Genesis 45
45
Yosefe anadduupullulla yeekha vamiitthoni va asinne
1 #
Mit 7.13
Vano Yosefe khaaworillettho ovillella vamiitthoni va akaporwaayaalle. Aallota mookhuwa wi attheene ekhume muchipindanimmo. Sika Yosefe ahallillemo yeekha ni asinne aadduupullulla yeekha. 2Ahinlla mookhuwa ophiyera Aiguputo yahiiwa nave epilli ya winllanngu wahiiweyattho o enyumba ya Farao. 3Yosefe ahaalleella asinne wi, “Mi tti Yosefe. Ethiyo attiitthaaka yookhallawove?” Koma asinnaayo yahoova wunchichi vawi kheyaaworille naari omwaakhulla. 4Vano Yosefe ahaalleella wi, “Pepaani, susellani vakhuviru.” Attheene esuserille vakhuviru, Yosefe aallota wi, “Mi tti mwanamunninyu, olle mwamukullihalleenyu o Iguputo. 5Koma vano muhitathille murima apaalle wiishella murima nyookha ekaamba yawi mwaakikulliha vawi Mulluku mwaneena sika akirumihalle khalle wuno wi vawi ddiiddo avulluse okumaanyu. 6Muyakhoolla tti waneepiilli wa miyakha dda ettalla. Koma ddoohalla miyakha mitthanu nave va miyakha ddenndda athu khellimaka apaalle ohata. 7Mulluku aakirumiha khalleve wi kuuvulluseni wi edduullu ddanyu ddinchichi ddikhalle ni okumi. 8Sika khamuhiyo nyuwaano mwakirumihalle wuno iyaayi koma Mulluku. Olliye ookitthattusa enduna yuullupalli ya Farao nave ellapo ettheeneella ya Iguputo eri m'mattani mwaka.
9 #
Mit 7.14
“Vano akuvani, hokollweellani wa attiitthaaka, mwaalleelle wi mwaninyu Yosefe anallota wi, ‘Mulluku ookunnuwiha ophiyera ookitthattusa oolamulella Iguputo muttheene, sika muwe wuno muhiselliwe. 10Ttuuwora okhalla mu echigawo ya Gosheni wi mukaatamelle miyaano. Mukhalle wuno nyuwaano, aniinyu, edduullu ddanyu, enkhosa ddanyu ni epuri ddene, eng'ombe ddanyu ni ddittheddene muriinyuna. 11Mwaakhallaka o Gosheni, miyaano kineerekewuuweherani. Miyakha dda ettalla ddookhallavove mitthanu. Nginapaalla wi nyuwaano muhoowe ni nibanja nanyu ni attheene muriinyuna.’ ”
12Yosefe aavirellella ollota wi, “Vano attheenenyu ni Benjamini, mung'onong'onwaakoolla, ttuuwoona ni miitthwaanyu wi tti miyaano Yosefe kinallota ni nyuwaano. 13Mwaalleelle attiitthaaka wi kinnavahiwa olemu munchichi Iguputo wuno. Mwaalleellettho ddittheddene nnddo muddoonilleenyu. Nave akuvani, muweena wuno attiitthaakaayo.”
14Enre ddiiddo aamukhupaarella Benjamini, mung'onong'onwaayoolle, ahaambattho winlla. Nayeenettho Benjamini ahaamba winlla nngu amukhupaarelle munikohini. 15Vatulli viwa ahaakhupaarella asinne attheenaalle inllaka. Vano asinnaalle yahaamba waarera ni Yosefe.
16Epilleella yiiweyille o enyumba ya Farao wi asinne a Yosefe aawa, Farao ni allupa muttekwaaye attheene yaahakallalla wunchichi. 17Nave Farao aamulleella Yosefe wi, “Waalleelle asinno wi emumakellelle katundu va enama ddiwa nave ehokollweelle o Kanani. 18Vano wenko yaakuse attiitthiiwa ni mabanjiiwa nave ewe wuno. Kineerewuuvahani ellapo ya ethaya yaphaama ya Iguputo nave muneerekoocha ddaphaama dda mwiillaponimmu. 19Waalamulettho wi ekuse magareta a wuno o Iguputo wi awariwa yawellevo ni aniiwa nave attiitthiiwa ewe wuno. 20Ehikhupanye wi eneerohiya eyuuma wenko ekaamba echigawo ya ethaya yaphaama ya o Iguputo wuno enaakhalle yayiwa.”
21Anamwani a Yakobo yaheera ddennddo. Yosefe ahaavaha magareta moollikana ni mmo Farao alamulelleeye nave ahaavaha pooso a voolendoni. 22Aamuvahattho arive muthu ddoowara ddanaanweene koma Benjamini aamwinnya makobiri a siliva 300 ni ddoowara dditthanu dda ehakallallo. 23Nave ahaarumihella attiitthinnya abulu khumi etukhullalle ezipaso ddaphaama dda mu Iguputo ni abulu khumi emutukhullalle tirigu, buledi ni ddoocha ddimodda dda voolendoni dda attiitthinnya. 24Sika ahaarumiha asinnaayo nave vootimullani ahaalleella wi, “Muhinakanganaka muttillammo.”
25Sika yaatimulla ovenyera o Iguputo oya o Kanani wa attiitthiiwa, Yakobo. 26Ephiyalle, yahaalleella attiitthiiwa wi, “Yosefoolle ookhallawo! Tti oomulamulella Iguputo muttheene!” Yakobo murimaaye waatthomowamo vawi khaakhulupililalle ddoollota ddiwannddo.
27Koma emulleelle ddittheddenennddo Yosefe aalleelleeye nave oonille magareta ayo Yosefe arumihalleeye wi olliye awellevo vooyaani o Iguputo, murima wa Yakobo wahaamba ohokollweella m'mapuroni. 28Sika aallota wi, “Ddawoona, mwanaka Yosefe ookhallawo. Kineeroyaawo kamoone kihinakhwe.”
Iliyochaguliwa sasa
Genesis 45: MW2019
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Elhomwe © The Bible Society of Malawi, 2019.