Jɛnɛsis 21
21
Sera Bɔn Pikin Fɔ Ebraam
1PAPA GƆD blɛs Sera, lɛkɛ aw i bin prɔmis. 2I gɛt bɛlɛ ɛn bɔn bɔypikin fɔ Ebraam we Ebraam bin dɔn ol. Di bɔbɔ bɔn di tɛm we PAPA GƆD bin dɔn tɛl Ebraam se i go bɔn. 3Ebraam gi di pikin we Sera bɔn nem Ayzak,#21:3 Ayzak Ayzak min, I laf. 4ɛn we Ayzak bin dɔn ol et de, Ebraam sakɔmsayz am, lɛkɛ aw PAPA GƆD bin tɛl am fɔ du. 5Ebraam bin ol ɔndrɛd ia we Ayzak bɔn. 6Sera se, “PAPA GƆD dɔn briŋ laf kam na mi os ɛn ɛnibɔdi we yɛri mɔs laf wit mi.” 7Dɛn i se, “Udat bin fɔ tɛl Ebraam se Sera go ebul bɔn pikin! Bɔt na mi dis dɔn bɔn bɔypikin fɔ am ivin we i dɔn ol so.”
8We di tɛm rich fɔ Sera fɔ win Ayzak, Ebraam mek big big pati.
Ebraam Drɛb Ishmɛl ɛn Ega
9Wande Sera si di pikin we da slev gyal we kɔmɔt Ijipt bɔn fɔ Ebraam de ambɔgin Ayzak. 10So i tɛl Ebraam fɔ drɛb di slev gyal ɛn in pikin kɔmɔt nain os. I se, “Dis uman in pikin nɔ fɔ gɛt ɛnitin pan yu prɔpati, na mi bɔypikin Ayzak fɔ gɛt ɔltin.” 11Dis tin ya bin mɔna Ebraam bad wan bikɔs Ishmɛl insɛf nain pikin. 12Bɔt PAPA GƆD tɛl Ebraam se, mek in nɔ wɔri bɔt di pikin ɛn in mama Ega. PAPA GƆD se mek i du ɛnitin we Sera se, bikɔs na frɔm Ayzak i go gɛt di jɛnareshɔn dɛn we in bin dɔn prɔmis. 13PAPA GƆD tɔk igen se, bɔt as Ishmɛl sɛf na ɔda bɔypikin we Ega, di slev gyal bɔn fɔ am, insɛf go gɛt bɔku pikin we dɛnsɛf go bi wanol neshɔn.
14As do klin di nɛks de, Ebraam mek Ega ɛn in pikin kɔmɔt na di os. I gi dɛn it fɔ kɛr go, ɛn put wata na wata-rɔba we Ega ɛŋ nain sholda. Na so dɛn tek kɔmɔt na di os de wirɔn na di ples we pɔsin nɔ go ebul tap na Biashiba. 15Wɛn di wata dɔn, i mek di bɔbɔ lidɔm ɔnda shed, dɔn 16in go sidɔm fawe. I de tɔk ɛn kray se in nɔ go ebul bia fɔ si in pikin de day.
17PAPA GƆD yɛri di bɔbɔ de kray, nain PAPA GƆD in enjɛl aks Ega se, “Ega, wetindu yu de kray so, nɔ fred. PAPA GƆD dɔn yɛri we di bɔbɔ de kray usay i de. 18Grap, go es di bɔbɔ ɛn mek i tinap. A go mek in jɛnareshɔn bi wan big big neshɔn.” 19PAPA GƆD mek Ega si wan say we wata de bɔs ɔnda di grɔn. Insɛf tek in wata rɔba, ful am, ɛn gi di bɔbɔ wata fɔ drink. 20PAPA GƆD bin de wit di bɔbɔ as i de gro. I bin de na di ples we pɔsin nɔ go ebul tap na Paran ɛn i bin sabi fɔ ɔntin. 21In mama fɛn wan uman we kɔmɔt Ijipt fɔ am fɔ mared.
Ebraam ɛn Abimɛlɛk Tay Bagin
22Da tɛm de Abimɛlɛk mek Fikɔl, di kapten fɔ in ami, fala am go to Ebraam. Abimɛlɛk tɛl Ebraam se, i no se, PAPA GƆD de wit am pan ɔl wetin i de du. 23I se Ebraam fɔ swɛ bifo PAPA GƆD se i nɔ go ambɔg ɛni wan pan in pipul dɛn. I tɛl am se, “A nɔ wande ambɔg yu, so swɛ se yusɛf nɔ go ambɔg mi ɛn kɔz prɔblɛm na dis kɔntri ya we yu tap.”
24Ebraam insɛf swɛ. 25Na de Ebraam le kɔmplen bɔt di wɛl we Abimɛlɛk in wokman dɛn siz nain an.
26Abimɛlɛk insɛf se, “A nɔ no udat du so. Yusɛf nɔ ɛva se ɛnitin bɔt dat; na di fɔs tɛm dis a de yɛri tin lɛkɛ dat.” 27Dɛn Ebraam gi Abimɛlɛk sɔm ship ɛn kaw dɛn, ɛn dɛn tu tay bagin se nɔbɔdi nɔ go ambɔg in kɔmpin. 28Ebraam pul sɛvin yɔŋ uman ship pan in yon dɛn ɛn put dɛn wan say. 29Dat mek Abimɛlɛk aks am, “wetin mek i du dat.
30Ebraam ansa am se, “If yu tek dɛn sɛvin yɔŋ uman ship ya so, dat go sho se yu gri se na mi dig dis wɛl.” 31Dɛn gi da ples de nem Biashiba,#21:31 Biashiba: Dis nem na Ibru min ‘Sɛvin Wɛl’ ɔ ‘Usay dɛn bin tay bagin. bikɔs na de dɛn ɔl tu bin tay bagin. 32We dɛn dɔn tay di bagin dɔn na Biashiba, Abimɛlɛk ɛn Fikɔl go bak na Filistia. 33Afta dat Ebraam plant tamarisk tik na Biashiba ɛn wɔship PAPA GƆD de, di PAPA GƆD we na PAPA GƆD sote go. 34Ebraam bin tap na Filistia fɔ lɔŋ.
Iliyochaguliwa sasa
Jɛnɛsis 21: KRIO13
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Krio Bible © The Bible Society of Sierra Leone, 2013.