Malɛkɛ 11
11
Isa ka don Jelusalɛmu teme
Matiyu 21.1-11; Luka 19.28-40; Yohana 12.12-19
1Isa nu masulunyatɔla Jelusalɛmu la, ai k'i madon Betifase ni Betani sonilu la, Zeituna tini kɔkan. Wo lɔ, a ka aa keladen mɔɔ fila lataa ai ɲa. 2A do vɛɛ ai yɛ: «Soni min yi mɔ ɲa ve, ài yi taa je. Ài vɛ donna so kɔnɔ feeya, ài kɛtɔ sofalini bolan dɔ silinin yena je, mɔɔ m'i sii ba min kɔkan bene. Ài y'a fɔlin ka na a le jan. 3Ni mɔɔ dɔ k'ài maɲininga, ko: ‹Ài yi min kɛla di?›, ài y'a fɔ wo tii yɛ, ko: ‹Mɔ Kuntii le mako y'a la. A kɛtɔ a laseila jona.› »
4Ai do vɛ taala ka sofalini bolan dɔ silinin ye bonnadala siya dafɛ. Ai do k'a fɔlin. 5Mɔɔ minu tɛɛ lɔnin je, wo dɔlu k'ai maɲininga, ai vɛɛ: «Ài yi mindɛ la yi ne? Ài yi sofalini fɔlinna mindɛ lɔ?»
6Keladennu k'ai javi iwo Isa k'a fɔ ai yɛ teme. Wo kɛ, mɔɔ wolu ka sofalini to ai bolo ko ai yi taa a le. 7Wo kɛ, ai ka na sofalini bolan ne Isa fɛ, k'aiya faanibalu lala a kɔkan, ado Isa k'i sii a kɔkan. 8Mɔɔ siyama vɛ aiya faanibalu lɔfɛzɛnna siya kɔkan Isa ɲa. A dɔlu ka kɔlɔman bolo mɛsɛnnilu lɔfɛzɛn siya kɔkan a ɲa, ai tɛɛ vɛ minu tɛɛ sɛnɛlu lɔ. 9Mɔɔ minu tɛɛ a ɲafɛ ani a kɔfɛ, wolu tɛɛ gbanɔla, ai vɛɛ:
«Hozana!
Duwawu yi wo le yɛ min yi nala mɔ Tii tɔɔ lɔ!
10Duwawu yi mɔ bema Dawuda ya masaya yɛ min lankɛnɛmayatɔ!
Tanuli yi kɛ haijɛnɛ dingila kɔlɔtanin nɔ!»
11Ai ka don mingɛ Jelusalɛmu, Isa ka taa lɔhɔlɔmabonba luu kɔnɔ ka ko bɛ lasaa je. Wo kɔ, ale ni aa keladen mɔɔ tan ni fila (12) ka taa Betani, kamasɔlɔn su tɛɛ ko bolo le ma.
Isa ka toloju daan teme
Matiyu 21.18-19
12Wo dusagbɛlon, Isa bɔtɔla Betani, kɔɔn k'a mina. 13A do ka to poon ka toloju dɔ ye min bulu tɛɛ a la. A ka taa k'a lasaa ni a den y'a la. Kɛɛ a ka se toloju kɔlɔ mingɛ, a m'a den ye a la, mafɔ filabulu gbaanzan, kamasɔlɔn a den waate tɛɛ ma se ba bene. 14Wo kɛ, Isa k'a fɔ toloju yɛ, a vɛɛ: «Ile t'i den butu tuun!»
A kɔbiladennu do ka kuma wo mɛn.
Isa ka julalu gbɛn ka bɔ lɔhɔlɔmabonba luu kɔnɔ teme
Matiyu 21.12-17; Luka 19.45-48; Yohana 2.13-22
15Ai senin Jelusalɛmu, Isa ka don lɔhɔlɔmabonba luu kɔnɔ ka julalu ni sannikɛbalu gbɛn damina k'ai labɔ je. A do ka wɔlifalinbalu ya tabalilu labenben, ani bilini julalu ya siifennu. 16A ma diɲa mɔɔ foi yi lɔhɔlɔmabonba luu lɔtimin julayafennu le. 17Wo kɛ a bolo, a k'ai kalan damina, a vɛɛ: «A sɛvɛnin kitabu kɔnɔ ko: ‹Ai kɛtɔ a fɔla ǹa bon ma ko siboloma bɛ ya Aladalibon.› Kɛɛ ài do vɛ je kɛ sonnu doonya le.»
18Salakalase kuntiibalu ni seliya kalanmɔɔlu ka wo mɛn. Ai do tɛɛ Isa faako ɲaɲininna, kɛɛ ai tɛɛ siyanna a ɲa, kamasɔlɔn aa kalan tɛɛ jama kawakoyala.
19Wulada senin, Isa ni a kɔbiladennu ka bɔ so kɔnɔ.
Toloju jako
Matiyu 21.20-22
20Kɛnɛ bɔnin, Isa nu timintɔla, ai ka toloju wo ye, k'a talan a tɛɛ vɛ ja kpan, haan fɔɔ ka se a lilennu ma. 21Piyɛli hangili ka bila Isa ya kuma lɔ. A k'a fɔ a yɛ wo lɔ, a vɛɛ: «Kalanmɔɔ, a ye! I na toloju min daanna, a vɛ ja.»
22Isa k'ai javi, a vɛɛ: «Ài yi limaniya Ala ma. 23#Matiyu 17.20; 1 Kolɛntikalu 13.2.Ǹ'i tuɲa fɔ ài yɛ, ni mɔɔ min k'a fɔ tini min yɛ ko a yi bɔ a nɔ lɔ ka taa a ben kɔɔji lɔ, ni wo tii ma sika a josokun nɔ, mafɔ ka limaniya ko wo yi kɛle iwo a n'a fɔla teme, wo vɛ kɛla, wo yi kɛle a tii yɛ. 24Ǹ'a fɔla ài yɛ wo le lɔ, ài vɛ Ala dalila min na, ài yi limaniya ko ài vɛ ban wo sɔlɔnna, wo do yi kɛle ài yɛ. 25#Matiyu 6.14, 15.I lɔnin vɛ kɛla Ala dalila, ni i hangili ka bila ko, ko dɔ ile ni mɔɔ dɔ wotɛ, wo vɛ kɛla, i yi wo tii makoto, fɔsa i Fa min yi haijɛnɛ, wo fana ile gbu ya hakɛlu lɔkoto.»#11.25 Sɛvɛli kɔlɔ dɔlu ka haya min la a kɔkan: 11.26
Isa ya seetiiya bɔnin min ne?
Matiyu 21.23-27; Luka 20.1-8
27Isa ni a kɔbiladennu ka se Jelusalɛmu kɔtunun. A ka to a mataamana lɔhɔlɔmabonba luu kɔnɔ, salakalase kuntiibalu ni seliya kalanmɔɔlu ni kɛmɔbalu ka na a ma. 28Ai do vɛɛ a yɛ: «I yi ko minu kɛla yi ne, jene n'i lɔla wo la? Jene na seetiiya wo dila i ma?»
29Isa k'ai javi, a vɛɛ: «Ǹe fana y'ài maɲiningala ko kelen na, ài yi ǹ javi. Wo vɛ kɛla, min na seetiiya dila m̀ ma ko minu kɛko lɔ, ǹ kɛtɔ wo fɔla ài yɛ. 30Jene ka seetiiya di Yaya ma makoliko lɔ: Ala le, baa adamadennu? Ài yi ǹ javi.»
31Wo fɔ Isa bolo, ai v'i ɲɔɔ sɔsɔla, ai vɛɛ: «Ni mɔ k'a fɔ ko Ala le, a kɛtɔ a fɔla mɔ yɛ, a vɛɛ: ‹Ni wo le, mindɛ lɔ ài ma la a la?› 32Kɛɛ ni mɔ k'a fɔ adamadennu le, wo tɛ bɛn!» Ai tɛɛ siyanna jama ɲa, kamasɔlɔn mɔɔ bɛ tɛɛ Yaya jatela kela bɛlɛ le le. 33Wo le k'a kɛ, ai ka Isa javi, ai vɛɛ: «Mɔ m'a lɔn.»
Isa do vɛɛ ai yɛ: «Ni wo le, ǹe fana tɛnala a fɔla ài yɛ, min na seetiiya dila m̀ ma ko minu kɛko lɔ.»
Iliyochaguliwa sasa
Malɛkɛ 11: MBT2023
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Manya Bible Translation, © SIM International, 2023