Genesis 44
44
Orimeella wa kapu
1Vatulli viwa Yosefe aamulamula kaporo oowehera enyumbaaye wi, “Oddallihe mathumba a athwaalla ni ddoocha ddinchichi moollikana ni mmo enaaworelliiwa otukhulla. Nave makobiri a arive muthu waahiye owanoni wa nthumba naye. 2Nave owanoni wa nthumba na mung'onong'ono ohiyewo kapwaaka a silivoolle ni makobiraaye ayo apaalleeye omukullella tirigu.” Kaporooyo aheera moollikana ni mmo alamulelliweeye. 3Oyaaka ni osa, athwaalle yahaakhullelliwa orowa ni abulwiiwa. 4Yeetille vang'ono okhuma m'muzindanimmo, Yosefe aamulleella kaporwaaye oowehera ddittheddene dda mpa mwaye wi, “Timulla, waathamakelle athwaalle. Waaphwanya, waakohe wi, ‘Kaambiiwa tini muhokolloselleenyu ddoonanara munipuroni mwa ddaphaama? 5Mumwiiyere tini kapu oowiryellamo apwiyaaka?#44.5: Ottaphullella wakhalle omodda wookhalla ni mawu awi Mumwiiyere tini kapu oowiryellamo apwiyaaka? Eheberi khenna mawu yaalla. Yapaalla woombesa wi edduwelle ddamuhoollo enamupharihesa mutteko kapu yoolla. Mweerilleenyunnddathi tti ddoonanara wunchichi.’ ”
6Kaporoolle aaphwanyille aallota mawu alleelliweeyaalle. 7Alliwaayo yaamwaakhulla wi, “Apwiya, ethiyo munallotella tini mawu wonanko yaalla? Ata naari vang'ono hiyaano khaneera ello yoonanara yawi ddiidda. 8Nyuwaano ni miitthwaanyu mwahoona wi hiyaano voovenyerani o Kanani, naahokollosa makobiri naaphwanyilleehu m'mathumbani mwahu. Ethiyo yawiiyera siliva apaalle golide mpa mwa apwiyaanyu tti tini? 9Vano apwiya oyo mwa hiyaano anaaphwanyeyena kapooyo, iiphiwe nave attheenehi ninaakhalle akaporwaanyu.”
10Sika kaporoolle aallota wi, “Ddikhallelle mwemmo mullotellaanyu. Komathi mmodda variyari vanyumva aphwanyeya ni kapooyo anaakhalle kaporwaaka, amodda attheenenyu muneerottaphulliwa.” 11Vano attheenaayo yaarulla vatthi mwawaakuva mathumbiiwa nave arive muthu aattaphulla nthumba naye. 12Kaporo a Yosefoolle ahaashaasha phaamaddene ovenyera va muullupalli ophiyera va mung'onong'ono nave kapooyo aphwanyeyille munthumbani mwa Benjamini. 13Ekaamba ya ethakaraka, attheenaayo yahaahulla ddoowara ddiwa. Yaamumakellellattho katundwiiwoolle va abulu nave ehokollweella omuzindani wulle.
14Yuda ni asinnaalle ephiyalle o enyumba ya Yosefe, yamuphwanyille ari wenko nave attheene yaamukokhorella vatthi. 15Nave Yosefe aallota wi, “Mweerilleenywiilla tti tini? Ethiyo khamunadduwella wi muthu wonanko miyaano kinnoombesa ddamuhoollo?”
16Sika Yuda aallota wi, “Apwiya, ethiyo hiyaano ttuullota tini wa nyuwaano? Ninaaddaakihere weekhiihu mwawiidde? Apaalle ninaaddeellihe weekhiihu mwawiidde? Mulluku ohuupullulla yoolakwaahu. Vano attheenehi niri akaporwaanyu ohiri mmoddave yoolla aphwanyeyille ni kapoolla munthumbani mwaye.”
17Koma Yosefe aallota wi, “Iyaayi! Miyaano ngiwora weera ddennddo. Yooyove aphwanyeyille ni kapu sika anaakhalle kaporwaaka. Amoddanyu hokollweellani wa attiitthiinyu mwamurendelle.”
Yuda anamupepesella Benjamini
18Sika Yuda ahaatamella wa Yosefe nave allota wi, “Pepaani apwiya, kaakhullelleni mi oorumeyellaanyu wi killote ni nyuwaano. Muhikishelle murima apwiya vawi nyuwaano muri wonanko Farao. 19Apwiya, valle mwaanikoha wi, ‘Ethiyo mookhallana attiitthiinyu apaalle mung'onong'onwaanyu?’ 20Nave hiyaano naawaakhullani wi, ‘Nookhallana attiitthiihu awuulluvalla ni mung'onong'onwaahu oyo ayariwe attiitthiihwaayo yuulluvanlle khalle. Muullupallaaye a musombwe yooyo aakhwa khalle. Sika mu erukullu mwa amennya, ookumi tti yoollave nave attiitthinnya ennamukonda wunchichi.’ 21Apwiya, valle mwaanilleella wi, ‘Mwamuweena wuno wi kimoone.’ 22Hiyaano naawaakhullani wi, ‘Musombooyo khanavenyevo vamiitthoni va attiitthinnya vawi eera ddiiddo, attiitthinnyaayo okhwa onaakhalle wenko. 23Vallethi mwallotille wi khamunaakhullella ophiyera vamiitthoni vanyu naahiwaana mung'onong'onwaahoolla.’
24“Nihokollweelle wa attiitthiihu oorumeyellaanyu, nahaalleella mawu mattheenaalle. 25Vano alliwa yaanilleella wi nihokollweellewo wi naakullelle ddoocha vang'ono. 26Koma hiyaano nahaalleella attiitthiihwaayo wi, ‘Khaniwora oyaawo vawi muthoolle khanaakhullella ophiyera vamiitthoni vaye vaavove mung'onong'onwaahu athaanane ni hiyaano.’ 27Koma attiitthiihu yaallota wi, ‘Munnadduwella wi mwaaraka akiyarenlle anamwani eelli. 28Mmodda mwa anamwanaalla aakihiya khalle. Sika wi aattakhuniwa ni enama ddawoopiha ddamuhakani kaambiiwa nginamoonekettho waambeella vaavo. 29Vano mwakaakhattho olla nave yoonanara yamweereyella, sika miyaano kineerokhwa ni ethakaraka.’ ”
30Yuda aavirellella ollota wi, “Sika kahokollweella wa attiitthaaka, oorumeyellaanyu, ahiivo musomboolla vawi murima wa attiitthaaka ori va olliye, 31yoona wi olliyoolla khaavo, eneerokhwa ni ethakaraka. Sika wi nineerihe tti hiyaano wi attitthaahu ekhalle ni ethakaraka ddookhwana yuulluvanlle. 32Miyaanothi kaavelleella okumaaka wa attiitthaaka wonanko echikole ya okumi wa Benjamini. Kahaalleella wi kaahiihokollweellana wuno ari ni okumi, nyuwaano mukiipe mullatu miyaano mu okumaaka muttheene 33Sika vano apwiya, kinimuuvekani wi miyaano kihalle wuno wi kikhalle kaporwaanyu munipuroni mwa musomboolla. Mwaakhullelleni wi olliyoolla aroweke ni asinnaalla. 34Miyaano kinaawore mwawiidde orowa wa attiitthaaka musomboolla aahithaanana ni miyaano? Miyaano ngiwora ovillella wi koone otulli wawiddiidda waamorellaka attiitthaaka.”
Iliyochaguliwa sasa
Genesis 44: MW2019
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Elhomwe © The Bible Society of Malawi, 2019.