Genesis 9
9
Echipangano ya Mulluku ni Nowa
1 #
Gen 1.28
Mulluku aamudalisa Nowa ni anaayeene voollotani wi, “Muyarane wi mwaate nave muddalle va ellapo yavatthi. 2Enama ddittheddene dda va ellapo yavatthi ni epallame ddene, ddawaapadda ni ddittheddene ddamunyanja ddineerekowoovani. Ddittheddenenndda kooddihiya wi muddilamulelleke. 3Vano mucheke enama ddittheddene, wonanko kawaakhullelleemini ocha matthaapa amakukhu. Kohuuvahani ddittheddenenndda wi ddikhalle yoochaanyu.
4 #
Lev 7.26,27; 17.10-14; 19.26; Deu 12.16,23; 15.23 “Koma ello emoddave muhinaachekeenyu tti enama yookhalla ni nikhame muwari mwiwa. Koovaanyiha ekaamba yawi okumi wa enama onakhalla mu nikhame. 5Arive muthu oomwiipha muthu, aneerewiiphiwa. Erive enama yoomwiipha muthu, eneerewiiphiwa. Arive muthu oomwiipha mukhwaaye, nayeenettho iiphiwe. 6#Eks 20.13; Gen 1.26Arive muthu oomwiipha muthu, nayeenettho aneerewiiphiwa ni muthu vawi muthu aphatusiwe moophwanaphwana ni Mulluku.”
7 #
Gen 1.28
Vano Mulluku aamudalisa Nowa wi, “Muyarane wi mwaate nave muddalle va ellapo yavatthi.”
8Mulluku aamulleella Nowa ni anaaye wi, 9“Vano kinakeraatthiha echipangano ni nyuwaano ni edduullu ddanyu, 10ni ddookumi ddittheddene, epallame, eziweto, enama ddamuhakani ni ddimodda ddittheddene ddakhumalle ni nyuwaano muchomboni. 11Echipanganweeyo tti yawi, ‘Ngiwa koonongattho ddookumi ddittheddene ni echigumula. Kinimallupella wi echigumula khewa yoonongattho ellapo yavatthi.’ ” 12Nave Mulluku aavirellella ollota wi, “Ella sika echizindikiro ya echipangano yoohimalla kinahiyeemi variyari va miyaano ni nyuwaano ni erive yoophatusiwa eri ni nyuwaano, ophiyera o mibado ddamuhoollo. 13Kinahiya mwiisherima m'miraponi wi okhalle echizindikiro ya echipangano variyari va miyaano ni ellapo yavatthi. 14Enthawi ddittheddene mwakhalla mirapo muddullu nave wooneya mwiisherima m'miraponi, 15kineerekewuupuwella echipanganwaaka eyo kakeraatthihalleemi ni nyuwaano ni enama ddittheddene wi echigumula ehiwe yoonongattho ddookumi ddittheddene. 16Mwiisherima wooneya m'miraponi, miyaano kineerewoona nave kineerekewuupuwella echipangano yoohimalla ya variyari va miyaano ni ddookumi ddittheddene ddookhalla va ellapo yavatthi. 17Ella sika echizindikiro ya echipangano eyo kikeraatthihalleemi ni ddookumi ddittheddene dda va ellapo yavatthi.”
Nowa ni anaaye aallopwana
18Anamwani a Nowa ayo akhumalleeyena muchomboni mulle yaari Shemu, Hamu ni Yafeti. Hamu sika aari attiitthinnya a Kanani. 19Anamwani a Nowa araru yaalla sika makhollo a athu a va ellapo yavatthi ettheene.
20Nowa ahaamba ollima nave aari muthu awaamba waalla mpesa. 21Nllapo nimodda olliye amuwiryalle vinyo, aalezela, arulla ddoowara ddaye ddittheddene, akonaatthi epwillimwinddive m'musasani mwaye. 22Hamu, attiitthinnya a Kanani, oonille wi Nowa, attiitthinnya eri epwillimwinddive, ahaalleella asinne eellaalle. 23Koma Shemu ni Yafeti yaakusa yawiikhuneellana eyihiya otulli wiwa, eyitukhullalle vamathurini. Nave yaheeta nintulli yaakhuneella attiitthiiwaayo, miitthwiiwa ewehaka okhwipi ekaamba yawi yaawulliwa muru wi ehoone epwillimwinddi ya attiitthiiwa. 24Nowa avenyilleeye, ahiiwa ddittheddene nnddo mwanaye mung'onong'ono eerilleeye, 25nave aallota wi,
“Atembeleliwe Kanani!
Anaakhalle kaporo a akaporo attheene wa asinne.
26Etitimihiwe Apwiya Mulluku a Shemu,
Kanani akhalle kaporo a Semooyo.
27Mulluku amunnuwihe Yafeti,
edduullu ddaye ddikhallelle nimodda ni edduullu dda Shemu,
nave Kanani anaakhalle kaporo a Yafeti.”#9.27 Yafeti: Nnddina nenna niniiweya wonanko na Eheberi nno ninattaphullella waata.
28Eviralle echigumula, Nowa aakhalla ni okumi miyakha 350 29nave akhwille ari ni miyakha 950.
Iliyochaguliwa sasa
Genesis 9: MW2019
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Elhomwe © The Bible Society of Malawi, 2019.