Malɛkɛ 12
12
Gbelekunnasiiba yonnu ma sana
Matiyu 21.33-46; Luka 20.9-19
1Isa k'ai kalan damina sanalu lɔ, a vɛɛ: «A ka kɛ kɛ́ dɔ le le, min ka lɛzɛn gbele kɛ, k'a laminin jɔsɔ le. A do ka diɲa sen ka kɛ lɛzɛnjibɔya le, ani k'a kunmagbɛn gbalan lɔ. A wɔlinin wo bɛ la, a k'a kalifa gbelekunnasiiba dɔlu la, ka taa jamana gbɛlɛ lɔ. 2Lɛzɛnbɔ waate, a ka aa bɔiden dɔ lataa gbelekunnasiibalu ma, ko ai y'a ta nii di a ma. 3Kɛɛ ai ka wo tii mina k'a gbasi k'a bolokolongbɛ lataa. 4Wo kɛ, gbeletii ka bɔiden gbɛlɛ lataa ai ma kɔtunun. Ai ka wo gbasi a kun nɔ k'a lafeya. 5Wo kɔ, gbeletii ka bɔiden dɔgbɛlɛ lataa ai ma kɔtunun, ai do ka wo faa. Gbeletii ka to bɔiden siyama lataala kelen kelen ne. Ai do k'a dɔlu gbasi, k'a dɔlu faa. 6Mɔɔ kelen min ka to gbeletii bolo, wo tɛɛ a diyanan denkɛ le le. A laban nɔ, a ka wo lataa ai ma, a vɛɛ: ‹Ai kɛtɔ ǹ denkɛ buɲala jɔ.› 7Kɛɛ gbelekunnasiibalu k'a fɔ i ɲɔɔ yɛ, ai vɛɛ: ‹Kɛɛtaba le ve le. Ài m'a faa fɔsa a fa kɛɛ yi kɛ mɔ ta le!› 8Ai do k'a mina, k'a faa, ka ban k'a su fɔnfɔn gbele kɔma.
9«A yi di wo lɔ? Ni gbeletii ka na waate min nɔ, a kɛtɔ mindɛ kɛla? A kɛtɔ nala ka gbelekunnasiibalu halaki, ka ban ka gbele kalifa mɔɔ gbɛlɛlu la. 10Jalasa ài ma kitabu dingila min kalan ba? Ko:
‹Bonlɔbalu n'ai banna kawakulun min nɔ,
wo le kɛnin bon tongun kawakulun ne.
11Mɔ Tii le na wo kɛla,
wo kɛnin mɔ ɲana kawananko le le.› »
12Ai do tɛɛ Isa minako ɲaɲininna, kamasɔlɔn ai k'a ɲaye ko Isa na sana wo lala ailu le ma. Kɛɛ ai tɛɛ siyanna jama ɲa. Wo le k'a kɛ, ai ka Isa to je ka taa.
Niisɔɔn salako
Matiyu 22.15-22; Luka 20.20-26
13Wo kɔ, ai ka Falisilu ni Masakɛ Helodi kɔmɔɔ dɔlu lataa Isa ma, fɔsa a yi kuma bɛnbali dɔ fɔ, min yi kɛ a minako sabu le. 14Ai ka na k'a fɔ Isa yɛ, ai vɛɛ: «Kalanmɔɔ, mɔ k'a lɔn ne tuɲande le i le. Mɔɔ miliya t'i masiyanna, kamasɔlɔn i tɛ mɔɔ bɔla mɔɔ lɔ, mafɔ i yi mɔɔlu kalanna ka bɛn Ala ya siya ma tuɲandeya le boloma. Wo lɔ, i i miliya fɔ mɔ yɛ butu. Ka niisɔɔn sala Lɔmu masakɛba Sezale ma, wo ladaanyine mɔ ma, baa wo ladaannin tɛ? Mɔ ka kan ka wo sala, baa mɔ kà a sala?»
15Kɛɛ Isa tɛɛ ka aiya filangafoya lɔn. Wo lɔ, a vɛɛ: «Mindɛ lɔ ài yi ǹ lɔsumana? Ài yi na wɔligbana dɔ le, ǹ'a lasaa.»
16Ai ka wɔligbana wo kelen don a bolo mingɛ, a vɛɛ ai yɛ: «Jene sawula ni a tɔɔ yi wɔligbana min kɔkan?»
Ai vɛɛ: «Sezale le.»
17Wo fɔ ai bolo, Isa do vɛɛ ai yɛ: «Ni a yi ten ne, ài yi Sezale ta di Sezale ma, ka Ala ta di Ala ma.»
Isa ya javili k'ai kawakoya kosɛvɛ.
Fulenilu lawuliko
Matiyu 22.23-33; Luka 20.27-40
18 #
Kɛkolu 23.8. Sadusi dɔlu ka na Isa ma. Wolu le y'a fɔla ko fulenilu lawuliko tɛ tuɲa le. Ai do ka Isa maɲininga, ai vɛɛ: 19«Kalanmɔɔ, Nabi Musa n'a sɛvɛla mɔ yɛ ko ni kɛ́ dɔ ka sa, a ma den to a kɔ, a dɔɔkɛ le ka kan ka kɛsamoso wo fulu, fɔsa a yi den sɔlɔn a kɔlɔkɛ yɛ. 20A ka kɛ badenmakɛ wolowulan ne le. Kɔlɔmanda ka moso dɔ fulu. A do ka sa, a ma den to a kɔ. 21Wo kɛ, a badenmakɛ filana ka moso wo fulu. Kɛɛ ale fana ka sa, a ma den to a kɔ. Wo suu kelen ka kɛ badenmakɛ sawana la 22haan fɔɔ a wolowulanna. Ai bɛ ka sa, ai ma den to ai kɔ. A laban nɔ, moso fana ka sa. 23A yi di vɛ? Fulenilu Lawulilon, moso wo kɛtɔ a jene ta le badenma wolowulan wolu lɔ? Kamasɔlɔn a n'i siila ai kelenkelenna bɛ kun.»
24Isa k'ai javi, a vɛɛ: «Ài filinin ko min nɔ, kamasɔlɔn ài ma kitabulu kɔlɔ ɲaye, kumatɛ Ala ya foniseleya ma. 25Kamasɔlɔn fulenilu v'i wulila lon min na, kɛ́ tɛnala moso fulula, moso fana tɛnala dila fulu boloma, mafɔ ai bɛ kɛtɔle iwo mɛlɛka minu yi haijɛnɛ. 26Fulenilu lawuliko koni, Nabi Musa na kɔlɔmanjuni taalamaa taliku min sɛvɛla, jalasa ài ma wo kalan ba? Ala k'a fɔ Nabi Musa yɛ, a vɛɛ: ‹Ǹe le Ala le min yi batola Ibulahima ni Isiyaka ani Janguba bolo.› 27Wo kɔlɔ le ko niimalu le Ala batola, fulenilu tɛ. Wo lɔ, ài filinin feu!»
Seliyalu bɛ lɔ bubata
Matiyu 22.34-40; Luka 10.25-26
28Seliya kalanmɔɔ dɔ ka na, ka Sadusilu talan i ɲɔɔ sɔsɔla. A do k'a ye ko Isa vɛ ai javi kobɛn. Wo lɔ, a k'a maɲininga, a vɛɛ: «Seliyalu bɛ lɔ bubata yi mindɛ le?»
29Isa k'a javi, a vɛɛ: «Seliyalu bɛ lɔ bubata le min ne, ko: ‹Àilu Bani Isilankalu, ài y'ài tolomalɔ. Ala yi mɔ Tii le le. Ala kelenpesa le yi je. 30I i Tii Ala kanu i josokun bɛ la, ani i nii bɛ la, ani i miliya bɛ la, ani i fanga bɛ la.› 31A filana le min ne, ko: ‹I i siiɲɔɔ kanu iwo ile gbu.› Ala ya seliyalu bɛ lɔ, a dɔ buɲanin tɛ ka timin seliya fila minu la.» 32Wo fɔ Isa bolo, seliya kalanmɔɔ k'a fɔ a yɛ, a vɛɛ: «Kalanmɔɔ, i na tuɲa le fɔla. I vɛɛ ko Ala kelenpesa le yi je, ko tii o tii tɛ je ale kɔ. I jo yi wo lɔ. 33Ni i ka Ala kanu i josokun bɛ la, ani i miliya bɛ, ani i fanga bɛ, k'i siiɲɔɔ kanu iwo ile gbu, wo le fisayanin ka timin kolofen lakunnin na min vɛ ɲɛnin salakako lɔ, ani salaka tɔlu bɛ.» 34#Luka 10.25-28.Isa k'a ye mingɛ ko seliya kalanmɔɔ na javili kɛla hangilimaya bolo le ma, a vɛɛ a yɛ: «I majaanyanin ba tɛ Ala ya masaya la.»
Wo kɔ, mɔɔ foi m'a wakali ka Isa maɲininga butu.
Dawuda Tii le Masa Tɔɔmasenin ne
Matiyu 22.41-46; Luka 20.41-44
35Isa ka to mɔɔlu kalanna lɔhɔlɔmabonba luu kɔnɔ, a k'ai maɲininga, a vɛɛ: «Mindɛ lɔ seliya kalanmɔɔlu y'a fɔla ko Masa Tɔɔmasenin yi Dawuda bɔzɔn ne le? 36Dawuda gbu ka kuma Nii Sɛnɛyanin sabu la, a vɛɛ:
‹Mɔ Tii n'a fɔla ǹ Tii yɛ, a vɛɛ:
«Na i sii m̀ bolokini fannɔ,
haan fɔɔ m̀'ɛ banna i juulu lala i sen kɔlɔ.» ›
37Ni Dawuda gbu y'a fɔla wo tii ma ko a Tii, wo yi se kɛla a bɔzɔn ne di wo lɔ?» Jama ba tɛɛ ai tolomalɔla a la sawa boloma.
Isa ka seliya kalanmɔɔlu jobaliya teme
Matiyu 23.1-36; Luka 20.45-47
38Isa ka to mɔɔlu kalanna, a vɛɛ: «Ài y'ài jando ài jɛlɛ lɔ ka bɛn seliya kalanmɔɔlu ma! A diyanin ai yɛ k'ai mataama, faani babalu vɛ ai kanna. Ai vɛ taala bala lɔ, a diyanin ai yɛ ko mɔɔlu y'ai fo buɲali boloma. 39Ai do vɛ taala Aladalibon na niwotɛ feetikɛya lɔ, ɲamɔɔ siiyalu le diyanin ai yɛ. 40Ai yi kɛsamosolu bolo latɛla tɛtɛ, ka ban k'ai jɛlɛjiya Aladali kunnɔjaannu fɛ. Wo le kɛtɔ a kɛla, aiya kolatɔn gbeleyatɔle ka timin dɔlu ta la.»
Kɛsamoso ya niilifen
Luka 21.1-4
41Wo kɔ, Isa k'i sii niilifenkesu ɲatelenma lɔ. A do vɛ mɔɔlu ya wɔli diɲa lasaala. Nafolotii siyama tɛɛ wɔli ba bilala a lɔ. 42A do ka kɛsamoso fandanni dɔ fana ye, min ka na ka wɔligbana mɛsɛnni fila bila kesu lɔ. 43Isa k'a kɔbiladennu kili k'a fɔ ai yɛ, a vɛɛ: «Ǹ'i tuɲa fɔ ài yɛ, kɛsamoso fandanni wo vɛ wɔli min bɔ, wo walanin vɛ ai bɛ ta le. 44Kamasɔlɔn ai bɛ n'a dɔni ne bɔla aiya nafolobalu la k'a di. Kɛɛ moso min ni aa bolokolonya bɛ, wɔlini min tɛɛ a bolo a baloko lɔ, a na wo bɛ le dila.»
Iliyochaguliwa sasa
Malɛkɛ 12: MBT2023
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Manya Bible Translation, © SIM International, 2023