsi‑a a fɔ kɔn chɛ ma, a ɔ, “Kuɔ fɔ, mɔ ɔ mɔ ee i gbɔɛ daun‑da to.”
Mbɛ a fɛ denɛ n‑na a da a kuiɛ chɛ a min.
Chisɔsi ta‑a Yataa 'a kata ɔ
(Matiu 21:12-17; Duku 19:45-48; Chɔn 2:13-22)
15Mbɛ an che‑a Chuusaɛn duu ɔ. Chisɔsi ta‑a wan Yataa 'a kata ɔ, mbɛ a bun‑da mɔɛ chɛ n gbain‑da miin ni nɔ, an mbe fee fenɛ n ma tachɛ‑a, a basan a san mɔɛ n na. A‑a kɔpɔ sinchi mɔɛ n 'na tebu n na bea bea wan. Bugbɔɛ ma tachɛ mɔɛ n bɛɛ, a‑a an 'na si fenɛ n na dɛ dɛ wan. 16A sin to, a nii dɔn mɔ ɔ mɔ ni don an kata chɛ ɔ, machiti a a boo ɔ. 17Chɛ gbakɔ, a bun‑da an kan‑da, a ɔ, “A nyɛnden fan mu Yataa 'a gboo ɔ, mbɛ Yataa‑a a fɔ wan, a ɔ, a 'a chenɛ ɛ dechee samun chɛ koe an na, dunya gbɛɛ ko a. Chɛɛ wo‑a an chen chɛ mun kanka n nun tena a.”
18Mɔɛ miin ni Chu n tɛ ɔ Yataa a, an 'na mansa nu, an bɛ Chu n 'na sawa kan mɔɛ n na, an‑na bai chɛ a min kɛn, an‑na a kuu sɔ wan chia yan‑da Chisɔsi fa koe a. An chiandenɛ ni a ma. Koe min na mu, a na‑a kanɛ chɛ buɛ min dɔ, fanka wa chɛ gbɛɛ nɔ, a na‑a an da a fa wan.
19Mbɛ fitii che‑a kɛn, Chisɔsi bɔ‑a Chuusaɛn duu chɛ ɔ, an bɛ a fɛ denɛ n na.
Chisɔsi‑a kanɛ chɛ, a si fiki kɔn chɛ ma
(Matiu 21:20-22)
20An mbe kɛn yɛ tena sau sau ma, Chisɔsi fɛ denɛ n‑na fiki kɔn chɛ yen fan, a gbaaenɛ ɛ gbechee, a ka a yamba ma, aan a yii a suu ma. 21Mbɛ Pita‑a a yii na chii, mbɛ a ɔ Chisɔsi ma, “Kan mɔ, a yen bɛ, i na‑a kɔnɛ min danka ka, a gbaa‑a pɔɛ.”
22Mbɛ Chisɔsi ɔ, “Wo wo yii na tɛ dechee Yataa an ma. 23N ni a ma din wo tena, mɔ ɔ mɔ min mbe a fɔ‑a kɔnkɔɛ chɛ ma, a ɔ, a ni kuɛn, a ni ta, a ni si yii wa ɔ, ni sika ee a ɔ Yataa a, ɛ ma wan. Ni a danden fan mu a a dechee a faa ɔ, mbɛ ɛ koe min dɔ tisa tena, ɛ kun fan a ni ma, Yataa ɛ a ma wan a ye. 24Chɛ an fɛ mu, n ni a ma din wo tena, mbɛ ni wo‑a samunɛ chɛ fen fen ko a, wo kai faenɛ ɛ Yataa a, wo dan dechee a a, mbɛ wo‑a a ma sɔn fan. 25-26A sin, tima ɔ tima ko a, ni wo‑a wo kɔɔ sɔ samun chɛ koe a, wo wo boo bɔ pɛn ko yama chɛ ɔ, mɔ ɔ mɔ na‑a min ma wo a. Chɛ an mbe a ma‑a, wo fa wɛɛ, min mbe banda bu ɔ, a ni a boo bɔ wo 'a ko yama n dɔ, wo‑a miin ma.”#11:25-26 Bai chɛ n fan saen mu a kun ma Maki 'a gboo kɔma dɔ n dɔ. An bai chɛ n dɔ: A mu min na, ni wo ma wo boo bɔ ni mɔ dɔ mende 'a ko yama maenɛ ɔ, wo fa Yataa, min bɛɛ ɛ banda bu ɔ, a wɛɛ ee a boo bɔ‑a wo ta ko yama maenɛ n dɔ.
Chisɔsi 'a gbasaya ma‑a kɔndɔfii a
(Matiu 21:23-27; Duku 20:1-8)
27Mbɛ an che‑a to Chuusaɛn duu ɔ kɛn, Chisɔsi don‑da Yataa 'a kata ɔ, mbɛ a bun‑da ben ben‑da a bu ɔ. Mbɛ Chu n tɛ mɔɛ nu Yataa a, an 'na mansa dɔ nu, ni Chu n 'na sawa kan mɔɛ nu, an bɛ Chu gbakoo n na, an na‑a a tena. 28Mbɛ an dɔ, “E koe miin ma ka, gbasaya minan mbe i boo ɔ, an ma koe a? An gbasaya chɛ sin, nyɔn‑na a be i ma?”
29-30Mbɛ Chisɔsi ɔ, “Ka wɛ, n mbe wo ɔ tisa, tisa dɔndɔ gbe a. Chɔn ni yii chɛ wan mɔɛ n kunɛ ɔ, Yataa chia a. Yataa an fea mɔ gbu a, minan na‑a an gbasaya chɛ be a ma? Wo chɛ fɔ n ye. Mbɛ n‑na a fɔ wo ye, min‑na gbasaya chɛ be n ma, koe chɛ n ma koe a.”
31Mbɛ an‑na a kuu sɔ a tɛnsɛ‑a an nyɔn tɛ ɔ, an dɔ te, “Mmɔ ɛ fen fɔ kamin chɛ ye? Ni mmɔ‑a a fɔ, mbɛ Chɔn 'na gbasaya ka‑a Yataa an tena, ɛ a fɔ‑a wan, mbɛ fen na‑a a ma, mmɔ nii ma dan ni Chɔn na? 32Chɛɛ mmɔ sin mbe ee che a fɔ‑a to, mbɛ Chɔn 'na gbasaya ka‑a mɔ gbu an na.” (An na‑a chɛ fɔ, a mu min na, an chianden fan ni fanka fanka chɛ n ma, miin ni nɔ. Koe min na mu, an gbɛɛ danden fan ni a a, mbɛ Chɔn ni Yataa 'a gbonka chɛ mɔɛ chɛndɛ chɛndɛ an na). 33Chɛ ko a, an‑na a fɔ wan Chisɔsi ye, an dɔ, “Nn ma a ɔ sɔn, ni Chɔn na‑a a 'a gbasaya chɛ sɔn kaina.”
Mbɛ Chisɔsi wɛɛ ɔ, “N bɛɛ, n mbe ee a ɔ yian wo a, ni nyɔn 'na gbasaya ɔ mu, n mbe koe chɛ n ma tena.”
Iliyochaguliwa sasa
MAKI 11: KONONT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kono © The Bible Society of Sierra Leone, 2006.