Genesis 11
11
Nttattha na Babiloni
1Vawaambawaamba athu attheene a va ellapo yavatthi yallota ellotello emoddave. 2Nave yatthaamilliiwa ovenyera wookhuma nndduwa, yaaphiya o ntapo na Babiloni nko yakeraattheyiiwa. 3Vano yahaamba okambirana wi, “Hankoni noope enjerwa nave niddoose phaama.” Sika vano yaaphariha mutteko enjerwannddo voomakani nave yaamaka ni nimphora munipuroni mwa matokwi shisha. 4Vano yaallota wi, “Hankoni niimakelle weekhiihu muzinda ni nttattha noorekama ophiyera oddullu. Neera ddiiddo nineerovuwa wunchichi nave khanimwareyattho va ellapo yavatthi.”
5Vano Apwiya yaakittha wi yoone muzindooyo ni nttattha yamaka athwaayo. 6Sika Apwiya yaallota wi, “Vano athu attheenaalla eri amodda nave enallota ellotello emoddave. Ddeko eneereewanndda tti maambeellello a ddeko enaaweeriiwa muhoollo. Sika alliwaalla ttuuweera erive ello eyo enapaalliiwa. 7Hankoni nikitthelle wenko wi navirikanihe ellotellwiiwa wi ehiiwananeke.” 8Sika Apwiya yahaamwara athwaayo va ellapo yavatthi ettheene nave athwaayo yaahiya omaka muzindooyo. 9Sika muzindooyo waromolliwa wi Babiloni#11.9 Babiloni: Nnddina nenna niniiweya wonanko na Eheberi nno ninattaphullella ottakanyiherana. ekaamba yawi wenko Apwiya yaavirikaniha ellotello ya athu attheene. Nave ovenyera wenko yahaamwara athwaayo va ellapo yavatthi ettheene.
Edduullu dda Shemu
(1 Epi 1.24-27)
10Nna sika ntthopoollo na edduullu ddoovenyera mwa Shemu. Ddiviralle miyakha miilli emanlle echigumula, Shemu ari ni miyakha 100, aamuyara Aripakishadi. 11Vatulli viwa aakhalla ni okumi miyakha ddimodda 500 nave ahaayarattho anamwani amodda aallopwana ni aatthiyana.
12Aripakishadi ari ni miyakha 35, aamuyara Shela. 13Vatulli viwa aakhalla ni okumi miyakha ddimodda 403 nave ahaayarattho anamwani amodda aallopwana ni aatthiyana.
14Shela ari ni miyakha 30, aamuyara Eberi. 15Vatulli viwa aakhalla ni okumi miyakha ddimodda 403 nave ahaayarattho anamwani amodda aallopwana ni aatthiyana.
16Eberi ari ni miyakha 34, aamuyara Pelegi. 17Vatulli viwa aakhalla ni okumi miyakha ddimodda 430 nave ahaayarattho anamwani amodda aallopwana ni aatthiyana.
18Pelegi ari ni miyakha 30, aamuyara Reu. 19Vatulli viwa aakhalla ni okumi miyakha ddimodda 209 nave ahaayarattho anamwani amodda aallopwana ni aatthiyana.
20Reu ari ni miyakha 32, aamuyara Serugi. 21Vatulli viwa aakhalla ni okumi miyakha ddimodda 207 nave ahaayarattho anamwani amodda aallopwana ni aatthiyana.
22Serugi ari ni miyakha 30, aamuyara Nahori. 23Vatulli viwa aakhalla ni okumi miyakha ddimodda 200 nave ahaayarattho anamwani amodda aallopwana ni aatthiyana.
24Nahori ari ni miyakha 29 aamuyara Tera. 25Vatulli viwa aakhalla ni okumi miyakha ddimodda 119 nave ahaayarattho anamwani amodda aallopwana ni aatthiyana.
26Tera ari ni miyakha 70 aamuyara Abramu, Nahori ni Harani.
Edduullu dda Tera
27Nna sika ntthopoollo na edduullu dda Tera. Tera aamuyara Abramu, Nahori ni Harani. Nave Harani aamuyara Loti. 28Haranooyo akhwenlle owaniwa, nipuro na Uri a o Babiloni. Akhwille attiitthinnya eri ni okumi. 29Abramu ni Nahori yaatthella. Abramu amutthellille Sarai nave Nahori amutthellille Milika mwaana a Harani oyottho aari attiitthinnya a Isika. 30Sarai khaarina anamwani kaambiiwa khaayara.
31Vano Tera aamukusa mwanaye Abramu ni edduullwaaye Loti, mwaana a Harani, vamoddattho mvokohaaye Sarai, mwaara Abramu. Aatimulla olendo ovenyera o Uri, o Babiloni oya o ellapo ya Kanani. Koma aaphiya o Harani, nko yakeraattheyeewawo. 32Nave Tera akhwenlle wenko ari ni miyakha 205.
Iliyochaguliwa sasa
Genesis 11: MW2019
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Elhomwe © The Bible Society of Malawi, 2019.