Mark 5
5
1kaŋ fəsi kȧbȧŋ mɔri, ka ȧŋthɔf ŋa aŋKarasin. 2Ma ɔ wur ka ȧŋbil-e, ka ɔlɛmp wati ulaŋgba ɔwe ba ukərəfi uləs ɔ wur ka taboma ɔ gbanɛ kɔ. 3Ɔlaŋgba ɔwe ɔ ba mayira mɔŋ kətɔŋ ka taboma, ɔwa wuni o wuni ɔ gbəli hɛ sek kɔ, hali rə tɔrɛntha, 4ȧtesoma-e ɛlɔkɔ ɛgbathi a seka kɔ ɛgbete yi tɔrɛntha-e, kɛrɛ ɔ piməs atɔrɛntha-e, ɔ siməth ɛgbete. Wuni o wuni ɔ ba hɛ afɔsɔ tə kətham kɔ. 5Lɔkɔ o lɔkɔ, tatak-o, rəyaŋ-o, ɔ yi ka tȧteŋ yi ka taboma, ɔ sɔŋkɔ, ɔ gbəkəsnɛ yi məsarȧŋ. 6Kɛrɛ ma ɔ nənk Yisɔs ɔbɔli poŋ, ɔ gbukɛ ɔ bȧtho kɔ, 7kɔ sɔŋkɔ yi rim rəbɔli rəkɔm, ɔ pa, Ko tȧy tȧŋ i ba yi munɔ-e, Yisɔs munɔ ɔWan ka Kuru ɔBɔlirəkɔm bɛ-e? Ka ȧŋes ŋa Kuru, i nɛmthɛnɛ mu kȧmȧ mə te sɔmpa mi. 8kotȧy-e ɔ po pa ro ŋɔŋ, Wur ka ɔlaŋgba, munɔ ɔkərəfi uləs ɔwe. 9kɔ yif kɔ ȧŋes ŋɔŋ, kɔ wosa, ɔ pa, Aŋes a mi aŋ yi Runia, ȧtesoma-e sa agbȧthi. 10kɔ nɛmthɛnɛ kɔ kȧmȧ ɔ te bȧl ŋa ka ȧŋthɔf. 11Ȧŋlɔkɔ ŋati, kuthi kəbana ka təsɔp kə bɔ wɔnth ri ka kateŋ rayɛr. 12Ka aŋkərəfi aŋ nɛmthɛnɛ kɔ aŋ pa, Somra su ka tasɔp kȧmȧ sə wɔŋ ŋa. 13Ka Yisɔsȧŋ ɔ malanɛ. Ka aŋkərəfi aləs aŋ wur kɔ aŋ wɔŋ ka tasɔp, ka akuthi (mɔlɔ ma ɛwul yɛrəŋ) kə gbuŋklɛ ka aŋtəmp ŋa kȧbȧŋ, kaŋ po fi ro mȧnt. 14Ka ŋaŋ aŋa wɔnthər ŋa aŋ gbukɛ, aŋ kanɛ ti ro pet, yi ka ȧŋthɔf. Kaŋ der tə kəkəli ȧte po yɔnɛ. 15Maŋ der ka Yisɔs-e, kaŋ nənk ɔlaŋgba ɔwe la ba aŋkərəfi aləs-e, ɔ yirȧ, ɔ lopra, ɔwa ɔ ba ȧmerȧ akɛnɛ-e, aŋ nesa. 16Ŋaŋ aŋa nənk ti-e, aŋ tɔri ŋa ȧte yɔnɛ kɔ ɔwe la ba aŋkərəfi aləs, yi ta tasɔp. 17kaŋ wɔŋ kənɛmthɛnɛ kɔ kȧmȧ ɔ wur ka ȧŋthɔf ŋaŋ. 18Mɔ mɔ wɔŋ ro bil-e, kɔnɔ ɔwe la ba aŋkərəfi ɔ nɛmthɛnɛ kɔ kȧmȧ ɔ yi ro ŋɔŋ. 19Kɛrɛ ɔ selɔ hɛ, ɔ kanɛ kɔ, Kɔnɛ ro seth ka mu ka aŋyathki a mu, kȧmȧ mə kanɛ ŋa mȧtȧy məbana ama ɔMarki ɔ yɔna mu, ɔwa mɔ mɔ ba ȧney ta ȧtȧ mu. 20kɔ kɔnɛ, ɔ təp kətaməs ro Dikapɔlis mȧtȧy məbana ama Yisɔsȧŋ ɔ po yɔna kɔ. Ka aŋfəm bɛ aŋ kabanɛ.
21Ma Yisɔsȧŋ ɔ bȧkȧ ka ȧŋbil ɔ kȧl fəsi romɔri-e, runiya rəbana rə thoŋklanɛ ro ŋɔŋ. Ȧŋlɔkɔ ŋati ɔ yi ro baŋ rayɛr. 22Ka ukin ka aŋkərbomp ka ȧŋseth agbanɛ ɔ der, ȧŋes ŋɔŋ ŋə yi Yairɔs. Ma ɔ nənk kɔ, ɔ fumpɔ ka ȧtȧtək tɔŋ, 23ɔ nɛmthɛnɛ kɔ ɔthasər, ɔ pa, Ɔwan kȧmi ubɛra ɔ yema fi, ɔmari mu, der kȧmȧ mə deŋ kɔ mȧta ma mu, kȧmȧ ɔ kȧl yeŋk, ɔwa ɔ kəli. 24Ka Yisɔsȧŋ ɔ paya kɔ; ka ȧruniya rəbana rə tȧŋ kɔ, rə thiŋkanɛ kɔ.
25Ka wuni bom ɔwe wur mətir ka təren tɔfɔt tərəŋ, 26ɔwa ɔ po thas mȧtȧy məgbȧthi ka mȧta ma aŋbolomba, ɔ po ləsər ara ɔ ba bɛ, kɛrɛ pə fisa hɛ kɔ, ɔ bȧr gbo nakasi; 27ma ɔ təl ta Yisɔsȧŋ, ɔ der rodarəŋ ka ȧruniya, ɔ gboŋ aruma rɔŋ. 28kotȧy-e ɔ pa, Hali gbo i gboŋ ȧsuma tɔŋ i ti yeŋk. 29Ɔwa ka ɔlɛmp wati mȧtir mɔŋ mə tey kəwur, kɔ təlnɛ ka aŋdɛr ŋɔŋ kəpa ratu rɔŋ rə poŋ. 30Ka ɔlɛmp wati-e, ma Yisɔsȧŋ ɔ təlnɛ kəpa aŋfɔsɔ aŋ wur kɔ, ɔ fəlɛ ka ȧruniya, kɔ pa, Kanɛ gboŋ ȧsuma ta mi-e? 31Ka aŋkarande ŋɔŋ aŋ pa ro ŋɔŋ, Mə nənk ȧruniya rə thiŋkanɛ mu, mə kȧl yif, Kanɛ gboŋ mi-e? 32kɔ kəli kəli kȧmȧ ɔ nənk ɔya ɔwe po yɔ ȧte. 33Ka ɔya ɔ nesa, ɔ yɛr ma ɔ tȧrȧ ȧtȧ a po yɔna kɔ, ɔ der, ɔ gbəpsa rodi kɔŋ, ɔ kanɛ kɔ tȧteŋ bɛ. 34kɔ pa ro ŋɔŋ, Wan kȧmi ubɛra, Kȧlanɛ ka mu kə po mu yenkəs. Kɔnɛ yi məthɔfəl yi kəyeŋk ka ratu ra mu.
35Ma Yisɔsȧŋ ɔ yi ras ka kəfɔf-e, afəm aŋ der kəwur ka ȧŋseth ŋa ɔwe yi rȧbomp ka ȧŋseth agbanɛ-e, aŋ pa, Ɔwan ka mu bɛra ɔ fi. Kɔyɛŋ mȧ mə sɔmpa sɔ ɔkarmɔkɔ kətiŋ-e? 36Kɛrɛ Yisɔsȧŋ ma ɔ təl ȧrim ara a fɔf-e, ɔ pa ka ɔwe yi rȧbomp ka ȧŋseth agbanɛ-e, Te nesa, lanɛ gbo. 37Kɛrɛ ɔ selɔ hɛ wuni o wuni ɔ paya kɔ, thambe Pitaŋ, Yeməsȧŋ yi Yɔnȧŋ, ɔwɔnt ka Yeməs. 38Maŋ bek ka ȧŋseth ŋa ɔwe yi rȧbomp ka ȧŋseth agbanɛ-e, ɔ bəp asɔnkɔ ȧbana, ɔwa afəm agbȧthi aŋ bok, ɔwa aŋ kulɔ kəkulɔ kəbana. 39Ma ɔ po wɔŋ-e, ɔ pa ro ŋaŋ, kɔyɛŋ mə nə woŋa-e, ɔwa nə bok-e? Ɔwath ɔ fi hɛ, ɔ dirȧ gbo. 40kaŋ sel kɔ kəsel kəbana. Kɛrɛ ma ɔ po wurɔ ŋa bɛ-e, ɔ kera ɔkas ka ɔwath yi ɔkara kɔŋ, yi ŋaŋ aŋa paya kɔ, kȧmȧ aŋ wɔŋ ro ɔwath ɔ yi. 41kɔ wop kȧta ka ɔwath-e, kɔ pa ro ŋɔŋ, Wath bɛra, i kanɛ mu, Yokanɛ. 42Ka ɔlɛmp wati ɔwath bɛra ɔ yokanɛ, ɔ kɔth, kotȧy-e ɔ ba thɔŋ təren tɔfɔt tərəŋ. Ɔwa aŋ kabanɛ kəkabanɛ kəbana. 43kɔ yamari ŋa ɔbaksər kȧmȧ wuni o wuni ɔ te tȧrȧ ti. Kɔ kanɛ ŋa kȧmȧ aŋ sɔŋ kɔ da rədi.
Iliyochaguliwa sasa
Mark 5: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.