Kisah Boko Rasul 11
11
Petrus monjolasan caro Allah moyakit'an io pakai' monorima' urakng inyo bukai Yahudi
(11:1-18)
1Boko rasul huatan boko urakng inyo pocayo di soluruh doerah Yudea nantai mondinga' borito mongona'i Petrus. Sia' mondinga' obai boko urakng inyo bukainyo urakng Yahudi udah pocayo Kabar Boi' doi' Allah mongona'i Yesus. 2Jadi, watu Petrus botula' ko Yerusalem, boko urakng pocayo inyo monaati poraturan agama Yahudi monyalahan io#11:2: Inyo monaati poraturan agama Yahudi Teks asli pakai sotilah ‘inyo bosunant’. Mosalah sunant'an di si'itn mowakili somuo masalah poraturan agama Yahudi. Boko urakng Yahudi inyo pocayo agatn Yesus monaati poraturan agama Yahudi. Ia'an, sia' kinyo bokawal agatn urakng inyo bukai Yahudi, sia' kinyo momua'i pomakatn inyo purih, sia' disunant, dll. Watu urakng inyo bukai Yahudi mula'i pocayo agatn Yesus, boko hal nantai monjadi mosalah bosar pakai' posokutuan gereja.. 3Kato sia', “Kolai udah bokawal huatan datakng usi'an ko rumah boko urakng bukainyo urakng Yahudi. Malah, kolai makatn bosamo sia'!”
4Apo Petrus monjolasan somuo inyo udah tojadi doi' mulonyo. 5Katonyo, “Boboropo watu komai, aku ado di kota Yope. Timpu aku tongahan bodoa, aku mondapat poniant'an doi' Allah. Ado sosuatu sama'an solamba'i koitn inyo kotakan luar. Koitn nantai togantukng di koompat bucunyo, turutn doi' langit. Koitn nantai turutn maho di pohadapanku. 6Di dalapm koitn nantai aku moniant ado banya' bondar jonis bonatakng tomansu' bonatakng bokaki ompat, bonatakng liar, bonatakng inyo moloncar di tanah, huatan boko burukng liar. 7Ongko Allah bopandir ko aku, ‘Petrus, bodiritn! Sombolih boko bonatakng ni'in ongko pua'i.’ 8Apo aku bopandir, ‘Cado, Tuhatn! Aku co kalo mua'i dagikng doi' bonatakng sama'an nantai. Boko bonatakng nantai purih.’
9Apo Allah bopandir pakai' koduo kalinyo, ‘Aman Aku bopandir sosuatu boi' mo dipua'i, jangan kolai bopandir purih.’
10Nantai tojadi tigo kali, hoyu' koitn nantai toangkat ko langit.
11Topat pado watu nantai, ado tigo urakng inyo datakng ko rumah tompat aku mongoluntukng. Sia' diutus ko aku doi' kota Kaisarea. 12Ongko, Roh Allah bopandir ko aku pakai' co gangga'-gua'an. Roh Allah monyiuh aku tuyut sia' ko kota Kaisarea. Koonam somadikan ni'in inyo tongahan ado di si'itn sokarakng, sia' jam tuyut samoan agatn aku doi' kota Yope nantai.
Watu koi sampai ko Kaisarea, koi mansu' ko dalapm rumah urakng inyo moningkau aku. 13Urakng bukai Yahudi nantai bokisah ko koi. Io udah moniant molekat bodiritn di rumahnyo. Molekat nantai bopandir ko io, ‘Siuh boboropo urakng ko kota Yope pakai' mocaki siku' urakng inyo bodamo Simon, inyo jam disobut Petrus. 14Io paca'an monyampaian borito ko kolai huatan somuo urakng inyo ado dalapm rumah kolai. Io paca'an momboritoan mongona'i caro kaitn ulih disolamant'an doi' hukupan dosa.’
15Jadi, aku mula'i monyampaian Kabar Boi' ko sia' somuo. Watu nantai jam, sopongirap Roh Allah turutn momonuhi sia' somuo. Roh Allah ado bosamo sia', samo sama'an inyo kito alapi komai. 16Lopas nian aku ingant agi' pomandiran Yesus, Tuhatn kito. Kato-Nyo, ‘Yohanes mombaptis urakng agatn ara'i, apo kaitn paca'an dibaptis agatn Roh Allah.’
17Watu kito udah pocayo ko Tuhatn Yesus Kristus, ongko Allah moonji'i Roh-Nyo ko kito. Ubo nian jam watu urakng inyo bukainyo Yahudi nantai pocayo, Allah jam moonji'i Roh-Nyo ko sia'. Aman Allah monorima' urakng bukai Yahudi sama'an nantai, co mungkitn aku ulih monula' sia'. Co mungkitn aku molawatn Allah!”
18Niannam inyo dikisahan Petrus di Yerusalem ko boko urakng Yahudi inyo pocayo. Jadi, sia' tongga'am monyalahan Petrus. Sobali'nyo, sia' momuji Allah. Kato sia', “Wah! Ruponyo, Allah monorima' urakng bukainyo Yahudi jam. Allah udah moonji'i kosompatan ko sia' pakai' sia' botongga' bulah dosa ongko monuruti Sio. Agatn caro nantai, sia' jam ulih mondapat'an hidup inyo somanah-manahnyo di sorugo.”
Banya' urakng di kota Antiokhia monjadi pocayo agatn Yesus
(11:19-30)
19Somontaro nantai, boko urakng inyo pocayo Yesus udah tosebar ko mono-mono.#11:19: Tiat Kisah 8:1-4. Lopas jadi Stefanus dibunuh, di kota Yerusalem boko urakng pocayo didorako'i. Obai nantai, sia' morarian diri jouh sampai ko nogori Fenisia, pulau Siprus, huatan kota Antiokhia.#11:19: Antiokhia nantai ibu kota propinsi Siria. Lobih doi' 480 pal ko arah utara doi' kota Yerusalem. Ponulis Kisah Boko Rasul (Lukas) boasal doi' su'utn. Dalapm Koraja'an Roma, kota ni'in bosar huatan sangant pontikng. Di su'utn ado jomaat agatn palikng banya' anggotanyo doi' boko urakng inyo bukai Yahudi. Ni'in jomaat inyo potamo sama'an nantai. Tigo kali, Paulus botula' doi' kota ni'in pakai' mula'i monyebaran Kabar Boi' (tiat Kisah 13:1-4; 15:35, 40 huatan 18:23). Sia' torus monyampaian Kabar Boi' mongona'i Yesus di boko tompat nantai. Apo sia' bayo momboritoan nantai ko urakng Yahudi ja'am. 20Ado boboropo urakng doi' antaro sia' inyo boasal doi' Siprus huatan kota Kirene. Sia' botula' ko Antiokhia jam. Di su'utn, sia' momboritoan Kabar Boi', ia'an Yesus nantai Tuhatn inyo bokuaso di pucu' somuonyo. Apo sia' momboritoan ko boko urakng bukainyo Yahudi jam. 21Tuhatn Allah kotakan monulukng sia' pakai' momboritoan Kabar Boi'. Obai nantai, banya' bondar urakng monjadi pocayo. Banya' urakng bukainyo Yahudi mula'i jumpat Tuhatn Yesus.
22Di kota Yerusalem boko urakng inyo pocayo Yesus mondinga' borito doi' Antiokhia nantai. Jadi, sia' moutus Barnabas ko su'utn. 23Pas Barnabas tuntukng ko su'utn, io moniant caro kohidupan sia' borubah obai Allah bulah koboi'an ko sia'. Obai nantai Barnabas mooso kotakan rindakng. Io monguat'an hati sia' oca' sia' somuo totap pocayo huatan monaati ko Tuhatn Yesus agatn soponuh hati. 24Nah, Barnabas nantai urakng inyo boi' hati. Io hala disoroto'i kuaso Roh Allah. Io kotakan pocayo agatn Yesus. Jadi, lopas polayatan Barnabas, banya' agi' urakng inyo monjadi pocayo ko Tuhatn Yesus.
25 Lopas nantai, Barnabas honda' bogoyap potulukan dalapm pogota'annyo doi' Saulus. #11:25: Kiro-kiro sopuluh tohutn udah manaham soja' Saulus botula' ko kota Tarsus (Kisah 9:30). Mungkitn io udah mula'i molayati boko urakng inyo bukai Yahudi timpu io ado di su'utn (Kisah 22:17-21).Jadi, Barnabas botula' ko kota Tarsus pakai' bousaha monggoyapi Saulus di su'utn. Lopas jadi monomuan Saulus, io mombaba' Saulus bobali' ko Antiokhia. 26Somanah sotohutn, sia' duo tinggal di su'utn. Sia' opat bokumpul bosamo agatn boko urakng inyo pocayo Yesus di su'utn. Sia' mongajar banya' urakng mongona'i Yesus Kristus. Di Antiokhia nam, boko urakng inyo pocayo Yesus mula'i disobut ‘Kristen’ pakai' potamo kalinyo.#11:26: Pado joman Paulus boko urakng opat bisi hulutn. Aman siku' urakng disobut urakng Kristen, rotinyo io nantai hulutn Kristus. Banya' ahli Buku Suci monyangko obai damo ‘Kristen’ potamo kali dipakai ulih boko musuh pongikut Kristus pakai' mohayam sia' (Kisah 26:28). Biasonyo urakng inyo pocayo Yesus moningkau urakng pocayo inyo bukai agatn sotilah ‘somadikan’, ‘murid’, damo ‘santa’. Apo, ado komungkitan obai boko urakng Kristen mo inyo momilih damo nantai.
27Di kota Yerusalem ado boko nabi inyo monyampaian posatn Allah ko boko urakng inyo pocayo Yesus. Pado watu Barnabas ongko Saulus ado di Antiokhia, boboropo doi' nabi nantai datakng. 28Salah siku' doi' sia' bodamo Agabus. Timpu, io bodiritn dalapm potomuan boko urakng pocayo. Roh Allah ado momonuhi io. Ongko io boposatn mongona'i lapar-barau inyo paca'an tojadi di soluruh doerah Israel. (Lapar-barau nantai bondar-bondar tojadi watu Klaudius nantai monjadi Kaisar negara Roma). 29Lopas jadi, mondinga' posatn nantai, somuo murid Yesus di Antiokhia momutusan pakai' monulukng boko somadikan nantai inyo tinggal di doerah Yudea. Sia' mongumpulan sumbakan. Sotiap urakng moonji'i sumbakan sobanya' mungkitn, sosuai agatn pongulihan siku'-monyiku'. 30Sia' moonji'i sumbakan nantai ko Barnabas ongko Saulus oca' sia' duo ulih moonju'annyo ko boko pomimpitn urakng pocayo agatn Yesusdi Yerusalem.
Iliyochaguliwa sasa
Kisah Boko Rasul 11: TBDS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia