Malɛkɛ 10
10
Fulusako
Matiyu 19.1-12; Luka 16.18
1Isa nu ka bɔ je ka Jude koovi lɔtimin ka se Julidɛn kɔɔ kɔma. Mɔɔ siyama k'ai ladɛn a laminin nɔ kɔtunun. A do vɛ ai kalanna iwo a deinin tɛɛ a kɛla teme.
2A ka to wo la, Falisi dɔlu ka na k'a maɲininga a lɔsumanko lɔ, ai vɛɛ: «A ladaanyine kɛ́ y'a moso bila?»
3Isa k'ai javi, a vɛɛ: «Nabi Musa na jamali mindɛ dila ài ma?»
4 #
Matiyu 5.31. Ai vɛɛ a yɛ: «Nabi Musa na diɲala le, kɛ́ yi fulusa sɛvɛ ladan k'a moso bila.»
5Kɛɛ Isa do vɛɛ a yɛ: «Nabi Musa na jamali wo sɛvɛla ài yɛ ka bɛn àiya josokunja le ma. 6Niwotɛ, dunuɲa dan waate, Ala ka kɛ́ ni moso ladan. 7‹Wo le y'a ma, kɛ́ bɔtɔle a fa ni a ba fɛ, ka ale ni a moso dɛn, 8fɔsa ai mɔɔ fila yi kɛ falikolo kelen ne.› Ai tɛ jatela mɔɔ fila le butu, mafɔ falikolo kelen. 9Wo ma, Ala na minu ladɛnna k'ai kɛ kelen ne, mɔɔ suu suu kà wolu falan i ɲɔɔ ma.»
10Isa nu seikɔnin bon na, a kɔbiladennu k'a maɲininga ko wo ma. 11#Matiyu 5.32; 1 Kolɛntikalu 7.10, 11.Wo lɔ, a vɛɛ ai yɛ: «Ni mɔɔ min k'a moso bila ka moso gbɛlɛ fulu, wo tii vɛ jalonya kɛ. A do vɛ hakɛ ta a moso kunfɔlɔ la. 12Wo boloɲa kelen ma, ni moso min k'i ban a kɛ́ lɔ ka t'i sii kɛ́ gbɛlɛ kun, moso wo vɛ jalonya kɛ.»
Isa ka duwawu kɛ dennilu yɛ teme
Matiyu 19.13-15; Luka 18.15-17
13Mɔɔ dɔlu ka na dennilu le Isa fɛ, fɔsa a a bolo la ai kɔkan ka duwawu kɛ ai yɛ. Kɛɛ a kɔbiladennu ka mɔɔ wolu makuma. 14Wo ye Isa bolo, a josola ka kuna. A do vɛɛ a kɔbiladennu yɛ: «Ài y'a to dennilu yi na m̀ ma. Ài kà ai dansii, kamasɔlɔn mɔɔ minu kɛnin iwo denni, wolu fɛ yi Ala ya masaya la. 15#Matiyu 18.3.Ǹ'i tuɲa fɔ ài yɛ, ni mɔɔ min m'a bolo sii Ala ya masaya kɔlɔ iwo denni, wo tii tɛnala donna a lɔ tuun.» 16Wo kɔ, a ka dennilu ta, k'a bolo la ai kɔkan ka duwawu kɛ ai yɛ.
Kɛ́ nafolotii ya ko
Matiyu 19.16-30; Luka 18.18-30
17Isa ka siya mina mingɛ, kɛ́ dɔ vɛ bɔlila ka na k'i majii a kɔlɔ. A do vɛɛ a yɛ: «Kalanmɔɔ ɲuma, ǹ ka kan ka mindɛ le kɛ fɔsa ǹ'i niimaya banbali sɔlɔn?»
18Isa k'a javi, a vɛɛ: «Mindɛ y'a kɛla vɛ i y'a fɔla m̀ ma ko ‹kalanmɔɔ ɲuma›? Mɔɔ suu suu ɲumayanin tɛ fɔ Ala kelenpesa. 19I ka Ala ya seliyalu lɔn, ko: ‹I kà mɔɔ faa, i kà jalonya kɛ, i kà suɲali kɛ, i kà faɲafɔ seleya di, i kà tɔɲɔli kɛ, ani i i fa ni i ba buɲa.› »
20Kɛ́ do vɛɛ a yɛ: «Kalanmɔɔ, m̀'ɛ seliya wo bɛ labato ka ta ǹ dennintɔ ma.»
21Isa k'i ɲa kaa a lɔ kanundeya boloma k'a fɔ a yɛ, a vɛɛ: «I dɛsɛnin ko kelen na bene. Taa i bolofen bɛ fele k'a wɔli lɔtala bolokolonnu wotɛ. Wo vɛ kɛla, nafolo ba kɛtɔ i bolo haijɛnɛ. Wo kɔ, i yi na, i yi bila ǹ kɔ.» 22Wo fɔ Isa bolo, kɛ́ k'a ɲakɔlɔ sili k'i kɔsei niilafin boloma, kamasɔlɔn a bolofennu walanin tɛɛ bubale.
23Wo kɛnin, Isa k'i ɲa kaa a kɔbiladennu lɔ k'a fɔ ai yɛ, a vɛɛ: «Nafolotii donko gbeleyayine feu haijɛnɛ masaya lɔ!»
24Kuma wo ka kɔbiladennu kawakoya, kɛɛ Isa vɛɛ ai yɛ kɔtunun: «Ǹ dennu, mɔɔ donko gbeleyayine haijɛnɛ masaya lɔ! 25Ka ɲɔɔmɛ latimin sɛɛlan woo la, wo nɔyayine ka timin nafolotii donko la Ala ya masaya lɔ.»
26Ai do ka kawakoya bubale, ka kɛ a fɔle i ɲɔɔ yɛ, ai vɛɛ: «Jene yi se kisila wo lɔ?»
27Wo lɔ, Isa k'i ɲa kaa ai lɔ k'a fɔ ai yɛ, a vɛɛ: «Wo ko tɛ se kɛla adamadennu bolo, kɛɛ ko bɛ yi sene kɛla Ala bolo.»
28Piyɛli do vɛɛ a yɛ: «Ǹu do? Mɔ vɛ ko bɛ to je ka bila i kɔ.»
29Isa k'a fɔ, a vɛɛ: «Ǹ'i tuɲa fɔ ài yɛ, ni mɔɔ min ka aa bon to a kɔ, niwotɛ a badenmalu, niwotɛ a ba, niwotɛ a fa, niwotɛ a dennu, niwotɛ aa sɛnɛlu, ka bɛn ǹe ni Samakan Kein ya ko ma, wo vɛ kɛla, 30wo tii kɛtɔ wolu ɲɔɔzii kɛmɛ (100) le sɔlɔnna dunuɲa min nɔ. A kɛtɔ bonnu sɔlɔnna, ani badenmalu, ani wolobalu, ani dennu, ani sɛnɛlu, ani jangatalu fana. Dunuɲa natɔ lɔ, a kɛtɔ niimaya banbali sɔlɔnna. 31#Matiyu 20.16; Luka 13.30.Kɛɛ ɲafɛmɔɔ siyama kɛtɔ kɔfɛmɔɔ le le, ani kɔfɛmɔɔ siyama kɛtɔ ɲafɛmɔɔ le le.»
Isa ka aa saya ni a wuliko fɔ kɔtunun
Matiyu 20.17-19; Luka 18.31-34
32Ai jɛlɛtɔla Jelusalɛmu, Isa tɛɛ siya ɲa. Aa keladennu ka kawakoya. Ado mɔɔ minu bilanin tɛɛ ai kɔ, wolu tɛɛ siyanna. Isa ka aa keladen mɔɔ tan ni fila (12) ta, ka taa ai le ai ta fan. Ko minu kɛtɔ a masɔlɔnna, a vɛ wo bɛ fɔla ai yɛ, a vɛɛ: 33«Ài y'ài tolomalɔ! Mɔ jɛlɛtɔle Jelusalɛmu. Ai kɛtɔ Mɔɔnivin Tanin donna salakalase kuntiibalu ni seliya kalanmɔɔlu bolo. Wolu kɛtɔ kiti bilala a la a faako lɔ, ani ka a don siboloma gbɛlɛ mɔɔlu bolo, 34fɔsa ai y'a lafeya, k'ai daji bɔn a kan, k'a gbasi gbusan ne, ka ban k'a faa. Kɛɛ tele fila a sawana, a wulitɔ ka bɔ saya lɔ.»
Janguba ni Yohana ka Isa dali teme
Matiyu 20.20-28
35Wo kɔ, Zebede denkɛ fila minu tɛɛ Janguba ni Yohana le, wolu k'i madon Isa la k'a fɔ a yɛ, ai vɛɛ: «Kalanmɔɔ, mɔ vɛ ko min dalila i la, m'a fɛ i yi wo le kɛ mɔ yɛ.»
36Isa vɛɛ ai yɛ: «Ài y'a fɛ ǹ'i mindɛ kɛ ài yɛ?»
37Ai do k'a javi, ai vɛɛ: «I vɛ kɛla iya magbiliyali lɔ lon min na, i yi diɲa ǹu mɔɔ fila ma, a kelen y'i sii i bolokini fannɔ, a tɔ kelen y'i sii i bolonunma fannɔ.»
38 #
Luka 12.50. Kɛɛ Isa do vɛɛ ai yɛ: «Ài m'a lɔn ài yi min dalila ǹ na. Ǹe lamintɔ jiyafɛ min nɔ, ài yi sene ài minna wo lɔ? Ǹ'i makoli min sɔlɔn boloma yi ne, ài yi sene wo kɔlɔ?»
39Ai k'a javi, ai vɛɛ: «Aan, m'i sene.»
Wo fɔ ai bolo, Isa do vɛɛ ai yɛ: «Ǹ lamintɔ jiyafɛ min nɔ, ài lamintɔ jiyafɛ kelen wo le lɔ jɔ, ani ka makoli sɔlɔn iwo ǹe gbu natɔ makoli masɔlɔnna teme. 40Kɛɛ siiya minu yi m̀ bolokini ni m̀ bolonunma fannɔ, wolu diba tɛ ǹe le. Ala na siiya wolu lɔbɛnna mɔɔ minu yɛ, a kɛtɔ ai dila wolu le ma.»
41Dɔ keladen tan ka ko wo mɛn mingɛ, ai ka mɔnɛ Janguba ni Yohana ma. 42#Luka 22.25, 26.Wo le n'a kɛla, Isa k'ai kili k'a fɔ ai yɛ, a vɛɛ: «Ài k'a lɔn ne minu yi jatela siboloma gbɛlɛ masakɛlu le, wolu yi kuntiiya kɛla aiya jamanadennu kunna diyanigbeya boloma, ani aiya ɲamɔɔlu yi fanga lala ai kɔkan. 43#Matiyu 23.11; Malɛkɛ 9.35; Luka 22.26.Kɛɛ a do man kan ka kɛ ten ài tɛma. Mɔɔ min y'a fɛ ka kɛ mɔɔba le ài lɔ, fɔ wo tii yi kɛ àiya bɔiden ne le. 44Min do y'a fɛ ka kɛ ɲamɔɔ le ài lɔ, fɔ wo tii yi kɛ ài bɛ ya jɔn ne le. 45Hali Mɔɔnivin Tanin gbu ma na fɔsa mɔɔlu yi kɛ aa bɔiden ne, mafɔ ale yi kɛ aiya bɔiden ne le, ani ka a nunakili di ka kɛ mɔɔ siyama kunmaka sala le.»
Isa ka Batimeyu ɲa laka teme
Matiyu 20.29-34; Luka 18.35-43
46Wo kɔ, Isa nu ka se Jɛliko so kɔnɔ. Ailu ni jama ba bɔtɔla so kɔnɔ, ɲagbɛ kɛ́ dɔ siinin tɛɛ siya dala je dailila. Ai tɛɛ a fɔla min ma ko Batimeyu, min fa tɔɔ tɛɛ ko Timeyu. 47Batimeyu k'a mɛn mingɛ ko Isa Nazalɛtika le yi timinna, a do vɛ gbanɔla, a vɛɛ: «Isa! Dawuda Bɔzɔn! Hena ǹ na!»
48Mɔɔ siyama v'a makumala ko a yi jeden. Kɛɛ a k'a dɔ la aa gbanɔ kɔkan, a vɛɛ: «Dawuda Bɔzɔn! Hena ǹ na!»
49Isa do k'i lɔ k'a fɔ, a vɛɛ: «Ài y'a kili.»
Ai do ka ɲagbɛ kili, ai vɛɛ: «I lɔja, i wuli. Isa y'i kilila.»
50Kɛ́ do ka aa faaniba lafili, k'i gban k'i lɔ, ka sangba Isa ma.
51Wo kɛ, Isa k'a maɲininga, a vɛɛ: «I y'a fɛ ǹ'i mindɛ kɛ i yɛ?»
A do ka Isa javi, a vɛɛ: «Kalanmɔɔ, ǹ'a fɛ ǹ ɲa la yi ka.»
52Isa do vɛɛ a yɛ: «Taa vɛ. Ka bɛn iya limaniya ma, i vɛ kɛnɛya.»
A ɲa la ka ka telemanin. A do vɛ bilala Isa kɔ siya la.
Iliyochaguliwa sasa
Malɛkɛ 10: MBT2023
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Manya Bible Translation, © SIM International, 2023