Mateo 4
4
Mëjjku'ujy tjayëkpökytyunwa'any Jesús
(Mr 1.12-13; Lc 4.1-13)
1Nits Jesús Yës Teety Jyaa'wë'n yyëknëjkxë tëtsta'aky itjötypy, jäjpts mëjjku'ujy jyayëkpökytyunwaajnë.
2Kä' kyaay y'uujky wixtekxy xëëw wixtekxy tsuuj, nitnë'mts yuuj tjaa'w'ëëy. 3Nits mëjjku'ujy nyimiijnë jäts jyäyëkpökytyunwaajnë jakëjxts nyëë'mxë:
—Pën tëyë'mtam jäts Yës Teety m'uu'nk'ätyë nnëëjmë yë' tsaaj jäts kyääkyjyatt.
4Nits Jesús t'atsoowimpijjty:
—Jäjp jaypyety myiny jäts kä' jä'yë kääky yëktajükyë, mëët yëktajükyë Yës Teety y'aaw y'ayuujk.
5Nits mëjjku'ujy pyawaajjë Jerusalén, kunüü'kxy mëjjkajjpjotm, jäts yëkpäjjtë tsajptëjkukujkm 6nits nyëë'mxë:
—Pën tëyë'mtam jäts Yës Teety m'uu'nk'ätyë, kuppujtnax jäm; jä'ku nëm Yës Teety y'aaw y'ayuujk yä'äny:
Yës Teety tpakkäxp tsajpjaa'y jäts m'ijxy'ittë't,
jä'äts m'axaj'attë'p jäts katij tsakkëjjxy mnaxkita'aky.
7Nits Jesús y'atsoowimpijjty:
—Jäjp mëët jaypyety myiny maj yä'äny: “Katij Yës Teety mwintsën nikoj xkäjpxy'ijxy xkäjpxyjawë.”
8Nits mëjjku'ujy pyawaajjë mëjjkojpkukujkm jäts tyok'ijxë tukkë'yë it naxwiin, naajx kajjp mëët tukkë'yë myëjk'ajjt, 9jäts nyëë'mxë:
—Tukkë'yë ëjts ya'at nyajkëxt, ku ëjts xwinkuxtänë't jäts ëjts xwintsë'ëkë't.
10Nits Jesús t'atsoowimpijjty:
—¡Jëwa'ak mëjjku'ujy, jäjp mëët jaypyety myiny maj yä'äny. “Tu'ukyë Yës Teety mwintsën xwintsëkë't jäts tu'ukyë jä' xmuttu'nt xmuppëkt.”!
11Nits mëjjku'ujy nyikkääjkë, jäts tsajpjaa'y nyimiijnë jä'äts ijxy'ijjtë.
Jesús tyunk tpatsoo'nta'aky Galilea
(Mr 1.14-15; Lc 4.14-15)
12Ku Jesús tnijaa'w'ëëy jäts tëj y'ijjty Juan yëkpujxtëjkpemy nits nyijkxy Galilea y'itjotm. 13Jä'yë'ts nyajjxy Nazaret maj y'ijjty kyukkajjpë, jäts nyijkxy Capernaúm, Galilea nyë'am, Zabulón mëët Neftalí y'itjotm. 14Najjts jä' jyajjty jäts kyuytyunë't mati' jyaay yëk'ayuujknajxpë Isaías maj jäjp yä'äny:
15«Zabulón mëët Neftalí y'itjotm
maaxynyë'am,
Jordánkë't nyë'awinm:
Galilea, maj jäm kyukkajjpë kayësjaa'myäjtspë jaa'y.
16Tëj t'ijxy mëjj'ajajjk mëjj'attëë'kxk kajjp mati' y'ijjty akkoots'attüjpy;
Pënts y'ijjty oo'jkën ni'äjjpë'p nikkëëjyë'p tëj jä' ajajjk nyijajjyë nyittee'kxyë.»
17Nits Jesús kya'amay'axajjy: «Katij m'okpökytyunëtë jaa'myätstë Yës Teety, jä'ku winkonnë'p jä' kyuttujjkë'n.»
Jesús nimajktaxk ajkxjuu'tpë twaajë'ëky
(Mr 1.16-20; Lc 5.1-11)
18Jäm y'ijjty Jesús wyittity Galilea nyë'am jäts t'ijxpaajty nimäjtsk jaa'y tu'kmuku'uktë y'ajkxjuut'ooktë tu'uk txëëwë Simón mati' y'ijjty mëët yëkkuxëëw'eepy Pedro, jatu'uk txëëwë Andrés. 19Jäts Jesús tnëëjmjaay:
—Patsoo'nktë'k ëjts, ëjts miits ntokjatp jäts jaa'y xyë'pitsë'mtë't tyakkoo'nyjötypy.
20¡Jätyë jä' jaa'y t'okkäjxkëjxnëtë y'ajkxmajjts'ëë'ny xuumy nits Jesús tpanëjkxtë.
21Oojknë'm Jesús tpaajty janimäjtsk jaa'y ninyajj tu'kmuku'uktë, kanëw jotm tyeety ttamëëtyëk'a'oyë'y'ooktë y'ajxmajjts'ëë'ny xuumy, tu'uk txëëwë Santiago jatu'uk Juan, Zebedeo myajjnktëjjk. Nits Jesús tyaajxjaay, 22jätyë jämyë tyeety kanëwjotm t'oknikkäknëtë nits Jesús tpanëjkxtë.
Jesús tka'amay nimay jaa'y
(Lc 6.17-19)
23Tukkë'yë y'ijjty Jesús Galilea't it t'ayo'oy, mats tpaaty tu'kwiin jatu'kwiin jaa'y ka'amaa'yë'n ttayo'ymyuktë jäts twaajnë oy'ayuujk oymatya'aky Yës Teety kyuttujjkë'n, jäts mëët jaa'y tyëktso'oky pënjäty antë'p pëjktë'p. 24Tukkë'yë Siria y'itjotm y'ijjty Jesús yëknikkäjpxy yëknimatya'aky, jäts y'ijjty tta'anëjkxëtë pa'amjaa'y pënjäty mëjkta'aky pëjjkëtë'p, pën mëjjku'ujy tyumpë yyëk'ayoojjëtë'p, pën montë'p, jäts pën tëj xyujxnë, nitukkë'yë'ts y'ijjty Jesús tyëktso'oky. 25Nimay y'ijjty Jesús jaa'y pyawittityë jäm pënjäty tsoo'ntë'p Galilea, Decápolis, Jerusalén, Judea jäts mëët pënjäty mintë'p Jordán nyë'awinm.
Iliyochaguliwa sasa
Mateo 4: YTYA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Porciones en Mixe de Yalalag, Oaxaca, México © Sociedad Bíblica de México, A.C.