Mark 10
10
1kɔ wur ri-e, ɔ der ka manəŋkəra ma ro Yudia ro Yɔrdan mɔri. Ka afəm agbȧthi aŋ thoŋklanɛ ro ŋɔŋ sɔ, kɔ thəksa ŋa mɔ mɔ la yɔ. 2Ka aŋFarisi aŋ der ro ŋɔŋ, aŋ yif kɔ rə athɛnsanɛ, Pə yi ti ɔlompi ta wan duni tə kəter ɔrani kɔŋ-i? 3kɔ gbaki ɔ pa ro ŋaŋ, To Mosisȧŋ ɔ yamari nu-e? 4kaŋ pa, Mosisȧŋ ɔ tɔri tə kəgbal areka ŋa kəsakanɛ, ɔwa tə kəter kɔ kɔnɛ. 5Ka Yisɔsȧŋ ɔ pa ro ŋaŋ, Ta kabak ka nu ɛmerȧ tə ɔ gbala nu aŋyamari aŋe. 6Kɛrɛ kȧbi ka ɔtəpɛr wa ȧdȧru-e Kurɔŋ ɔ bɛmpa ŋa, uruni yi ubɛra. 7Ka ȧŋsabu aŋe, wan duni ɔ tə tey ɔkas kɔŋ yi ɔkara kɔŋ, ɔ tə gbapsa ɔrani kɔŋ; 8ɔwa ŋa ŋarəŋȧŋ aŋ tə səkɛ mədɛr min. 9Tiyȧŋ ara Kurɔŋ ɔ pant dɛr rɔkin, ta wuni ɔ te ri gbaski. 10Maŋ wɔŋ ro seth-e, aŋkarande ŋɔŋ aŋ yif kɔ ta ȧŋpa aŋe. 11kɔ pa ro ŋaŋ, Wuni o wuni ɔwe ter ɔrani kɔŋ, ɔ nȧntȧ ulɔm-e, ɔ yɔ kərəp, ɔ pɔnthnɛ ɔrani kɔŋ. 12Bepi wuni bom ɔ ter ɔwos kɔŋ-e, ɔ balȧ rə ulɔm-e, ɔ yɔ kərəp.
13kaŋ kȧrȧ afɛth agbət ro ŋɔŋ, kȧmȧ ɔ gboŋ ŋa, kɛrɛ aŋkarande ŋɔŋ aŋ ŋal ŋa. 14Kɛrɛ ma Yisɔsȧŋ ɔ nənk ti-e, ɔ bansȧ, ɔ pa ro ŋaŋ, Ter aŋfɛth agbət kȧmȧ aŋ der ro mi; te nu bɛnt ŋa, ȧtesoma-e, ka awunɔŋ rȧbȧy ra Kuru rə yi. 15Tɛntɛnɛ i kanɛ nu, Wuni o wuni ɔwe mə te malanɛ rȧbȧy ra Kuru mɔ uwath-e, ɔgbəli hɛ wɔŋ ri. 16kɔ mampəlanɛ ŋa, ɔ ruba ŋa ukin kin, kɔ reŋ ŋa mȧta mɔŋ.
17Ma ɔ wur tə kəkɔ ka ȧŋbiyas ŋɔŋ-e, wuni kin ɔ der ro ŋɔŋ kəgbukɛŋ, ɔ sɔ təwu, ɔ yif kɔ, Karmɔkɔ ufinɔ, to mə i yɔ kȧmȧ i sɔthɔ aŋesəm thəbana-e? 18Ka Yisɔsȧŋ ɔ pa ro ŋɔŋ, kɔyɛŋ mə bont mi ufinɔ-e? Wuni o wuni ɔ yi hɛ ufinɔ thambe ukin gbɛt, kɔnɔ yi Kurɔŋ. 19Mə tȧrȧ ɛthɔ, Te yɔ kərəp, te dif wuni, te keya, te sɔŋ məseri ma rəyem, te tɔns wuni, yikis ɔkas ka mu yi ɔkara ka mu. 20kɔ pa, Karmɔkɔ, mȧtȧy ame bɛ i po wop kȧbi ka rafɛth ra mi. 21Ma Yisɔsȧŋ ɔ kəli kɔ-e, ɔ bɔthər kɔ-e, kɔ pa ro ŋɔŋ, Tȧy tin tə mə paŋ; kɔnɛ, thila rəka o rəka ara mə ba, mə sɔŋ ka ȧŋmɔnɛ, ɔwa mə tə ba kɛŋ ro riyana; ɔwa der, tȧŋ mi. 22Ma ɔ po təl mapa ame-e, ɔ saŋ amɔl, ɔ kɔnɛ yi ɔnɔsinɛ, kotȧy-e wuni wɔŋ ɔwe ba kɛŋ kəbana.
23Ka Yisɔsȧŋ ɔ kəli kəli, ɔ pa ka aŋkarande ŋɔŋ, Ɔbaki ta ȧtȧ ŋaŋ aŋa ba rəyola tə kəwɔŋ ka rȧbȧy ra Kuru! 24Ka aŋkarande aŋ kabanɛ ȧsim tɔŋ. Ka Yisɔsȧŋ ɔ pa ro ŋaŋ, Awuth, ɔbaki ka ŋaŋ aŋa ba rəyola tə kəwɔŋ ka rȧbȧy ra Kuru! 25Ɔyay ta ȧyɔkmɛ tə kəsɔnthɔs rafɔr ra asɛni, pəthasi ta wuni yola tə kəwɔŋ ka rȧbȧy ra Kuru! 26kaŋ kabanɛ ɔthasər, aŋ pa ro ŋɔŋ, Kanɛ thɔŋ mə gbəli kisi-e? 27Ma Yisɔsȧŋ ɔ kəli ŋa ɔ pa, Ka aŋfəm pə fɔyɛ tȧy, kɛrɛ pə tui hɛ tȧy ta Kuru, kotȧy-e Kurɔŋ ɔ gbəli yɔ tȧy o tȧy.
28Pitaŋ ɔ təp kəpa ro ŋɔŋ, Saŋ sə po tey bɛ, ɔwa sə po tȧŋ mu. 29Yisɔsȧŋ ɔ pa, Tɛntɛnɛ i kanɛ nu, Wuni o wuni ɔ yi hɛ ɔwe po tey mayira mɔŋ-o, awɔnt ŋɔŋ aruni-o, awɔnt ŋɔŋ abɛra-o, ɔkas kɔŋ-o, ɔkara kɔŋ-o, ɔrani kɔŋ-o, awuth ŋɔŋ-o, yi tȧkay tɔŋ-o, salata mi, yi ȧkɛra kəfinɔ ka Kuru, 30kɛrɛ ɔ tə sɔthɔ ka koko bɛ kɛmɛ kin kin ka ȧŋlɔkɔ aŋe, ɛseth-o, awɔnt aruni-o, awɔnt abɛra-o, akara-o, awuth-o, yi təkai, yi ɛsɔmpanɛ; yi aŋesəm thəbana ka ȧdȧru ara mə der-e. 31Kɛrɛ agbȧthi aŋa yi aŋtɔtɔkɔ aŋ tə yi aləpsɔ, ɔwa aŋləpsɔ aŋ tə yi ȧtɔtɔkɔ.
32Maŋ yi ro roŋ kəkɔ ro Yerusalɛm-e, Yisɔsȧŋ ɔ təmȧ ŋa kədi; kaŋ kabanɛ, ɔwa aŋa tȧŋ kɔ aŋ wɔŋ rənes. Kɔ gbasi sɔ aŋtɔfɔt ŋarəŋ, kɔ təp kəkanɛ ŋa mȧtȧy ama ba kəbəp kɔ, 33ɔ pa, Kəli, sə kɔ ro Yerusalɛm, ɔwa ɔWan ka wuni, a tə lȧnki kɔ ka aŋfode abana yi aŋkarmɔkɔ; aŋ tə sɔŋ kɔ mətheri tə kəfi, ɔwa aŋ tə lȧnki kɔ ka tȧbona təlɔm. 34Ɔwa aŋ tə sel kɔ, aŋ tə sapəth kɔ, aŋ tə thufər kɔ, ɔwa aŋ tə dif kɔ. Kɛrɛ kədarəŋ ka mərey məsas ɔ tə kȧl yokanɛ ka rafi.
35Ka Yeməsȧŋ yi Yɔnȧŋ, aŋwuth ŋa Sɛbidi, aŋ der ro ŋɔŋ, aŋ pa, Karmɔkɔ, sə yema mə yɔna su tȧy o tȧy ȧte sə yif mu. 36kɔ pa ro ŋaŋ, Ko nə yema i yɔna nu-e? 37kaŋ pa ro ŋɔŋ, Yɔ su sə yirȧ, ukin ka kȧta ka mu kədiɔ, ɔwa ulɔm ka kȧta ka mu kəmɛrɔ ka aŋyiki a mu. 38Kɛrɛ Yisɔsȧŋ ɔ pa ro ŋaŋ, Nə tɛ hɛ ȧte mə nə yif. Nə gbəli mun ka ampɔthi aŋa mə i muna-i? Thalɔm tə kəbaptais nu yi ȧŋbaftisəm aŋa a baftaysȧ mi-i? 39kaŋ pa ro ŋɔŋ, Sə gbəli. Ka Yisɔsȧŋ ɔ pa ro ŋaŋ, Tɛntɛnɛ nə tə mun ka ampɔthi aŋa mə i muna; ɔwa yi ȧŋbaftisəm aŋa a baftaysȧ mi-e a tə baftaysȧ nu ŋi. 40Kɛrɛ tə kəyira ka kȧta kȧmi kədiɔ, thalɔm ka kȧta kȧmi kəmɛrɔ-e, tȧy ta mi thahɔ tə kəsɔŋ, kɛrɛ tə yi ta ȧtȧ ŋaŋ aŋa a bɛnɛnɛ ti. 41Ma aŋtɔfɔt aŋ təl ti-e, aŋ wɔŋ kəbansa ta Yeməsȧŋ yi Yɔnȧŋ. 42Ka Yisɔsȧŋ ɔ tela ŋa ro ŋɔŋ, ɔ pa, Nə tȧrȧ kəpa aŋa a bot tə kəgbəka tȧbona təlɔm, aŋ gbəka ŋa rə afɔsɔ, ɔwa aŋfəm abana aŋ yɔ ŋa kȧmȧ aŋ tȧrȧ aŋfɔsɔ ŋaŋ; 43kɛrɛ pə yi hɛ yi kətɔŋ ka nu. Wuni o wuni ɔwe yi ubana kətɔŋ ka nu, ɔ tə yi ȧŋbɔy a nu, 44ɔwa wuni o wuni ɔwe yema yi utɔtɔkɔ kətɔŋ ka nu, ɔ tə yi ȧbɔy a nu bɛ. 45Ȧtesoma-e ɔWan ka wuni ɔ der hɛ kȧmȧ a yɔna kɔ, ɔ der tə kəyɔna, ɔwa tə kəsɔŋ aŋesəm ŋɔŋ tə kəbani afəm agbȧthi.
46kaŋ der ro Yɛriko. Ɔwa ma ɔ wur ro Yɛriko yi aŋkarande ŋɔŋ yi ȧruniya rəbana, Bartimiyɔsȧŋ, ɔwan ka Timiyɔs, uthola ufith, ɔ yirȧ ro roŋ dayɛr. 47Ɔwa ma ɔ təl kəpa Yisɔsȧŋ ɔwe ro Nasarɛth kɔnɔŋ, ɔ təp kəsel ɛrɔŋ, ɔ pa, Yisɔs, munɔ ɔwan ka Debid, ba mi aney. 48Ɔwa agbath aŋ ŋal kɔ kȧmȧ ɔ taŋk, kɛrɛ ɔ bȧr gbo sel ɛrɔŋ, Munɔ ɔwan ka Debid, ba mi ȧney. 49Ka Yisɔsȧŋ ɔ təmȧ, ɔ yamari kȧmȧ aŋ tela kɔ. Kaŋ tela ɔwuni ufith, aŋ pa ro ŋɔŋ, Bȧk kəbuth, yokanɛ, ɔ tela mu. 50kɔ fitha aruma rɔŋ, ɔ yokanɛ, ɔ der ka Yisɔs. 51Yisɔsȧŋ ɔ yif kɔ, Ko mə yema i yɔna mu-e? Ka ɔwuni ufith ɔ pa, Karmɔkɔ, ta i sɔthɔ kakəli kȧmi. 52Ka Yisɔsȧŋ ɔ pa ro ŋɔŋ, Kɔnɛ, kȧlanɛ ka mu kə po mu yenkəs. Ka ɔlɛmp wati ɔ sɔthɔ kakəli kɔŋ, kɔ tȧŋ Yisɔsȧŋ ro roŋ.
Iliyochaguliwa sasa
Mark 10: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.