Mark 9
9
1kɔ pa ro ŋaŋ, Tə tɛntɛnɛ i kanɛ nu, alɔm aŋ təmȧ nɔ aŋa ba hɛ kəfi haŋ aŋ nənk rȧbȧy ra Kuru rə der yi afɔsɔ. 2Kədarəŋ ka mərey tamthərukin-e, Yisɔsȧŋ ɔ kera Pitaŋ, Yeməsȧŋ yi Yɔnȧŋ, ɔ gbepa ŋa ka kəteŋ kəbɔli rəkɔm, ŋa son; ka a siŋkar ader rɔŋ rodi ka ŋaŋ. 3Ɛyɛt yɔŋ ɛlopra ɛ səkɛ ɛgbɛntha, ɛfera pər, ɔwa ɛ fera haŋ uyak ɔ yi hɛ nɔru ɔwe mə gbəli fethər yi yaŋ. 4Ka Ilaya yi Mosisȧŋ aŋ tɔrinɛ ro ŋaŋ kaŋ fɔfȧnɛ Yisɔsȧŋ. 5Ka Pitaŋ ɔ pa ka Yisɔs, Karmɔkɔ, ɔfinɔ ti ta kayi kȧsu nɔ. Ta sə bɛmpa ɛgbɔm ɛsas, ŋin ta ȧtȧ mu, ŋin ta Mosis ɔwa ŋin ta Ilaya. 6Ȧtesoma-e ɔ tɛ hɛ ȧtȧ mɔ pa, kotȧy-e rənes rə wop ŋa. 7Ka kərənt kəfera kə thorər ŋa, ka rim rə wur ka karənt kəferȧ-e, rə pa, Ɔwan kȧmi ubɔthər, kɔnɔ ɔwe; təlȧ kɔ nu. 8Ka ɔlɛmp wati, aŋ kəli kəli kɛrɛ aŋ nənk hɛ wuni thambe Yisɔs son yi ŋaŋ-əŋ.
9Ɔwa mɔ mə aŋ thor kateŋ-e, Yisɔsȧŋ ɔ yamari ŋa kȧmȧ aŋ te tɔri wuni o wuni mȧtȧy ama aŋ po nənk haŋ ɔWan ka wuni ɔ kȧl yokanɛ kəwur ka aŋfi. 10kaŋ bɛnɛ ȧŋpa aŋe, aŋ yifəthanɛ ko kȧyokanɛ ka aŋfi kə yi. 11kaŋ yif kɔ, To som aŋkarmɔkɔ aŋ pa Ilayaŋ ɔ ba kəmɔtha der-e? 12kɔ wosa ɔ pa ro ŋaŋ, Ka təteŋ Ilayaŋ tɛntɛnɛ ɔ ba kəmɔtha der, kȧmȧ ɔ lompəs mȧtȧy bɛ. Ɔwa to som a gbal ta ɔWan ka wuni kəpa ɔ ba kənakasi mȧtȧy məgbathi, ɔwa a ba kəsay kɔ-e? 13Kɛrɛ i kanɛ nu kəpa, Ilaya ɔ po thɔŋ der, ɔwa aŋ po yɔ kɔ ȧtȧy bɛ ȧtȧ a bot kəpa a ba kəyɔ kɔ, mɔ mə a gbal ta atɔŋ.
14Ma ɔ der ka aŋkarande ŋɔŋ-e, ɔ nənk ȧruniya rəbana rə gbətɔr ŋa, ɔwa aŋkarmɔkɔ aŋ thoŋkanɛ ŋa. 15Ɔwa ka ɔlɛmp wati ma aŋfəm aŋ nənk kɔ-e, aŋ kabanɛ, aŋ kɔ kəgbukɛŋ, kaŋ kori kɔ. 16kɔ yif ŋa, Ko tȧy tȧŋ mə nə yifəthanɛ-e? 17Ka ukin ka ȧruniya ɔ wosa ɔ pa, Karmɔkɔ i po kȧrȧ ɔwan kȧmi uruni ro mu, ɔ ba ukərəfi ubobo, 18ɔwa dɛr o dɛr ɔ wop kɔ-e, ɔ napanɛ kɔ ro thɔf; ɔwa ɔ wur kəfoth, ɔ tɔmnɛ ɛsek yɔŋ, ɔ bȧkərȧnɛ santhȧni. I kanɛ aŋkarande a mu kȧmȧ aŋ wurɔ kɔ, kɛrɛ aŋ ba hɛ aŋfɔsɔ ŋati. 19kɔ lasianɛ ŋa ɔ pa, O na rəkomra rəte ba kəlanɛ, mɔlɔ alɔkɔ mə i ba kəyi yi naŋ-a? Mɔlɔ alɔkɔ mə i ba kəmuyu nu-a? Kara ɔwath ro mi. 20kaŋ kȧrȧ kɔ ro ŋɔŋ, ka ɔkərəfi-e, ma ɔ nənk Yisɔsȧŋ, ka ɔlɛmp wati ɔ sɔmpa ɔwath ɔthasər, ɔ fumpɔ ro thɔf, ɔ sapəthnɛ kɔ wur kəfoth. 21kɔ yif ɔkas kɔŋ, To pə won thɔŋ-e, kȧbi ma ȧte mə tə yɔnɛ kɔ-e? kɔ pa Kəbi ka rafɛth rɔŋ. 22Ɛlɔkɔ ɛgbathi ɔ napanɛ kɔ ka anȧnt yi ka ȧmȧnt tə kədif kɔ, kɛrɛ bepi mə gbəli yɔ tȧy o tai-e, ba su ȧney, mar su. 23Ka Yisɔsȧŋ ɔ pa, Bepi mə gbəli lanɛ-e, tȧy o tȧy bɛ tə gbəli yi ka ɔwe mə lanɛ. 24Ka ɔlɛmp wati ɔkas ka ɔwath ɔ pa yi mantər, Mariki i lanɛ; mar kate lanɛ kȧmi. 25Ma Yisɔsȧŋ ɔ nənk kəpa ȧruniya rə der kəgbukɛ dɛr rɔkin-e, ɔ ŋal ɔkərəfi uləs, ɔ pa ro ŋɔŋ Munɔ ukərəfi ubobo yi utaŋa, i yamari mu, wur ro ŋɔŋ, ɔwa te sɔ wɔŋ kɔ. 26Ka ɔkərəfi ɔ woŋa, ɔ sɔmpa kɔ ɔthasər, kɔ wur kɔ. Ɔwath ɔ yi mɔ ɔ po fi, ɔwa afəm agbȧthi aŋ pa kəpa ɔ po fi. 27Kɛrɛ Yisɔsȧŋ ɔ wop kȧta kɔŋ, ɔ ŋata kɔ, kɔ təmȧ. 28Ma ɔ wɔŋ ro seth-e, aŋkarande ŋɔŋ aŋ yif kɔ sɔy, To som saŋ sə te gbəli wurɔ kɔ-e? 29kɔ pa ro ŋaŋ, Katəp ake kə gbəli hɛ wur, thambe rə kəramnɛ yi kəwop asum.
30kaŋ wur ri, aŋ gbəkinɛ ro Kalili. Ɔwa ɔ yema hɛ wuni o wuni ɔ tȧrȧ ti. 31Pəkasifɛ ɔ thəksa aŋkarande ŋɔŋ, ɔ pa ro ŋaŋ, A tə lȧnki ɔWan ka wuni ka mȧta ma aŋfəm, ka aŋ tə dif kɔ; bepi a po dif kɔ-e, kədarəŋ ka mərey məsas ɔ tə kȧl yokanɛ. 32Kɛrɛ ȧŋpa aŋ sɔk hɛ ŋa, ɔwa aŋ nesa tə kəyif kɔ.
33Kɔ der ro Kepaniyɔm; ɔwa ma ɔ yi ro seth-e, ɔ yif ŋa, Ko tȧy tȧŋ mə nə bɔ thoŋka ro roŋ-e? 34Kɛrɛ aŋ taŋk thəm, ȧtesoma-e aŋ thonkas ro roŋ ta ɔwe mə yi ubana kətɔŋ ka ŋaŋ. 35kɔ yirȧ ɔ tela aŋtɔfɔt ŋarəŋ, kɔ pa ro ŋaŋ, Bepi wuni o wuni ɔ yema yi utɔtɔkɔ-e, ɔ ba kəyi ɔləpsɔ bɛ, ɔwa yi ȧŋbɔy ŋa bɛ. 36kɔ gbasi uwath fɛth-e, ɔ təmər kɔ kətɔŋ ka ŋaŋ. Ma ɔ manthlanɛ kɔ-e, ɔ pa ro ŋaŋ, 37Wuni o wuni ɔwe mə malanɛ ukin ka aŋfɛth mɔ ɔwe ka ȧŋes a mi-e, minɛ ɔ malanɛ; ɔwa wuni o wuni ɔwe mə malanɛ mi, min thahɔ ɔ malanɛ, kɛrɛ ɔwe som mi-e.
38Yɔnȧŋ ɔ pa ro ŋɔŋ, Karmɔkɔ, sə nənk wuni kin ɔ wurɔ akərəfi ka ȧŋes a mu, ka sə gbiŋa kɔ ti pəkasifɛ ɔ tȧŋ hɛ su. 39Kɛrɛ Yisɔsȧŋ ɔ pa, Te nu gbiŋa kɔ, kotȧy-e wuni o wuni ɔ gbəli hɛ yɔ məyɔs məbana ka ȧŋes a mi ɔwe mə kȧl sɔ fɔf mi ɔləs. 40Ȧtesoma-e ɔwe te ŋamnɛ su ɔ yi ta ȧtȧ su. 41Wuni o wuni ɔwe mə sɔŋ nu mȧnt rə apɔthi tə kəmun ka ȧŋes a mi pəkasifɛ nə yi aŋa Kraist-e, tɛntɛnɛ i kanɛ nu ȧŋrȧm ŋɔŋ aŋ ba hɛ kədinɛ. 42Ɔwa wuni o wuni ɔwe mə yɔ aŋgbət gbət aŋe aŋa lanɛ mi aŋ pənthbəla-e, pə tə yi kɔ ɔfisa bepi a gbak kɔ ȧsar ȧgbɔlȧ ka kalim kɔŋ, a fitha kɔ ro baŋ. 43Ɔwa bepi kȧta ka mu kə yɔ mu mə pənthbəla-e, gbək ki, pə tə yi mu fisa tə kəwɔŋ ka aŋesəm thəbana ulopanɛ, pəthasi kəba məta mȧrəŋ, ɔwa a fitha mu ro yahanama, ka anant ana te dimsɛ. 44ro ɛbiloŋ yaŋ aŋ te fi, ɔwa anant nə dimsi hɛ. 45Bepi akatək ka mu kə yɔ mu mə pənthbəla-e, gbək ki, pə tə yi mu fisa tə kəwɔŋ ka aŋesəm thəbana mun tətkɛ, pəthasi kəba tatək tərəŋ, ɔwa a fitha mu ro yahanama ka anant ana te dimsɛ, 46ro ɛbiloŋ yaŋ aŋ te fi, ɔwa anant nə dimsɛ hɛ. 47Ɔwa bepi rafɔr ra mu rə yɔ mu mə pənthbəla-e, kothi ri; pə tə yi mu fisa bepi mə wɔŋ ka rȧbȧy ra Kuru yi rəfɔr rin-e, pəthasi kəba ɛfɔr yɛrəŋ, ɔwa a fitha mu ka anant na ro yahanama, 48ro ɛbiloŋ yaŋ aŋ te fi, ɔwa anant nə dimsɛ hɛ. 49kotȧy-e, wuni o wuni a tə mɛm kɔ yi nȧnt, sathka o sathka-e, a tə bɔthəs ti yi mɛr. 50Amɛr mə finɔ, kɛrɛ bepi mə rant-e, ko rəka rə mə bɔthəs ma-e? Nia gbeŋ nə ba kəyi mɛr ka ɛyɛthɛ nu, ɔwa yirȧ yi məthɔfəl ukin yi ulɔm.
Iliyochaguliwa sasa
Mark 9: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.