Kisah Boko Rasul 12
12
Rajo Herodes Agripa mondorako'i boko urakng inyo pocayo agatn Yesus
(12:1-4)
1 Somontaro Barnabas ongko Saulus ija' di Antiokhia, Rajo Herodes monyiuh boko projuritnyo pakai' monangkap boboropo urakng inyo pocayo di Yerusalem. Herodes honda' mondorako'i boko urakng inyo pocayo agatn Yesus. 2Io monyiuh oca' Rasul Yakobus anci' Rasul Yohanes dibunuh pakai podakng. 3Pombunuhan Yakobus monyonangan boko pomimpitn urakng Yahudi. Jadi, watu Herodes mongotohu'i nantai, io pan monyiuh oca' Petrus ditangkap. (Nantai tojadi timpu poraya'an Ari Rayo Roti co boragi kohobu'annyo, lopas jadi Paskah dirayoan.)#12:3: Tiat catatan mongona'i Ari Rayo Roti Co boragi huatan Ari Rayo Paskah di Lukas 22:1. 4Jadi, Petrus ditangkap ongko ditamoan ko dalapm ponjara. Herodes monyiuh oca' Petrus dijago hala. Ado ompat regu projurit, masikng-masikng regu nantai doi' ompat urakng projurit. Hajat Herodes honda' moadili Petrus di hadapan urakng banya', oca' io dihukupm mati. Apo Herodes honda' monantian lopas poraya'an Paskah nantai jadi.#12:4: Ado banya' urakng bodatakan ko kota Yerusalem pakai' morayaan Ari Rayo Paskah. Jadi, mungkitn Herodes gola' banya' urakng paca'an molawatn aman Petrus dihukupm mati timpu poraya'an nantai.
Molekat mombebasan Petrus doi' ponjara
(12:5-19)
5Somanah Petrus ditahatn dalapm ponjara, boko urakng inyo pocayo agatn Yesus torus-monorus bodoa ko Allah pakai' io. 6Herodes udah monontuan ari pakai' moadili Petrus. Timpu malapm ari sobolupm ari nantai, Petrus tongahan tidu' di antaro duo projurit. Io dikobat agatn duo rantai. Ado jam boko projurit bukai monjago ponjara nantai di muka' lawakng. 7Sopongirap ado molekat Tuhatn moniant'an dirinyo ko Petrus. Torakng momanjah di dalapm ruakan ponjara nantai. Molekat nantai mongguyakng-guyakng Petrus pakai' monggagaian io. Kato molekat nantai, “Cocopat huas!” Watu nantai jam, boko rantai tolopas doi' longan Petrus.
8Ongko molekat nantai bopandir ko io, “Koncakan tali ikat pinggakng kolai.#12:8: Urakng Yahudi biasonyo momakai baju dalapm bolongan panda' (sama'an kaus panjakng) panjakngnyo singgatn pokutut. Baju nantai dikobat'an ko punggukng agatn tali timpu bojalatn damo bonggidi'an. Sia' pan gala' momakai jubah panjakng pakai' molapisi baju sia'. Jubah nantai panjakngnyo singgatn bukuali huatan bolongan panjakng. Pasakng sandal kolai.” Petrus pan molabuhannyo. Molekat nantai bopandir agi', “Pakaicam jubah kolai ongko tuyut aku.”
9Petrus tuyut molekat nantai koluar. Apo io co bopikir aman somuonyo nantai bondar-bondar tojadi. Io monyangko io mondapat poniant'an. 10Sia' bojalatn molalu'i mo pos jago potamo ongko koduo sampai di lawakng bosi inyo monuju ko kota. Lawakng nantai tobuka' siku'nyo. Sia' koluar doi' santai ongko bojalatn sampai ko jalatn bukai. Di santai sopongirap molekat nantai moninggalan io.
11Watu nantai jam, Petrus monjadi sadar la'apo inyo udah tojadi. Katonyo, “Ni'inan aku tohu ni'in bondar-bondar tojadi. Tuhatn Allah udah mongiripm molekat-Nyo ko aku. Sio monyolamant'an aku doi' kuaso Herodes. Herodes honda' mohukupm mati aku. Boko pomimpitn Yahudi pan mongohonda'i hal nantai paca'an tojadi. Apo Tuhatn Allah monyolamant'an aku doi' somuonyo nantai.”
12Jadi, Petrus udah sadar aman Allah bondar-bondar mombebasan io doi' ponjara. Lopas nantai, io botula' ko rumah Maria, indai Yohanes (inyo jam disobut Markus). Di rumah nantai banya' urakng tongahan bokumpul. Sia' ija' bodoa oca' Allah monulukng Petrus di ponjara. 13Timpu nantai, Petrus mongetok lawakng rumah nantai. Polayatn rumah nantai datakng pakai' mongotohu'i sopo inyo ado di muka' lawakng. Damo botina' nantai Rode. 14Watu Rode mohampiki lawakng, io mondinga' saro Petrus. Rode udah konal saronyo. Jadi, io kotakan rindakng. Obai nantai, io bonggidi'an ko dalapm, sampai tongkolupatnnyo pakai' mombuka' lawakng. Io momadahan ko sia' inyo bokumpul. Katonyo, “Petrus ado di muka' lawakng!”
15“Kolai gogilo!” kato sia'. Apo io totap monjajahan aman Petrus bondar-bondar ado di muka' lawakng. Jadi sia' bopandir, “Mungkitn nantai molekatnyo.”#12:15: Allah monugasan boko molekat-Nyo pakai' monulukng boko urakng inyo monjadi umant-Nyo. (Tiat Mazmur 91:11, Matius 18:10 huatan Ibrani 1:14.) Ado boko urakng Yahudi pocayo obai sotiap urakng ado molekat husus pakai' urakng nantai. Molekatnyo ulih monyorupo'i urakng nantai.
16Pontongahan nantai, Petrus ija' hala mongetok lawakng. Ongko ado urakng doi' sia' inyo botula' ko solabakan ongko mombuka' lawakng. Sia' moniant nantai memang bondar-bondar Petrus. Jadi sia' tokonyant. 17Apo Petrus mombori' tando agatn jarinyo oca' sia' langunt holu'ai. Io mongisahan ko sia' sama'an apo caro Tuhatn udah mongoluaran io doi' ponjara. Ongko, io bopandir ko sia', “Padahancam mongona'i hal ni'in ko Yakobus#12:17: Yakobus ni'in ia'an adikngnyo Yesus bukainyo Yakobus anci' Yohanes. ongko boko urakng pocayo inyo bukai.” Lopas nantai, io botula' ko kota bukai.
18Sunsukng hobu'nyo, boko projurit inyo monjago Petrus tontai kotakan kuatir. Sia' kotakan topocongo, sama'an apo caro Petrus ulih koluar doi' ponjara. 19Herodes monyiuh boko projuritnyo pakai' monggoyapi Petrus. Apo co kotomuan sia'. Ongko, Herodes botakutn kapikng godi ko boko projurit inyo monjago ponjara nantai huatan monyiuh boko projurit bukainyo oca' mombunuh sia'. Lopas nantai, Herodes botula' doi' doerah Yudea ongko bodiapm di kota Kaisarea.
Herodes mati
(12:20-23)
20Timpu nantai, Herodes kotakan godi agatn masrakat di kota Tirus huatan Sidon. Apo sia' kotakan pontikng mondapat pomakatn doi' doerah kokuasa'an Rajo Herodes nantai. Obai nantai, boko urakng doi' koduo kota nantai samo-samo bousaha bodamai agatn io. Timpu Herodes ado di kota Kaisarea, sia' mongiripm boko utusan ko su'utn. Sia' boharap oca' ulih mohadap rajo. Ongko, sia' mongkongkanti'i siku' urakng pojabat rajo pakai' bopihak ko sia'. Damonyo Blastus. Io hulutn gapit kulit rajo Herodes. 21Jadi, sia' dapat bantu'an doi' Blastus. Lopas nantai, Herodes monontuan ari pakai' botomu agatn boko utusan nantai.
Pado ari nantai, Herodes momakai jubah husus rajo, dudu' di pucu' tahta rajo, ongko bopodatu ko sia'. 22Sia' somuo bosura' bolahap kapikng bopandir, “Ni'in saro duato, bukai saro monsio!”#12:22: Sia' inyo bokumpul nantai boko urakng doi' kota Tirus huatan Sidon. Mungkitn ado urakng bukai jam di santai. Mungkitn sia' bondar-bondar bopikir Herodes nantai duato. Apo mungkitn jam sia' bayo moncubo monyonangan Herodes oca' io honda' bodamai agi' agatn sia'. 23Herodes monjadi kotakan buhau huatan co mohormati Allah. Obai nantai, lansukng ado molekat doi' Allah inyo bulah io sakit kuat. Porutnyo dipua'i boko cacikng. Co manah lopas nantai, io mati.
Barnabas ongko Saulus diutus pakai' molayati Tuhatn di doerah bukai
(12:24–13:3)
24Mongkitn manah mongkitn banya' urakng inyo mondinga' Kabar Boi' doi' Allah. Mongkitn banya' urakng monjadi pocayo agatn Yesus.
25 Barnabas ongko Saulus udah moonju'an sumbakan ko boko pomimpitn kumpulan urakng pocayo di kota Yerusalem. # 12:25: Tiat Kisah 11:30. Lopas jadi sia' duo monyolosaian polayatan nantai, sia' bobali' doi' Yerusalem ko kota Antiokhia. Sia' mombaba' Yohanes (inyo jam disobut Markus).
Iliyochaguliwa sasa
Kisah Boko Rasul 12: TBDS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia