San Mateo 13
13
Xhkodza didza ki bene rhaze
(Mc 4.1-9; Lc 8.4-8)
1Dza nagsizi, broaj Jesús lo yo'o ga' zee te guiaje yajchie rhoa nisado'. 2Le'a tan bdobikagazi bene zen, Jesús gre'anhe lo to barko te grie, latzaka bene rhega'anke rhoa nisado' na. 3Na'arhe btzalajle'anhe le'ake bikakalha le'an xhkodza didza.
Gochhie le'ake: To bene rhaze broaje zajeze. 4Te nan rhaze, troa'a bini bexaj lhaneza, te bchhinka bguini te gdagokaba. 5Yetroa bexaj ladaj guiaj, ga' biteka zoa yo'; bini na betin prondozi, le'a tan bini na gxhoa' laweze tan biteka zoa yo'; 6Na kati broaj gbidza, te bkoadi, na tan biteka zoa lhoe, te gbichhi. 7Yetroa bini na bexaj ladaj yechi', te kati goni ka yechi' na labi bde lataj ye'ani. 8Na yetroa bexaj lo yo' chhia'a, na be'ana gsecho chhia'a; bala gchhia togayoa toto' bini, yebala gchhia tzona galaj, te yebala gchhia chirhoa. 9Ga' zoa nagalhe, leyenhe.
Jesús gdixaje'ene le'ake nobixhkia' rse'adiene le'an xhkodza didza
(Mc 4.10-12; Lc 8.9-10)
10Ka bene lachhile'anke Jesús yajse'ake kuite na gnabekene le' nobixhkia' rtzalajlo le'an ka bene le'an xhkodza didza. 11Jesús gochhie le'ake: Diozo rguixaje'ene lén tanagachi ki yelarne'abe'a kie'; zan ka bene yobilha labi rsnisiene le'ake. 12Le'a bene dia kie', wagdekarhe kie' mazirhe, te gatagazi kie'; te no' labi dia kie, za'atale'ati dia kie' weyede'ala. 13Tanka, rtzalajle'ankane le'an xhkodza didza; le'a le'ake ryoke, le'an labi rhe'akiebekene; kan rhenkene, le'an labi rheajniekene. 14Kanha, naka kie'ake goka ka' gne'a bene btzalaje laza Diozo grelawe Isaías:
Za'akalha yenkene, labi tzeajniekene,
kan za'akalha, ryoke, labi ye'akiebekene.
15Le'a yikiajlo laxhdo ka bene ni nachola naniti,
rhonkalize zi birhenhe
kan rhonke zi birle'e,
kinda labi sle'ekene nika yenkene,
kinda labi tzeajniekene kan labi yedake le'an ne'adia,
kinda ne'adia gaka yeyonha le'ake.
16Te chhia'a tzawe naka kie'alhe lén, le'a zoa yiajlolhe rle'elhe kan zoa nagalhe te rhenhelhe. 17Tali rhapa lén tixeka bene btzalajke laza Diozo le'an ka bene wen go'onkene sle'ekene tan rle'elhe lén te bible'ekene; go'onkene yenkene tan lén rhenhelhe te labi benkene.
Jesús bzeajniene ka bene xhkodza didza ki bene rhaze
(Mc 4.13; Lc 8.11-15)
18Legze'anaga, chen, tan rhe'anhe sne'a xhkodza didza ki bene rhaze: 19Ka bene rhenkene xhtidza Diozo le'an labi rheajniekene, nakake ka' bini gosi lhaneza; na rla'a taxiwe na rheguie'alata xhtidza Diozo nadoza lo laxhdoke 20Na bini gosi lo ladaj guiaj rhe'anhe sne'a bene rhenkene xhtidza Diozo te rhebekene nan rzi'ike, 21na tan biteka napa lhoe, na labi rze'ake tzotzo; kati nia' ki xhtidza Diozo rdeke lo taze'adi o rsakaya'aka bene le'ake, rinajkene. 22Na bini gosi ladaj yechi' rhe'anhe sne'a bene rhenkene xhtidza Diozo, na rhebankene ki bikaka tan dia lo yelanaban nan kan ki tan rze'alachhike gatarhe kie'ake tan rzie' ye'a le'ake. Yogote'a ten rchiagui xhtidza Diozo te labi rde lataj gtzake ka' chhiarheke. 23Na bini gosi lo yo' chhia'a rhe'anhe sne'a bene rhenkene xhtidza Diozo na rheajniekene te rdeke to gsecho chhia'a, ka' lo beto'o ki trigo gchhia togayoa, tzona galaj o chirhoa toto' bini.
Xhkodza didza ki guixi malha lo ga' nadoza ka xhoa xhtilha
24Jesús gdixaje'ene yeto' xhkodza didza ni: Rhaka kan lo yelarne'abe'a ki Diozo ka' goka ki to bene goze bini chhia'a lo laye'alha kie'; 25te kati yogokate' chirhasike, bchhin to bene rle'ene zi' le', goze guixi malha ga' nadozaka trigo te beze'e. 26Kati goni trigo na te golhaj lo beto'o kie le'aksikan betin guixi malha. 27Na'arhe ka bene we'anchhin guiajke yajechhike xan yo' na: Xanha, chen bini gozalho lo laye'alha kio' naka chhia'a, ¿noga gza guixi malha na? 28Xan yo' na rhe le'ake: Ten be'an bene rle'ene zi' ne'adia ka bene we'anchhin gnabekene le': ¿Arhe'anlo tzeajto zale'akiajto guixi malha na? 29Na le' rhe le'ake: Labi, le'a nan chirladzolhe guixi malha nakalha sladzole'anle trigo. 30Wenkalha gderha lataj ye'anika tzaxhen nan xhchhinte'arhe gsecho; na'arhe sela ka bene zajlapake te yezi'ike zalho guixi malha te gogake troa'a weaj, kinda gze'aguike, te dena'a ko'oke sigorha trigo na lo ye'e kia'.
Xhkodza didza ki bini ki mostaza
(Mc 4.30-32; Lc 13.18-19)
31Jesús le'aksikan gdixajene le'ake xhkodza didza: Lo yelarne'abe'a ki Diozo naka ka' to bini ki mostaza kati to bene rhaze lo yo' kie'. 32Te kan, naka bini mazirhe zingo de yogote'a bini; le'an kati rhe'ani, rhaka ta mazirhe xhen ka' yebala guixi nadozaka na, te rchhinte'a rhaka to yaga, xhengolha te ka bguini rheajkaba rhajxoakaba lo xhi'in yaga na.
Xhkodza didza ki tarlichi lo koa
(Lc 13.20-21)
33Le'aksikan Jesús gdixaje'ene le'ake xhkodza didza ni: Yelarne'abe'a ki Diozo naka ka' tarlichi lo koa kati to nigolha rgotzene troa'a bixhte xhnolha rhonkene yetaxhtilha kinda gxen koa na.
Goka kumplirhe tan rne'a lo Xhtidza Diozo
(Mc 4.33-34)
34Jesús gdixaje'ene yogote'a ten ka bene le'an xhkodza didza, te chen labi naka le'an xhkodza didza labi rtzalajle'anhe le'ake. 35Ten goka kinda gaka kumplirhe tan chi gne'a bene rtzalaje laza Diozo:
Gtzalajle'anha bene le'an xhkodza didza;
yapa ka bene ta bino neze ta choka ga' bagachi
kati be'ante'a Diozo lichhileyo'.
Jesús bzeajniene bene xhkodza didza ki guixi malha
36Jesús na'arhe bose'e ka bene te guioe' lo yo'o, te bene lachhile'anke le' guiajke gago ga' zee te gnabekene le' kinda gzeajniene le'ake ki xhkodza didza ki guixi malha ki lo guixi. 37Jesús bochhie' kie'ake: Bene rhaze bini chhia'a nake Xhi'in bene bguio', 38te yo' ga' nadoza bini na naka sdote'a lichhileyo' ni. Na bini chhia'a na rhe'anhe sne'a ka bene nakake ki yelarne'abe'a ki Diozo, na guixi malha na rhe'anhe sne'a ka bene nakake ki taxiwe, 39na bene rle'ene zi' rho'o goze guixi malha nake taxiwe. Gsecho na rhe'anhe sne'a dza yelhalhe, na ka bene rhesoke gsecho na nakake angle. 40Ka' rhonke ki guixi malha rhesoke te rgo'oke lo gui'i kinda gze'aguike, le'aksikan gaka lo dza yelhalhe. 41Xhi'in bene bguio' sele ka angle kie' zajtobike lo yelarne'abe'a kie' yogoka bene rgo'oyelake bene yebalake gonke tamalha, kan bene rhonke tamalha. 42Ko'oke le'ake lo gui'i gabila, te na gata' yelagrechhi le'an gatilachhike. 43Na'arhe ka bene wen gze'anike ka' gbidza lo yelarne'abe'a ki Xozike. Ga' zoa nagalhe, leyenhe.
Xhkodza didza ki babanheza nagachi
44Lo yelarne'abe'a ki Diozo naka ka' to ta tzawegolha ta nagachi lo yo'. Na to bene bedzelhene, te nagsizi bokachike; rhebeguezene, beyiaje yajye'atie diarha tan dia kie' te beya'awe yo' na.
Xhkodza didza ki perla nagachi
45Le'aksikan rhaka lo yelarne'abe'a ki Diozo ka' to bene rha'awe na rheyotike glachhie' wilhaj perla tzawegolha; 46kati bedzelhene to ta za'akarhe, guiaje te beyotie' yogote'a tan dia kie', te beya'awe perla na.
Xhkodza didza ki yexaj rzenkenhe bela
47Le'aksikan rhaka le'an lo yelarne'abe'a ki Diozo ka' le'an to yexaj rgo'oke lo nisado' te rhesoke beyakoe bela. 48Kati rdza yexaj na, ka bene rzenke bela rhebeajkeba rhoa nisalha, ga' rbe'eke rhebekene bela; rhego'oke lo ga'a bea chhia'a te ro'onke bea labi nakaba chhia'a. 49Le'aksikan gaka dza yelhalhe ki lichhileyo': Wayiaj ka angle kinda yebeajke kieze ka bene malha kan bene wen, 50te cho'onke ka bene malha gui'i gabila. Na'arhe kida yelagrechhi le'an gatilachhike.
Ta kobi kan ta golha
51Jesús gnabenhe le'ake:
—¿Arheajnielhe yogote'a ten?
—Kan —bochhike le'ake.
52Na'arhe Jesús rhe le'ake:
Kati to muestro ki xhba'a rye'adiene ki yelarne'abe'a ki Diozo, rne' ka' to xan ki to yo', bene nonhe sigorha tan dia kie' nezene rhebeaje kieze ta kobi le'an golha.
Jesús zeaje Nazaret
(Mc 6.1-6; Lc 4.16-30)
53Kati beyochhi tan rtzalaj Jesús xhkodza didza ni, na beze'e 54te bechhinhe lo yechhi kie', ga' na gzolhoe rse'adiene ka bene lo yo'o ga' rhedobike. Ka bene, rhe'akiekene banachhi, na rne'ake:
¿Noga bye'adie bene ni yogote'a tan nezene? Nonaka rhakague rhonhe milagre? 55¿Alaga' bene ni nake xhi'in bene rchie yaga te alaga' María rhaka xhne? ¿Alaga' bene ni nake bichi Santiago, José, Simón kan Judas, 56le'aksikan alaga' ni' zoaka nigolha zanhe le'an rho'o? ¿Noga za tan rhonhe yogote'a ten?
57Na labi rheajkene ye'a kie'. Te Jesús gochhie le'ake:
—Gatite'azi rhonke xhen to bene rtzalaje laza Diozo, te lo yechhi kie' bigslano ni bene zoake lo yo'o kie'.
58Te na' labi be'anhe milagre zen le'a ka bene na labi rheajkeneye'a kie'.
Iliyochaguliwa sasa
San Mateo 13: XDZPY
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Porciones en Zapoteco de Yalahui, Oaxaca, México © Sociedad Bíblica de México, A.C.