Mȧyɔs ma aŋsom 2
2
1Ɔwa ma ȧŋrey ŋa ȧŋPɛntikɔst aŋ bek-e, aŋkarande bɛ aŋ yi rə dim din dɛr rɔkin. 2Ɔwa yawin-əŋ asɔnkɔ aŋ wur ka ȧkȧriyana mɔ aŋsɔnkɔ ŋa afef abȧki, aŋ lasər ȧŋseth ro aŋ yirȧ. 3kaŋ nənk təmer təgbayanɛ tə bȧlȧnɛ mɔ nȧnt, tə rensa ŋa ukin o kin. 4Ka ɔYina məsəm ɔ la ŋa bɛ, kaŋ təp kəfɔf tənt tətel mɔ mə ɔYina məsəm ɔ sɔŋ ŋa tə kəfɔf.
5Ɔwa aŋYuda aŋ yi ro Yerusalɛm aŋa nesa Kurɔŋ, aŋa wur ka tȧbona sɛŋk roratha ka ȧkuru. 6Maŋ təl ɛsɔnkɔ ɛye-e, ȧruniya rə gbanɛ rɔkin, ka pə sɔkanɛ ŋa pəkasifɛ wuni o wuni ɔ təlȧ ŋa aŋ fɔf ka akənt kɔŋ gbeŋ. 7Ka pə kɔnthɔfəli ŋa bɛ, aŋ kabanɛ, kaŋ pa, Aŋe mə fɔf-e, aŋe aKalili rəmaŋ thahɔ-i? 8To som mə sə təlȧ, ukin o kin ka akənt kȧsu ȧke a komanɛ su-e? 9Aparthian-o, aMid-o, aƐlamayt-o, yi aŋa yirȧ ro Mɛsapotemiya, ro Yudiya-o, ro Kapadosiya-o, ro Pɔntɔs-o, yi ro Esiya-o, 10ro Fərikiya-o, ro Pamfiliya-o, ro Iyipt-o, yi ɛgbap ya ro Libiya ɛyɛ fatər ro Sirini, yi aŋtik aŋa wur ro Rom-o, aYuda yi aŋa səkɛ alanɛ, 11aKrit yi aŋArabiyanȧŋ, saŋ bɛ sə təlȧ ŋa aŋ fɔf ka atənt ta su mȧyɔs məkabanɛ ma Kuru. 12Ka pə kɔnthɔfəli ŋa bɛ, pə sɔkanɛ ŋa, ka aŋ pa kətɔŋ ka ŋaŋ, ko tȧy tȧŋ ȧte-e? 13Kɛrɛ alɔm aŋ sel ŋa aŋ pa, Aŋfəm aŋe aŋ namra məber məfɛth.
14Ɔwa Pitaŋ ɔ təmȧ yi antɔfɔt ukin-e ŋata ȧrim rɔŋ, ɔ pa ro rɔŋaŋ, na aŋfəm ŋa ro Yuda yi nia bɛ aŋa yirȧ ro Yerusalɛm, tȧrȧ nu ȧte, ɔwa su nu ɛləns ka ȧsim ta mi. 15kotȧy-e aŋe aŋ yi hɛ atis, mɔ mə nə nanɛ-e, ȧtesoma-e aŋhawa aŋa bekȧ məsas ka ȧŋrey ŋiəŋ gbo ras. 16Kɛrɛ ȧte tə yi ȧtȧ Yowɛl ɔnȧbi ɔ fɔf,
17Kurɔŋ ɔ pa, Pə tə yi ka marey mələpsɔ,
I ti kus ɔ Yina kȧmi ka afəm bɛ,
Ɔwa aŋwuth a nu aruni yi aŋwuth a nu abɛra aŋ tə nȧbi,
Ɔwa aŋlaŋgba a nu aŋ tə nənk mənənk,
Maȧhem ma nu aŋ tə wɔrəp mərey;
18Yao ka marey mati i ti kus ɔYina kȧmi ka ɛbɔy ɛ mi aruni,
Yi ka ɛbɔy ɛ mi abɛra, ɔwa aŋ tə nȧbi.
19Ɔwa i ti tɔri mȧtȧy məkabanɛ ka ȧkuru rokɔm,
Yi ɛmisali ka ȧŋthɔf roratha;
Mətir yi nȧnt yi kimɔ.
20Aret tə tə səkɛ asum dɛ aŋof aŋ tə səkɛ mətir Yeŋka ȧŋrey abana ŋa ɔMarki aŋ bek.
21Ɔwa pə tə yi wuni o wuni ɔwe mə tela ka ȧŋes ŋa ɔMarki ɔ tə kisi.
22Naŋ aŋfəm ŋa ro Isrɛl, təl nu ȧsim ȧte. Yisɔs ɔwe ro Nasarɛth, wuni ɔwe Kuru ɔ po lomi kətɔŋ ka nu rə məyɔs ma afɔsɔ yi mȧtȧy məkabanɛ yi ɛmisali ɛyɛ Kuru ɔ yɔ ka kȧta kɔŋ kətɔŋ ka nu, mɔ naŋ gbeŋ nə po tȧrȧ. 23Kɔnɔ a lȧnki tand ka mabotəs yi kȧtȧrȧ ka Kuru thəpaŋ, ɔwa naŋ-e, ka mȧta ma afəm ȧthȧnthonɛ, nə tȧŋ kɔ ka akənt kəpəŋkinɛ, nə dif kɔ. 24Ɔwe Kuru ɔ yokas ka rəfi ma ɔ po səli ɔbaŋ wa rəfi, pəkasifɛ pə fɔyɛ tȧy kəpa rafi rə wop kɔ. 25kotȧy-e Debid ɔ pa ta atɔŋ,
I nənk ɔMarki ro der kȧmi kədi alɔkɔ bɛ,
kotȧy-e ɔ yi ka kȧta kȧmi kədiɔ,
Kama a te bora mi.
26Tiyȧŋ ȧŋmerȧ a mi aŋ ba məbɔnɛ,
Ɔwa ramer ra mi rə sel məbɔnɛ.
Ma pə thas ri-e, ȧŋdɛr a mi aŋ tə yirȧ rə kəgbak ȧmerȧ;
27Pəkasifɛ mə gbəli hɛ tey ɔfəm ɔ mi ro kərəfi,
Thalɔm mə gbəli hɛ sɔŋ ɔSəm ka mu tə kənəŋk kȧthey.
28Mə po mi tɔri asoŋ ta aŋesəm.
Mə tə yɔ mi i la məbɔnɛ ka kȧbəprȧnɛ ka mu.
29Awɔnt, i gbəli fɔfȧnɛ nu rə kəmintha ta ɔbemba Debid, kəpa ɔ fi, ka a maŋk kɔ, ɔwa kȧboma kɔŋ kə yi ro su haŋ thonɔŋ. 30Tiyȧŋ ma ɔ yi unabi, ɔwa ɔ tȧrȧ Kurɔŋ ɔ po gbiŋ ro rɔŋɔŋ kəpa, ka rȧkomra rɔŋ ɔ tə yis ukin ka kawaŋ ka rȧbȧy. 31Ɔwa ma kɔnɔ ɔ nənk ȧte rodi-e, ɔ fɔf ta kȧyokanɛ ka ɔKrayst, kəpa a tey hɛ kɔ ro kərəfi, ɔwa ȧŋdɛr ŋɔŋ aŋ thei hɛ. 32Yisɔs ɔwe-əŋ, kɔnɔ Kuru ɔ yokas, ɔwa saŋ bɛ sə yi ti məseri. 33Tiyȧŋ ma a po ŋata kɔ ka kȧta kədiɔ ka Kuru-e, ɔwa ma ɔ po sɔthɔ ka ɔKas aŋlahiri ŋa ɔYina məsəm-e, ɔ po kus ame, ama nə nənk, ɔwa ama nə təl. 34Ȧtesoma-e Debid ɔ ŋat hɛ ro riyana, kɛrɛ kɔn kɔnɔnɛ ɔ pa,
ƆMariki ɔ pa ka ɔMarki kȧmi,
Yirȧ ka kȧta kȧmi kədiɔ,
35Haŋ i səki antheranɛ a mu agbeth ŋa ȧtȧtək ta mu.
36Tiyȧŋ ta ȧŋseth ŋa Isrɛl bɛ aŋ tȧrȧ tɛntɛnɛ kəpa, Yisɔs ɔwe gbeŋ, ɔwe nə po tȧŋ ka akənt kəpəŋkinɛ-e, Kuru ɔ po səki kɔ ɔMarki yi ɔKrayst.
37Ɔwa maŋ təl ȧte-e, tə sɔs tabuth taŋ, ka aŋ pa ka Pita yi ka aŋsom alɔm, Awɔnt, to mə sə yɔ-i? 38Ka Pitaŋ ɔ pa ro ŋaŋ, Thupi nu, ɔwa yɔ a baftays nu kin o kin ka ȧŋes ŋa Yisɔs Krayst ta katerɔ ka ɛhakɛ ɛ nu, ɔwa nə tə sɔthɔ ȧŋboya ŋa ɔYina məsəm. 39kotȧy-e aŋlahiri aŋe aŋ yi ta ȧtȧ nu, yi ta aŋwuth a nu yi ta ŋaŋ aŋa yi ɔbɔli poŋ, hali ta ŋaŋ bɛ aŋa ɔMarki ɔKuru kȧsu mɔ tela ro rɔŋɔŋ. 40Ɔwa yi sim təlɔm təlai ɔ sɔŋ məseri, kɔ maŋ ŋa, ɔ pa, Kisisnɛ nu ka rȧkomra rəkənȧ are. 41Ɔwa ŋaŋ bɛ aŋa po malanɛ ȧsim tɔŋ yi məbɔnɛ, a baftays ŋa; ɔwa ka ȧŋrey ŋati aŋa bȧrnɛ aŋkarande aŋ yi afəm ɛwul ɛsas. 42kaŋ bȧsər bȧkər ka mȧtȧy məthəksa ma aŋsom, yi məmanɛ, yi ka kasiməth təbo, yi ka təramnɛ.
43Ka rənes rə wop wuni o wuni; ka mȧtȧy məkabanɛ məgbathi yi ɛmisali ɛ yɔnɛ ka mȧta ma aŋsom. 44Ka ŋa bɛ aŋa lanɛ aŋ yi dɛr rɔkin, aŋ ba ɛyɛt bɛ ɔthənanɛ. 45kaŋ thila tafus yi ɛyɛt yaŋ, kaŋ yerəsanɛ ka ŋa bɛ mɔ wuni o wuni ɔ paŋ. 46kaŋ bȧsər kəyi ka ȧŋseth ŋa Kuru rə ȧmerȧ ŋin ȧrey o rey, aŋ siməth təbo ka ɛseth yaŋ, ɔwa aŋ di yi məbɔnɛ yi rə ȧmerȧ ȧferȧ, 47rə kəthɔkəs Kuru. Ka aŋfəm bɛ aŋ tȧrȧ ŋa rəka. Ka ɔMarki ɔ bȧrȧ ŋa ŋaŋ aŋa mə kisi ȧrey o rey.
Iliyochaguliwa sasa
Mȧyɔs ma aŋsom 2: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.