Mark 4
4
1Ka Yisɔsȧŋ ɔ təp sɔ kəthəksa ro baŋ rayɛr. Ka runiya rəbana rə thoŋklanɛ ro ŋɔŋ, kɔ wɔŋ ka abil alɔl, ɔ yirȧ ri ro baŋ ka aŋfəm bɛ aŋ yirȧ ro gbaŋ ka kȧbȧŋ dayɛr. 2kɔ thəksa ŋa mȧtȧy məgbathi rə ɛlomɔ, kɔ pa ro rɔŋaŋ ka kathəksa kɔŋ, 3Su nu ɛləns. Kəla, usak ɔ wur tə kəsak, 4ka pə re yi, mɔ mɔ sak-e, məter məlɔm mə fumpɔ ro roŋ dayɛr, ka ɛbȧmp aŋ der aŋ gbaməs ma. 5Ɔwa məlɔm mə fumpɔ rə agbalaŋ aŋa te ba ɛthɔf ɛgbathi. Ɔlɛmp wati mə lɔkɔ, ma mə te ba ɛthɔf ɛbɔlɔŋ-e, 6kɛrɛ ma aret rə put-e, mə fianɛ, ɔwa mə wela ma mə te ba ɛthəŋk. 7Məlɔm mə fumpɔ rə təbaŋk, ɔwa ma tabaŋk tə lɔkɔ-e, tə thiŋkanɛ ma haŋ mə kom hɛ məkomi. 8Ka məlɔm mə fumpɔ rə athɔf afinɔ, ka mə kom məkomi, mə bȧk, mə fui. Məlɔm mə kom məkomi mɔlɔ ma kəgba tɔfɔt, məlɔm təgba təsas, məlɔm kɛmɛ kin. 9kɔ pa ro ŋaŋ, Ɔwe ba ɛləns ta ɔ təl.
10Ɔwa ma Yisɔsȧŋ ɔ tiyȧ kɔn son-e, aŋtɔfɔt ŋarəŋ yi aŋa yi yi ŋaŋ-e, aŋ yif kɔ tə kəlokthia ŋa aŋlomɔ. 11kɔ pa ro ŋaŋ, A sɔŋ nu tə kətara aŋgbundu ŋa rȧbȧy ra Kuru, kɛrɛ ka ŋaŋ aŋa yi rokaŋ-e, mȧtȧy ame bɛ mə yɔnɛ rə ɛlomɔ, 12kȧmȧ bepi aŋ kəli-e aŋ nənk kɛrɛ aŋ sɔthnɛ hɛ. Ɔwa kətəl aŋ tə təl kɛrɛ pə sɔk hɛ ŋa; ta thani aŋ kȧl lafthɛ, ɔwa a tera ŋa ɛhakɛ yaŋ. 13kɔ pa ro ŋaŋ, Nə tɛ hɛ aŋlomɔ aŋe-i? Ɔwa to mə nə yɔ nə tȧrȧ ɛlomɔ bɛ-a? 14Ɔsak ɔ sak ȧrim. 15Aŋa yi ro roŋ dayɛr ro a sak ȧrim, ŋa yi aŋa bepi aŋ po təl-e, Sethani ɔ der ɔlɛmp wati ɔ nɔy ȧrim ara a sak ro rɔŋaŋ. 16Ya pə yi sɔ mɔ aŋlɔm aŋa a sak ka aŋgbalaŋ-e, maŋ təl ȧrim, ka ɔlɛmp wati aŋ malanɛ ri yi məbɔnɛ, 17kɛrɛ maŋ te ba ɛthəŋk rokor ka ŋaŋ-e, aŋ muyu ɔthan gbo; kədarəŋ kati bepi mɔnɛ-e, thalɔm asɔmpanɛ aŋ der salata ȧrim, ka ɔlɛmp wati aŋ tə pənthbəla. 18Alɔm-e, a sak ŋa ka tabaŋk. Ŋaŋ ŋa yi aŋa təl ȧrim, 19kɛrɛ ɛsoli ya ȧdȧru, yi matɔns ma rəyola, ɔwa mafela ma mȧtȧy məlɔm mə der-e, mə thiŋkanɛ ȧrim, ɔwa rə ba hɛ məkomi. 20Ɔwa aŋa a sak ka ȧŋthɔf afinɔ, maŋ təl ȧrim aŋ malanɛ ri, ɔwa aŋ kom məkomi mɔlɔ ma kəgba tɔfɔt, məlɔm təgba təsas, məlɔm kɛmɛ kin.
21kɔ pa ro rɔŋaŋ, A kȧrȧ kəmulɛ tə kəbot ki ka ȧthunthȧ roratha ba, thalɔm ka kəfənt roratha-i, a kȧrȧ hɛ ki tə kəbot ki ka ɔtəmər wati-i? 22kotȧy-e koko ara a maŋk rə yi hɛ ara mə a te ba kəwur gbafəth; amurare aŋ yi hɛ aŋa mə a te ba kətara. 23Bepi wuni o wuni ɔ ba ɛləns-e, ta ɔ təl. 24kɔ pa ro ŋaŋ, Bot nu rə ȧmerȧ ȧte nə təl. Anthuntha aŋa nə thunth-e, ŋə mə a thuntha nu. Ɔwa a tə kȧl bȧrȧ nu sɔ. 25Ȧtesoma-e kɔnɔ ɔwe ba-e, ɔ tə bȧr sɔthɔ, ɔwa kɔnɔ ɔwe te ba-e, a tə nɔy kɔ ara ɔ ba.
26kɔ pa sɔ, Rȧbȧy ra Kuru rə yi mɔ ulaŋgba mɔ ɔ sak məter ka ȧŋthɔf. 27Ɔwuni ɔ dirȧ, ɔ thəmɛ tȧtȧk yi rəyaŋ, ɔwa ma mater mə lɔkɔ, ɔwa mə bȧk-e, ɔ tɛ hɛ aroŋ dati. 28Aŋthɔf gbeŋ aŋ wur məkomi; kətɔtɔkɔ kȧpotoŋ. Kədarəŋ kati mȧkomi, kədarəŋ kati mȧkomi məbaki. 29Kɛrɛ bepi mȧkomi mə bȧk-e, ka ɔlɛmp wati ɔ kȧrȧ aŋthis arɔka, pəkasifɛ ȧŋlɔkɔ ŋa karɔk aŋ bek.
30kɔ pa, Ko rəka raŋ mə sə bȧlȧnɛ rȧbȧy ra Kuru-e? Thalɔm ko alomɔ mə sə lomɔ ri-e? 31Rə yi mɔ aluka ŋa amustard, aŋa pə yi bepi a tɛp ŋi ka aŋthɔf-e, hali maŋ yi alɔl athasi maluka bɛ ka ȧdȧru-e 32kɛrɛ ma a tɛp ŋi-e, aŋ lɔkɔ-e, aŋ səkɛ ȧbana pəthasi ɛbuma bɛ, aŋ wur məra məbana, haŋ ɛbȧmp ya aŋfena aŋ gbəli yianɛ roratha ka ȧŋfɔyr ŋati.
33Ɔwa ɔ fɔfȧnɛ ŋa ȧrim rə ɛlomɔ ɛgbathi ɛwunɔŋ, mɔ mə aŋ gbəli təl. 34Ɔ fɔfȧnɛ hɛ ŋa thambe rə alomɔ, kɛrɛ ka aŋkarande ŋɔŋ ɔ yɛksi mȧtȧy bɛ, maŋ tiyȧ ŋa son.
35Ka ȧŋrey ŋati ma rȧfɔy rə po bek-e, ɔ pa ro ŋaŋ, Maŋ fəsi nu romɔri ka ȧŋgbȧp alɔm. 36Maŋ po tey ȧruniya-e aŋ keranɛ kɔ ka ȧŋbil mɔ ɔ yi. Ka təbil təlɔm tə kɔ yi kɔnɔ. 37Ka kəŋkəl kəbana kə yokanɛ, ɛmunkəl ɛ wɔŋ ka ȧŋbil, ka ȧŋbil aŋ yema la mȧnt. 38Kɛrɛ kɔnɔ ɔ yi rodarəŋ ka ȧŋbil-e, ɔ dirȧ ka ȧŋpila, kaŋ thəmi kɔ, aŋ pa ro ŋɔŋ, Karmɔkɔ, tə ba hɛ mu tȧy bepi sə dinɛ-i? 39kɔ thəmɛ, ɔ ŋal aŋfef, ɔ pa ka kȧbȧŋ, Taŋk, thɔfəla thɔŋ. Ka aŋfef aŋ poŋ, ka pə kȧl yi ɔthɔfəl bɛm. 40kɔ pa ro ŋaŋ, kɔyɛŋ nə nesa-e? Nə tha ba hɛ kəlanɛ-i? 41kaŋ nesa haŋ aŋ pa ukin yi ulɔm, Kanɛ yi ɔwe-e, ɔwe pə yi hali aŋfef yi kȧbȧŋ, ɛ təlȧ kɔ-e?
Iliyochaguliwa sasa
Mark 4: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.