Mȧyɔs ma aŋsom 3
3
1Ka Pitaŋ yi Yɔnȧŋ aŋ kȧnɛ ka ȧŋseth ŋa Kuru ka ȧŋlɔkɔ ŋa kəramnɛ ka aŋhawa aŋa bekȧ tȧmthərɛŋanlɛ. 2Ɔwa ulaŋgba ulɔm ugbɛba kȧbi ma ɔkara kɔŋ ɔ kom kɔ-e, kɔnɔ a kȧrȧ, a bot kɔ ȧrey o rey ka karare ka ȧŋseth ŋa Kuru ȧke a bont Bɔthikəli, kȧmȧ ɔ thola ka ŋaŋ aŋa mə wɔŋ ka ȧŋseth ŋa Kuru. 3Ɔwe-e, ma ɔ nənk Pitaŋ yi Yɔnȧŋ aŋ yema wɔŋ ka ȧŋseth ŋa Kuru-e, ɔ tholir ŋa. 4Ka Pitaŋ yi Yɔnȧŋ aŋ kəli kɔ təŋ, aŋ pa, Kəli su. 5kɔ kəli ŋa, ɔ nanɛ tə kəsɔthɔ rəka ro rɔŋaŋ. 6Kɛrɛ Pitaŋ ɔ pa, Akala ȧferȧ yi abɔŋɔ i ba hɛ, kɛrɛ ara i ba i ti sɔŋ mu ri. Ka ȧŋes ŋa Yisɔs Krayst ɔwe ro Nasarɛth, kɔth. 7kɔ wop kȧta kɔŋ kədiɔ, ɔ ŋata kɔ; ka ɔlɛmp wati ȧtȧtək tɔŋ yi tagbɔlkɔnt tɔŋ tə sɔthɔ afɔsɔ. 8kɔ pay, ɔ təmȧ, ɔ təp kəkɔth, ɔ wɔŋ ka ȧŋseth ŋa Kuru yi ŋaŋ, ɔ kɔth kɔth, ɔ pais pais, ɔ thɔkəs Kuru. 9Ka aŋfəm bɛ aŋ nənk kɔ mɔ mɔ kɔth ɔ thɔkəs Kuru; 10ɔwa aŋ tȧrȧ ti kəpa kɔnɔŋ ɔwe la yirȧ tə kəthola ka kadare kəBɔthikəli ka ȧŋseth ŋa Kuru, ka aŋ kabanɛ ɔthasər, ɔwa pə kɔnthɔfəli ŋa ta ȧte po yɔnɛ kɔ.
11Ɔwa ma ɔ wopnɛ Pitaŋ yi Yɔnȧŋ-e, aŋfəm bɛ aŋ gbukɛ dɛr rɔkin, kaŋ bȧlər ŋa ka aŋgbənthəŋ ŋa Sɔlɔmɔn, aŋ kabanɛ kəkabanɛ kəbana. 12Ma Pitaŋ ɔ ŋaŋk ti-e, ɔ pa ka aŋfəm, Naŋ afəm ŋa Isrɛl, kɔyɛŋ mə nə kabanɛ ȧte-e? Thalɔm kɔyɛŋ mə nə kəli su teŋ mɔ pə yi mɔ ka aŋfɔsɔ a su thalɔm ka rasəm ra su sə yɔ ɔlaŋgba ɔwe ɔ kɔth-e? 13ƆKuru ka Ebraham-əŋ, ɔka Aysakȧŋ yi ɔka Yekɔb-əŋ, ɔKuru ka aŋkas a su, kɔnɔ ɔ po yikis ȧŋbɔy ŋɔŋ Yisɔsȧŋ ɔwe naŋ nə lȧnki, ɔwa nə pɛnsa ro der kədi ka Paylet, ma ɔ nanɛ naŋ tə kəter kɔ. 14Kɛrɛ naŋ nə pɛnsa kɔn ɔSəm yi ɔLompi, ka nə thola kȧmȧ a sɔŋ nu udif. 15Ka nə dif ɔTəpi wa aŋesəm, ɔwe Kuru ɔ po yokas kətɔŋ ka aŋfi, ta ȧtȧ sə yi məseri. 16Ɔwa pə yi salata kəlanɛ ka ȧŋes ŋɔŋ ɔlanŋgba ɔwe ɔ sɔthɔ afɔsɔ, ɔwe naŋ bɛ nə nənk dɛ yi nə tȧrȧ. Yao, kȧlanɛ ȧke yi ro ŋɔŋ kə po sɔŋ kɔ kayenk mədɛr kəgbenthis ka kȧbəprȧnɛ ka nu bɛ. 17Kɛrɛ ka-ake awɔnt a mi i tȧrȧ kəpa nə yɔ ti rə kəte tȧrȧ, mɔ mə aŋgbəka a nu sɔ aŋ yɔ. 18Kɛrɛ mȧtȧy ama Kuru ɔ tɔri ka tasəŋ ta Aŋnȧbi kəpa ɔKrayst ɔ ba kənȧkȧsi-e, ya ɔ lasər ma yaŋ. 19Tiyȧŋ thupi nu ɔwa lafthɛ nu kȧmȧ a dimsi ɛhakɛ ɛ nu, kȧmȧ ɛlɔkɔ ya kəfothanɛ ɛ der kəwur ro der kədi ka ɔMarki; 20kȧmȧ ɔ somra nu Yisɔsȧŋ ɔwe a bont ɔKrayst, ɔwe a po thithȧ nu, 21pə yi mɔ kɔnɔ ɔwe ȧŋriyana aŋ ba kəwop haŋ ka ɛlɔkɔ ya kakala mȧtȧy bɛ, ama Kuru ɔ po fɔf ka tasəŋ ta Aŋnȧbi bi ŋɔŋ asəm bɛ aŋa yi kȧbi ka ɔwoni. 22Tɛntɛnɛ Mosis ɔ pa ka aŋkas, ƆMariki ɔKuru ka nu, ɔ tə wurɔ nu unabi kətɔŋ ka aŋwɔnt a nu mɔ minɛŋ. Nə yi tə kəsua kɔ ɛləns ka mȧtȧy bɛ ama mɔ kanɛ nu. 23Ɔwa pə tə yi wuni o wuni ɔwe mə te təlȧ ɔnȧbi kati-e, a tə dim kɔ kətɔŋ ka aŋfəm bɛ. 24Yao Aŋnȧbi bɛ, kətəp ka Samuɛl yi ŋaŋ bɛ aŋa tȧŋ kɔ kədarəŋ aŋ po kanɛ sɔ ta marey ame. 25Naŋ nə yi aŋwuth ŋa Aŋnȧbi, yi aŋlemranɛ aŋa Kuru ɔ sekər aŋkas a su ma ɔ kanɛ Ebrahamȧŋ, Ka rȧkomra ra mu, tȧbona bɛ ka ȧdȧru tə tə sɔthɔ aruba. 26Ɔwa ma Kuru ɔ po yokas ɔWan kɔŋ Yisɔsȧŋ, ɔ mɔtha somra kɔ ro rɔnu tə kəruba nu, ka kalafthi nu-e, naŋ bɛ kəwur ka makənə ma nu.
Iliyochaguliwa sasa
Mȧyɔs ma aŋsom 3: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.